1, 2. (a) Abantu b’amahanga agandi nibatunga buremeezi ki obunaku obu? (Reeba ekishushani aha kutandika.) (b) Entumwa Paulo akatwijutsya ki, kandi eki nikireetaho bibuuzo ki?

EMYAKA erengire 30 enyima, Osei, ^[1] owaabaire atari Mujurizi wa Yehova obwire obwo, akaruga Ghana yaaza omuri Europe. Naagira ati: “Nketegyereza ngu abantu abarikukira obwingi bakaba batarikunfaho. Embeera y’obwire nayo ekaba neetangaaza. Ku naarugire aha kishaayi ky’enyonyi, nkahurira naagira embeho nyingi omurundi gw’okubanza, reero naatandika kurira.” Ahabw’okugira ngu Osei akaba atarikumanya orurimi, akamara obwire oburengire aha mwaka gumwe ataine murimo murungi. Kandi ahabw’okuba hare n’eka ye, akagira eihamba.

² Teekateeka aha ku waakubaire nooyenda ngu abandi bakutwarize waaba ori omu mbeera nk’egyo. Mbwenu shi ti waakubaire nooyenda ngu abandi bakwakiire gye waahika aha Kyombeko ky’Obukama oyihireho eihanga ryawe nari erangi yaawe? Baibuli neehiga Abakristaayo eti: “Mutarireka kukunira abagyenyi.”  (Heb. 13:2) N’ahabw’ekyo, ka tushwijume ebibuuzo ebi: Yehova naareeba ata ab’eihanga erindi? Ahabw’enki nikibaasa kutwetengyesa kuhindura aha miteekateekyere ei twine aha b’amahanga agandi? Kandi nitubaasa kuhwera tuta abarikuruga omu ihanga erindi kuhurira baikaikaine omu kibiina kyaitu?

3, 4. Kurugiirira aha Okuruga 23:9, abaheereza ba Yehova aba ira bakaba baine kutwariza bata abanyamahanga, kandi ahabw’enki?

³ Bwanyima ya Yehova kucungura abaheereza be kuruga Misri, akabaha ebiragiro ebyabaire nibyoreka ngu baine kutwariza gye abanyamahanga abaabaire babeegaitsireho. (Kur. 12:38, 49; 22:21) Ahabw’okugira ngu abanyamahanga bakaba bari enshoberwa, Yehova akabateeraho entebeekanisa y’okutunga eby’okubabaisaho. Entebeekanisa emwe ei yaabateereireho, n’okubaikiriza kuhumba eby’okurya omu misiri y’Abaisraeli.​—Lev. 19:9, 10.

⁴ Yehova omu mwanya gw’okugyema Abaisraeli kuha abanyamahanga ekitiinisa, akabahiga kubagirira embabazi. (Shoma Okuruga 23:9.) N’obu Abaheburaayo baabaire batakabaire bahuuku, bakaba nibangwa Abanyamisri abaabaire baine amaryo kandi barikushoroora omu diini. (Kut. 43:32; 46:34; Kur. 1:11-14) Abaisraeli bakaba baherize kutwarizibwa kubi nk’abanyamahanga, n’ahabw’ekyo Yehova akaba naayenda ngu baijukye ekyo, reero batwarize abanyamahanga “nk’enzaarwa” omuribo.​—Lev. 19:33, 34.

5. Niki ekiraatuhwere kureeba ab’eihanga erindi nk’oku Yehova arikubareeba?

⁵ Obunaku obu, nitubaasa kuhamya ngu Yehova naafayo munonga aha bantu ab’amahanga agandi abarikwija omu nteerane omu bibiina byaitu. (Bir. 10:17-19; Mal. 3:5, 6) Twateekateeka aha buremeezi obu barikutunga, nk’okubashoroora nari okutamanya rurimi, nitwija kuteeraho kubagirira embabazi n’okubafaho.​—1 Pet. 3:8.

6, 7. Niki ekirikworeka ngu Abakristaayo omu kyasha ky’okubanza bakeihamu omuze gw’okushoroora abandi?

⁶ Abakristaayo omu kyasha ky’okubanza bakateeraho kusingura omuze gw’okushoroora abandi. Aha Pentekoote 33 Y.A., abaabaire nibatuura omuri Yerusaalemu bakaba efura ahari abo abaabaire bahindukire Abakristaayo abasya kuruga omu mahanga agandi. (Byak. 2:5, 44-47) Rukundo ei Abakristaayo Abayudaaya baagiriire abaikiriza bagyenzi baabo kuruga omu mahanga agandi ekooreka ngu bakaba nibeetegyereza amakuru g’ekigambo “okukunira,” ekirikumanyisa ‘okugirira abagyenyi embabazi.’

⁷ Ekibiina Ekikristaayo eky’omu kyasha ky’okubanza ku kyakuzire, abamwe bakatandika kushoroora abandi. Abayudaaya abaabaire nibagamba Orugriika bakeetomboita ngu abafaakazi baabo bakaba batarikutwarizibwa gye. (Byak. 6:1) Kubaasa kumaraho oburemeezi obwo, entumwa bakatoorana abashaija mushanju kuhamya ngu tihaine owaahugwaho. Abashaija abo boona bakaba baine amaziina g’Orugriika, ekirikumanyisa ngu entumwa bakaba nibenda kumaraho omuze gw’okushoroora abaihanga erindi ogwabaire guriho omu kyasha ky’okubanza.​—Byak. 6:2-6.

8, 9. (a) Niki ekirikubaasa kworeka ngu nitushoroora abandi nari nitwetunguura aha b’eihanga erindi? (b) Niki eki twine kwiha omu mitima yaitu? (1 Pet. 1:22)

⁸ Yaaba nitukimanya nari tutarikukimanya, ahu twakuriire nihatukwataho munonga. (Rom. 12:2) Buzima, nitukira kuhurira abataahi, abu turikukora nabo, nari abeegi bagyenzi baitu nibagamba kubi aha bantu  b’eihanga erindi, ab’oruganda orundi, nari ab’erangi endiijo. Mbwenu shi emiteekateekyere mibi nk’egyo neetukwataho eta? Kandi nitutwaza tuta haagira owaagamba kubi aha ihanga ryaitu, obundi arikukwongyeramu ebitahikire aha ntwaza y’eihanga ryaitu?

⁹ Kumara obwire bukye, entumwa Petero akaba naashoroora abatari Bayudaaya, kwonka mporampora akeega kwiha ebiteekateeko nk’ebyo omu mutima gwe. (Byak. 10:28, 34, 35; Gal. 2:11-14) Naitwe, twareeba omuze gw’okushoroora abandi nari gw’okugira amaryo, twine kuteeraho kugweihamu. (Shoma 1 Petero 1:22.) Twine kukimanya ngu twena tituhikiriire n’obu twakuba turi b’eihanga ki. (Rom. 3:9, 10, 21-24) Mbwenu shi ahabw’enki tushemereire kuteekateeka ngu nitukira abandi? (1 Kor. 4:7) Tushemereire kugira emiteekateekyere nk’ey’entumwa Paulo, owaahigire Abakristaayo bagyenzi be abashukirweho amajuta abaabaire batakiri “banyamahanga nari abahinguzi, kureka . . . ab’omu kikaari kya Ruhanga.” (Efe. 2:19) Twateeraho kweihamu ebiteekateeko by’okushoroora abandi, nikiija kutuhwera kutaho emitwarize misya.​—Kol. 3:10, 11.

10, 11. Boazi akooreka ata emiteekateekyere nk’eya Yehova kurugiirira aha ku yaakoragaine na Ruusi?

¹⁰ Hatariho kubanganisa Boazi akagira emiteekateekyere nk’eya Yehova obu yaabaire naakoregana na Ruusi Omumoabukazi. Boazi ku yaizire kurambura omusiri gwe omu bwire bw’ishaaruura, akabaasa kureeba omukazi omweziriki arikuhumba omu musiri gwe. Boazi ku yaamanyire ngu Ruusi akaba ashabire orusa rw’okuhumba, n’obu araabe yaabaire aine obugabe kukikora, akamwikiriza kuhumba nangwa n’omu biba by’engano.​—Shoma Ruusi 2:5-7, 15, 16.

¹¹ Omuringo ogu baagaaniiremu gukooreka gye ngu Boazi akaba naafayo munonga ahari Ruusi n’obu araabe yaabaire ari ow’eihanga erindi. Akamweta kuguma n’abaishiki be kugira ngu atakaatwarizibwa kubi abashaija abaabaire nibakora omu musiri. Kandi akahamya ngu Ruusi yaatunga eby’okurya n’amaizi ebirikumara, nk’abakozi abandi. Okwongyera ahari ekyo, Boazi akaba atarikutwara Ruusi nk’ow’ahansi, omu mwanya gw’ekyo, akamuhuumuriza.​—Rus. 2:8-10, 13, 14.

12. Okutwariza gye abarikuruga omu ihanga erindi nikibaasa kubahwera kita?

¹² Boazi akahigwa omuringo ogu Ruusi yaabaire naakunda nyinazaara Naomi, n’ahabw’okugira ngu akaba ahindukire omuheereza wa Yehova. Embabazi za Boazi zikaba nizooreka rukundo ya Yehova etahwaho ei yaabaire ainiire Ruusi owaabaire aizire ‘kusherura obuhungiro omu mapapa ga Ruhanga wa Israeli.’ (Rus. 2:12, 20; Enf. 19:17) Nikyo kimwe n’obunaku obu, emitwarize yaitu emirungi neebaasa kuhwera “abantu boona” kureeba amazima kandi bakamanya rukundo ei Yehova abainiire.​—1 Tim. 2:3, 4.

13, 14. (a) Ahabw’enki twine kuteeraho munonga kuramutsya abu tutarikumanya aha Kyombeko ky’Obukama? (b) Kyaba nikikugumira kugamba n’ab’eihanga erindi noobaasa kusingura ota embeera egyo?

¹³ Nitubaasa kugirira embabazi abasya abarikuruga omu ihanga erindi turikubaramutsya na rukundo mpango aha Kyombeko ky’Obukama. Nitubaasa kwetegyereza ngu abarikuba bafurukiire omu ihanga erindi obumwe nibaba baine enshoni, kandi nibaba baine eihamba. Ahabw’entwaza yaabo n’oku baakuziibwe, nibabaasa kwereeba nk’ab’ahansi aha b’erangi endiijo nari eihanga erindi. N’ahabw’ekyo, tushemereire niitwe twabanza kubooreka ngu nitubafaho. JW Language app yaaba eriho omu rurimi rwanyu, neebaasa kukuhwera kumanya oku  orikubaasa kuramutsya ab’eihanga erindi omu rurimi rwabo.​—Shoma Abafilipi 2:3, 4.

¹⁴ Nikibaasa kukugumira kugamba n’abo ab’eihanga erindi. Kubaasa kusingura enyehurira nk’egyo, noobaasa kubagambira bimwe ahabirikukukwataho. Noobaasa kushanga ngu nimushushanisa ebintu bingi. Kandi ijuka ngu buri ihanga niriba riine ebi orikukunda n’ebi otarikukunda.

15. Niki ekiraatuhwere kwetegyereza gye abo abarikwega emitwarize y’eihanga ritari ryabo?

¹⁵ Kubaasa kuhwera abandi kuhurira baikaikaine omu kibiina, yeebuuze oti: ‘Ku ogire ngu niinye ndi omu ihanga erindi, nkayenzire ngu abandi bantwarize bata?’ (Mat. 7:12) Gumisiririza abarikwega emitwarize ey’eihanga ritari ryabo. Omu kubanza, nitubaasa kuteetegyereza gye emiteekateekyere yaabo n’oku barikutwaza. Omu mwanya gw’okuteekateeka ngu nibaija kutwaza nk’oku turikutwaza, nitubaasa kubaikiriza nk’oku bari.​—Shoma Abarooma 15:7.

16, 17. (a) Niki eki turikubaasa kukora kuhwera ab’eihanga erindi? (b) Nitubaasa kuhwera tuta abaizire omu kibiina kyaitu kuruga omu ihanga erindi?

¹⁶ Twayega emitwarize n’emigyenzo y’abarikuruga omu ihanga erindi, nikibaasa kutworobera kukwatanisa nabo. Omu kuramya kwaitu kw’eka nitubaasa kugira obwire bw’okucondooza aha bantu abu tutarikumanya gye omu kibiina nari omu kicweka kyaitu. Omuringo ogundi gw’okwirira haihi ab’eihanga erindi n’okubeeta omu maka gaitu tukarya nabo. Obu Yehova ‘ayaiguriire Abanyamahanga orwigi rw’okwikiriza,’ mbwenu shi naitwe titushemereire kwigurira ab’eihanga erindi “abari omu nju y’okwikiriza” enyigi zaitu?​—Byak. 14:27; Gal. 6:10; Yob. 31:32.

¹⁷ Twagira obwire bw’okubaho n’eka erugire omu ihanga erindi, nikiija kutuhwera kwetegyereza oku barikukora  empindahinduka kuhikaana n’entwaza yaitu. Nitubaasa kwetegyereza ngu nibeetenga obuhwezi bwaitu kubaasa kwega orurimi rwaitu. Nitubaasa n’okubooreka ebitongore ebirikubaasa kubahwera kutunga amaju marungi nari omurimo murungi. Okufayo nk’okwo nikubaasa kuhwera munonga ow’eishe-emwe mugyenzi waawe.​—Enf. 3:27.

18. Obunaku obu abasya nibabaasa kutooreza oha omu kusiima abandi n’okubaha ekitiinisa?

¹⁸ Buzima, abasya nibaba nibenda kuteeraho munonga kuhikaanisa entwaza yaabo n’ey’eihanga erindi. Ruusi akataho eky’okureeberaho kirungi omu nshonga egi. Eky’okubanza, akaha ekitiinisa entwaza y’eihanga erindi arikushaba bamwikirize kuhuumba. (Rus. 2:7) Tarakwatsire eijaga enshonga egi arikuteekateeka ngu abandi baine kugira eki baamuha. Ekya kabiri, akasiima ahabw’embabazi ezi yaagiriirwe. (Rus. 2:13) Abasya baayoreka emiteekateekyere mirungi nk’egyo, abantu b’eihanga eryo n’ab’eishe-emwe nibabaha ekitiinisa.

19. Ni nshonga ki ezishemereire kutureetera kwakiira ab’amahanga agandi abari naitwe?

¹⁹ Nitushemererwa ahabw’okureeba ngu Yehova agiriire embabazi abantu b’enganda zoona yaabaikiriza kuhurira amakuru marungi. Abamwe obu baabaire bari omu ihanga ryabo nibabaasa kuba bataratungire kagisha k’okwega Baibuli nari kuza omu nteerane z’Abajurizi ba Yehova. Kwonka hati obu baine omugisha gw’okwija omu nteerane zaitu, titushemereire kubahwera kugira ngu barekye kwehurira nk’abanyamahanga omuriitwe. N’obu turaabe tutaine bintu bingi kandi tutarikubaasa kubahwera turikugira ebi twabaha, twabagirira embabazi nituba nitutooreza Yehova. Itwe ‘abarikutooreza Ruhanga,’ ka tukore kyona ekirikubaasika, kwakiira abu abantu b’amahanga agandi abari naitwe.​—Efe. 5:1, 2.