Ɛnɛ mekɛ ye Gyihova Alasevolɛ ne mɔ bɔle ɔ bo wɔ ɛvoya 19 ne awieleɛ. Zɔhane mekɛ ne, Baebolo sukoavoma ekpunli ekyi bie mɔɔ ɛnee de bikye Pittsburgh, Pennsylvania mɔɔ wɔ United States la bɔle ɔ bo kɛ bɛsukoa Baebolo ne. Bɛvale asɔne asɔne ne mɔ ngilehilelɛ ne bɛtotole mɔɔ Baebolo ne kilehile amgba la anwo. Bɛhɛlɛle mɔɔ bɛzukoale la wɔ mbuluku, adwelie ngɛlata nee magazine ne mɔɔ ɛnlɛ bɛfɛlɛ ye Ɛzinzalɛ Arane—Ɔbɔ Gyihova Belemgbunlililɛ Nolo la anu.

 Ɛnee nrenya bie mɔɔ bɛfɛlɛ ye Charles Taze Russell la boka Baebolo sukoavoma ɛhye anwo. Russell a lile Baebolo ngilehilelɛ gyima ne anyunlu wɔ zɔhane mekɛ ne a, na ɔdaye a ɔle Ɛzinzalɛ Arane ne kpanuvolɛ mɔɔ lumua a noko yeambɔ ɛzonlenlɛ fofolɛ bo. Ɛnee Russell nee Baebolo Sukoavoma ne, kɛmɔ ɛnee bɛfɛlɛ ekpunli ne la, bodane a le kɛ bɛmaa menli anwu Gyisɛse Kelaese ngilehilelɛ ne na bɛali neazo mɔɔ ɛvoya mɔɔ lumua la anu Keleseɛnema ne yɛle la anzi. Gyisɛse a bɔle Keleseɛne ɛzonlenlɛ ne abo a, yemɔti yɛbu ye kɛ yemɔ a vale yɛ ɛzonlenlɛ ne ziele ɛkɛ a.—Kɔlɔsaema 1:18-20.