Ɔwɔ Kɛ Kilisienema Di Ɛnwomenlelielɛ Kenle Ɔ?
Baebolo ne bua kɛ
Kilisienema ɛnle dapɛne dapɛne ɛnwomenlelielɛ kenle ne abo. Kilisienema wɔ “Kelaese mɛla ne” mɔɔ Ɛnwomenlelielɛ Kenle ne ɛmboka nwo la abo. (Galeehyeama 6:2; Kɔlɔsaema 2:16, 17) Duzu ati a yɛkola yɛka ye zɔ a? Mɔɔ limoa, suzu kɛzi Ɛnwomenlelielɛ Kenle ne bɔle ɔ bo la anwo.
Duzu a le Ɛnwomenlelielɛ Kenle ne?
Edwɛkɛkpɔkɛ “ɛnwomenlelielɛ” vi Hibulu edwɛkɛkpɔkɛ mɔɔ kile kɛ “ɛgyakyi debie bie ɛyɛlɛ” la anu. Mekɛ mɔɔ limoa mɔɔ bɛhanle nwolɛ edwɛkɛ wɔ Baebolo ne anu la a le mekɛ mɔɔ bɛvale mɛla ne bɛmaanle tete Yizilayɛma la. (Adendulɛ 16:23) Kɛ neazo la, mɛla ne mɔɔ tɔ zo nna wɔ Mɛla Bulu ne anu la se: ‘Bɛhakye kɛ bɛkɛzie Ɛnwomenlelielɛ Kenle ne nwuanzanwuanza. Bɛva kenle nsia bɛyɛ gyima, bɛyɛ bɛ gyima muala, na kenle nsuu ne le Gyihova bɛ Nyamenle ne Ɛnwomenlelielɛ Kenle; bɛmmayɛ gyima biala.’ (Adendulɛ 20:8-10) Ɛnee Ɛnwomenlelielɛ Kenle ne bɔ ɔ bo wɔ Yalɛ mɔɔ sɛnzɛne ne ɛhɔdɔ la kɔdwu Folɛ mɔɔ sɛnzɛne ne ɛhɔdɔ la. Mekɛ zɔhane dwu a, Yizilayɛma ɛnvi ɛleka mɔɔ bɛde la, bɛnwuda senle, bɛnsesa ɛyɛne, yɛɛ bɛnzoa debie. (Adendulɛ 16:29; 35:3; Ɛdianlɛ 15:32-36; Gyɛlɛmaya 17:21) Ɛnee saa awie to Ɛnwomenlelielɛ Kenle mɛla ne a bɛku ye.—Adendulɛ 31:15.
Wɔ tete Dwuuma mekɛ zo, ɛnee eza bɛfɛlɛ mekɛ gyɛne bie mɔ, ɛvolɛ 7 ne nee ɛvolɛ 50 ne ɛnwomenlelielɛ mekɛ. Wɔ Ɛnwomenlelielɛ ɛvolɛ ne mɔ anu, ɛnee bɛnlua aleɛ biala wɔ azɛlɛ ne azo, yɛɛ ɛnee bɛntinlitinli Yizilayɛnli biala mɔɔ tua kakɛ la kɛ ɔdua.—Sɛlɛvolɛma 16:29-31; 23:6, 7, 32; 25:4, 11-14; Mɛla ne 15:1-3.
Gyisɛse afɔlebɔlɛ ne maanle Ɛnwomenlelielɛ Kenle mɛla ne rale awieleɛ
Duzu ati a Ɛnwomenlelielɛ Kenle mɛla ne ɛnkyekye Kilisienema ɛ?
Menli mɔɔ ɛnee bɛdi Mosisi Mɛla ne mɔɔ ɛha la azo la ala a ɛnee wɔ Ɛnwomenlelielɛ Kenle mɛla ne abo a. (Mɛla ne 5:2, 3; Yizikeɛle 20:10-12) Nyamenle anga ye ɛlɛ kɛ awie mɔ gyɛne noko ɛli ɛnwomenlelielɛ kenle ne. Eza Gyisɛse Kelaese afɔlebɔlɛ ne liele Dwuuma bɔbɔ vile Mosisi mɛla ne mɔɔ Mɛla Bulu ne boka nwo la “tumi bo.” (Wulomuma 7:6, 7; 10:4; Galeehyeama 3:24, 25; Ɛfɛsɛsema 2:15) Yemɔti Kilisienema ɛnli Mosisi Mɛla ne azo, emomu bɛdi ɛlɔlɛ mɛla ne mɔɔ tɛla biala la azo.—Wulomuma 13:9, 10; Hibuluma 8:13.
Ɛnwomenlelielɛ Kenle ne anwo adwenle mɔɔ ɛndenrɛ
Adwenle mɔɔ ɛndenrɛ: Nyamenle hyehyɛle Ɛnwomenlelielɛ ne wɔ mekɛ mɔɔ ɔliele ɔ menle wɔ ninyɛne ɛbɔlɛ kenle ne mɔɔ tɔ zo nsuu azo la.
Nɔhalɛ edwɛkɛ: Baebolo ne ka kɛ: “Yemɔti Nyamenle yilale kenle ne mɔɔ tɔ zolɛ nsuu ne la azo, na ɔyɛle ye kenle nwuanzanwuanza, ɔboalekɛ kenle zɔhane a ɔvale ɔliele ye ɛnwomenle, ɔyele ɔ sa wɔ gyima mɔɔ ɔbɔ ewiade la ɔyɛle la anwo a.” (Mɔlebɛbo 2:3) Ngyɛnu ɛhye ɛngile mɛla mɔɔ Nyamenle vale maanle alesama la, emomu ɔlɛka debie mɔɔ Nyamenle yɛle wɔ kenle ne mɔɔ tɔ zo nsuu la anwo edwɛkɛ. Baebolo ne ɛnga kɛ awie limoale lile ɛnwomenlelielɛ kenle kolaa na Mosisi ara.
Adwenle mɔɔ ɛndenrɛ: Ɛnee Yizilayɛma wɔ Ɛnwomenlelielɛ Kenle mɛla ne abo kolaa na bɛava Mosisi Mɛla ne bɛamaa bɛ.
Nɔhalɛ edwɛkɛ: Mosisi hanle hilele Yizilayɛma kɛ: ‘Gyihova yɛ Nyamenle ne nee yɛ yɛle ngyekyeleɛ wɔ Saenae Boka.’ Ɛnee Ɛnwomenlelielɛ Kenle mɛla ne boka ngyekyeleɛ ɛhye anwo. (Mɛla ne 5:2, 12) Mɔɔ Yizilayɛma yɛle ye wɔ ɛnwomenlelielɛ kenle ne anwo la kile kɛ ɛnee ɔle debie fofolɛ ɔmaa bɛ. Saa ɛnee Yizilayɛma wɔ Ɛnwomenlelielɛ Kenle mɛla ne abo dɛba wɔ mekɛ mɔɔ ɛnee bɛwɔ Yigyibiti la a, ɛnee duzu ati a Nyamenle hanle kɛ Ɛnwomenlelielɛ Kenle ne bamaa bɛahakye mekɛ mɔɔ ɔliele bɛ ɔvile Yigyibiti la ɛ? (Mɛla ne 5:15) Duzu ati a bɛhanle bɛhilele bɛ kɛ bɛmmakɔsesa mana wɔ kenle ne mɔɔ tɔ zo nsuu la ɛ? (Adendulɛ 16:25-30) Na duzu ati a ɛnee bɛnnwu kɛzi ɔwɔ kɛ bɛyɛ nrenyia bie mɔɔ limoale donle Ɛnwomenlelielɛ Kenle mɛla ne la ɛ?—Ɛdianlɛ 15:32-36.
Adwenle mɔɔ ɛndenrɛ: Ɛnwomenlelielɛ Kenle ne le ngyekyeleɛ mɔɔ bɛntulu ye ɛlɛ na ɔwɔ kɛ yɛdi zo.
Nɔhalɛ edwɛkɛ: Baebolo ngilebɛbo bie mɔ ka Ɛnwomenlelielɛ Kenle ne anwo edwɛkɛ kɛ “ɔle ngyekyeleɛ mɔɔ bɛntulu ye ɛlɛ.” (Adendulɛ 31:16) Noko Hibulu edwɛkɛkpɔkɛ mɔɔ bɛhile ɔ bo “bɛntulu ye ɛlɛ” la eza kola kile “debie mɔɔ ɔbahyɛ,” ɔngile kɛ ɔbadɛnla ɛkɛ ne dahuu. Kɛ neazo la, Baebolo ne vale edwɛkɛkpɔkɛ ko ne ala hilele kɛzi Yizilayɛ ɛsɔfolilɛ ne bayɛ la, noko Nyamenle maanle ɛsɔfolilɛ ne rale awieleɛ wɔ ɛvolɛ kɛyɛ 2,000 mɔɔ ɛze ɛhɔ la anu.—Adendulɛ 40:15; Hibuluma 7:11, 12.
Adwenle mɔɔ ɛndenrɛ: Ɔwɔ kɛ Kilisienema di Ɛnwomenlelielɛ Kenle mɛla ne azo ɔluakɛ Gyisɛse lile zo.
Nɔhalɛ edwɛkɛ: Gyisɛse lile Ɛnwomenlelielɛ Kenle ne ɔluakɛ ɛnee ɔle Dwuunli yɛɛ ɛnee ɔwɔ Mosisi Mɛla ne abo ɔvi ye ngakula nu. (Galeehyeama 4:4) Mɔɔ Gyisɛse wule la, Mɛla ngyekyeleɛ ɛhye, mɔɔ Ɛnwomenlelielɛ Kenle mɛla ne boka nwo la, rale awieleɛ.—Kɔlɔsaema 2:13, 14.
Adwenle mɔɔ ɛndenrɛ: Ɛzoanvolɛ Pɔɔlo yɛle Kilisienenli la ɛnee ɔdi Ɛnwomenlelielɛ Kenle ne.
Nɔhalɛ edwɛkɛ: Pɔɔlo hɔle nyianu azua nu wɔ Ɛnwomenlelielɛ Kenle, noko yeangɔ kɛ ɔ nee Dwuuma kali Ɛnwomenlelielɛ ne. (Gyima ne 13:14; 17:1-3; 18:4) Emomu kɛ mɔɔ ɛnee bɛta bɛyɛ la, ɔhɔhanle edwɛkpa ne wɔ nyianu azua nu kɛ mɔɔ bɛkola bɛto ɛsalɛ bɛfɛlɛ awie bɛmaa ɔkilehile Baebolo nu edwɛkɛ nu ɔkile menli mɔɔ ɛyia la. (Gyima ne 13:15, 32) Pɔɔlo hanle edwɛkpa ne “dahuu,” tɛ Ɛnwomenlelielɛ Kenle ala.—Gyima ne 17:17.
Adwenle mɔɔ ɛndenrɛ: Kilisienema Ɛnwomenlelielɛ Kenle a le Molɛ.
Nɔhalɛ edwɛkɛ: Baebolo ne ɛnli mɛla biala ɛmmaa Kilisienema kɛ bɛye Molɛ mɔɔ le dapɛne ne anu kenle mɔɔ limoa la bɛzie ahane bɛva bɛlie bɛ menle na bɛzonle Nyamenle. Ɛnee Kilisienema mɔɔ limoa la yɛ gyima Molɛ kɛ mɔɔ bɛyɛ ye kenle gyɛne biala la. The International Standard Bible Encyclopedia se: “Mekɛ mɔɔ Constantine [Wulomu amɛnlado bie mɔɔ sonle awozonle la] lile mɛla kɛ ɔnle kɛ bɛyɛ gyima titili bie mɔ wɔ Molɛ wɔ ɛvoya mɔɔ tɔ zo 4 ne anu la yɛɛ menli bɔle ɔ bo kɛ bɛdi ɛnwomenlelielɛ kenle wɔ Molɛ a.” *
Noko duzu a yɛbaha wɔ edwɛkɛ mɔɔ wɔ Baebolo ne anu mɔɔ ɔmaa ɔyɛ kɛ asɛɛ Molɛ le kenle titili la anwo a? Baebolo ne ka kɛ ɛzoanvolɛ Pɔɔlo nee ɔ mediema diedima bɔle nu lile aleɛ wɔ ‘kenle ne mɔɔ limoa,’ mɔɔ le Molɛ la, na ɛnee ndelebɛbo wɔ nu ɔluakɛ aleɛ kye a Pɔɔlo bavi ɛkɛ. (Gyima ne 20:7) Zɔhane ala a bɛhanle bɛhilele asafo bie mɔ kɛ “Molɛ biala, bɛ nuhua ko biala ɛde ezukoa mɔɔ yenyia ye dapɛne ne anu la bie ɛdo ahane” amaa bɛava bɛboa bɛ mediema diedima mɔɔ wɔ ngyegyelɛ nu la, noko ɛnee bɛlɛfa kɛzi bɛbayɛ ezukoa nwo ngyehyɛlɛ kpalɛ la anwo nzuzulɛ bɛamaa ala. Ɛnee bɛfa ezukoa ne bɛsie bɛ azua nu, bɛnva bɛmba ɛleka mɔɔ bɛyia bɛsonle la.—1 Kɔlentema 16:1, 2.
Adwenle mɔɔ ɛndenrɛ: Ɔnle kpalɛ kɛ ɛbaye kenle ko wɔ dapɛne ne anu wɔazie ahane wɔava wɔalie ɛ menle na wɔazonle Nyamenle.
Nɔhalɛ edwɛkɛ: Baebolo ne maa Kilisienenli biala si ɔ ti anwo kpɔkɛ wɔ ɛhye anwo.—Wulomuma 14:5.
^ Eza nea New Catholic Encyclopedia, Second Edition, Volume 13, mukelɛ 608.
Bie A Eza Ɛ Nye Balie
BAEBOLO KPUYA MƆƆ BƐBUA
Nyamenle Mɛla Bulu Ne A Le Boni?
Nwane mɔ a bɛvale bɛmaanle bɛ a? Asoo Kilisienema wɔ ɔ bo ɔ?
KPUYA MƆƆ MENLI TA BIZA
Gyihova Alasevolɛ Le Keleseɛnema Ɔ?
Suzu deɛmɔti yɛle Keleseɛnema nee kɛzi yɛle ngakyile yɛfi asɔne ngakyile mɔɔ bɛfɛlɛ bɛ nwo Keleseɛnema anwo la anwo.
ƐZINZALƐ ARANE
Asoo Ɛnee Nyamenle Mɛla Maa Yizilayɛma Le Kpalɛ Na Ɔfɛta?
Ngyinlazo titile nna hilele Yizilayɛ ndɛnebuavolɛma adenle.
YƐ NWO EDWƐKƐ
Maa Yɛrakpɔla Wɔ
Ɛ nee yɛ ɛzuzu Baebolo nu edwɛkɛ bie anwo anzɛɛ sukoa Gyihova Alasevolɛ anwo edwɛkɛ dɔɔnwo.