OMUTWE OGURI AHA MUNAARA | HARIHO OMUGASHO GWONA OMU KUSHABA?
Ahabw’enki Abantu Nibashaba?
“Nkaba ndi omuteezi wa zaara rugambwa. Nkaba nshaba ngu mbaase kutunga omugisha. Kwonka nkaba ntagutunga.”
—Samuel, * kuruga Kenya.
“Aha ishomero tukaba tugarukagaruka omu kushaba oku twayegyesiibwe kukwata omu mutwe.”
—Teresa, kuruga Philippines.
“Ninshaba naatunga oburemeezi. Ninshaba kusaasirwa ebibi n’okuba Omukristaayo murungi.”
—Magdalene, kuruga Ghana.
Ebyagambirwe Samuel, Teresa, na Magdalene nibyoreka ngu abantu nibashaba ahabw’enshonga nyingi, kandi ezimwe ni nkuru kukira ezindi. Okushaba kw’abantu abamwe nikuruga aha mutima, kandi abandi nibashaba batarikworeka oku barikwehurira. Kwonka, yaaba nibashaba kuhika ebigyezo, kugira ngu tiimu yaabo esingure, kutunga obuhabuzi bwa Ruhanga omu maka gaabo, nari ahabw’enshonga ezindi, abantu nyamwingi baine ekyetengo ky’okushaba. Nangwa okucondooza nikworeka ngu n’abatari banyadiini nabo nibashaba butoosha.
Nooshaba? Ku oraabe nooshaba, nooshaba ki? Yaaba nookunda kushaba nari otarikukukunda, noobaasa kwebuuza oti: ‘Omu kushaba harimu omugasho gwona? Haine orikuhurira okushaba?’ Omuhandiiki omwe akagira ngu okushaba “nikureetera omuntu kwehurira gye.” Abashaho abandi nabo baine emiteekateekyere nk’egyo, barikugira ngu okushaba “nikukora nk’omubazi.” Mbwenu shi abantu abarikushaba nibaguma nibakikora nk’omugyenzo, kwehurira gye kwonka?
Okutaana n’ekyo, Baibuli neeyoreka ngu kushaba n’okw’omugasho kukira aha kwehurira gye kwonka. Baibuli neetuhamiza ngu hariho orikuhurira okushaba kwaitu, twashaba omu muringo murungi nari ahabw’enshonga nungi. Eki kihikire? Ka tureebe obuhame.
^ kacw. 3 Amaziina agamwe gahindwire.
