“Tata ku yaaherize kufa, ibanyi akangira ngu aboine omukazi ondiijo,” nikwo Janet arikugira. “Bwanyima y’ebiro bikye, atasiibwire akakwata emyenda ye yaantsigaho n’abaana baitu babiri.” Janet akatunga omurimo, kwonka esente ezi yaabaire atunga zikaba zitarikumara kubaasa kushashura enju. Kandi akatunga oburemeezi bwingi obundi. Naagira ati: “Nkaba nyine okwerarikirira kw’amaani ahabw’obujunaanizibwa busya obu naabaire nyine kuhikiiriza nyenka. Nkaba ninyeshiija ahabw’okutaha abaana bangye ebi barikwetenga byona nk’abandi bazaire. Na hati, ninyerarikirira oku abandi barikundeeba n’abaana bangye. Mbwenu shi nibeebuuza yaaba naakozire eki naabaire nshemereire kukora kurinda obushwere bwangye?”

Okushaba nikuhwera Janet kurinda ebiteekateeko bye n’okugira omukago murungi na Ruhanga. “Ekiro nikiba kigumire, ebintu byona ku biri kuhunama obwo nibwo ndikwerarikirira munonga. Okushaba n’okushoma Baibuli nibimpwera kugwejegyera. Ninkunda munonga Abafilipi 4:6, 7 aharikugira hati: ‘Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza, kandi musiime. Kandi obusingye bwa Ruhanga oburengire okwetegyereza kw’omuntu weena, buryaguma burinde emitima yaanyu n’obwengye bwanyu.’ Mmazire ebiro bingi ndikushaba nyekiro kandi buzima obusingye bwa Yehova bumpumuriize.”

Ebigambo bya Yesu ebirikukwata aha kushaba ebi yaagambire omu Kwegyesa kwe okw’aha Rushozi nibikwata aha kwerarikirira kw’emiringo yoona. Akagira ati: “Ahakuba Shoimwe amanya ebi mukyenire mutakamushabire.” (Matayo 6:8) Kandi buzima twine kumushaba. Okushaba nigwo muringo mukuru ‘gw’okwirira haihi Ruhanga.’ Niki ekirikubaasa kurugamu? Nawe naija ‘kutwirira haihi.’—Yakobo 4:8.

Buzima, twagambira Yehova ebirikutwerarikiriza nituhurira gye kandi tutunga n’emigisha endiijo. Yehova, “ohurira okushaba,” naija kurwanirira boona abarikumushaba omu kwikiriza. (Zaaburi 65:2) Egyo niyo nshonga ahabw’enki Yesu yaayegyeise abakuratsi  be “kushaba obutoosha okutaruha.” (Luka 18:1) Twine kuguma nitushaba Yehova kutuha obuhabuzi n’obuhwezi, turikuhamya ngu naija kutuha emigisha ahabw’okwikiriza kwaitu. Titushemereire kubanganisa ngu naayenda kukikora kandi ngu aine amaani g’okukikora. “Okushaba obutoosha” omu muringo ogu, nikyoreka ngu twine okwikiriza okwabuzima.—1 Abatesalonika 5:17.

Kwonka buzima okwikiriza niki? Okwikiriza nikitwariramu “okumanya” Ruhanga. (Yohaana 17:3) Ekyo nitukikora twaba nitushoma ebiteekateeko bya Ruhanga ebiri omu Baibuli. Nitwega ngu naareeba buri omwe ahariitwe kandi naayenda kutuhwera. Kwonka, okwikiriza okwabuzima nikitwariramu ekirikukira aha kugira eki twamanya ahari Ruhanga. Nikitwariramu n’okugira omukago murungi nawe. Nk’oku kiri aha bantu, titurikubaasa kugira omukago nk’ogwo omu kiro kimwe. Okwikiriza kwaitu ‘nikuguma nikweyongyera’ twaguma nitweyongyera kumwegaho, turikukora ‘ebirikumushemeza,’ kandi tukareeba oku arikutuhwera. (2 Abakorinso 10:15; Yohaana 8:29) Oku nikwo kwikiriza okurikuhwera Janet kwemera okwerarikirira.

Janet naagira ati: “Ekyampwereire kugira okwikiriza kuhami n’okureeba obuhwezi bwa Yehova omu buri kimwe eki naabaire ninkora. Emirundi mingi tukahikwaho obutari buringaniza obwabaire nibureebeka nk’obutarikubaasa kwemwerwa. Ahabw’okushaba, Yehova akaba atubaasisa kuraba omu mbeera zigumire omu muringo ogu naabaire ntarikubaasa kwetegyereza. Ku ndikumwebaza, kinyijutsya bingi ebi ankoreire. Atwire naatuhwera omu bwire obuhikire. Kandi ampaire abashaija n’abakazi Abakristaayo nibo banywani abaabuzima. Butoosha nibaba beeteekateekire kumpwera kandi nibateeraho eky’okureeberaho kirungi abaana bangye.” *

“Nnimanya ahabw’enki omuri Malaki 2:16 Yehova naagira ngu ‘nyanga okushenda.’ Aha muntu orikuba atsigirweho, okwo nikuba kuri okureebya okurikukirayo. Hahingwireho emyaka kwiha ibanyi antsigaho, kwonka na hati nimpurira nyine eihamba kandi ndi nk’otaine mugasho. Ku ndikwehurira ntyo, ninteeraho kukora ekirikuhwera omuntu ondiijo, kandi ekyo naanye nikimpwera.” Janet ku arikugyendera aha musingye gwa Baibuli ogw’obuteetaanisa aha bandi, ekyo nikituubya aha kwerarikirira kwe. *—Enfumu 18:1.

Janet naagira ati, “Ekirikukira kumpwera n’okumanya ngu Ruhanga ‘n’ishe w’efuuzi kandi omucwi w’emanja w’abafaakazi.’ Taritutsigaho nk’oku omushaija wangye yaatutsigireho.” (Zaaburi 68:5) Janet naamanya ngu Ruhanga tarikutugyeza na “kibi.” Omu mwanya gw’ekyo, naaha obwengye boona “n’omutima ogutarikwima” kandi naaha “amaani agarikukirira kimwe” kutuhwera kwemera okwerarikirira kwaitu.—Yakobo 1:5, 13; 2 Abakorinso 4:7.

Kandi shi twaba nitwerarikirira ahabw’okugira ngu amagara gaitu gari omu kabi?