OBUHEEREZA bwaitu ni bukuru kandi n’obw’omuhendo. Kwonka ti buri omwe ou turikubuurira ngu naayetegyereza eki. N’obu abantu baraabe nibakunda obutumwa bw’omu Baibuli, tikirikumanyisa ngu butoosha nibaba nibenda ngu tubeegyese Baibuli.

Okwo nikwo Gavin yaabaire ari, ahakuba akatandika kwija omu nteerane, kwonka akanga kwegyesibwa Baibuli. Naagira ati: “Nkaba ntarikumanya munonga Ebyahandiikirwe, kandi nkaba ntarikwenda kworeka obushema bwangye. Nkaba ninyegyendesereza ntarikwenda kubeihwa, kandi nkaba nintiina obujunaanizibwa bw’okwega.” Nooteekateeka ki? Mbwenu shi Gavin akaba atarikubaasa kwetegyereza Baibuli? Ngaaha! Yetegyereze oku enyegyesa za Baibuli zirikubaasa kuhwera omuntu. Yehova akagambira abaheereza be aba ira ati: “Ebigambo byangye bitonde nk’orume, nk’orutoonyerera aha bunyaatsi.” (Bir. 31:19, 30; 32:2) Nk’oku orume rurikuhwera ebimera, naitwe nitubaasa kuhwera abantu b’emiringo yoona omu buheereza bwaitu.​—1 Tim. 2:3, 4.

Orume nirubobeeza. Orume nirutonda mporampora kuruga omu rwoya reero rurigamu amatondo g’amaizi. Ebigambo bya Yehova bikaba ‘nibitonda nk’orume’ ekirikumanyisa ngu akaba abigambira abaheereza be omu muringo gw’embabazi, mporampora, kandi arikubafaho. Nitumutooreza twayoreka ngu nituha ekitiinisa omuntu ahabw’emiteekateekyere ye. Nituhiga abantu kuteekateeka reero bakeecweramu eki barikwenda. Twafayo aha bantu omu muringo nk’ogwo, nibabaasa kwikiriza ebigambo byaitu kandi obuheereza bwaitu nibuba burungi.

Orume nirugarura busya. Obuheereza bwaitu nibugarura abantu busya twateekateeka aha muringo murungi gw’okubareetera kukunda amazima. Gavin, owaaba yaagambirweho taragyemesereziibwe kwikiriza kwega Baibuli. Omu mwanya gw’ekyo, ow’eishe-emwe Chris owaabandize kugamba nawe akakoresa emiringo mingi kureetera Gavin kwenda kugaaniira ahari Baibuli. Chris akashoboororera Gavin ngu Baibuli eine omutwe mukuru kandi ngu ekyo nikiija kumuhwera gye kwetegyereza ezi yaabaire naazamu. Ekindi, Chris akooreka ngu obunabi bwa Baibuli nibwo bwamureeteire kuhamya ngu Baibuli ehikire. Eki kikabareetera kugaaniira munonga aha kuhikiirira kw’obunabi. Okugaaniira oku kukagaruramu Gavin amaani yaarugaho yaikiriza kwega Baibuli.

Orume niruha amagara. Omu Israeli nihakira kugira omushana mwingi, kandi hooma ahabw’okugira ngu enjura neemara ameezi maingi etagwire. Haaba hatabaireho rume, ebimera nibihoonga kandi bifa. Obunaku obu hariho ekyanda ky’eby’omwoyo, nk’oku Yehova yaagambire. (Amo. 8:11) Akaraganisa ngu ababuurizi abashukirweho amajuta bakaba nibaija kuba “nk’orume orurugire ahari” Yehova baaba nibabuurira amakuru g’Obukama, barikushagikwa ‘ab’entaama ezindi.’ (Mik. 5:7; Yoh. 10:16) Mbwenu shi nitutwara amakuru g’Obukama nk’ag’omuhendo turikugareeba nk’agarikuruga ahari Yehova kuhwera abantu kutunga amagara?

Orume n’omugisha kuruga ahari Yehova. (Kut. 27:28) Obuheereza bwaitu nibubaasa kuba omugisha ahari abo abarikusiima. Gavin akatunga omugisha nk’ogwo. Kurabira omu kwega Baibuli, akatunga eby’okugarukamu by’ebibuuzo bye. Akarahuka kutunguuka kuhika aha kubatizibwa, kandi hati we n’omukazi we Joyce, bari hamwe omu buheereza obw’obutwire barikubuurira amakuru marungi g’Obukama.

Kandi okuteekateeka aha rume nikubaasa kutuhiga kutwara okwejumba kwaitu omu kubuurira nka kikuru. Mu muringo ki? Eitondo rimwe ry’amaizi nirireebeka nk’eritari ry’omugasho. Kwonka ku garikwegaita hamwe gakaba maingi munonga nigabobeeza ensi. Nikyo kimwe n’okwejumba kwaitu omu kubuurira, nikubaasa kureebeka nka kukye. Kwonka, Abajurizi ba Yehova boona hamwe ku barikwejumba omu kubuurira, nibaha “eky’okuhamya aha mahanga goona.” (Mat. 24:14) Mbwenu shi obuheereza bwaitu kuruga ahari Yehova nibwija kuba omugisha aha bandi? Nibwija kuba butyo, obutumwa obu turikubuurira bwaba buri nk’orume, burikubobeeza, burikugarura busya, kandi burikuha amagara!