Wɔ ɛvolɛ abulanla mɔɔ ɛpɛ nu la wɔ February 2, 1973, yɛnyianle milahyinli fofolɛ wɔ Wallkill, New York, U.S.A., mɔɔ yɛfa yɛpelente Ɛzinzalɛ Arane nee Awake! a.

Ɛnee Gyihova Alasevolɛ ɛlumua ɛdɔ azɛlɛ wɔ ɛkɛ ɛvolɛ kɛyɛ bulu kɛ bɛfa bɛayɛ egyinli amaa bɛava nuhua aleɛ ne bɛanlea menli mɔɔ yɛ gyima wɔ ewiade amuala gyima ne ati, wɔ Brooklyn, New York. Noko ɛnɛ, eza yɛnyia aleɛ bieko, sunsum nu aleɛ wɔ azɛlɛ ko ne ala azo.​—Mateyu 24:45-47.

Philip Wilcox, mɔɔ ɛnee le neavolɛ wɔ ɛkɛ la hanle kenle mɔɔ lumua mɔɔ bɛvale milahyinli ne bɛyɛle gyima wɔ Wallkill la anwo edwɛkɛ kɛ: “Yɛvale asɛɛ siane ko na yɛahola yɛahyehyɛ milahyinli ne mɔɔ bɛfa bɛpelente ninyɛne ndɛndɛ la. Yɛwiele la, yɛzɔle yɛnleanle. Yɛvale mekɛ ekyi bie yɛpelentele magazine dɔɔnwo. Yɛvale yɛhɔle Brooklyn ɛleka mɔɔ ɛnee yɛpelente yɛ ninyɛne ne mɔ la, na bɛvale bɛhɔmanle asafo ne mɔ. Ɛnee yɛbɔ kpɔkɛ kɛ yɛnrɛmaa magazine ko bɔbɔ ɛnrɛyɛ mgbane.”

Gyihova Alasevolɛ yɛle milahyinli ɛhye kɛ bɛfa bɛaboka mɔɔ ɛnee bɛfa bɛpelente ninyɛne wɔ Brooklyn la anwo. Ɔkadwu 1970 mɔlebɛbo la, ɛnee bɛhyia Baebolo nwo mbuluku dɔɔnwo anwo yemɔti ɛnee bɛyɛ gyima nɔɔzo noko wɔ ɛleka mɔɔ yɛpelente yɛ mbuluku ne mɔ la wɔ Brooklyn amaa yɛahola yɛali ngyianlɛ ne anwo gyima.

Milahyinli nna, ɛleka mɔɔ bɛfa mbuluku bɛnwa, nee Belemgbunlililɛ Asalo yɛɛ yɛlumuale yɛzile ye wɔ Wallkill, ɛleka mɔɔ yɛpenlente yɛ mbuluku ne mɔ la a. Noko akee, kolaa na bɛabɔ gyima ne ɛyɛlɛ bo la, bɛbɔle sua fofolɛ mɔɔ le kpole tɛla alumua ɛdeɛ ne la ɛzilɛ bo wɔ ɛkɛ. Ɛnee menli dɔɔnwo hyia Baebolo nwo mbuluku yemɔti kolaa na yɛawie sua ne si bɔbɔ la, milahyinli mgbole nsia bieko bɔle gyima ɛyɛlɛ bo wɔ sua ne mɔɔ tɔ zo nwiɔ la anu.

Yɛva milahyinli mɔɔ yɛ gyima ndɛndɛ la yɛpelente Baebolo nwo mbuluku ngakyile wɔ ɛvolɛ dɔɔnwo anu. Amaa yɛahola yɛali nzenzaleɛ ɛhye mɔ anwo gyima la, ɛnee ɔwɔ kɛ yɛyɛ milahyinli ɛhye mɔ boɛ na yɛtɛlɛ nu fane dɔɔnwo. Yɛvale milahyinli mɔɔ yɛ gyima ndɛndɛ la yɛziele mɔɔ ɛnee ɛyɛ dɛba la agyakɛ anu wɔ 1980 ne mɔ anu.

Bɛdole Brooklyn ɛleka ne mɔɔ bɛpelente debie la anu wɔ 2004, na yɛbɔle ɔ bo kɛ yɛpelente mbuluku wɔ Wallkill. Wɔ 2010, bɛyele milahyinli mɔɔ bɛfa bɛpelente magazine la bɛhɔle Gyihova Alasevolɛ ɔfese ne mɔɔ wɔ Canada la. Milahyinli fofolɛ ɛhye kola pelente magazine 200,000 wɔ dɔnehwele ko anu.

Ɛnɛ, Wallkill milahyinli ne yɛ gyima ndɛndɛ kpalɛ, na mediema 281 yɛɛ ɛdu bɛ nwo ɛmaa ɛlɛyɛ gyima wɔ ɛkɛ a. Ɛkenle ɛvolɛ ne, bɛyɛle mbuluku nee Baebolo mɔɔ bo mgbe 17 la wɔ ɛkɛ. Saa ɛye Wallkill ɛdeɛ ne ɛsie ahane a, eza bie wɔ Canada, Mexico, America Sɔlɔ. Gyihova Alasevolɛ eza lɛ milahyinli mɔɔ pelente mbuluku la 12 wɔ Africa, Asia, Australia, Europe nee America Nyiakɛ mɔɔ ɔboa ɔmaa bɛfa sunsum nu aleɛ bɛmaa menli dɔɔnwo a.​—Mateyu 5:3.