Ni Baahi Abarikuza omu Iguru?
Eki Baibuli erikugarukamu
Ruhanga naatoorana Abakristaayo bakye abeesigwa kugira ngu bwanyima y’okufa kwabo bazoorwe baze omu iguru. (1 Petero 1:3, 4) Baaheza kutooranwa, baine kugumizamu baine okwikiriza kw’Ekikristaayo kubaasa kuba abahikire kutunga obuhunguzi bwabo omu iguru.—Abaefeso 5:5; Abafilipi 3:12-14.
Abo abarikuza omu iguru nibaza kukorayo ki?
Nibaija kuheereza na Yesu nk’abagabe kandi abanyamurwa kumara emyaka 1,000. (Okushuuruurwa 5:9, 10; 20:6) Nibaija kukora “eiguru erisya,” nari gavumenti y’omu iguru, erikwija kutegyeka “ensi ensya,” nari abantu omu nsi. Abategyeki aba abaraabe nibategyekyera omu iguru nibaija kuhwera abantu kugaruka kuba abahikiriire nk’oku Ruhanga yaabaire agyendereire omu kubanza.—Isaaya 65:17; 2 Petero 3:13.
Ni bangahi abarikwija kuzooka kuza omu iguru?
Baibuli neeyoreka ngu abantu 144,000 nibo baraazoorwe kuza omu iguru. (Okushuuruurwa 7:4) Omu kworekwa okuri omu Okushuuruurwa 14:1-3, entumwa Yohaana akareeba “Omwana gw’entaama ayemereire aha rushozi Saayuuni hamwe n’abantu ” 144,000. Omu kworekwa oku, “omwana gw’entaama” naajwekyera Yesu. (Yohaana 1:29; 1 Petero 1:19) “Orushozi Saayuuni” nirujwekyera omwanya gwa Yesu n’abantu 144,000 abaraategyekye nawe omu iguru.—Zaaburi 2:6; Abaheburaayo 12:22.
“Abatoorainwe” kutegyeka na Kristo omu Bukama nibeetwa “obusyo obukye.” (Okushuuruurwa 17:14; Luka 12:32) Eki nikyoreka ngu bo ni bakye waabagyeragyeranisa n’omuhendo gwona ogw’entaama za Yesu.—Yohaana 10:16.
Okuhabisibwa aha bikwatiraine n’abarikuza omu iguru
Okuhabisibwa: Abantu abarungi boona nibaza omu iguru.
Amazima: Ruhanga naaraganisa ngu abantu abarungi abarikukira obwingi nibaija kutunga amagara agatahwaho omu nsi.—Zaaburi 37:11, 29, 34.
Yesu akagira ati: “Tihariho oratembire omu iguru.” (Yohaana 3:13) N’ahabw’ekyo akooreka ngu abantu abarungi boona abaafiire Yesu atakaizire omu nsi, nk’Abrahamu, Musa, Yobu, na Daudi, tibaragiire omu iguru. (Ebyakozirwe 2:29, 34) Kureka, nibaija kuzoorwa batungye amagara agatahwaho omu nsi.—Yobu 14:13-15.
Okuzooka kw’okuza omu iguru nikwetwa ‘okuzooka okw’okubanza.’ (Okushuuruurwa 20:6) Eki nikyoreka ngu hariyo okundi kuzooka. Oku nikwija kuba omu nsi.
Baibuli neeyegyesa ngu ahansi y’obutegyeki bw’Obukama bwa Ruhanga, ‘tiharikwija kugaruka kubaho okufa obundi.’ (Okushuuruurwa 21:3, 4) Okuraganisa oku nikukwata aha nsi, obu omu iguru yatariyo kufa.
Okuhabisibwa: Buri muntu naayecweramu yaaba naija kutunga amagara agatahwaho omu iguru nari omu nsi.
Amazima: Ruhanga niwe arikutoorana Abakristaayo abaraatungye ‘ekihembo eky’okwetwa kuza omu iguru.’ (Abafilipi 3:14) Ekyetengo ky’omuntu nari eki arikwenda tikyo kirikurugiirirwaho okutooranwa kwe.—Matayo 20:20-23.
Okuhabisibwa: Amatsiko g’okutunga amagara agatahwaho omu nsi ti g’omuhendo, nigaheebwa abo abatahikire kuza omu iguru.
Amazima: Abaraatungye amagara agatahwaho omu nsi, Ruhanga naabeeta ‘abantu be’ ’abatoorainwe be,’ kandi “abahairwe omugisha” Yehova. (Isaaya 65:21-23) Nibaija kutunga omugisha gw’okuhikiiriza ekigyendererwa kya Ruhanga eky’okubanza eki yaabaire ainiire abantu, eky’okugira amagara agahikiriire omu paradiso omu nsi.—Okutandika 1:28; Zaaburi 115:16; Isaaya 45:18.
Okuhabisibwa: Abantu 144,000 abarikugambwaho omu Okushuuruurwa n’ab’akamanyiso, ti bantu abaabuzima.
Amazima: N’obu ekitabo ky’Okushuuruurwa kiraabe kirimu emibaro y’obumanyiso, emwe aha mibaro ei kirikukoresa n’eyaabuzima. Nk’eky’okureeberaho, nikigamba aha ‘maziina g’entumwa ikumi na ibiri ez’Omwana gw’entaama.’ (Okushuuruurwa 21:14) Yetegyereze obuhame oburikworeka ngu omubaro gw’abantu 144,000 nagwo n’ogwabuzima.
Okushuuruurwa 7:4 nihagira ngu “omubaro gw’abaatairweho akamanyiso, [nari, abahamiibwe kutunga amagara omu iguru],” n’abantu 144,000. Ebyetooroire omushororongo ogu, nibigamba aha bantu ab’omuringo ogundi birikubeeta “omutwe muhango gw’abantu ogu omuntu atarikubaasa kubara.” Abarikwetwa omuntwe muhango gw’abantu nabo nibaija kutunga okujunwa kwa Ruhanga. (Okushuuruurwa 7:9, 10) Abantu 144,000 ku baraabe bari ab’akamanyiso, barikujwekyera abu omubaro gwabo gutarikumanywa, nikimanyisa ngu abandi abarikugambwaho tibaine amakuru. a
Kandi, abantu 144,000 nibagambwaho ngu “bakacungurwa omu bantu okuba omuganuro.” (Okushuuruurwa 14:4) Ekigambo “omuganuro” nari ab’okubanza nikimanyisa abantu bakye abatoorainwe. Nikishoboorora ahari abo abaraze omu iguru kutegyeka na Kristo barikutegyeka abantu omu nsi abatarikumanywa omubaro gwabo.—Okushuuruurwa 5:10.
a Nikyo kimwe, Omuhangu Robert L. Thomas akahandiika aha bikwatiraine n’omubaro 144,000 ogurikugambwaho omu Okushuuruurwa 7:4 ati: “Ogu n’omubaro ogwabuzima okutashushana n’abarikugambwaho omu shuura 7:9. Gwayetwa ogw’akamanyiso, nikimanyisa ngu tihaine omubaro omu kitabo eki ogurikubaasa kutwarwa nk’ogwabuzima.”—Okushuuruurwa 1-7: An Exegetical Commentary, orupapura 474.
Noobaasa Kukunda n'Ebi
ENYEGYESA ZA BAIBULI ENKURU
Obukama bwa Ruhanga Niki?
Yesu omu buheereza bwe bwona, akeegyesa aha Bukama bwa Ruhanga kukira ebintu ebindi. Kumara ebyasha bingi, abakuratsi be batwire nibashaba ngu Obukama obwo bwije.
ENYEGYESA ZA BAIBULI
Gyezaho Omushomo Gwaitu gwa Baibuli
Yejumbe omu mushomo gw’okuhikaanisa ebiteekateeko ahari Baibuli oine orikukuhwera.