Omu Baibuli, ekigambo “okuzooka” nikikomooka omu kigambo ky’Orugriika a·na’sta·sis, ekirikumanyisa “okwimutsya” nari “okugaruka kwemerera.” Omuntu ku arikuzoorwa naimuka kuruga omu kufa aba ohuriire nk’obu yaabaire atakafiire.—1 Abakorinso 15:12, 13.

 N’obu ekigambo “okuzooka” kitarikukira kukoresibwa omu Byahandiikirwe eby’Oruheburaayo, erikukira kwetwa Endagaano Enkuru, kwonka enyegyesa egyo neegambwaho munonga. Nk’eky’okureeberaho, Ruhanga arikukoresa nabi Hosea, akaraganisa ati: “Ninyija kubacungura, mbaihe omu maani g’okuzimu; mbakize rufu.”—Hosea 13:14; Yobu 14:13-15; Isaaya 26:19; Danieli 12:2, 13.

 Abantu nibaija kuzoorwa kutuura nkahi? Abamwe nibazooka baza kutegyeka na Kristo omu iguru. (2 Abakorinso 5:1; Okushuuruurwa 5:9, 10) Eki Baibuli neekyeta ‘okuzooka okwo okw’okubanza’ ekirikumanyisa ngu hariho okundi okuraakurateho. (Okushuuruurwa 20:6) Okuzooka oku okuraakurateho n’okw’abarikwija kutuura omu nsi, bakagira amagara ebiro byona.—Zaaburi 37:29.

 Abantu nibaija kuzoorwa bata? Ruhanga ahaire Yesu amaani g’okuzoora abafu. (Yohaana 11:25) Yesu naija kuzoora “abari omu bituuro boona,” buri omwe nk’oku yaabaire naashusha, entwaza ye, n’okwijuka kwe. (Yohaana 5:28, 29) Abarikuzoorwa kuza omu iguru nibaheebwa omubiri gw’omwoyo, kandi abarikuzoorwa kutuura omu nsi nibatunga emibiri etaine ndwara, eshugaine, kandi etaine kamogo.—Isaaya 33:24; 35:5, 6; 1 Abakorinso 15:42-44, 50.

 Ni baahi abaraazoorwe? Baibuli neegira ngu nihaija ‘kubaho okuzooka kw’abahikiriire n’abatahikiriire.’ (Ebyakozirwe 24:15) Abahikiriire nibatwariramu abantu abeesigwa, nka Noa, Saara, na Abrahamu. (Okutandika 6:9; Okutandika 11:11; Okutandika 2:21) Abatahikiriire nibatwariramu abataragyendeire aha mitindo ya Ruhanga ahabw’okutatunga omugisha gw’okugyega n’okugigyenderaho.

 Kwonka, abo abarikukora ebihagaro kandi batarikubaasa kuhwerwa bakahinduka tibarikwija kuzoorwa. Abo ku barikufa, nibacwekyererezibwa kimwe bataine matsiko g’okuzooka.—Matayo 23:33; Abaheburaayo 10:26, 27.

 Okuzooka nikwija kubaho ryari? Baibuli neeyoreka ngu okuzooka kuza omu iguru kukaba nikwija kubaho omu kubaho kwa Kristo okwatandikire 1914. (1 Abakorinso 15:21-23) Okuzooka kutuura omu nsi nikwija kubaho omu Myaka Rukumi ey’Okutegyeka kwa Yesu Kristo, obu ensi eraahinduke paradiso.—Luka 23:43; Okushuuruurwa 20:6, 12, 13.

 Ahabw’enki okwikiririza omu kuzooka kiri eky’oburyo? Baibuli neegamba aha kuzooka kw’emiringo mwenda, kandi buri kuzooka hakaba hariho baakareebi. (1 Abagabe 17:17-24; 2 Abagabe 4:32-37; 13:20, 21; Luka 7:11-17; 8:40-56; Yohaana 11:38-44; Ebyakozirwe 9:36-42; Ebyakozirwe 20:7-12; 1 Abakorinso 15:3-6) Okuzooka okundi okurikutangaaza munonga n’okwa Laazaaro, akaba amazire ebiro bina afiire, kandi Yesu akazoora Laazaaro hariho abantu baingi. (Yohaana 11:39, 42) N’abaabaire nibahakanisa Yesu bakaba batarikubaasa kugira ngu tiyaakikora, n’ahabw’ekyo orukwe rw’okwita Yesu na Laazaaro.—Yohaana 11:47, 53; 12:9-11.

 Baibuli neeyoreka ngu Ruhanga aine obushoboorozi n’ekihika ky’okuzoora abaafiire. Yehova naijuka buri kimwe ekirikukwata ahari abo abu araazoore arikukoresa amaani ge agarikukirayo. (Yobu 37:23; Matayo 10:30; Luka 20:37, 38) Ruhanga aine okubaasa kw’okuzoora abafu, kandi aine ekihika ky’okukikora! Baibuli erikugamba aha kuzooka okuraabeho, neegamba ahari Ruhanga eti: ‘Naiwe nooyetenga kureeba eki emikono yaawe yaakozire.’—Yobu 14:15.

Ebitahikire ebi barikugamba aha kuzooka

 Ekishuba: Okuzooka n’okugaruka kuteerana omubiri n’omwoyo.

 Amazima: Baibuli neeyegyesa ngu omwoyo n’omuntu weena, beitu ti kicweka ky’omubiri ekitarikufa. (Okutandika 2:7; Ezekieli 18:4) Omuntu orikuzooka naaba atagarukaine n’omwoyo gwe, kureka naagaruka aba omwoyo oguhuriire nari omuntu ohuriire.

 Ekishuba: Abamwe nibazooka reero ahonaaho bacwekyerezibwa.

 Amazima: Baibuli neegira ngu ‘abo abaakozire ebibi’ nibaija ‘kuzookyera okucwerwa orubanja.’ (Yohaana 5:29) Okucwerwa orubanja oku nikurugiirira aha ki barikukora bwanyima y’okuzooka beitu ti ebi baakozire enyima. Yesu akagira ati: ‘Abafu nibaija kuhurira eiraka ry’Omwana wa Ruhanga, n’abo abaraarihurire nibaija kuba abahuriire.’ (Yohaana 5:25) Abo ‘abaraahurire’ nari abaraayorobere ebi beegire bwanyima y’okuzooka, amaziina gaabo nigaija kuhandiikwa omu kitabo ““ky’amagara.”—Okushuuruurwa 20:12, 13.

 Ekishuba: Bwanyima y’okuzooka, omuntu naaba aine omubiri gwenyini ogu yaafiire aine atakafiire.

 Amazima: Bwanyima y’okufa omubiri nigucwanyagurika gujunda.—Omubuurizi 3:19, 20.