Duzu A Baebolo Ne Ka Ye Wɔ Ɛhɔnehyelɛ Nwo A?
Baebolo ne bua kɛ
Wɔ Baebolo ne anu, ɛnee saa awie fa adwenle kpalɛ kye ɛhɔne a, Nyamenle die to nu. Noko, ɛnee saa awie anva adwenle kpalɛ anyɛ a Nyamenle ɛnlie ɛndo nu. Noko akee, ɛnɛ Baebolo ne ɛnga kɛ menli ɛhye ɛhɔne yɛɛ ɔndua ɛhɔnehyelɛ.
Tɛnlabelɛ boni mɔ a maanle Baebolo nu menli bie mɔ hyele ɛhɔne a?
Mekɛ mɔɔ bɛlɛkpondɛ moalɛ anzɛɛ adehilelɛ bɛavi Nyamenle ɛkɛ la. Menli mɔɔ ɛnee ɛlɛtu adenle ahɔ Gyɛlusalɛm la hyele ɛhɔne vale lale ye ali kɛ amgba ɛnee bɛlɛkpondɛ Nyamenle moalɛ. (Ɛzela 8:21-23) Pɔɔlo nee Baanabase hyele ɛhɔne mekɛ bie wɔ mekɛ mɔɔ bɛlɛkpa asafo nu mgbanyima la.—Gyima ne 14:23.
Mekɛ mɔɔ bɛlɛfa bɛ adwenle bɛazie Nyamenle bodane zo la. Mekɛ mɔɔ bɛzɔnenle Gyisɛse bɛwiele la, ɔhyele ɛhɔne kenle 40 ɔvale ɔzieziele ɔ nwo ɔmaanle Nyamenle ɛhulolɛdeɛ mɔɔ ɔbayɛ wɔ ye ɛzonlenlɛ gyima ne anu la.—Luku 4:1, 2.
Mekɛ mɔɔ bɛlɛda ye ali kɛ bɛnlu bɛ nwo wɔ bɛ ɛtane nwo la. Gyihova luale ngapezonli Dwowɛle anwo zo hanle hilele Yizilayɛma mɔɔ ɛnli nɔhalɛ la kɛ: ‘Bɛva ɛhɔnehyelɛ, ɛzunlɛ nee nyanelilɛ, yɛɛ bɛ ahonle kɔsɔɔti bɛzia bɛrɛla me nwo ɛke.’—Dwowɛle 2:12-15.
Mekɛ mɔɔ Mgbɔdalɛ Kenle ne badwu la. Ɛnee mɛla mɔɔ kile kɛ ɔwɔ kɛ Yizilayɛma kye ɛhɔne wɔ Mgbɔdalɛ Kenle ne la boka Mɛla mɔɔ Nyamenle vale maanle Yizilayɛma la anwo. * (Sɛlɛvolɛma 16:29-31) Ɛnee ɛhɔnehyelɛ nwo hyia wɔ zɔhane mekɛ ne ɔluakɛ ɛnee ɔkakye Yizilayɛma kɛ bɛnli munli yɛɛ bɛhyia Nyamenle ɛtanefakyɛ.
Ɛhɔnehyelɛ nwo adwenle mɔɔ ɛnfɛta la bie mɔ a le boni?
Amaa menli anye alie bɛ nwo. Gyisɛse hilehilele kɛ ɔwɔ kɛ ɛzonlenlɛ nu ɛhɔnehyelɛ yɛ fealera nu debie, ɔwɔ kɛ ɔyɛ ahenle nee Nyamenle avinli edwɛkɛ.—Mateyu 6:16-18.
Amaa yeala ali kɛ bɛle tenlenema. Ɛhɔnehyelɛ ɛmaa awie anwo ɛnde wɔ ɛbɛlabɔlɛ anzɛɛ sunsum nu.—Luku 18:9-14.
Amaa bɛava ɛtane bie mɔɔ awie anye fuu ɛyɛ la bɛahyɛ ye. (Ayezaya 58:3, 4) Awie mɔɔ ɔyɛ tieyɛ na ɔfi ye ahonle nu ɔnnu ɔ nwo ɔfi ye ɛtane nwo la ala a Nyamenle die ye ɛhɔnehyelɛ to nu a.
Amaa bɛali ɛzonlenlɛ nu amaamuo bie anzi. (Ayezaya 58:5-7) Wɔ ɛhye anu, Nyamenle le kɛ awovolɛ bie mɔɔ ɔ nye ɛnlie ɔluakɛ ɔ mra ɛnvi bɛ ahonle nu ɛngulo ye na emomu bɛkulo ye ɔluakɛ ɔwɔ kɛ bɛyɛ zɔ la ati ɔ.
Asoo ɔle mɛla kɛ Kilisienema bahye ɛhɔne?
Kyɛkyɛ. Nyamenle hanle kɛ Yizilayɛma ɛhye ɛhɔne wɔ Mgbɔdalɛ Kenle ne, noko ɔyele ɔvile ɛkɛ wɔ mekɛ mɔɔ Gyisɛse kpɔdale menli mɔɔ ɛnlu bɛ nwo ɛtane la. (Hibuluma 9:24-26; 1 Pita 3:18) Kilisienema ɛnle Mosisi Mɛla ne mɔɔ ɛnee Mgbɔdalɛ Kenle boka nwo la abo. (Wulomuma 10:4; Kɔlɔsaema 2:13, 14) Ɔti, ɔle Kilisienenli ko biala kpɔkɛzilɛ kɛ ɔbahye ɛhɔne anzɛɛ ɔnrɛhye ɛhɔne.—Wulomuma 14:1-4.
Kilisienema ze ye kɛ ɛhɔnehyelɛ ɛnle debie titili wɔ bɛ ɛzonlenlɛ nu. Baebolo ne ɛnga kɛ ɛhɔnehyelɛ maa awie anye die. Mɔɔ nee ɛhye ɛnle ko la, nɔhalɛ Kilisienema ɛzonlenlɛ maa bɛ nye die na ɔda Gyihova, “anyelielɛ Nyamenle ne” subane ali.—1 Timote 1:11; Nolobɔvo ne 3:12, 13; Galeehyeama 5:22.
Adwenle mɔɔ Baebolo ne lɛ wɔ ɛhɔnehyelɛ nwo la anwo adalɛ edwɛkɛ
Adalɛ edwɛkɛ: Ɛzoanvolɛ Pɔɔlo hanle kɛ ɔwɔ kɛ Kilisienema mɔɔ bɛgya la kye ɛhɔne.—1 Kɔlentema 7:5, King James Version.
Nɔhalɛ edwɛkɛ: Bɛ sa anloa Baebolo ngɛlɛlera mɔɔ ɛhyɛ la ɛnga ɛhɔnehyelɛ nwo edwɛkɛ wɔ 1 Kɔlentema 7:5. * Ɔda ali kɛ menli mɔɔ kopele Baebolo ne la a vale ɛhɔnehyelɛ bokale ngyɛnu ɛhye nee mɔɔ wɔ Mateyu 17:21; Maake 9:29 nee Gyima ne 10:30 anwo a. Adwuleso Baebolo ngilebɛbo dɔɔnwo ɛye ɛhɔnehyelɛ nwo edwɛkɛ mɔɔ ɛnle nɔhalɛ la ɛvi ngyehyɛnu ɛhye mɔ anu.
Adalɛ edwɛkɛ: Ɔwɔ kɛ Kilisienema kye ɛhɔne fa kakye kenle 40 ne mɔɔ Gyisɛse lile wɔ fienemgbole ne anu wɔ ye ɛzɔnenlɛ ne anzi la.
Nɔhalɛ edwɛkɛ: Gyisɛse anyɛ ɛhɔnehyelɛ zɔhane anwo mɛla, yɛɛ Ngɛlɛlera ne ɛngile kɛ alimoa Kilisienema noko yɛle zɔ. *
Adalɛ edwɛkɛ: Saa Kilisienema ɛlɛkakye Gyisɛse ewule ne a ɔwɔ kɛ bɛkye ɛhɔne.
Nɔhalɛ edwɛkɛ: Gyisɛse anga kɛ saa ye ɛdoavolɛma ɛlɛkakye ye ewule ne a bɛhye ɛhɔne. (Luku 22:14-18) Mekɛ mɔɔ Gyisɛse hanle kɛ saa ɔwu a ye ɛdoavolɛma ne bahye ɛhɔne la, ɛnee ɔnhyehyɛ mɛla emomu ɛnee ɔlɛka debie mɔɔ bazi la anwo edwɛkɛ. (Mateyu 9:15) Baebolo ne hanle hilele Kilisienema mɔɔ ɛhɔne ɛlɛku bɛ la kɛ bɛli aleɛ kolaa na bɛahɔ Gyisɛse ewule Ngakyelɛlilɛ ne abo.—1 Kɔlentema 11:33, 34.
^ Nyamenle hanle hilele Yizilayɛma kɛ: “Ɔwɔ kɛ bɛkile bɛ nwo nyane,” anzɛɛ “bɛkile bɛ ɛkɛla nyane,” wɔ Mgbɔdalɛ Kenle ne. (Sɛlɛvolɛma 16:29, 31; King James Version) Ɛnee bɛte edwɛkɛ ɛhye abo kɛ ɔfale ɛhɔnehyelɛ nwo. (Ayezaya 58:3) Ɔti, Contemporary English Version hilele ɛhye abo kɛ: “Ɔnle kɛ bɛdi aleɛ wɔ mekɛ mɔɔ bɛlɛkɔ ɛkɛ ne la bɛfa bɛkile kɛ bɛlɛdi bɛ ɛtane ne mɔ anwo nyane.”
^ Nea A Textual Commentary on the Greek New Testament, mɔɔ Bruce M. Metzger hɛlɛle la, Third Edition, mukelɛ 554.
^ Mɔɔ fale Lent kenle 40 ɛhɔnehyelɛ ne tetedwɛkɛ nwo la, New Catholic Encyclopedia ne ka kɛ: “Wɔ ɛvoya nsa mɔɔ limoa la anu, ɛnee ɛhɔnehyelɛ mɔɔ bɛfa bɛsiezie bɛ nwo bɛmaa [Easter] ɛvoyia ne la ɛmbo dapɛne ko; ɛnee yehyele zo o, ɔle kenle ko anzɛɛ nwiɔ. . . . Bɛlimoale bɛhanle ɛhɔne mɔɔ bɛkye ye kenle 40 la anwo edwɛkɛ wɔ mɛla mɔɔ tɔ zo nnu mɔɔ bɛlile ye wɔ Ayia mɔɔ bɛyɛle ye wɔ Nicaea (325) la abo, noko nwomama dɔɔnwo ɛnlie ɛnli kɛ ɔfale ɛhɔne mɔɔ bɛkye wɔ Easter mekɛ nu la anwo.”—Second Edition, Volume 8, mukelɛ 468.
Bie A Eza Ɛ Nye Balie
BAEBOLO KPUYA MƆƆ BƐBUA
Asoo Nyamenle Bava Ahyɛ Me?
Suzu mɔɔ Baebolo ne ka ye wɔ kɛzi yɛbahola yɛanyia Nyamenle ɛkɛ ne ɛtanefakyɛ la anwo.
YƐ NWO EDWƐKƐ
Maa Yɛrakpɔla Wɔ
Ɛ nee yɛ ɛzuzu Baebolo nu edwɛkɛ bie anwo anzɛɛ sukoa Gyihova Alasevolɛ anwo edwɛkɛ dɔɔnwo.