5. Okushiisha Ensi

‘[Ruhanga naija] kucwekyereza abarikushiisha ensi.’​—OKUSHUURUURWA 11:18.

● Mr. Pirri naakora omu inyuukiro rya viinyo omuri Kpor, Nigeria. Omushuuburo gwe ogu gusiisirwe oiro erikwatika omu mugyera Niger. “Neereetera eby’enyanja kufa, neeshiisha emibiri y’abantu, n’amaizi g’emigyera yaitu nigasiisikara,” nikwo arikugira. “Hati tinkiine ntaatsya yoona.”

OBUHAME NIBWOREKA KI? Abahangu abamwe nibagira ngu, ebisasiro ebirikuremeera taani obukaikuru 6.5 nibiza omu nyanja empango buri mwaka. Kandi nikiteeberezibwa ngu ebicweka 50 ahari igana eby’ebisasiro ebyo ni purasitika erikutwara emyaka mingi kucwanyagurika. Oyihireho okushiisha ensi, abantu bariyo nibatuubya eby’okuhangwa aha rurengo orurikutiinisa. Okucondooza nikworeka ngu ensi eine kuhuumura omwaka gumwe n’ameezi ataano kubaasa kugaruraho ebi abantu barikushiisha omu mwaka gumwe. “Abantu baaguma nibashiishagura eby’obuhangwa, nikiza kwetengyesa ensi ibiri kuza kuhika omwaka 2035,” nikwo orupapura rw’amakuru rwa Australia orurikwetwa Sydney Morning Herald rurikugira.

ABANTU BAINGI NIBAKIRA KUGAMBA KI? Abantu nibakoresa gye eby’obuhangwa. Nitubaasa kushoboorora oburemeezi kandi turinde ensi yaitu.

EKI BARIKUGAMBA SHI KIHIKIRE? Abantu baingi n’ebitongore nibeetomboita ahabw’okusiisikara kw’eby’obuhangwa. Kwonka, ensi neeyongyera kusiisikara munonga.

NOOTEEKATEEKA KI? Ruhanga shi aine kugira eki yaakora ahonaaho kucungura ensi kutasiisikara, nk’oku arikuragaanisa kukikora?

Oyihireho obunabi butaano obu twaheza kushwijuma, Baibuli neegamba n’aha bintu birungi ebyabaire nibiija kubaho omu biro by’emperu. Yetegyereze ekintu kimwe omu bunabi obwa mukaaga.

[Ebigambo ebitoorainwe]

“Nindeeba ngu tinkiine omwanya murungi oguri nka paradiso kureka hati nyine eirundaaniro ry’ebisasiro.”​—ERIN TAMBER, OMUTUUZI WA GULF COAST, OMURI UNITED STATES, ARIKUGAMBA EBYAREETSIRWEHO OIRO AYAAYATIKIRE OMURI GULF OF MEXICO OMU 2010.

[Akabokusi]

Ebi shi Nibireetwaho Ruhanga?

Ahabw’okugira ngu Baibuli ekagamba kare aha mbeera mbi eziriho hati, nikimanyisa ngu Ruhanga niwe arikuzireetaho? Naatureetera okubonabona? Noobaasa kutunga eby’okugarukamu ebihikire eby’ebibuuzo ebyo omu shuura 11 eya akatabo Niki Buzima Eki Baibuli Erikwegyesa? akaatairwe Abajurizi ba Yehova.

[Obukomooko bw’ekishushani]

U.S. Coast Guard photo