Maekeɛle mɔɔ eza ɛzonlenlɛ bie mɔ fɛlɛ ye “Anwodelɛnli Maekeɛle” la le duma mɔɔ ɛnee bɛfa bɛfɛlɛ Gyisɛse kolaa na yeara azɛlɛ ye azo yɛɛ mekɛ mɔɔ ɔhɔle anwuma la. * Kpolera dɔle Maekeɛle nee Seetan avinli wɔ Mosisi ewule nzi yɛɛ ɔboale anwumabɔvolɛ bie ɔmaanle ɔhanle Nyamenle nrɛlaleɛ ɔhilele ngapezonli Daneɛle. (Daneɛle 10:13, 21; Dwuudu 9) Maekeɛle bɔle ye duma ne anwo ɛbɛla​—ɔ bo kile “Nwane A Le Kɛ Nyamenle A?”​—ɔlua Nyamenle tumililɛ ne mɔɔ ɔgyinlanle ɔ nzi nee Nyamenle agbɔvolɛ mɔɔ ɔ nee bɛ honle la azo.​—Daneɛle 12:1; Yekile 12:7.

 Nea deɛmɔti yɛka kɛ Gyisɛse a le anwumabɔvolɛ kpanyinli Maekeɛle la.

•   Maekeɛle a le “anwumabɔvolɛ kpanyinli” ne. (Dwuudu 9) Amodinli “anwumabɔvolɛ kpanyinli” finde ɛleka nwiɔ pɛ wɔ Baebolo ne anu. Kɛzi bɛva bɛli gyima wɔ ɛleka nwiɔ ne la kile kɛ bɛlɛka sonla ko ala anwo edwɛkɛ, ɛhye ati anwumabɔvolɛ kokye ala a lɛ amodinli zɔhane a. Ngyehyɛnu zɔhane anu ko ka kɛ Awulae Gyisɛse mɔɔ bɛdwazo ye la “bava ɛnelɛ kpole, anwumabɔvolɛ kpanyinli ɛnelɛ ɔvi anwuma lɔ yeadwu.” (1 Tɛsalonaekama 4:16) Gyisɛse lɛ “anwumabɔvolɛ kpanyinli ɛnelɛ” ɔluakɛ ɔdaye a ɔle anwumabɔvolɛ kpanyinli Maekeɛle a.

•   Maekeɛle a li anwumabɔvolɛ ɛlɔnema ne ati a. ‘Maekeɛle nee ye anwumabɔvolɛma yɛɛ ɛwɔlɛ ne, Seetan honle.’ (Yekile 12:7) Maekeɛle lɛ tumi kpole wɔ anwuma ɔluakɛ bɛfɛlɛ ye “soanvolɛ mgbanyima ne mɔ ko” yɛɛ “mɔɔ nea wɔ menli ne mɔ anwo zo la.” (Daneɛle 10:13, 21; 12:1) Amodinli ɛhye mɔ maa ɔda ali kɛ Maekeɛle a le “anwumabɔvolɛ ɛlɔnema ne kpanyinli kpalɛ ne a,” kɛ mɔɔ New Testament nwomanli David E. Aune hanle la.

   Baebolo ne eza ka awie bieko anwo edwɛkɛ kɛ ɔlɛ tumi wɔ anwumabɔvolɛ ɛlɔnema ne anwo zo. Ɔka “mekɛ mɔɔ bɛbaye Awulae Gyisɛse nee ye anwumabɔvolɛma mɔɔ bɛlɛ tumi la bɛavi anwuma bɛahile wɔ sendɔlɔra nu la, na ɔbali nzenralɛ” la anwo edwɛkɛ.” (2 Tɛsalonaekama 1:7, 8; Mateyu 16:27) Gyisɛse hɔle “anwuma na bɛva anwumabɔvolɛma nee tumivolɛma nee tumililɛma bɛwula ɔ gyakɛ abo.” (1 Pita 3:​21, 22) Nrɛlɛbɛ ɛnle nu kɛ yɛbaha kɛ Nyamenle bava tumi ko ne ala amaa Gyisɛse nee Maekeɛle kɛ bɛnlea ye anwumabɔvolɛ nwuanzanwuanzama ne anwo zo. Emomu, yɛkola yɛka kɛ sonla ko ne ala a bɛfɛlɛ ye Gyisɛse nee Maekeɛle a.

•   Maekeɛle “badwazo” wɔ “amaneɛnwunlɛ” mɔɔ bie ɛtɛsile ɛlɛ la anu. (Daneɛle 12:1) Wɔ Daneɛle buluku ne anu, bɛta bɛfa edwɛkɛkpɔkɛ “badwazo” bɛkile belemgbunli mɔɔ ɔbaheha ɔ nwo kɛ ɔyɛ gyima titili bie la. (Daneɛle 11:​2-4, 21) Gyisɛse Kelaese mɔɔ ɔle “Nyamenle Edwɛkɛ” ne la badwazo kɛ “arelemgbunli Belemgbunli” yeazɛkye Nyamenle agbɔvolɛ na yeabɔ Nyamenle menli ne anwo bane. (Yekile 19:11-​16) Ɔbayɛ ɛhye wɔ “anwongyelelɛ kpole mɔɔ sumunli kɛ ewiade bɔle ɔ bo badwu ɛnɛ bie ɛtɛsile ɛlɛ” la anu.​—Mateyu 24:21, 42.