Mɔɔ Tɔ Zo Nwiɔ Kɔmaa Kɔlentema 13:1-14
13 Ye fane nsa ne azo mɔɔ melɛba bɛ nwo lɔ la ɛne. “Ɔwɔ kɛ edwɛkɛ biala gyinla alasevolɛ nwiɔ anzɛɛ nsa daselɛlilɛ* zo.”+
2 Menle bɛ nwo lɔ kɛkala ɛdeɛ, noko ɔle kɛ asɛɛ mewɔ bɛ nwo lɔ fane nwiɔ ne azo, na melɛdimoa meabɔ bɛdabɛ mɔɔ bɛyɛle ɛtane mekɛ bie nee bɛdabɛ mɔɔ bɛha la amuala kɔkɔ kɛ saa meba bieko a, menrɛmaa bɛnrɛva bɛ nwo bɛnrɛli,
3 kɛmɔ bɛlɛkpondɛ daselɛ mɔɔ kile kɛ Kelaese, mɔɔ ɛnle bɛtɛɛ ɛmmaa bɛ emomu ɔlɛ tumi wɔ bɛ avinli la amgba dua me nwo zo tendɛ la ati.
4 Ɔluakɛ bɛhunle ye wɔ baka zo wɔ bɛtɛɛyɛlɛ nu ɛdeɛ, noko ɔlua Nyamenle tumi ne azo ɔde aze.+ Nɔhalɛ nu, yɛdayɛ noko yɛ nee ye le bɛtɛɛ noko ɔlua Nyamenle tumi ne+ mɔɔ wɔ bɛ nwo zo la ati, yɛ nee ye badɛnla ngoane nu.+
5 Bɛhɔ zo bɛzɔ bɛ nwo bɛnlea saa bɛwɔ diedi ne anu a; bɛhɔ zo bɛnleɛnlea bɛ nu.+ Anzɛɛ bɛnnwu kɛ Gyisɛse Kelaese wɔ bɛ nu ɔ? Kyesɛ bɛanlie bɛ bɛando nu.
6 Nɔhalɛ nu, me nye la kɛ bɛkɛnwu kɛ yɛnle menli mɔɔ bɛanlie yɛ bɛando nu a.
7 Akee yɛsɛlɛ Nyamenle amaa bɛanyɛ ɛtane biala, tɛ kɛ amaa awie mɔ alie yɛ ado nu la ati ɔ, emomu amaa bɛayɛ mɔɔ le kpalɛ la, saa awie mɔ anlie yɛ ando nu bɔbɔ a.
8 Ɔluakɛ yɛngola yɛnyɛ debie biala yɛntia nɔhalɛ ne, emomu mɔɔ yɛyɛ yɛmaa nɔhalɛ ne la ala.
9 Mekɛ biala mɔɔ yɛkɛyɛ bɛtɛɛ na bɛmɛ bɛ nwo kɛyɛ se la, yɛdi fɛlɛko kpole. Na ɛhye anwo asɔne a yɛlɛyɛ a, kɛ bɛkɛhakyi bɛ adwenle.*
10 Ɛhye ati a melɛkɛlɛ ɛhye mɔ wɔ mekɛ mɔɔ menle bɛ nwo lɔ la a, amaa saa meba a meanva tumi ne mɔɔ Awulae ɛva ɛmaa me kɛ menva memaa bɛ anwosesebɛ na memmafa meto bɛ sa nu la, me nee bɛ anli ye ɛsesebɛ zo.+
11 Mediema, akee bɛhɔ zo bɛli fɛlɛko, bɛhakyi bɛ adwenle,* bɛmaa bɛ rɛle ɛkyekye,+ bɛnyia adwenle ko,+ bɛdɛnla anzodwolɛ nu;+ na ɛlɔlɛ nee anzodwolɛ Nyamenle ne+ nee bɛ badɛnla.
12 Bɛva bɛ nloa anwo ɛvolɛ nwuanzanwuanza bɛbizebiza bɛ nwo ahye.
13 Nwuanzanwuanzama ne mɔ amuala biza bɛ.
14 Awulae Gyisɛse Kelaese ɛlolɛ kpole ne nee Nyamenle ɛlɔlɛ ne nee sunsum nwuanzanwuanza ne mɔɔ yɛnyia nuhua kyɛfoa la nee bɛ muala ɛdɛnla.
