“Ɔyɛ a nla nwo nganeɛdelɛ mɔɔ anu yɛ se la ba me ti anu arɛlevilɛ nu. Ɛbaha kɛ asɛɛ bɛva awie gyɛne adwenle bɛwula me ti anu la.”​—Vera.

 “Ɔle kɛ asɛɛ nla nwo nganeɛdelɛ ɛnle debie mɔɔ bɛkomo zo a. Ɛbanwu kɛ ɛnee mebɔ ɔ bo melɛmemaa me sa zo kɛ asɛɛ metu la.”​—John.

 Asoo ɛte nganeɛ kɛ Vera anzɛɛ John? Saa zɔhane a ɔde a, edwɛkɛ ɛhye baboa wɔ.

•  Duzu ati a ɔnle kɛ yɛkɔ zo yɛdwenle nla nwo a?

•  Duzu ati a ɔnla aze kɛ yɛbaye yɛ adwenle yɛavi nla zo a?

•  Mɔɔ ɛbahola wɔayɛ la

•  Mɔɔ ɛ tipɛnema ka la

 “Kpavolɛ bie mɔɔ bɛfɛlɛ ye Alex la ka kɛ: “Me mame adiema nrenyia hanle hilele me kɛ, saa Nyamenle ɛngulo kɛ menyia nla nu ngitanwolilɛ a, anrɛɛ ɔnrɛva nla nwo nganeɛdelɛ ɔnrɛbɔ me.”

 Alex mame adiema nrenyia ne edwɛkɛ ne foa bie le nɔhalɛ​—Nyamenle vale nla nwo nganeɛdelɛ bɔle yɛ ɔlua ndelebɛbo kpalɛ bie ati. Ɔlua awolɛ ti a alesama abusua ne tɛbɔ ɛkɛ ne badwu ɛnɛ a. Yemɔti duzu ati bɔbɔ a ɔwɔ kɛ ɛbɔ mɔdenle kɛ ɛye wɔ adwenle wɔavi nla zo ɛ? Ndelebɛbo nwiɔ mɔɔ anwo hyia la ɛne:

•   Baebolo ne kilehile kɛ Nyamenle bodane a le kɛ, menli nwiɔ mɔɔ bɛgya la ala a lɛ nwolɛ adenle nyia nla nu ngitanwolilɛ a.​—Mɔlebɛbo 1:28; 2:24.

   Saa ɛbu Nyamenle ɛbɛlabɔlɛ nwo ngyinlazo ne na ɛtɛgyale a, nla mɔɔ ɛbava wɔ adwenle wɔazie zo la bamaa wɔayɛ basaa, ɔluakɛ ɛnrɛhola ɛnrɛli wɔ nganeɛdelɛ ne anwo gyima. Ɔbahola yeamaa wɔava ɛ nwo wɔawula nla nu ngitanwolilɛ mɔɔ ɔnle ye adenle zo la anu. Menli dɔɔnwo ka kɛ bɛnlu bɛ nwo kɛ bɛyɛle zɔ la.

•   Saa ɛbɔ mɔdenle kɛ ɛbaye wɔ adwenle wɔavi nla zo a, ɔbamaa wɔanyia bɛnwozohomolɛ na ɛhye baboa wɔ wɔ ɛbɛlabɔlɛ nu.​—1 Kɔlentema 9:25.

 Subane zɔhane baboa wɔ yeamaa yeawie wɔ boɛ ɛnɛ nee kenle bie. Neɛnleanu kile kɛ, ngakula mɔɔ kola komo bɛ nwo zo la ɛnda ɛnyia kpɔkɛdelɛ nee ezukoa nwo ngyegyelɛ yɛɛ bɛdi mɛla zo. a

 Saa ɛle kpavolɛ anzɛɛ bɛlɛra a, nzenzaleɛ bie mɔ kɔ zo wɔ wɔ sonlabaka ne anu mɔɔ ɔmaa ɛnyia nla nwo nganeɛdelɛ a. Ɛye yemɔ ɛsie ahane a, debie mɔɔ menli mɔɔ ɛbɔ yɛ nwo mgbɔlɔka ɛyia dwenle nwo na bɛka nwolɛ edwɛkɛ titili la a le nla, na ɛhye maa ɔyɛ se kɛ ɛbaye wɔ adwenle wɔavi zo.

 “Asɛɛ TV zo gyimalilɛ biala kanvo nla mɔɔ li agyalɛ nyunlu la, na bɛnga ngyegyelɛ mɔɔ wɔ nu la. Ɔnyɛ se kɛ ɛbava wɔ adwenle wɔazie nla zo saa bɛmaa ɛnwu kɛ ngyegyelɛ biala ɛnle nla nu ɛbɛlatane zo a.”​—Ruth.

 “Mete nla nwo edwɛkɛ mɔɔ ɛnle kpalɛ la wɔ gyima nu, na ɔyɛ a debie se menva me adwenle menzie zo. Bɛmaa ɔyɛ kɛ asɛɛ nvonleɛ biala ɛnle nla nu ɛbɛlatane nwo la.”​—Nicole.

 “Saa ɛlɛnea nvoninli wɔ yintanɛte ne azo a, ɔnla aze kɛ ɛbaye wɔ adwenle wɔavi nla zo. Nla nwo nvoninli ko mɔɔ ɛbanlea la bahola aha wɔ adwenle nu ahyɛ na ɔbayɛ se kɛ ɛ rɛle bavi!”​—Maria.

 Ngyegyelɛ ɛhye mɔ bahola amaa wɔade nganeɛ kɛ ɛzoanvolɛ Pɔɔlo la. Ɔhɛlɛle kɛ: “Mekɛ mɔɔ mekulo kɛ meyɛ mɔɔ le kpalɛ la, ɛnee ɛtane ala a gyi me nye zo a.”​—Wulomuma 7:21.

 Fa wɔ adwenle sie debie fofolɛ azo. Bɔ mɔdenle kɛ ɛbaye wɔ adwenle wɔavi nla zo na wɔava wɔazie debie fofolɛ azo. Nwɔhoa bie mɔɔ ɛ nye die nwo, agbɔkɛ nu ɛkpundinlɛ anzɛɛ debie biala mɔɔ bamaa wɔ adwenle avi zo la. Bɛlɛra bie mɔɔ bɛfɛlɛ ye Valerie la ka kɛ: “Baebolo ne ɛgengalɛ boa kpalɛ, adwenle mɔɔ kpogya la wɔ Baebolo ne anu, mekɛ mɔɔ ɛlɛnyia adwenle ɛhye mɔ dɔɔnwo la, ɔmmaa ɛnnyia mekɛ ɛndwenle ninyɛne gyɛne mɔɔ anwo ɛngyia la anwo.”

 Ɔle nɔhalɛ kɛ nla nwo adwenle bara ɛ ti anu, noko mɔɔ ɛbayɛ ye wɔ nwolɛ la gyi ɛ nwo zo. Saa ɛkulo a, ɛbahola wɔakpo adwenle ɛhye mɔ.

 “Saa nla nwo adwenle ɛlɛba me ti anu a, mebɔ mɔdenle kɛ mebadwenle debie fofolɛ nwo. Eza mebɔ mɔdenle kɛ mebanwu debie mɔɔ maa menyia adwenle zɛhae mɔ la​—saa ɔle edwɛne anzɛɛ nvoninli bie a, mekyikyi ye ndɛndɛ.”​—Helena.

 Baebolo ngyinlazo: “Debie biala mɔɔ le tenlene, debie biala mɔɔ nwolɛ te . . . la, bɛhɔ zo bɛzuzu ninyɛne ɛhye mɔ anwo.”​—Felepaema 4:8.

 Kpa agɔnwolɛ kpalɛ. Saa ɛ gɔnwo mɔ ta ka nla nwo edwɛkɛ a, ɔbayɛ se yeamaa wɔ kɛ ɛbaye wɔ adwenle wɔavi nla zo.

 “Kɛ awie mɔɔ metɛdwule ɛvolɛ 20 la, meta menyia nla nwo adwenle ɛtane, na dɔɔnwo vi me gɔnwo mɔ. Saa ɛwɔ menli mɔɔ fa bɛ adwenle sie nla nwo atiakunluwɔzo ɛtane zo la avinli a, ɔbamaa wɔava wɔ adwenle wɔazie wɔ nganeɛdelɛ zo somaa na yemɔ maa ngyegyelɛ ne yɛ kpole.”​—Sarah.

 Baebolo ngyinlazo: “Sonla mɔɔ nee nrɛlɛbɛvolɛma tu la nwu nrɛlɛbɛ, na mɔɔ nee ahoasea tu la nwu ɔ nyunlu.”​—​—Mrɛlɛbulɛ 13:20.

 Kpo anyelielɛ ninyɛne mɔɔ ɛnle kpalɛ la. Ɔle nɔhalɛ bɔkɔɔ kɛ nla nwo edwɛkɛ ɛbu zo wɔ ninyɛne mɔɔ bɛfa bɛdielie bɛ nye la anu. Nicole ka kɛ: “Me ngyegyelɛ kpole a le edwɛne. Ɔkola ɔmaa menyia nla nwo nganeɛdelɛ kpole mɔɔ mennwu kɛzi meyɛ me nwo bɔbɔ a.”

 “Membɔle ɔ bo kɛ menea vidio nee TV zo gyimalilɛ mɔɔ ka nla nwo edwɛkɛ la. Me nye kara me nwo zo la, ɛnee nla ala a medwenle nwo a. Mekakye mɔɔ vale ngyegyelɛ ne rale la bɔkɔɔ. Mɔɔ mengyakyile vidio nee TV zo gyimalilɛ zɔhane mɔ ɛnleanlɛ la, meanva me adwenle meanzie nla zo bieko. Saa yɛyɛ nyeyenu wɔ ninyɛne mɔɔ yɛfa yɛdie yɛ nye la anu a, ɔboa yɛ ɔmaa yɛye yɛ adwenle yɛfi nla nwo nganeɛdelɛ zo.”​—Joanne.

 Baebolo ngyinlazo: “Adwɔmane ɛbɛla nee nyɛleɛ evinli biala anzɛɛ anyebolo ɛdeɛ, bɛmmabɔ zo wɔ bɛ avinli.”​—Ɛfɛsɛsema 5:3.

 Nɔhalɛ ne a le kɛ: Menli bie mɔ nla nwo nganeɛdelɛ hyia bɛ somaa mɔɔ ɔti bɛte nganeɛ kɛ bɛnrɛhola yɛɛ ɔnle kɛ bɛkomo zo. Noko Baebolo ne ɛnga ye zɔ. Ɔmaa yɛ anwosesebɛ kɛ yɛbahola yɛahomo yɛ adwenle nee yɛ nzuzulɛ zo, na ɛhye le enililɛ.

 Baebolo ngyinlazo: “Bɛmaa [bɛhɔ] zo bɛyɛ bɛ fofolɛ wɔ tumi ne mɔɔ kile bɛ adwenle ne adenle la anu.”​—Ɛfɛsɛsema 4:23.