Awieleɛ bɔkɔɔ ne, akee mrenyia ne mɔ yɛle koonwu. Bie a anwoma mɔɔ ɛlɛbɔ avi Areleebea ɛsɛlɛ ne azo la ala a ɛnee bɛte a. Ɛnee kpolerazulɛ tendenle ne ɛmaa Dwobu ɛvɛ na ɔnnwu edwɛkɛ bieko mɔɔ ɔka a. Pɛ Dwobu mɔɔ ɔ nye gyi ɔ gɔnwo mɔ nsa ne, Ɛlaefaze, Beledade nee Zofaa anyunlu​—kɛ asɛɛ ɔlɛka yeahile bɛ kɛ, ‘bɛlɛ edwɛkɛ bieko a bɛha ɛ’​—la anwo nvoninli? Noko ɛnee bɛzi bɛ ti aze anzɛɛ bɛlɛnea ɛleka bie. Bɛ nyunlu guale aze, ɔluakɛ bɛ edwɛkɛ “mgbane mgbane” ne angola anli ye bodane nwo gyima. (Dwobu 16:3) Na ɛnee Dwobu ɛbɔ kpɔkɛ kɛ ɔkɔ zo yeagyinla ye munlililɛ nu.

Bie a Dwobu dele nganeɛ kɛ ɔwɔ kɛ ɔgyinla ye munlililɛ nu wɔ adenle biala azo. Ye anwonyia yɛɛ ɔ mra bulu ne vile ɔ sa, ɔ gɔnwo mɔ nee ye kpalɛzoamra mɔɔ bɛboa ye na bɛbu ye la noko kpole ye na awieleɛ bɔkɔɔ ne, ye kpɔkɛdelɛ zɛkyele. Ewule ne maanle ɔ nwonane ne yɛle bile tuu, nganlɛ dule ye na ɔ nwo yɛle azonlɛ ngome. Ɛnee ye ɛnwomenle bɔbɔ bɔ. (Dwobu 7:5; 19:17; 30:30) Noko, edwɛkɛ mɔɔ ɔ gɔnwo mɔ nsa ne hanle la maanle ɔvale ɛya kpole. Ɔbɔle mɔdenle kɛ ɔmaa bɛanwu kɛ, ɔnle ɛtanevolɛ kɛ mɔɔ bɛsuzu la. Edwɛkɛ mɔɔ li amozii mɔɔ Dwobu hanle la maanle bɛhanle bɛ nloa bɛdole nu. Mɔɔ bɛhehanle edwɛkɛ dɔɔnwo mɔɔ yɛ nyane bɛhilele Dwobu bɛwiele la anzi, ɛnee akee bɛnnwu bieko mɔɔ bɛka a. Noko ɛnee Dwobu nyane ne tɛbɔ ɛkɛ. Ɛnee ɔhyia moalɛ ɛsesebɛ!

Ɛnee Dwobu ɛnlɛ ye tɛnlabelɛ ne anwo adwenle kpalɛ, na ndelebɛbo wɔ nu. Ɛnee ɔhyia adehilelɛ nee ɛdenrɛdenrɛlɛ. Ɛnee eza ɔhyia arɛlekyekyelɛ kpalɛ na yemɔ yɛɛ anrɛɛ ɔwɔ kɛ ɔ gɔnwo mɔ nsa ne fa maa ye a, noko bɛanyɛ. Wɔhɔ tɛnlabelɛ bie anu na wɔde nganeɛ kɛ ɛhyia adehilelɛ nee arɛlekyekyelɛ ɔ? Asoo menli mɔɔ ɛnee ɛze kɛ bɛle ɛ gɔnwo mɔ la yele ɛ rɛle dole ɛ sa nu? Kɛzi Gyihova Nyamenle boale ye sonvolɛ Dwobu nee kɛzi Dwobu yɛle ye nyɛleɛ la bahola aboa wɔ na yeakyekye ɛ rɛle.

Akee yɛnwu debie bie mɔɔ yɛ nwanwane la wɔ Dwobu edwɛkɛ ne anu. Ɛnee kpavolɛ bie mɔɔ bɛfɛlɛ ye Ɛlaehu la noko wɔ ɛkɛ. Mɔɔ Dwobu nee mrenyia mgbanyinli ne mɔ ɛlɛtendɛ la amuala ɛnee ɔwɔ ɛkɛ, na ɔlɛtie bɛ. Mɔɔ ɔdele la anyɛ ye fɛ fee.

Ɛlaehu vale Dwobu anwo ɛya. Ɔyɛle ye nyane kɛ Dwobu mɔɔ le tenlenenli la ‘ɛlɛbɔ mɔdenle abua ɔ nwo benle yeadɛla Nyamenle la.’ Noko Ɛlaehu akunlu yelɛyelale ye maanle Dwobu​—ɔnwunle nyane mɔɔ ɛnee nrenyia ne ɛlɛdi yɛɛ ahonle kpalɛ mɔɔ ɔlɛ la na ɔnwunle kɛ eza ɔhyia folɛdulɛ nee ɛdenrɛdenrɛlɛ. Yemɔti Ɛlaehu angola anzɔ ɔ nwo wɔ adalɛ arɛlekyekyevolɛma ne anwo bieko! Ɔdele kɛ bɛlɛkeha edwɛkɛ mɔɔ yɛ nyane la bɛahile Dwobu na ɛnee bɛkulo kɛ ye diedi ka aze, bɛsɛkye ye duma na ɔgyakyi ye munlililɛ nu. Na mɔɔ zɛkyele edwɛkɛ ne bɔkɔɔ la, bɛ adalɛ edwɛkɛ ne maanle ɔyɛle kɛ asɛɛ Nyamenle ati yɛ se. Yemɔti Ɛlaehu nwunle kɛ ɔwɔ kɛ ɔtendɛ!​—Dwobu 32:2-4, 18.

Ɔhanle kɛ, “Mele kpavolɛ na bɛmɛ bɛle mgbanyinli. Ɔti menvile ɛbulɛ nu mengendɛle, na meambɔ mɔdenle kɛ meka mɔɔ meze la meahile bɛ.” Noko yeangola yeanga ɔ nloa yeando nu. Ɔti ɔdoale zo kɛ: “Ɛvolɛ ngome ɛmmaa sonla ɛnnwu nrɛlɛbɛ yɛɛ tɛ mrelera angome a te mɔɔ le fɔɔnwo la abo a.” (Dwobu 32:6, 9) Akee Ɛlaehu vale mekɛ dɔɔnwo dendɛle na ɔhilele kɛ edwɛkɛ zɔhane le nɔhalɛ. Yeanyɛ kɛ Ɛlaefaze, Beledade yɛɛ Zofaa la. Ɛlaehu maanle Dwobu nyianle anwodozo kɛ, ɔnrɛha edwɛkɛ ɔnrɛmaa ye nyane ne ɛnrɛyɛ kpole. Eza ɔlile Dwobu eni na ɔbɔle ye duma, ɔmaanle ɔlale ali kɛ mrenyia ne mɔ ambu ye. * Ɔvile ɛbulɛ nu ɔhanle kɛ, “Noko kɛkala Dwobu, mesɛlɛ wɔ tie me edwɛkɛ ne.”​—Dwobu 33:1, 7; 34:7.

Ɛlaehu vale akɛnrasesebɛ dule Dwobu folɛ: “Mendele kɛ ɛlɛka kɛ, . . . ‘Me nwo te, metɛtonle mɛla biala; Me nwo ɛtɛguale evinli, metɛyɛle nvonleɛ biala. Noko Nyamenle ɛnyia debie ɛgyinla zo ɛdwazo ɛtia me.’” Ɛlaehu hanle Dwobu ngyegyelɛ ne anwo edwɛkɛ fɔɔnwo. Ɔbizale ye kɛ: “Ɛdie ɛ nwo ɛdi somaa la ati, asoo wɔ edwɛkɛ yɛ fɛ kɛ ɛkɛha kɛ, ‘Mele tenlene metɛla Nyamenle’ ɔ?” Ɛnee Ɛlaehu ɛngulo kɛ Dwobu nyia adwenle zɔhane. Yemɔti ɔhanle kɛ, “Mɔɔ ɛlɛka la ɛnle nɔhalɛ.” (Dwobu 33:8-12; 35:2) Ɛnee Ɛlaehu ze kɛ, Dwobu ɛva ɛya ɔluakɛ ye anwonyia kɔsɔɔti ɛvi ɔ sa yɛɛ menli mɔɔ bɛse bɛle ɔ gɔnwo mɔ la nee ye anli ye boɛ. Noko Ɛlaehu bɔle Dwobu kɔkɔ kɛ: “Nea boɛ na wɔ ɛyavalɛ ne anva wɔ angɔ ɛtane nu.”​—Dwobu 36:18.

Mɔɔ hyia kpalɛ la, Ɛlaehu dendɛle maanle Gyihova Nyamenle. Ɔpɛle nɔhalɛ edwɛkɛ bie mɔɔ tumi wɔ nu la sikalɛ kɛ: “Ɔnrɛra ye ɛlɛ kɛ nɔhalɛ Nyamenle ne kɛyɛ amumuyɛ, Kɛ Tumivolɛ Bedevinli ne kɛyɛ ɛtane! . . . Tumivolɛ Bedevinli ne ɛngakyi pɛlepɛlelilɛ nye.” (Dwobu 34:10, 12) Mɔɔ Ɛlaehu maa Dwobu anwu kɛ Gyihova se anwunvɔne la, ɔhakyele ye kɛ, yeanva ɛya yeambu edwɛkɛ mɔɔ Dwobu andwenle nwolɛ na yeaha la anwo mgbonda yɛɛ yeandwe ɔ nzo. (Dwobu 35:13-15) Yɛɛ Ɛlaehu anyɛ ɔ nwo kɛ ɔze debie biala, emomu ɔvile mɛlɛbɛnwoaze nu ɔhanle kɛ: “Nyamenle le bedevinli tɛla kɛzi yɛkola yɛnwu ye la.”​—Dwobu 36:26.

Ɛnee tumi wɔ Ɛlaehu folɛdulɛ ne anu, noko ɔlale atiakunlukɛnlɛma ali. Ɔhanle anyelazo kɛnlɛma nwo edwɛkɛ kɛ, kenle ko dedee Gyihova bamaa Dwobu anyia kpɔkɛdelɛ kpalɛ bieko. Nyamenle baha ye nɔhalɛ sonvolɛ ne anwo edwɛkɛ kɛ: “Maa ɔ nwo nane ɛdɔ zo ɛdɛla ye mgbavolɛ nu ɛdeɛ ne.” Adenle bieko mɔɔ Ɛlaehu luale zo lale atiakunlukɛnlɛma ali la ɛne: Kɛ anrɛɛ ɔbaha edwɛkɛ ne yeagua Dwobu anwo zo la, ɔdole ɔ sa ɔvɛlɛle ye kɛ ɔbua ye. Ɔhanle kɛ: “Tendɛ, ɔluakɛ mekulo kɛ mebua wɔ benle.” (Dwobu 33:25, 32) Noko Dwobu andɛ ɔ nloa anu. Bie a ɔdele nganeɛ kɛ ɔnle kɛ ɔbua ɔ nwo benle wɔ folɛdulɛ ɛhye mɔɔ maa anwosesebɛ la anwo. Bie a kɛzi ye ahonle dɔle ye azule nu la maanle ɔzunle.

Yɛbahola yɛanyia ɛzukoalɛdeɛ dɔɔnwo yɛavi nɔhavoma nwiɔ ɛhye ɛkɛ. Ɛlaehu edwɛkɛ ne maa yɛnwu kɛzi bɛfa folɛdulɛ nee arɛlekyekyelɛ bɛmaa menli mɔɔ bɛhyia nwolɛ la. Agɔnwolɛ kpalɛ maa ɔ gɔnwo nwu nvonleɛ kpole mɔɔ yeyɛ anzɛɛ ngyegyelɛ mɔɔ bahola avi ye nyɛleɛ nu ara la. (Mrɛlɛbulɛ 27:6) Agɔnwolɛ zɛhae a yɛkulo kɛ yɛyɛ a, yɛkɔ zo yɛda atiakunlukɛnlɛma ali na yɛmaa menli mɔɔ hyia la anwosesebɛ, saa bɔbɔ bɛka mgbole a. Na saa ɔhyia kɛ bɛtu yɛdayɛ mumua ne folɛ a, Dwobu neazo ne kakye yɛ kɛ, ɔwɔ kɛ yɛfi mɛlɛbɛnwoaze nu yɛtie folɛdulɛ ne, ɔnle kɛ yɛkpo. Yɛ muala yɛhyia folɛdulɛ nee ɛdenrɛdenrɛlɛ. Saa yɛdie yɛto nu a, ɔbahola yɛalie yɛ ngoane.​—Mrɛlɛbulɛ 4:13.

Mɔɔ Ɛlaehu ɛlɛtendɛ la, ɛnee ɔta ɔka anwoma, amungu, ahumuakyima yɛɛ ezule ɛhululɛ nwo edwɛkɛ. Ɔhanle Gyihova anwo edwɛkɛ kɛ: “Bɛdie ɔ ne ɛhululɛ ne kpalɛ.” Nzinlii, Ɛlaehu eza hanle “ahumuakyima” nwo edwɛkɛ. (Dwobu 37:2, 9) Ɔbayɛ kɛ, mɔɔ ɔgua zo ɔlɛtendɛ la, ɛnee anwoma ɛlɛbɔ, na ɛnee ngyikyi ngyikyi ɔlɛbɔ kpole. Awieleɛ bɔkɔɔ ne, ɔyɛle ahumuakyima. Akee debie bie mɔɔ yɛ ɛzulolɛ la zile. Gyihova dendɛle!​—Dwobu 38:1.

Saa yɛlɛkenga Dwobu buluku ne na yɛdwu foa ɛhye mɔɔ bɛyɛ edwɛkɛ mɔɔ Gyihova hanle hilele Dwobu la anwo kɛlɛtokɛ la azo a, yɛ nye die kpole. Ɔle kɛ asɛɛ anwoma zɔhane mɔɔ dule la bɔle adalɛ edwɛkɛ mɔɔ Ɛlefaze, Beledade yɛɛ Zofaa hanle la kɔsɔɔti hɔle. Gyihova andɛne mrenyia zɔhane mɔ zo ɛkɛ ne ala. Ɔvale ye adwenle ɔziele Dwobu angomekye anwo zo; ɔdenrɛle ye sonvolɛ ne mɔɔ la ye ahonle nwo la kɛ mɔɔ selɛ tenrɛ ɔ ra nrenyia la.

Ɛnee Gyihova ze nyane mɔɔ Dwobu wɔ nu la. Na ɔ nwo yɛle ye anwunvɔne kɛ mɔɔ ye sonvolɛ biala ɛlɛnwu amaneɛ a, ɔte nganeɛ la. (Ayezaya 63:9; Zɛkalaya 2:8) Noko ɛnee eza ɔze kɛ Dwobu ”hanle edwɛkɛ mɔɔ nrɛlɛbɛ ɛnle nu la,” na ɛhye maanle ye ngyegyelɛ ne yɛle kpole. Yemɔti Gyihova bizale Dwobu kpuya bie mɔ ɔvale ɔdenrɛle ye zo. Ɔbɔle ɔ bo kɛ: “Mekɛ mɔɔ mefa azɛlɛ ne meazie ɛkɛ ne la ɛnee ɛwɔ ni? Ka kile me, saa ɛdwenle kɛ ɛte ɔ bo a.” Mekɛ mɔɔ bɛbɔ ninyɛne la, “nwonlomɔ nwɔlɔra,” Nyamenle anwumabɔvolɛma ne bɔle bɛ sa nu deɛdeanle nu. (Dwobu 38:2, 4, 7) Nɔhalɛ nu, ɛnee Dwobu ɛnze ninyɛne ɛhye mɔ anwo ɛhwee.

Gyihova hɔle zo hanle ninyɛne mɔɔ yebɔ la anwo edwɛkɛ. Wɔ adenle bie azo, ɛnee Gyihova ɛlɛfa Dwobu ahɔ akpɔsa yeahilehile ye ninyɛne mɔɔ yebɔ mɔɔ abɔdeɛ nwo nrɛlɛbɛvolɛma mɔɔ wɔ ɛkɛ ɛnɛ sukoa nwolɛ debie la; le kɛ nwɔlɔra, nane nane nee mbaka, azɛlɛ yɛɛ mɔɔ bokɛboka nwo la. Gyihova hanle nane nane mɔɔ ɛnee wɔ ɛkɛ wɔ Dwobu mekɛ zo la bie mɔ anwo edwɛkɛ​—awenade, kɔkɔsɛlɛ, boka zo abɔnkye, ɛbɔ nu asoaso, ɛbɔ nu ɛnlankɛ nyinli, soholo, ɛkpɔnwɔ, kyɛnyema, kɔleɛ, Behemɔto (ɔbayɛ kɛ yemɔ a le koliadunli) yɛɛ mɔɔ li awieleɛ Lɛveatan (ɔbayɛ kɛ yemɔ a le ɛlɛnrɛne). Nea nwolɛ adenle kpole mɔɔ ɔle kɛ anwuma nee aze Bɔvolɛ ne baha ninyɛne mɔɔ yebɔ la anwo edwɛkɛ yeahile wɔ a! *

Duzu a ɛnee Gyihova kpondɛ ahile a? Ɛnee Dwobu hyia mɛlɛbɛnwoaze kpole. Mɔɔ Dwobu nyianle adwenle kɛ ye ngyegyelɛ ne vi Gyihova la, ɔmaanle ye nyanelilɛ ne yɛle kpole, na ɛhye maanle ɔhwenle ɔ nwo ɔvile ye ɛlɔlɛ Selɛ ne anwo. Yemɔti Gyihova bizale Dwobu fane dɔɔnwo kɛ, mɔɔ ɔbɔ ninyɛne ɛhye mɔ mɔɔ yɛ nwanwane la, ɛnee ɔwɔ ni, yɛɛ asoo ɔbahola yeamaa bɛ aleɛ, yeanlea bɛ na yeamaa bɛadie ye ɔ. Yemɔti saa ɛnee Dwobu ɛnrɛhola ɛnrɛyɛ ninyɛne ɛhye mɔ a, duzu a ati a ɔwɔ kɛ ɔbua ye Bɔvolɛ ne ndɛne a? Asoo Gyihova ndenle nee ye adwenle ɛmkpogya ɛndɛla Dwobu ɛdeɛ ne mɔɔ ɛnli munli la ɔ?

Eza yɛnwu Gyihova ɛlɔlɛ kpole ne wɔ edwɛkɛ zɔhane mɔɔ ɔhanle la anu. Ɛnee ɔle kɛ asɛɛ Gyihova ɛlɛka ahile Dwobu kɛ: ‘Me ra, saa mekola mebɔ ninyɛne ɛhye mɔ na menea bɛ nwo zo a, ɛdie ɛdi kɛ menrɛhola menrɛnlea ɛ nwo zo ɔ? Asoo mebakpo wɔ, meamaa ɛ mra nee wɔ debie biala avi ɛ sa na wɔ kpɔkɛdelɛ azɛkye ɔ? Asoo tɛ Medame ala a mebahola meamaa ɛ sa aha ninyɛne mɔɔ ɛvi ɛ sa la na wɔanyia kpɔkɛdelɛ bieko a?’

Kpuya mɔɔ Gyihova bizale la maanle Dwobu zuzule ninyɛne nwo hɔle moa, na mɔɔ ɔbua la, ɔdendɛle fane nwiɔ pɛ. Yeanzu kpolera yɛɛ yeanva edwɛkɛ yeanyeye ɔ nloa. Ɔvile mɛlɛbɛnwoaze nu ɔliele ɔdole nu kɛ ɔnze ɛhwee na ɔnlunle ɔ nwo wɔ ye mgbole ɛhanlɛ ne anwo. (Dwobu 40:4, 5; 42:1-6) Wɔ ɛke, yɛnwu diedi kpole mɔɔ Dwobu lale ye ali la. Ɔnva nwo mɔɔ ɔhɔle nu la amuala, ɔlale diedi kpole ali. Ɔliele Gyihova ndeanlɛ ɔdole nu na ɔyɛle nzenzaleɛ. Ɔwɔ kɛ ɛhye ka yɛ maa yɛbiza yɛ nwo kpuya bie mɔɔ anwo hyia la, ‘Asoo mebɛlɛ me nwo aze medie ɛdenrɛdenrɛlɛ nee folɛdulɛ meto nu?’ Yɛ muala yɛhyia ɛhye. Saa yɛdie ɛdenrɛdenrɛlɛ nee folɛdulɛ yɛto nu a, ɛnee yɛlɛsukoa Dwobu diedi ne.

Akee Gyihova bɔle ɔ bo kɛ ɔkyekye Dwobu arɛle. Gyihova vɛlɛle Ɛlaefaze mɔɔ ɔkɛyɛ kɛ ɔdaye a ɔle adalɛ arɛlekyekyevolɛma nsa ne anu kpanyinli la na ɔhanle kɛ: “Meva ɛdawɔ nee ɛ gɔnwo mɔ nwiɔ ne anwo ɛya kpole, ɔluakɛ bɛanga me nwo nɔhalɛ edwɛkɛ ne kɛ mɔɔ me sonvolɛ Dwobu yɛle la.” (Dwobu 42:7) Dwenle edwɛkɛ zɔhane anwo nea. Asoo ɛnee Gyihova ɛlɛka kɛ, edwɛkɛ biala mɔɔ mrenyia nsa zɔhane hanle la le adalɛ na mɔɔ Dwobu hanle la amuala le nɔhalɛ? Kyɛkyɛ. * Noko ɛnee ngakyile kpole wɔ Dwobu nee mrenyia nsa zɔhane avinli. Ɛnee Dwobu ɛbolɛ ɛlɛte, nyane ɛlɛku ye yɛɛ ɛzonle mɔɔ bɛdole ye la maanle ɔ rɛle bɔle. Yemɔti ndelebɛbo wɔ nu kɛ mekɛ bie ɔhehanle mgbole la. Noko ɛnee ngyegyelɛ ɛhye bie ɛnla Ɛlaefaze nee ɔ gɔnwo mɔ nwiɔ ne anwo zo. Ɔluakɛ bɛnlɛ diedi la ati, bɛ nye fuu bɛhehanle edwɛkɛ ɛtane ɛtane. Bɛdendɛle bɛtiale awie mɔɔ ɛnze nwolɛ bie la, na mɔɔ ɛnle kpalɛ fee la, bɛhehanle Gyihova mumua ne anwo adalɛ edwɛkɛ kɛ ɔ ti yɛ se yɛɛ ɔle Nyamenle mɔɔ ɔndwenle sonla nwo!

Yemɔti ɔnyɛ nwanwane kɛ Gyihova hanle kɛ mrenyia zɔhane mɔ ɛhɔbɔ afɔle la. Ɛnee ɔwɔ kɛ bɛfa nlankɛ nyinli nsuu nee mboane nyinli nsuu bɛbɔ afɔle​—ɛnee ɛhye ɛnle debie ɛkyi ɔluakɛ nzinlii, wɔ Mosisi Mɛla ne abo, ɛnee ɔwɔ kɛ ɛsɔfo kpanyinli ne fa ɛnlankɛ nyinli bɔ afɔle saa ye ɛtane ne ka maanle ne anu amra amuala a. (Lɛvitikɔso 4:3) Wɔ Mɛla ne abo, ɛnee ɛnlankɛ a le nane mɔɔ ye bolɛ yɛ se kpalɛ mɔɔ bɛfa bɛbɔ afɔle a. Bieko, Gyihova hanle kɛ saa Dwobu dimoa yɛ asɔne maa mrenyia nsa ne a yɛɛ ɔbalie bɛ afɔlebɔlɛ ne yeado nu a. * (Dwobu 42:8) Nea kɛzi Dwobu anye liele kɛ ye Nyamenle ne ɛde ɔ nyunlu na ɔlɛmaa pɛlepɛlelilɛ ayɛ gyima la!

Ɛnee Gyihova lɛ anwodozo kɛ Dwobu bava mrenyia nsa ne mɔɔ bɛboda ye kpole la ɛtane yeahyɛ bɛ kɛ mɔɔ yeha yehile ye la. Na Dwobu anye ɔ Ze ne arɛle ando ɔ sa nu. (Dwobu 42:9) Tieyɛ mɔɔ ɔyɛle la kile kɛ ɛnee ɔdi nɔhalɛ kpalɛ, yeanva ɔ nloa yeanga ala. Na ɛhye bukele adenle maanle ɔnyianle nyilalɛ kpole.

‘Gyihova akunlu yelɛyelale ye maanle Dwobu yɛɛ ɔzele ye anwunvɔne.’ (Gyemise 5:11) Adenle boni azo? Gyihova maanle Dwobu dele kpɔkɛ bieko. Nea kɛzi Dwobu dele nganeɛ wɔ mekɛ mɔɔ ɔnwunle kɛ amgba “ɔ nwo nane ɛdɔ zo ɛdɛla ye mgbavolɛ nu ɛdeɛ ne” kɛ mɔɔ Ɛlaehu hanle la! Ye mbusuafoɔ nee ɔ gɔnwo mɔ rale ɔ nwo bieko, bɛkyekyele ɔ rɛle na bɛmaanle ye ahyɛlɛdeɛ. Gyihova maanle Dwobu asa hanle ye anwonyia ne bieko, ɔmaanle ɔnyianle mɔɔ ɛnee ɔlɛ la mɔnwo nwiɔ. Na ɔ mra ne mɔ mɔɔ bɛwule nyane nyane nu la noko ɛ? Dwobu nee ɔ ye wole mralɛ bulu bieko na ɛhye kyekyele bɛ rɛle! Eza Gyihova luale nwanwane adenle zo maanle Dwobu ngoane mekɛ tendenle. Dwobu dɛnlanle aze ɛvolɛ 140 bieko, ɔdɛnlanle aze ɔnwunle ye awolɛndoazo nna. Yɛkenga kɛ: “Awieleɛ bɔkɔɔ ne, Dwobu wule wɔ mekɛ mɔɔ ɛnee yeyɛ ɛrelera la, na ɔ kunlu dwole ɔ nwo.” (Dwobu 42:10-17) Wɔ Paladaese, Dwobu nee ɔ ye nee ye abusua ne mɔɔ ye ngakula ne mɔ mɔɔ Seetan hunle bɛ boka nwo la bayia bieko.​—Dwɔn 5:28, 29.

Duzu ati a Gyihova yilale Dwobu kpole zɔhane a? Baebolo ne bua kɛ: “Bɛde Dwobu kpundiigyinlanlɛ ne anwo edwɛkɛ.” (Gyemise 5:11) Ngyegyelɛ mɔɔ Dwobu yiale la le kpole tɛla mɔɔ bie a yɛsuzu la. Edwɛkɛkpɔkɛ “kpundiigyinlanlɛ” maa yɛnwu kɛ Dwobu angyinla ye ngyegyelɛ ne mɔ anloa ala. Ɔgyinlanle nu na yeammaa edwɛkɛ amba diedi nee ɛlɔlɛ mɔɔ ɔlɛ ɔmaa Gyihova la anwo. Kɛ anrɛɛ ɔbava menli mɔɔ anye fuu nee ye anli ye boɛ anwo adwenle ɛtane yeazie ɔ ti anu la, ɔnyianle ɛhulolɛ kɛ ɔbava yeahyɛ bɛ. Yeammaa ye anyelazo ne mɔɔ sonle bolɛ la anwie yɛɛ ɔbɔle ye nɔhalɛlilɛ ne mɔɔ sonle bolɛ kpalɛ la anwo bane.​—Dwobu 27:5.

Ɔwɔ kɛ yɛ nuhua ko biala gyinla kpundii. Yɛze kɛ Seetan babɔ mɔdenle kɛ ɔmaa yɛ sa nu ado kɛ mɔɔ ɔvale ɔyɛle Dwobu la. Noko saa yɛgyinla kpundii, yɛkɔ zo yɛbɛlɛ yɛ nwo aze, yɛnyia ɛhulolɛ kɛ yɛbava awie mɔ ɛtane yeahyɛ bɛ na yɛbɔ kpɔkɛ kɛ yɛbagyinla yɛ munlililɛ nu a, ɔbamaa yɛdayɛ noko yɛahɔ zo yɛazɔ yɛ anyelazo ne mɔɔ sonle bolɛ la anu. (Hibuluma 10:36) Saa yɛsukoa Dwobu diedi ne a, ɔbaha Seetan ɛya kpole na yeamaa Gyihova anye alie kpole kpalɛ!