1, 2. (a) Niki ekirikworeka ngu ekibiina kya Kolosai omu kyasha ky’okubanza kikaba kiri omu kabi? (b) Ni buhabuzi ki obwahairwe kuhwera ab’eishe-emwe ba Kolosai kuguma bahami?

 OMU kyasha ky’okubanza, ekibiina Ekikristaayo eky’omuri Kolosai kikaba kiri omu kabi! Bamwe omu kibiina bakaba nibareetaho okwebaganisamu barikuhamira aha Biragiro bya Musa. Abandi bakaba nibeebembeza enyikiriza y’ekikaafiire ey’okwezibira kushemererwa nari okwefubira ekirenga. Entumwa Paulo akabarabura aha kabi akari omu kugira emiteekateekyere nk’egi etarikushushana, arikugira ati: “Mwerinde hatagira omuntu owaabanyagisa obwengye bw’abantu n’oburyarya obutaine mugasho, omu kukuratira emigyenzo y’abantu n’okukuratira eby’okubanza eby’omu nsi egi, okutakuratira Kristo.”​—Kol. 2:8.

² Abakristaayo abo abashukirweho amajuta ku baraabe baabaire bataire omutima aha “by’okubanza eby’omu nsi egi,” nikimanyisa ngu bakaba bangire entebeekanisa ya Yehova y’okujuna abantu. (Kol. 2:20-23) Paulo kubaasa kubahwera kurinda omukago gwabo ogw’omuhendo ogu baabaire baine na Ruhanga, akabeehanangiriza ati: “Mute omutima aha by’omu iguru,  murekye eby’omu nsi.” (Kol. 3:2) Buzima, beene ishe Kristo bakaba baine kuguma nibateekateeka aha matsiko gaabo ag’okutunga obuhunguzi obu baabaire ‘babiikiirwe omu iguru.’​—Kol. 1:4, 5.

3. (a) Ni matsiko ki agu abashukirweho amajuta barikutaho omutima? (b) Nituza kushwijuma bibuuzo ki omu kicweka eki?

³ Abakristaayo abashukirweho amajuta ab’obunaku obu, nabo nibata omutima aha Bukama bwa Ruhanga obw’omu iguru, n’aha matsiko gaabo ag’okuba abahunguzi “hamwe na Kristo.” (Rom. 8:14-17) Kandi shi abo abaine amatsiko g’okutuura omu nsi? Ebigambo bya Paulo nibibakwataho bita? Ni mu muringo ki ogu ‘ab’entaama ezindi’ barikuta omutima “aha by’omu iguru”? (Yoh. 10:16) Twena nitubaasa kugasirwa tuta twateekateeka aha bashaija abeesigwa nka Abrahamu na Musa abaataire omutima aha by’omu iguru, n’obu baraabe baabaire baine oburemeezi?

4. Ab’entaama ezindi nibabaasa kuta bata omutima aha by’omu iguru?

⁴ N’obu ab’entaama ezindi baraabe bataine matsiko g’okuza omu iguru, nabo nibabaasa kuta omutima aha by’omu iguru. Mu muringo ki? Nibakikora barikwebembeza okukora ebi Yehova Ruhanga arikukunda. (Luk. 10:25-27) Eki nikyo Kristo yaakozire, kandi naitwe nikyo twine kukora. (1 Pet. 2:21) Nk’ab’eishe-emwe omu kyasha ky’okubanza, obunaku obu hariho enyegyesa zigwire, nari ez’abantu buntu, n’omuze gw’okwebembeza okusherura eby’obutungi omu nsi egi erikutegyekwa Sitaane. (Shoma 2 Abakorinso 10:5.) Ahabw’okugira ngu nitutooreza Yesu, twine kuguma nitureeba kandi tukeerinda ebintu nk’ebyo ebirikubaasa kutushiisha omu by’omwoyo.

5. Nitubaasa kweshwijuma tuta aha bikwatiraine nookukunda eby’obutungi?

⁵ Mbwenu shi ku waakuba otandikire kugira emiteekateekyere y’okukunda esente munonga nk’ab’ensi? Ebintu ebi turikukunda butoosha nibireebekyera aha miteekateekyere yaitu n’ebikorwa byaitu. Yesu akagira ati: “Ahu eitungo ryawe riri, n’omutima gwawe niho guba.” (Mat. 6:21) Kubaasa kumanya ahu omutima gwaitu guri, twine kuguma nitweshwijuma butoosha. Noobaasa kwebuuza oti: ‘Niimara bwire burikwingana ki ndikuteekateeka aha by’esente? Mbwenu shi ninteekateeka munonga aha kutunga omurimo murungi, nari aha kutunga ebintu bingi? Nari niinteeraho kuguma ntaire omutima aha by’omwoyo?’ (Mat. 6:22) Yesu akooreka ngu abo abarikuta omutima aha ‘kwebiikira eitungo omu nsi’ nibeeta omu kabi omu by’omwoyo.​—Mat. 6:19, 20, 24.

6. Nitubaasa kusingura tuta orugamba rw’okurwanisa ebikorwa by’omubiri?

⁶ Omubiri gwaitu ogutahikiriire nigutuhiga kukora ebintu ebirikutushemeza. (Shoma Abarooma 7:21-25.) Twaba tutaine omwoyo gurikwera, nitubaasa kugira “emicwe y’omwirima.” Emicwe egi neetwariramu ‘okujagarara, okusinda, okushambana, n’okukora ebirikwitsa enshoni.’ (Rom. 13:12, 13) Kubaasa kwetantara kuta omutima aha ‘by’omu nsi,’ ebyo ebirikushemeza omubiri gwaitu, twine kuta omutima aha bintu eby’omu iguru. Eki nikyetengyesa okuteeraho munonga. Egi niyo nshonga ahabw’enki entumwa Paulo yaagizire ati: “Nteera omubiri gwangye ngu ngutegyekye.” (1 Kor. 9:27) Hatariho kubangaanisa, titushemereire kwesaasira ku turaabe nitwenda kuguma omu mpaka z’okwiruka kutunga amagara! Ka tureebe eki abashaija babiri aba ira abeesigwa baakozire kubaasa “kushemeza Ruhanga.”​—Heb. 11:6.

7, 8. (a) Ni buremeezi ki obu Abrahamu na Saara baatungire? (b) Abrahamu akaba ataire omutima ahari ki?

⁷ Obu Yehova yaaragiira Abrahamu kutwara eka ye omu nsi ya Kanaani, akaikiriza kukikora. Abrahamu ahabw’okwikiririza kwe, Yehova akakora nawe endagaano arikugira ati: “Ndyakuhindura eihanga rihango; kandi ndyakuha omugisha.” (Kut. 12:2) Kwonka bwanyima y’emyaka mingi, muka Abrahamu Saara akaba akiri engumba ataine mwana. Mbwenu shi Yehova akaba ayebirwe endagaano ei yaakozire na Abrahamu? Kandi nabwo, embeera omuri Kanaani ekaba etoorobi. Abrahamu n’ab’omu ka ye bakaba batsigireho eka yaabo n’abanyabuzaare omuri Uri, orurembo rurungi omuri Mesopotamia. Bakaba bagyenzire mahiro ezirikurenga omuri 1,000 kubaasa kuhika Kanaani, bakaba nibatuura omu mahema, bakagumira enjara, kandi bakashangayo n’abashuma. (Kut. 12:5, 10; 13:18; 14:10-16) Kwonka, bakaba bataine kyetengo ky’okugaruka omuri Uri ahaabaire hari obusingye!​—Shoma Abaheburaayo 11:8-12, 15.

⁸ Abrahamu omu mwanya gw’okuta omutima aha bintu “eby’omu nsi,” akaikiririza omuri Yehova. (Kut. 15:6) Buzima, Abrahamu akata omutima aha by’omu iguru, ekirikumanyisa ebiraganiso bya Ruhanga. Ekyarugiremu, Ruhanga ow’Obushoboorozi Bwona akaha Abrahamu omugisha ahabw’okwikiriza kwe, obu yaamweyoreka akagira ati: Rarama oreebe ahaiguru obare enyonyoozi, oreebe ku oraabe noobaasa kuzibara. Yaamugira ati: Na baijukuru baawe nikwo bariingana batyo.” (Kut. 15:5) Ekyo ka kiine kuba kyabaire nikigaruramu amaani! Buri murundi ogu Abrahamu yaabaire areeba ahaiguru, akaba aijuka eki Yehova yaamuraganiise ngu aryakanyisa oruzaaro rwe. Kandi obwire ku bwahikire, Abrahamu akazaara omuhunguzi, nk’oku Ruhanga yaabaire amuraganiise.​—Kut. 21:1, 2.

9. Okutooreza Abrahamu nikiija kutuhiga kita kuguma twine bingi by’okukora omu buheereza bwa Ruhanga?

⁹ Naitwe tutegyereize okuhikiirira kw’ebiraganiso bya Ruhanga nka Abrahamu. (2 Pet. 3:13) Twaba tutataire omutima aha bintu eby’omu iguru, nitubaasa kureeba ebiraganiso nk’ebitwireho kuhikiirira, kandi nitubaasa kuhwa amaani omu by’omwoyo. Nk’eky’okureeberaho, haine ebi waayefeerereize enyima kubaasa kuba payoniya nari kwongyera aha buheereza bwawe omu muringo ogundi? Ku kiraabe nikwo kiri, noosiimwa munonga. Kandi shi hati? Ijuka ngu Abrahamu akaguma ataire omutima aha “rurembo orwine emisingi.” (Heb. 11:10) “Abrahamu akaikiriza Ruhanga kyamubarirwa okuba okuhikiirira.”​—Rom. 4:3.

10. Musa omu bunyeeto akaba ari mu mbeera ki?

¹⁰ Omushaija ondiijo owaataire omutima aha by’omu iguru ni Musa. Kuruga omu bunyeeto, akaba ayegyesiibwe “obwengye bwona obw’Abanyamisri.” Obu bukaba butari bwegyese obwa butoosha. Misri rikaba riri eihanga kirimaani kandi Musa akaba naatuura omu nju ya Faraho. Ahabw’obwegyese obu yaatungire, akaba “ow’amaani omu bigambo bye n’omu bi yaabaire naakora.” (Byak. 7:22) Teekateeka aha migisha ei yaabaire naabaasa kutunga omu nsi egi! Kwonka, Musa akaba ataire ebiteekateeko bye aha bintu ebirikukira obukuru, okukora ebi Ruhanga arikukunda.

11, 12. Ni bwegyese bwa muringo ki obu Musa yaatwire nka bukuru, kandi eki nitukimanya tuta?

¹¹ Musa akiri muto, nyina orikwetwa Yokebedi, ashemereire kuba yaamwegyeise ebirikukwata ahari Ruhanga wa Abaheburaayo. Musa akaba naakunda munonga ebirikukwata  ahari Yehova kandi akaba naamanya ngu nibikira eby’obutungi byona. N’ahabw’ekyo akatsigaho emigisha yoona ei yaabaire naabaasa kutunga ahabw’okutuura omu nju ya Faraho. (Shoma Abaheburaayo 11:24-27.) Buzima, obwegyese obw’eby’omwoyo n’okwikiriza ebi Musa yaabaire aine, bikamuhiga kuta omutima aha by’omu iguru.

¹² Musa akatunga obwegyese bw’ensi obwabaire nibukirayo oburungi omu bunaku bwe, kwonka tarabukoreise kutunga omurimo omuri Misri, kukora eiziina, nari kutunga eby’obutungi. Ku ogire ngu ekyo nikyo yaakozire, akaba atarikwija kwanga “kwetwa mutabani wa muhara wa Faraho” akaihamu “okukorwa kubi hamwe n’abantu ba Ruhanga,” akanga “kuguma omu by’okweshemeza by’ekibi ebirikuhwaho juba.” Buzima, Musa akakoresa obwegyese bwe obw’eby’omwoyo kushagika ekigyendererwa kya Ruhanga.

13, 14. (a) Niki ekyabaasiise Musa kwetebeekanisiza obujunaanizibwa obu Yehova yaabaire naija kumuha? (b) Nka Musa, nikibaasa kutwetengyesa kukora ki?

¹³ Musa akaba naakunda Yehova hamwe n’abaheereza be. Musa aha myaka 40 y’obukuru, akaba naateekateeka ngu naabaasa kucungura abaheereza ba Ruhanga kuruga omu buhuuku omuri Misri. (Byak. 7:23-25) Kwonka, Yehova atakahaire Musa obujunaanizibwa obwo, akaba aine kubanza kugira emitwarize mirungi nk’obucureezi, okugumisiriza, okutarahuka kugira ekiniga, n’okwerinda. (Enf. 15:33) Akaba aine kutendekwa kubaasa kwemera okugyezibwa n’oburemeezi, obundi ebyakubaireho omu biro by’omumaisho. Emyaka ei yaamazire ari omuriisa w’entaama, kikamubaasisa kutunga okutendekwa n’okugira emitwarize mirungi egyo.

¹⁴ Mbwenu shi Musa okutendekwa oku yaatungire ari omuriisa w’entaama kukamuhwera? Eego buzima! Ekigambo kya Ruhanga nikigira ngu “Musa akaba ari omucureezi, okukira abantu boona ab’omu nsi.” (Kub. 12:3) Akaba aine omutwarize gw’obucureezi, ekyamuhwereire kukoragana n’abantu batari bamwe na bamwe n’okugumira obundi buremeezi. (Kur. 18:26) Naitwe nikibaasa kutwetengyesa kugira emitwarize mirungi ekiraatuhwere kuraba omu “kubonabona kwingi,” kuhika omu nsi ensya ey’okuhikiirira. (Kush. 7:14) Mbwenu shi nitutwariza gye abantu, otwariiremu n’abo abarikurahuka kuguubwa kubi? Nikiba kiri kirungi kugyendera aha bigambo by’entumwa Petero, owaahigire abaikiriza bagyenzi be ati: “Muhe abantu boona ekitiinisa. Mukunde ab’eishe-emwe.”​—1 Pet. 2:17.

15, 16. (a) Ahabw’enki ni kikuru kuguma tutaire omutima aha by’omu iguru? (b) Ahabw’enki Abakristaayo bashemereire kuguma baine emitwarize mirungi?

¹⁵ Turi omu biro “by’akabi kaingi” ebigumire kwemera. (2 Tim. 3:1) Kubaasa kuguma nitureeba omu by’omwoyo, twine kuguma tutaire omutima aha by’omu iguru. (1 Tes. 5:6-9) Yetegyereze oku turikubaasa kukikora omu bi turikukora butoosha.

¹⁶ Emitwarize yaitu: Petero akaba naamanya obukuru bw’okugira emitwarize mirungi. Akagira ati: “Mugire emicwe mirungi omu Banyamahanga, kandi . . . bareebe ebirungi ebi murikukora, bahimbise Ruhanga.” (1 Pet. 2:12) N’obu twakuba turi aha murimo, aha ishomero, omu mizaano, nari omu kubuurira, nituteeraho munonga kuhimbisisa Yehova ahabw’emitwarize yaitu mirungi. Buzima, ahabw’okugira ngu tituhikiriire, nitukora enshobe. (Rom. 3:23) Kwonka twagumizamu niturwana “okurwana okurungi okw’okwikiriza,” nitubaasa kusingura ebyetengo byaitu eby’omubiri ogutahikiriire.​—1 Tim. 6:12.

17. Nitubaasa kugira tuta emiteekateekyere nk’eya Kristo? (Reeba ekishushani aha kutandika.)

 ¹⁷ Emiteekateekyere yaitu: Okugira emitwarize mirungi, kiine akakwate k’amaani n’okugira emiteekateekyere mirungi. Entumwa Paulo akagira ati: “Mugire omutima guri ogwabaire guri omuri Kristo Yesu.” (Fil. 2:5) Mbwenu shi Yesu akaba aine mutima ki? Akaba aine omutima gw’obucureezi. Obucureezi bukamureetera kwefeerereza omu kubuurira. Okubuurira abandi amakuru marungi agarikukwata aha Bukama bwa Ruhanga nikyo yaabaire naataho munonga omutima. (Mak. 1:38; 13:10) Yesu akaba naatwara Ekigambo kya Ruhanga nka kikuru omu kubuurira. (Yoh. 7:16; 8:28) Akashwijuma gye Ebyahandiikirwe kugira ngu abaase kubijuriza, kworeka ngu bihikire, n’okubishoboorora. Twaba abacureezi kandi abeeziriki omu kubuurira n’omu kweyegyesa Baibuli, nitwija kugira emiteekateekyere nk’eya Kristo.

18. Ni muringo ki omukuru ogu turikubaasa kushagikamu omurimo gwa Yehova?

¹⁸ Obushagiki bwaitu: Yehova naayenda ngu “boona abari omu iguru n’omu nsi n’okuzimu batsimbire amaju eiziina rya Yesu.” (Fil. 2:9-11) N’obu Yesu araabe ari omu mwanya gw’ahaiguru, naija kuguma naakora ebi ishe arikukunda, n’ahabw’ekyo naitwe twine kukikora. (1 Kor. 15:28) Mu muringo ki? Turikwehayo n’omutima gwaitu gwona kushagika omurimo ogu turikuragiirwa kukora, ogw’okuza ‘omu mahanga goona, kuhindura abantu abeegi.’ (Mat. 28:19) Kandi, nitukorera “gye abantu boona,” turikukorera abataahi n’ab’eishe-emwe bagyenzi baitu ebintu birungi.​—Gal. 6:10.

19. Tushemereire kumariirira kukora ki?

¹⁹ Ka nikitushemeza kureeba ngu Yehova naatwijutsya kuguma tutaire omutima aha by’omu iguru! N’ahabw’ekyo, ka “twirukye okwiruka okw’empaka oku tuteereirweho n’okugumisiriza.” (Heb. 12:1) Kandi twena ka tuteereho n’agaitu goona kukora twihire “aha mutima nk’abarikukorera” Yehova, Tataitwe ow’omu iguru, kandi naija kutuha emigisha mingi.​—Kol. 3:23, 24.