1. Nitwegyera ki aha bigambo by’Omugabe Sulemaani ebiri omu Omubuurizi 7:20?

 OMUGABE Sulemaani akahandiika ati: “Tihariho ohikiriire omu nsi okora gye atashiishe na kakye.” (Mub. 7:20) Ekyo ka kihikire! Twena nitushiisha. (1 Yoh. 1:8) N’ahabw’ekyo twena nituba nitwenda ngu Ruhanga n’abantu bagyenzi baitu batusaasire.

2. Nooyehurira ota munywani waawe ow’aha mara yaakusaasira?

² Obundi noijuka obu waashagiza munywani waawe ow’aha mara. N’ahabw’ekyo kubaasa kugonjoora enshonga kandi okagaruraho omukago gwawe nawe, okacwamu kumushaba okusaasirwa. Okeehurira ota ku yaakusaasiire atataireho bushonshorekye? Okatunga oburuhuuko. Eego, kandi okashemererwa!

3. Nituza kuta omutima ahari ki omu kicweka eki?

³ Nitwenda ngu Yehova abe munywani waitu, kwonka obumwe nitumugwisa kubi omu bigambo byaitu n’ebikorwa. Kwonka shi ahabw’enki turikubaasa kuhamya ngu Yehova naaba ayeteekateekire kutusaasira? Okusaasira kwa Yehova nikutaana kuta aha kusaasira kw’abantu? Kandi, ni baahi abu Ruhanga arikusaasira?

4. Ahabw’enki turikubaasa kuhamya ngu Yehova naaba ayeteekateekire kutusaasira?

⁴ Ekigambo kya Ruhanga nikituhamiza ngu Yehova naaba ayeteekateekire kutusaasira. Obu Yehova yaayemanyisa Musa  aha Rushozi Sinai, kurabira omuri maraika akagira ati: ‘[Yehova, Yehova], Ruhanga ow’okusaasira n’embabazi, otarikurahuka kugira ekiniga, oijwire [rukundo etarikuhinduka] n’amazima, orikugirira abantu embabazi enkumi n’enkumi, orikusaasira okutahikiirira n’okushiisha n’ekibi.’ (Kur. 34:6, 7) Yehova ni Ruhanga oine embabazi n’esaasi, butoosha orikuba ayeteekateekire kusaasira abasiisi abarikweteisa.—Neh. 9:17; Zab. 86:15.

5. Kurugiirira ahari Zaaburi 103:13, 14, Yehova okumanya gye abantu nikumureetera kukora ki?

⁵ Ahabw’okugira ngu Yehova n’Omuhangi waitu, naamanya buri kimwe ekirikutukwataho. Kiteekateekyeho! Naamanya byona ebirikukwata aha buri muntu omu nsi. (Zab. 139:15-17) N’ahabw’ekyo naabaasa kureeba obutahikiirira bwona obu twahungwire aha bazaire baitu. Kandi, naamanya byona ebirikutureetera kutwaza nk’oku turikutwaza. Yehova okumanya gye abantu nikumureetera kukora ki? Nikumuhiga kutusaasira.—Zab. 78:39; shoma Zaaburi 103:13, 14.

6. Yehova akakora ki kutuhamiza ngu ayeteekateekire kutusaasira?

⁶ Yehova naatuhamiza ngu naaba ayeteekateekire kusaasira. Naamanya ngu ebikorwa by’omuntu w’okubanza Adamu, bikatureetera kugibwaho omukyeeno gw’ekibi n’okufa. (Rom. 5:12) Tukaba tutarikubaasa kwecungura nari kucungura ondiijo muntu weena omu mukyeeno ogwo. (Zab. 49:7-9) Kwonka, Ruhanga waitu owa rukundo akatugirira embabazi yaatuteeraho entebeekanisa y’okutucungura. Akakora ki? Nk’oku kirikworekwa omuri Yohaana 3:16, Yehova akoohereza Omwana we omwe nyamunegyere kutufeera. (Mat. 20:28; Rom. 5:19) Yesu akabonabonesibwa kandi yaitwa ahabwaitu kugira ngu omuntu weena orikumwikiririzamu acungurwe. (Heb. 2:9) Yehova ka aine kuba yaagizire obusaasi ku yaareebire Omwana we omukundwa naitwa omu muringo gw’obusaasi kandi ogurikuhemurana! Buzima, Yehova akaba atarikwija kwikiriza Omwana kufa ku ogire ngu akaba atarikwenda kutusaasira.

7. Ni baahi abarikugambwaho omu Baibuli abu Yehova yaasaasiriire kimwe?

⁷ Baibuli neegamba ahari bamwe abu Yehova yaasaasiire. (Efe. 4:32) N’oha ou orikwijuka? Obundi waateekateeka aha  Mugabe Manaase. Omushaija mubi ogwo akacumura munonga ahari Yehova. Akatandikaho okuramya kw’ebishuba. Akaita abaana be, arikubahongyera baaruhanga abakaafiire. Nangwa akahika n’aha kuta ekishushani kya ruhanga w’ebishuba omu hekalu ya Yehova erikwera. Baibuli neegamba aha mugabe ogwo eti: ‘Akakora ebibi bingi omu maisho ga [Yehova], kumugwisa kubi.’ (2 Bus. 33:2-7) Kwonka Manaase ku yaayorekire ngu ayeteisize kuruga aha mutima, Yehova akamusaasira atataireho bushonshorekye. Nangwa akagaruka yaaba omugabe. (2 Bus. 33:12, 13) Obundi noobaasa kuba waateekateeka n’aha Mugabe Daudi, owaakozire ebibi by’amaani omu maisho ga Yehova, otwariremu obushambani n’okwita. Kwonka, Daudi ku yaayeteisize kuruga aha mutima kandi akaikiriza n’enshobe ze, Yehova akamusaasira. (2 Sam. 12:9, 10, 13, 14) Eego, titwine kubangaanisa kwona ngu Yehova naaba ayeteekateekire kutusaasira. Kandi, nk’oku turikuza kureeba, okusaasira kwe n’okw’omutaano waakugyeragyeranisa n’okw’abantu.

8. Yehova okuba Omuramuzi w’omutaano nikikwata kita aha kusaasira kwe?

⁸ Yehova niwe ‘mucwi w’emanja z’ensi yoona.’ (Kut. 18:25) Omuramuzi murungi aine kuba naamanya gye ebiragiro. Kandi buzima Yehova naayetegyereza gye ebiragiro, ahakuba niwe yaabituhaire. (Isa. 33:22) Tihariho orikumanya gye ekihikire n’ekigwire nka Yehova. Niki ekindi ekirikutwarirwa omu kuba omuramuzi murungi? Aine kuba naabaasa kwetegyereza byona ebirikukwata aha nshonga atakacwiremu. N’ahabw’ekyo, Yehova niwe ahikire kuba Omuramuzi.

9. Yehova naihirira aha bintu ki kucwamu yaaba araasaasire omuntu?

⁹ Okutaana aha baramuzi ab’omu nsi, Yehova we naamanya byona ebirikukwata aha buri rubanja oru arikucwa. (Kut. 18:20, 21; Zab. 90:8) Naareeba ekirikukira ahari ekyo eki abantu barikureeba nari barikuhurira. Naayetegyereza oku omuntu arikukwatwaho akarande, oku yaakuziibwe, omwanya ogu yaakuriiremu, enyehurira ze, n’oku obwongo bwe burikukora. Kandi Yehova naareeba ebiri omu mutima. Naamanya gye ekirikuhiga buri muntu kukora ebintu, ebigyendererwa bye, n’ebyetengo bye. Tihariho ekirikubaasa kusherekwa Yehova. (Heb. 4:13) N’ahabw’ekyo, butoosha okusaasira kwa Yehova nikwegamira aha kwetegyereza gye embeera.

10. Ahabw’enki turikubaasa kugira ngu okucwamu kwa Yehova butoosha n’okw’oburingaaniza kandi okw’oburyo? (Eky’Ebiragiro 32:4.)

¹⁰ Butoosha Yehova naacwa emanja omu muringo gw’oburingaaniza kandi ogw’oburyo. Tarikushoroora na kakye. Tarikusaasira omuntu arikwihirira aha ndeebeka ye, obugaiga bwe, okurangaanwa kwe, nari okubaasa kwe. (1 Sam. 16:7; Yak. 2:1-4) Tihaine orikubaasa kugyemesereza Yehova nari kumuha ekituga. (2 Bus. 19:7) Tarikucwamu arikwihirira aha nyehurira nari ahabw’okugira ngu atamirwe. (Kur. 34:7) Hatariho kubangaanisa, okwetegyereza kwa Yehova, n’obwengye bwe nibimureetera kuba omuramuzi orikukirayo.—Shoma Eky’Ebiragiro 32:4.

11. Okusaasira kwa Yehova n’okw’omutaano mu muringo ki?

¹¹ Abaahandiikire Ebyahandiikirwe eby’Oruheburaayo bakeetegyereza ngu okusaasira kwa Yehova n’okw’omutaano. Kurugiirira aha kucondooza kumwe, bakakoresa ekigambo ky’Oruheburaayo okukira munonga ekirikumanyisa  “Ruhanga okusaasira omusiisi, beitu kutari kusaasira kw’omuntu arikusaasira mugyenzi we.” Yehova niwe wenka orikubaasa kusaasirira kimwe omusiisi oyeteisize. Nitugasirwa tuta Yehova yaatusaasira?

12-13. (a) Omuntu naagasirwa ata Yehova yaamusaasira? (b) Ebirungi ebirikuruga omu kusaasira kwa Yehova nibigumaho kuhitsya ryari?

¹² Twaikiriza ngu Yehova atusaasiire, ‘nitugarurwa busya’ otwariiremu obusingye bw’omu biteekateeko, n’omutima ogutarikweshinja. Kandi okusaasirwa nk’okwo tikurikuruga aha bantu kureka nikuruga ahari Yehova. (Byak. 3:19) Yehova ku arikutusaasira, naagaruka agira naitwe omukago murungi oshusha oti titukashiishahoga.

¹³ Yehova yaatusaasira, tarikugaruka kutucwera orubanja nari kutufubira ahabw’ekibi eki twakozire. (Isa. 43:25; Yer. 31:34.) Ebibi byaitu Yehova naabita hare munonga “nk’oburugwa-izooba oku eri hare n’oburengyerwa-izooba.” * (Zab. 103:12) Twateekateeka oku Yehova arikusaasira munonga atyo, nikitureetera kumusiima n’okutangaara. (Zab. 130:4) Kwonka ni baahi abu Yehova arikusaasira?

14. Twaheza kwega ki aha bikwatiraine n’okusaasira kwa Yehova?

¹⁴ Nk’oku twaheza kureeba, Yehova tarikucwamu kusaasira arikwihirira aha ku ekibi kirikwingana. Kandi, twayega ngu Yehova naakoresa okumanya kwe nk’Omuhangi waitu, Omunyabiragiro, kandi Omuramuzi omu kucwamu yaaba araasaasire omuntu. Ni nshonga ki ezi Yehova arikuteekateekaho?

15. Kurugiirira ahari Luka 12:47, 48, ni nshonga ki ei Yehova arikuteekateekaho?

¹⁵ Enshonga emwe ei Yehova arikuteekateekaho ni yaaba omusiisi akozire ekibi akigyendereire. Eki Yesu akakyoreka gye omu Luka 12:47, 48. (Kishome.) Omuntu orikukora ebintu nkana ebirikugwisa kubi Yehova, naaba akozire ekibi ky’amaani. Omuntu nk’ogwo naaba ari omu kabi k’okutasaasirwa. (Mak. 3:29; Yoh. 9:41) Kwonka twine kwebeera ab’amazima ngu obumwe nitukora eki turikumanya ngu kigwire. Ekyo shi kyabaho, hariho amatsiko goona? Eego! Ka tushwijume  enshonga endiijo ei Yehova arikuteekateekaho atakacwiremu kusaasira omuntu.

16. Okweteisa niki, kandi ahabw’enki ni kukuru Yehova yaaba ari ow’okutusaasira?

¹⁶ Enshonga endiijo ei Yehova arikuteekateekaho ni yaaba omusiisi ayeteisize kuruga aha mutima. Okweteisa nikimanyisa ki? Nikimanyisa “omuntu okuhindura ebiteekateeko bye, emiteekateekyere, nari ekigyendererwa kye.” Nikutwariramu okwefuuza n’okugira obusaasi bwingi ahabw’ebintu bibi ebi akozire nari ahabw’okuremwa kukora ebihikire ebi abaire ashemereire kukora. Omuntu oyeteisize tarikwehurira kubi ahabw’ebibi ebi akozire kyonka, beitu n’ahabw’embeera mbi y’eby’omwoyo emureeteire kukora ebibi ebyo. Ijuka ngu Omugabe Manaase n’Omugabe Daudi bombi bakakora ebibi by’amaani, kwonka Yehova akabasaasira ahabw’okugira ngu bakaba beeteisize kuruga aha mutima. (1 Bag. 14:8) Eego, Yehova aine kureeba obuhame ngu omuntu ayeteisize kubaasa kumusaasira. Kwonka tikirikumara omuntu kwehurira kubi ahabw’okushiisha kwe, nari ahabw’ekibi eki akozire. Aine kuba ayeteekateekire kugira eki yaakora. * Eki nikitutwara aha nshonga endiijo ei Yehova arikwihiriraho kusaasira.

17. Okuhinduka niki, kandi ahabw’enki twine kuhinduka twaba turi ab’okwetantara kugaruka kukora ebibi? (Isaaya 55:7)

¹⁷ Okuhinduka n’enshonga endiijo ei Yehova arikuteekateekaho. Okuhinduka nikimanyisa okurekyera kimwe omuhanda okatoora ogundi. Ekirikumanyisa ngu omuntu naaba aine kuhindura omuhanda gwe arikureka ebikorwa bibi, reero akagyendera omu muhanda gwa Yehova. (Shoma Isaaya 55:7.) Omuntu naaba aine kuhindura busya ebiteekateeko bye kugira ngu ayebemberwe emiteekateekyere ya Yehova. (Rom. 12:2; Efe. 4:23) Naaba aine kumariirira kureka enyima emitwarize ye mibi n’ebikorwa bye. (Kol. 3:7-10) Nangwa, okwikiririza omu kitambo kya Kristo nikwo Yehova arikwihiriraho kutusaasira n’okutwozyaho ekibi. Yehova naija kwihirira aha muhendo gw’ekitambo ekyo kutusaasira,  yaareeba nituteeraho kuhindura emitwarize yaitu.—1 Yoh. 1:7.

18. Twayega ki aha bikwatiraine n’okusaasira kwa Yehova?

¹⁸ Ka tweyijutsye omu bugufu zimwe aha nshonga nkuru ezi twaheza kushwijuma. Yehova niwe arikukirayo kusaasira omu nsi n’omu iguru. Ahabw’enki nitugira tutyo? Eky’okubanza, butoosha naaba ayeteekateekire kusaasira. Ekya kabiri, naamanya byona ebirikutukwataho. Naamanya gye obuhangwa bwaitu, n’ahabw’ekyo niwe arikubaasa kumanya gye yaaba tweteisiize kimwe. Kandi ekya kashatu, Yehova ku arikutusaasira naaba ari nk’owaasangurira kimwe ebibi byaitu. Eki nikituhwera kuteeshinja n’okusiimwa Yehova.

19. N’obu turaabe tutahikiriire kandi turikugumizamu nitushiisha, ahabw’enki turikubaasa kushemererwa?

¹⁹ Amazima gari ngu, obu tukiri abatahikiriire, nitwija kugumizamu nitushiisha. Kwonka, nitubaasa kuhuumuzibwa ebigambo ebiri omu kitabo Insight on the Scriptures, ekya 2, orupapura 771, ebi: “Obu Yehova arikugirira embabazi abaheereza be ahabw’obweremwa bwabo, tibaine kuguma omu mbeera y’okwefuuza ahabw’enshobe ezirikureetwaho obutahikiirira obu baahungwire. (Zab. 103:8-14; 130:3) Baateeraho nk’oku barikubaasa kugyendera omu mihanda ya Ruhanga, nibabaasa kushemererwa. (Fil. 4:4-6; 1 Yoh. 3:19-22).” Buzima ekiteekateeko eki ka nikigaruramu amaani!

20. Nituza kushwijuma ki omu kicweka ekirikukurataho?

²⁰ Nikishemeza kumanya ngu Yehova naaba ayeteekateekire kutusaasira ebibi byaitu twayeteisiza kimwe ebibi byaitu. Kwonka, nitubaasa kutooreza tuta Yehova omu kusaasira abandi? Oku abantu barikusaasira nikushushana kuta n’oku Yehova arikusaasira, kandi nikutaana kuta? Ahabw’enki ni kikuru kumanya entaaniso egyo? Ekicweka ekirikukurataho nikiza kugarukamu ebibuuzo ebyo.