1, 2. (a) Nitubaasa kuza tuta omu muhanda gw’okujunwa? (b) Niki ekirikubaasa kutuhwera kuguma omu muhanda gw’okujunwa?

KU TURIKUBA abeegi ba Kristo, nituba twatandika kuza omu muhanda. Omuhanda ogu nigubaasa kutuhitsya omu magara agatahwaho omu iguru nari omu nsi. Yesu akagira ati: “Origumisiriza kuhitsya aha muheru [emperu y’obusingye obu nari ey’ensi egi embi], niwe arijunwa.” (Mat. 24:13) Buzima, twaguma turi abeesigwa, nitwija kujunwa. Kwonka omu muhanda ogwo, twine kwegyendesereza kutagira ekyatuhuzya. (1 Yoh. 2:15-17) Nitubaasa kuguma tuta omu muhanda ogwo?

² Yesu akatuteeraho eky’okureeberaho omu nshonga egi. Ebirikumukwataho bihandiikirwe omu Baibuli. Twabyega nitumwetegyereza. Nitumukunda kandi tumwikiririzamu. (Shoma 1 Petero 1:8, 9.) Guma noijuka ngu entumwa Petero akagira ngu Yesu akatuteeraho eky’okureeberaho eky’okukuratira. (1 Pet. 2:21) Twagyendera gye omu bigyere bye, nitwija kuhika aha kigyendererwa kyaitu eky’okujunwa. * Omu kicweka ekihweire tureebire  oku turikubaasa kutooreza Yesu tukaba abacureezi kandi tukagira n’embabazi. Ka tushwijume oku turikubaasa kumutooreza omu kugira obumanzi n’okwetegyereza.

3. Obumanzi niki, kandi nitubutunga tuta?

³ Obumanzi n’omutwarize ogurikutureetera kuguma n’okugira obuhame. Okuba emanzi nikushoboororwaho “nk’okugumisiriza omu bwire bw’oburemeezi,” “okuhamira aha kihikire,” nari “okwemera okubonabonesibwa omu kwikiriza.” Okugira obumanzi kwine akakwate n’okutiina, amatsiko, na rukundo. Mu muringo ki? Okutiina Ruhanga nikutuha obumanzi bw’okwetantara kutiina abantu. (1 Sam. 11:7; Enf. 29:25) Amatsiko agaabuzima nigatuhwera kuta omutima aha biro by’omumaisho omu mwanya gw’okuta omutima aha kugyezibwa. (Zab. 27:14) Rukundo erimu okwefeerereza neetuhiga kugira obumanzi twahiiganisibwa. (Yoh. 15:13) Nitutunga obumanzi turikwesiga Ruhanga tukatooreza n’Omwana we.—Zab. 28:7.

4. Yesu akooreka ata obumanzi obu yaabaire ari omu hekalu “ahagati y’abeegyesa”? (Reeba ekishushani aha kutandika.)

⁴ N’obu Yesu yaabaire aine emyaka 12, akooreka obumanzi yaarwanirira ekihikire. Yetegyereze ekyabaireho obu yaabaire ari “omuri hekalu, ashutami ahagati y’abeegyesa.” (Shoma Luka 2:41-47.) Abeegyesa abo bakaba nibamanya gye Ebiragiro bya Musa, kwonka barikuhamira n’aha migyenzo y’abantu. Kwonka Yesu tarabatiinire, kureka akaba ariyo “naababuuza ebibuuzo.” Buzima akaba atarikubabuuza ebibuuzo nk’eby’abaana bato. Kureka naabaasa kuba yaabaire naababuuza ebibuuzo ebyabaire nibibareetera kuteekateeka. Kandi abeegyesa abo ku baraabe baateireho kumubuuza ebibuuzo ebirikubaasa kurugamu entongane, bakaremwa. Abo boona abaamuhurikiize otwariiremu n’abeegyesa, bakatangarira “obwengye bwe n’ebi yaabaire naabagarukamu.” Buzima, Yesu akooreka obumanzi yaarwanirira amazima agari omu Kigambo kya Ruhanga.

5. Yesu akooreka ata obumanzi omu kubuurira?

⁵ Obu Yesu yaabaire ari omu nsi, akaba emanzi omu miringo mingi. Akooreka obumanzi arikugambira abeegyesa b’ediini ngu nibeegyesa abantu ebishuba. (Mat. 23:13-36) Akanga kwikiriza ensi kumushiisha. (Yoh. 16:33) Akagumizamu arikubuurira n’obu haabaire hariho okuhigaanisibwa kwingi. (Yoh. 5:15-18; 7:14) Emirundi ebiri akashemeza hekalu, arikubinga abo abaabaire nibashiisha okuramya okw’amazima.—Mat. 21:12, 13; Yoh. 2:14-17.

6. Yesu akaba emanzi ata aha kiro ekyahereerukireyo omu nsi?

⁶ Nikihamya okwikiriza kwaitu kumanya ngu Yesu akaba emanzi obu yaabaire naabonabona. Teekateeka aha ku yaabaire emanzi aha kiro ekyahereerukireyo atakaitsirwe. Akaba naamanya byona ebyabaire nibiza kukorwa ogwo owaamuriiremu orukwe. Kwonka, obu baabaire nibarya Okuhingurwaho akagira Yuda ati: “Eki orikwenda kukora, kirahutsye.” (Yoh. 13:21-27) Obu Yesu yaabaire ari omu musiri Gesesemaani, taratiinire kweyoreka abaserukare abaabaire baizire kumukwata. N’obu amagara ge gaabaire gari omu kabi, akagamba n’obumanzi kurinda abeegi be. (Yoh. 18:1-8) Ku yaabuuziibwe obu yaabaire ari omu ishengyero, akabahamiza ngu niwe Kristo kandi Omwana wa Ruhanga, n’obu araabe yaabaire naamanya ngu omunyamurwa omukuru naaronda rwekwatso y’okumuhayo kwitwa. (Mak. 14:60-65) Yesu akaguma ari omwesigwa okuhitsya obu baamwita barikumuhanika aha muti. Ku yaabaire ari haihi kufa, akagira ati: “Kyahwa!”—Yoh. 19:28-30.

7. Eminyeeto, nimutwara muta omugisha gw’okwetererwa eiziina rya Ruhanga Yehova, kandi nimubaasa kworeka muta ngu muri emanzi?

⁷ Nitubaasa kuba tuta emanzi nka Yesu? Aha ishomero. Eminyeeto, mube emanzi mwaba nimwegambaho ngu muri Abajurizi ba Yehova, n’obu eki kyakuba nikibaasa kubarugiramu okurahurwa abu murikushoma nabo nari abandi. N’ahabw’ekyo kyorekye ngu okwetererwa eiziina rya Ruhanga Yehova, nikikwesiimisa. (Shoma Zaaburi 86:12.) Noobaasa kugyemeserezibwa kwikiriza ngu ebintu bikabaho birikuruga omu bindi. Kwonka oine enshonga zihikire kuba emanzi orikwikiriza eki Baibuli erikwegyesa aha kuhangwa. Noobaasa kukoresa akatabo The Origin of Life—Five Questions Worth Asking kugarukamu gye abo abarikwenda kumanya “eby’amatsiko agu mwine.” (1 Pet. 3:15) Ekyo nikiija kukuhwera kutunga okumarwa ahabw’okumanya ngu waahamira aha mazima agari omu Kigambo kya Ruhanga.

8. Ni nshonga ki ezirikutureetera kubuurira n’obumanzi?

⁸ Omu kubuurira. Ahabw’okugira ngu turi Abakristaayo, twine kuguma ‘nitugamba n’obumanzi,’ ahabw’obushoboorozi bwa Yehova. (Byak. 14:3) Niki ekirikutureetera kubuurira twine obumanzi nari tutarikutiina? Nitumanya ngu ebi turikubuurira n’amazima ahakuba biri omu Baibuli. (Yoh. 17:17) Nitumanya ngu turi abakozi ‘abarikukora hamwe na Ruhanga’ kandi ngu omwoyo gwe ogurikwera nigutuhwera. (1 Kor. 3:9; Byak. 4:31) Twabuurira n’obweziriki, nitworeka ngu nituhamira ahari Yehova kandi ngu nitukunda n’abataahi. (Mat. 22:37-39) Ahabw’okugira ngu twine obumanzi, titurikwija kurekyera aho kubuurira. Kureka, nitwija kumariirira kumanyisa amazima abahabisiibwe enyegyesa z’ediini ez’ebishuba. (2 Kor. 4:4) Kandi nitwija kugumisiriza omu kubuurira amakuru marungi n’obu twakuba nituhiiganisibwa nari nituhakanisibwa.—1 Tes. 2:1, 2.

9. Nitubaasa kuba emanzi tuta twaba nitubonabona?

⁹ Omu kubonabona. Okwesiga Ruhanga nikutuhwera kugira okwikiriza n’obumanzi twaba twine emirabanamu. Twafeerwa omukundwa, nitushaasha munonga, kwonka titurikuhwa matsiko. Twine obuhame ngu ‘Ruhanga ow’okuhuumuriza kwona’ naija kutuha amaani. (2 Kor. 1:3, 4; 1 Tes. 4:13) Twarwara munonga nari tukahutaara munonga, nitugira obusaasi bw’amaani, kwonka nitwanga obujanjabi bwona oburikugwisa kubi Yehova nari oburikuhenda emisingye ye. (Byak. 15:28, 29) Twagira amaganya, emitima yaitu neebaasa kutushinja, kwonka twaba nitwesiga Yehova ori “haihi ab’emitima ehendekire,” titurikwija kuhwa amaani. *—1 Yoh. 3:19, 20; Zab. 34:18.

10. Okwetegyereza niki, kandi Omukristaayo orikwetegyereza naakyoreka ata omu migambire ye n’emitwarize ye?

¹⁰ Okwetegyereza n’obushoboorozi bw’okutaanisa ekihikire aha kigwire, reero okacwamu kukora ekihikire. (Heb. 5:14) Nikishoboororwaho “nk’obushoboorozi bw’okucwamu gye omu bintu eby’omwoyo.” Omukristaayo oine okwetegyereza naagamba kandi akora ebirikushemeza Ruhanga. Omuntu nk’ogwo naatoorana ebigambo ebirikuhwera bandi omu mwanya gw’okubasaasa. (Enf. 11:12, 13) Tarikurahuka “kugira ekiniga.” (Enf. 14:29) Naagyendera omu ‘muhanda oguhikire,’ kandi naahamira  aha kihikire omu bi arikukora byona. (Enf. 15:21) Nitubaasa kugira tuta okwetegyereza? Twine kwega Ekigambo kya Ruhanga kandi tukagyendera aha bi turikwega. (Enf. 2:1-5, 10, 11) Okukira munonga n’eky’omugasho kwega ebirikukwata ahari Yesu, owaabaire naakirayo kuba orikwetegyereza omu nsi.

11. Yesu akooreka ata okwetegyereza omu migambire ye?

¹¹ Yesu akooreka okwetegyereza omu bikorwa bye n’ebigambo bye. Omu migambire. Akaba ayoreka okwetegyereza omu kubuurira amakuru marungi, arikutoorana “ebigambo by’embabazi” ebyabaire bitangaaza abamuhurikiize. (Luk. 4:22; Mat. 7:28) Ebigambo bye akaba abiiha omu Kigambo kya Ruhanga arikushoma nari arikujuriza ebyahandiikirwe ebirikuhikaana n’eki arikugambaho. (Mat. 4:4, 7, 10; 12:1-5; Luk. 4:16-21) Kandi Yesu akaba ashoboorora gye Ebyahandiikirwe ahika aha mitima y’abamuhurikiize. Bwanyima y’okuzooka, arikugamba na babiri aha beegi be omu muhanda ogurikuza Emau, akabashoboororera “omu Byahandiikirwe byona ebyamuhandiikirweho.” Abeegi be bwanyima bakagira bati: “Emitima yaitu tiyaashashaanuka, obu yaaba . . . naatushuuruurira Ebyahandiikirwe?”—Luk. 24:27, 32

12, 13. Yesu akooreka ata ngu tarikurahuka kuguubwa kubi, kandi ngu aine emiteekateekyere mirungi?

¹² Omu mutima gwe n’emiteekateekyere ye. Okwetegyereza kukahwera Yesu kurinda omutima gwe kyamuhwera ‘kutarahuka kugira ekiniga.’ (Enf. 16:32) Akaba ari “omucureezi.” (Mat. 11:29) Akaba agumisiririza abeegi be n’obu baabaire bakora enshobe. (Mak. 14:34-38; Luk. 22:24-27) Akaba aguma ari omucureezi n’obu abantu baabaire bamutwariza kubi.—1 Pet. 2:23.

¹³ Kandi okwetegyereza kukabaasisa Yesu kugira emiteekateekyere mirungi. Akaba naayetegyereza gye emisingye eyaabaire eri omu Biragiro bya Musa, reero atwariza abantu kuhikaana n’emisingye egyo. Yetegyereze eky’okureeberaho ekiri omuri Mako 5:25-34. (Kishome.) Omukazi owaabaire aine ekyejweiso, akareetwa enyima ya Yesu atyo yaakwata aha kijwaro kye, yaakira. Akaba ari otashemeire kurugiirira aha Biragiro, n’ahabw’ekyo akaba atashemereire kukwata aha muntu weena. (Lev. 15: 25-27) Kwonka Yesu ahabw’okwetegyereza ngu “ebigambo bikuru eby’omu biragiro” nibitwariramu ‘amazima, n’embabazi,’ tarateekateekire ngu omukazi ogwo akakora ekibi obu yaakwata aha kijwaro kye. (Mat. 23:23) Omu mwanya gw’ekyo, omu muringo gw’embabazi akagira omukazi ogwo ati: “Mwana wangye, okwikiriza kwawe nikwo kwakukiza, yegyendere n’obusingye, okirire kimwe endwara yaawe.” Eki ka nikyoreka gye oku okwetegyereza kwabaire kuhiga Yesu kugirira abandi embabazi!

14. Yesu akacwamu kukora ki, kandi akahamira ata aha murimo gwe?

¹⁴ Omu mitwarize ye. Yesu akooreka okwetegyereza omu kucwamu ekihikire kandi akakihamiraho. Akeemarira aha murimo gw’okubuurira amakuru marungi. (Luk. 4:43) Kandi taraikiriize kintu kyona kumuhuzya, akaba acwamu omu muringo ogwabaire gumureetera kuguma ataire omutima aha murimo gwe okuhitsya obu yaaguhendera. Akacwamu kumarwa n’ebintu bikye ebi yaabaire aine, kugira ngu amarire obwire bwe n’amaani ge aha kubuurira. (Luk. 9:58) Akeetegyereza ngu kikaba nikyetengyesa kutendeka abandi kugira ngu yaaheza kufa bagumizemu n’omurimo gw’okubuurira. (Luk. 10:1-12; Yoh. 14:12) Akaraganisa abakuratsi be ngu akaba naija kuguma naashagika omurimo ogu “okuhitsya obu ensi egi erihwaho.”—Mat. 28:19, 20.

15. Nitubaasa kworeka tuta okwetegyereza omu migambire yaitu?

¹⁵ Yetegyereza omuringo ogundi ogu turikubaasa kutoorezamu Yesu. Omu migambire yaitu. Twaba nitugaaniira n’ab’eishe-emwe bagyenzi baitu, twine kukoresa ebigambo ebirikwombeka. (Efe. 4:29) Twaba nitugambira abandi ebirikukwata aha Bukama bwa Ruhanga, ebigambo byaitu biine kuba “nk’ebirimu omwonyo.” (Kol. 4:6) Nituteeraho kwetegyereza ebi barikukunda n’oburemeezi bwabo reero tutoorana ebigambo ebi turaakorese. Twakoresa ebigambo by’embabazi, abantu nibabaasa kutuhurikiza kandi tubahikye n’aha mutima. Kandi twaba nitushoboorora aha bi turikwikiriza, nituteeraho kukoresa Baibuli. N’ahabw’ekyo, nitujuriza ebirimu kandi tushomamu kyaba nikibaasika. Nitwetegyereza ngu ebiri omu Baibuli biine amaani kukirira kimwe ekintu kyona eki turikubaasa kugamba.—Heb. 4:12.

16, 17. (a) Nitworeka tuta ngu titurikurahuka kugira kiniga, kandi ngu titurikugwera rubaju? (b) Nitubaasa kwemarira tuta aha murimo gw’okubuurira?

¹⁶ Omu mitima n’omu miteekateekyere yaitu. Okwetegyereza nikutuhwera kutarahuka ‘kugira ekiniga.’ (Yak. 1:19) Abandi baatugwisa kubi, nituteeraho kwetegyereza ahabw’enki baagamba nari bakatwaza batyo. Okwetegyereza nk’okwo nikubaasa kutuhwera kutagira ekiniga, reero kitubaasise ‘kwehuzya eki batushobeize.’ (Enf. 19:11) Kandi okwetegyereza nikutuhwera kugira emiteekateekyere etagwereire rubaju. N’ahabw’ekyo, titurikuteekateeka ngu abandi bahikiriire, kureka nitwijuka ngu nibabaasa kuba baine oburemeezi obu tutarikumanya. Nituba tweteekateekire kuhurikiza, abandi baaba nibagamba ebi barikuteekateeka, kandi kyabaasika twikirizane nabo.—Fil. 4:5.

¹⁷ Omu mitwarize yaitu. Nitumanya ngu okubuurira amakuru marungi nibwo bujunaanizibwa oburikukirayo obukuru. N’ahabw’ekyo, nitwenda kucwamu ebiraatubaasise kuta omutima aha omurimo gwaitu gw’okubuurira. Nitucwamu kwebembeza eby’omwoyo kandi tumarwa n’ebi twine kugira ngu twemarire aha murimo mukuru gw’okubuurira, emperu etakahikire.—Mat. 6:33; 24:14.

18. Nitubaasa kuguma tuta omu muhanda gw’okujunwa, kandi omariirire kukora ki?

¹⁸ Ka twine okushemererwa kwingi ahabw’okushwijuma emitwarize mirungi ya Yesu! Teekateeka aha ku kirikubaasa kuba eky’omugasho kwega aha mitwarize ye endiijo n’oku turikubaasa kwongyera kuba nkawe. N’ahabw’ekyo, ka tumariirire kumutooreza nk’oku kirikubaasika. Twakora tutyo, nituhamira aha muhanda gw’okujunwa kandi nitweyongyera kwirira haihi Yehova, ou Yesu yaatooraize omu muringo oguhikire.