Baebolo ne kilehile kɛ ɛyavalɛ mɔɔ bɛngomo zo la boda ahenle mumua ne nee menli gyɛne. (Mrɛlɛbulɛ 29:22) Awie bahola ava ɛya, noko Baebolo ka kɛ menli mɔɔ ‘ɛyavalɛ’ le bɛ subane la ɛnrɛnyia ngoane. (Galeehyeama 5:​19-​21) Ngyinlazo ngakyile mɔɔ bahola aboa awie yeamaa yeali ɛyavalɛ zo la wɔ Baebolo ne anu.

•  Asoo mekɛ ne amuala a ɛyavalɛ ɛnle kpalɛ a?

•  Mekɛ boni a ɛyavalɛ ɛnle kpalɛ a?

•  Kɛ ɔkɛyɛ na wɔahola wɔali ɛyavalɛ zo ɛ?

•  Baebolo tɛkese ngakyile mɔɔ ka ɛyavalɛ nwo edwɛkɛ la

 Kyɛkyɛ. Tɛnlabelɛ bie mɔ bahola amaa awie ava ɛya. Kɛ neazo la, nɔhavonli Nihɛmaya ‘vale ɛya kpole’ wɔ mekɛ mɔɔ ɔnwunle kɛ bɛlɛsisi ɔ mediema azonvolɛ la.​—Nihɛmaya 5:6.

 Ɔdwu mekɛ ne bie a Nyamenle fa ɛya. Kɛ neazo la, mɔɔ Yizilayɛma anli ɛwɔkɛ mɔɔ bɛbɔle kɛ bɛbazonle Gyihova angomekye azo na bɛzonlenle nyamenle gyɛne la, ‘Gyihova vale bɛ nwo ɛya kpole.’ (Maanlebuvolɛma 2:​13, 14) Noko ɛyavalɛ ɛmboka Gyihova Nyamenle subane titili ne mɔ anwo. Ye ɛyavalɛ lɛ ye mekɛ yɛɛ ɔkomo ɔ nwo zo.​—Adendulɛ 34:6; Ayezaya 48:9.

 Ɛyavalɛ mɔɔ bɛngola bɛngomo zo na ɔngyi kpɔkɛ zo la ɛnle kpalɛ, kɛ mɔɔ ɔyɛ a ɔsi wɔ menli mɔɔ ɛnli munli afoa nu la. Kɛ neazo la:

•   Mɔɔ Nyamenle kpole Keen afɔlebɔlɛ ne la, “ɛya hunle ye kpole.” Keen maanle ɛya vole ɔ nwo zo na ɔhunle ɔ diema ne.​—Mɔlebɛbo 4:​3-8.

•   Ngapezonli Dwona ‘vale ɛya’ wɔ mekɛ mɔɔ Nyamenle nwunle Nenɛvɛma anwunvɔne la. Nyamenle denrɛdenrɛle Dwona, na ɔhanle kɛ, tɛ ‘ɛya kpalɛ a yeva la,’ anrɛɛ ɔwɔ kɛ ɔse bɛdabɛ mɔɔ bɛnlu bɛ nwo la anwunvɔne.​—Dwona 3:10–​4:​1, 4, 11. *

 Neazo ɛhye mɔ maa ɔda ali kɛ alesama mɔɔ ɛnli munli la, “ɛyavalɛ ɛmmaa Nyamenle tenleneyɛlɛ ɛnla ali.”​—Gyemise 1:​20.

•   Nwu esiane mɔɔ wɔ ɛya kpole nu la. Bie mɔ dwenle kɛ saa bɛda bɛ ɛyavalɛ ali a ɔkile kɛ bɛ nwo yɛ se. Nɔhalɛ nu, awie mɔɔ ɛngola ɛngomo ye ɛya zo la lɛ sinlidɔlɛ kpole kpalɛ. “Sonla mɔɔ ɛngola ɔ nwo zo komo la le kɛ suakpole mɔɔ bɛbubu nwolɛ bane ne amuala bɛgua la.” (Mrɛlɛbulɛ 25:28; 29:11) Noko, saa yɛbɔ mɔdenle kɛ yɛbahomo yɛ ɛya zo a, ɛnee yɛlɛkile kɛ yɛ nwo yɛ se yɛɛ yɛlɛ ndelebɛbo. (Mrɛlɛbulɛ 14:29) Baebolo ne ka kɛ: “Sonla mɔɔ ɛnva ɛya mgbane mgbane la le kpalɛ tɛla katakyie.”​—Mrɛlɛbulɛ 16:32.

•   Di ɛyavalɛ zo kolaa na yeamaa wɔayɛ debie mɔɔ nzinlii ɛbanlu ɛ nwo la. Edwɛndolɛ 37:8 ka kɛ: “Mmafa ɛya, yɛɛ mmamaa wɔ ahonle futu!” Ɔtoa zo kɛ: “Mmafonla ɛ nwo; ɔwie munzule.” Kakye kɛ saa ɛfa ɛya a, ɛkola ɛkpa kɛ ɛbabu ɛ nye wɔagua zo kolaa na yeava “munzule” yeara. Kɛ mɔɔ Ɛfɛsɛsema 4:​26 ka la: “Bɛva ɛya, noko bɛmmayɛ ɛtane.”

•   Saa ɔbayɛ boɛ a twe ɛ nwo wɔ mekɛ mɔɔ ɛlɛfa ɛya la. Baebolo ne ka kɛ: “Mgbonde bo ɛbɔlɛ le kɛ azuledukuelɛ, yemɔti twe ɛ nwo kolaa na butule ne abɔ ɔ bo.” (Mrɛlɛbulɛ 17:14) Nrɛlɛbɛ wɔ nu kɛ ɛbaziezie ngyegyelɛ ne ndɛndɛ ɛdeɛ, noko ɔwɔ kɛ ɛ nee ahenle ɛya ne dwo kolaa na bɛahola bɛaziezie edwɛkɛ ne wɔ adenle kpalɛ zo.

•    Nwu edwɛkɛ ne. Mrɛlɛbulɛ 19:11 ka kɛ: “Adwenle kpalɛ ɛmmaa sonla ɛnva ɛya mgbane mgbane.” Ɔle kpalɛ kɛ ɛbanwu edwɛkɛ ne amuala kolaa na wɔazi kpɔkɛ. Saa yɛtie afoa biala edwɛkɛ ne a, ɔnrɛmaa yɛnrɛva ɛya ndɛndɛ.​​—Gyemise 1:​19.

•    Yɛ asɔne amaa wɔanyia anzodwolɛ. Asɔneyɛlɛ boa maa ɛnyia “Nyamenle anzodwolɛ ne mɔɔ bo ndelebɛbo muala azo la.” (Felepaema 4:7) Asɔneyɛlɛ boka ndenle titili mɔɔ yɛdua zo yɛnyia Nyamenle sunsum nwuanzanwuanza ne la anwo, na ɔboa ɔmaa yɛnyia subane le kɛ anzodwolɛ, abotane, yɛɛ bɛnwozohomolɛ.​—Luku 11:13; Galeehyeama 5:​22, 23.

•   Kpa agɔnwolɛma kpalɛ. Yɛta yɛsukoa yɛ gɔnwo mɔ. (Mrɛlɛbulɛ 13:20; 1 Kɔlentema 15:33) Ɛhye ati, Baebolo ne bɔ yɛ kɔkɔ kɛ: “Mmafa sonla mɔɔ ye ahonle bikye ye la agɔnwolɛ, yɛɛ ɛ nee sonla mɔɔ fa ɛya mgbane mgbane la mmatu.” Duzu ati ɔ? “Anrɛɛ ɛkɛva ɔ gyakɛ na ɛkɛva ɛ nwo ɛkɛdo ɛhane nu.”​—Mrɛlɛbulɛ 22:24, 25.