Ditilɔnomi 15:1-23
15 “Ɛvolɛ nsuu biala awieleɛ, ɔwɔ kɛ bɛfa kakɛ bɛkyɛ.+
2 Kɛzi bɛbava kakɛ bɛahyɛ la ɛne: Awie biala mɔɔ bɔ bosea la bava kakɛ mɔɔ ɔ gɔnwo tua ye la ahyɛ ye. Ɔnle kɛ ɔmaa ɔ gɔnwo anzɛɛ ɔ diema tua kakɛ mɔɔ ɔtua ye la, ɔluakɛ bɛbava kakɛ bɛahyɛ bɛawula Gyihova anyunlunyia.+
3 Bɛbahola bɛamaa ɛyɛvolɛ adua kakɛ mɔɔ ɔtua bɛ la,+ noko ɔwɔ kɛ bɛfa kakɛ biala mɔɔ bɛ diema tua bɛ la bɛkyɛ ye.
4 Ɔnle kɛ bɛ nuhua bie yɛ ehyianli, ɔluakɛ Gyihova bayila bɛ+ wɔ azɛlɛ ne mɔɔ Gyihova bɛ Nyamenle ne bava amaa bɛ kɛ bɛ agyapadeɛ la azo,
5 noko kyesɛ bɛtie Gyihova bɛ Nyamenle ne ane bɔkɔɔ na bɛdi ye mɛla ne mɔ amuala mɔɔ melɛfa meamaa bɛ ɛnɛ la azo pɛpɛɛpɛ.+
6 Ɔluakɛ Gyihova bɛ Nyamenle ne bayila bɛ kɛ mɔɔ yebɔ bɛ ɛwɔkɛ la, na bɛbabɔ maanle maanle dɔɔnwo bosea noko bɛmɛ ɔnrɛhyia kɛ bɛbiza bosea+ yɛɛ bɛbali maanle maanle dɔɔnwo anwo zo tumi noko bɛmɛ bɛnrɛli bɛ nwo zo tumi.+
7 “Saa bɛ diema bie yɛ ehyianli wɔ bɛ azuamgbole ne mɔ bie azo wɔ azɛlɛ ne mɔɔ Gyihova bɛ Nyamenle ne bava amaa bɛ la azo a, bɛmmamaa bɛ ahonle yɛ se yɛɛ bɛmmamuomua bɛ sa zo bɛkile bɛ diema ehyianli ne.+
8 Ɔwɔ kɛ bɛfi bɛ ahonle nu bɛbuke bɛ sa nu bɛmaa ye+ na bɛfa debie biala mɔɔ ɔhyia nwo anzɛɛ ɔnlɛ bie la bɛmaa ye.
9 Bɛnlea boɛ na bɛannyia adwenle ɛtane ɛhye wɔ bɛ ahonle nu kɛ, ‘Ɛvolɛ nsuu ne mɔɔ bɛfa kakɛ bɛkyɛ la ɛbikye,’+ na bɛgyakyi kɛ bɛkɛvi bɛ ahonle nu bɛkɛboa bɛ diema ehyianli ne mɔɔ bɛmmaa ye ɛhwee a. Saa bɛdabɛ ti ɔsu ɔfɛlɛ Gyihova a, ɔbayɛ ɛtane yeamaa bɛ.+
10 Ɔwɔ kɛ bɛfi bɛ ahonle nu bɛmaa ye debie,+ na ɔnle kɛ bɛtwenlehwenle bɛ bo aze ɔluakɛ ɛhye ati a Gyihova bɛ Nyamenle ne bayila bɛ gyima biala azo la.+
11 Ɔluakɛ ehyiavolɛma ɛnrɛkpa azɛlɛ ne azo ɛlɛ.+ Ɛhye ati a melɛka meahile bɛ kɛ, ‘Ɔwɔ kɛ bɛfi bɛ ahonle nu bɛbuke bɛ sa nu bɛmaa bɛ diema mɔɔ ɛlɛnwu amaneɛ na ɔlɛdi ehyia wɔ bɛ azɛlɛ ne azo la.’+
12 “Saa bɛtɔne bɛ diema Hibulunli nrenyia anzɛɛ raalɛ bie bɛmaa bɛ na ɔsonle bɛ ɛvolɛ nsia a, ɛvolɛ nsuu ne azo, ɔwɔ kɛ bɛgyakyi ye bɛmaa ɔkɔ.+
13 Na saa bɛlɛgyakyi ye bɛamaa yeahɔ a, ɔnle kɛ bɛmaa ɔfa ɔ sa mgbane ɔkɔ.
14 Ɔwɔ kɛ bɛfi bɛ ahonle nu bɛfa bɛ mboane, bɛ ma, bɛ nwole nee bɛ nwanye ne bie bɛmaa ye. Kɛ mɔɔ Gyihova bɛ Nyamenle ne ɛyila bɛ la, bɛva bie bɛmaa ye.
15 Bɛhakye kɛ ɛnee bɛle ngɛkɛlɛ wɔ Yigyibiti azɛlɛ zo yɛɛ Gyihova bɛ Nyamenle ne liele bɛ a. Ɛhye ati a melɛka meahile bɛ ɛnɛ kɛ bɛli mɛla ɛhye azo la.
16 “Noko saa ɔka ɔkile wɔ kɛ, ‘Menrɛvi ɛ nwo ɛke menrɛhɔ!’ ɔluakɛ ɔkulo ɛdawɔ nee wɔ sua nu amra, ɔboalekɛ mekɛ mɔɔ ɔ nee wɔ de la amuala ɛnee ɔ nye die a,+
17 ɔwɔ kɛ ɛfa ye ɛkɔ anlenkɛ ne anwo na ɛfa bulalɛ* ɛfiti ɔ nzo ɛmaa ɔwɔ anlenkɛ ne anu na ɔbayɛ wɔ akɛlɛ dahuu. Zɔhane ala a ɔwɔ kɛ ɛyɛ wɔ akɛlɛ bɛlɛra a.
18 Saa ɛlɛgyakyi ye wɔamaa yeahɔ a, mmadwenle kɛ ɔbamaa ɛ nwo ahyele wɔ, ɔluakɛ ɛvolɛ nsia ne mɔɔ yeva yezonle wɔ la le kɛ ɛkpanli ahatualɛ fane nwiɔ yɛɛ Gyihova wɔ Nyamenle ne ɛyila wɔ wɔ debie biala ɛyɛlɛ nu.
19 “Ɔwɔ kɛ bɛte bɛ ɛnlankɛ nee bɛ boane belamunli ralɛ nyinli biala anwo bɛmaa Gyihova bɛ Nyamenle ne.+ Ɔnle kɛ bɛfa bɛ ɛnlankɛ* belamunli ralɛ bɛyɛ gyima yɛɛ ɔnle kɛ bɛpepɛ bɛ boane belamunli ralɛ nwo enrinli.
20 Ɔwɔ kɛ bɛ nee bɛ sua nu amra di ye wɔ Gyihova bɛ Nyamenle ne anyunlu ɛvolɛ biala wɔ ɛleka mɔɔ Gyihova bahile la.+
21 Noko saa dɛne wɔ ɔ nwo—ɔ gyakɛ ɛbu, ɔ nye ɛzi anzɛɛ dɛne gyɛne wɔ ɔ nwo a, ɔnle kɛ bɛfa bɛbɔ afɔle bɛmaa Gyihova bɛ Nyamenle ne.+
22 Ɔwɔ kɛ bɛdi ye wɔ bɛ azuamgbole ne mɔ azo,* sonla mɔɔ anwo te nee mɔɔ anwo ɛnde la bali bie kɛ mɔɔ bɛdi kɛtɛboɛ anzɛɛ weɛlɛ la.+
23 Noko ɔnle kɛ bɛdi ye mogya ne;+ ɔwɔ kɛ bɛwola bɛgua azɛlɛ nwo kɛ nzule la.+
Ɔbodwɛkɛ
^ Ɔle debie mɔɔ bɛfa bɛfiti tokule.
^ Hibulu aneɛ nu, “ɛnlankɛ nyinli.”
^ Hibulu aneɛ nu, “nlenkɛ mgbole ne mɔ anu.”
