Dwɔhyua 6:1-27
6 Yizilayɛma ati, ɛnee bɛdo Gyɛleko nlenkɛ mgbole ne mɔ anu ɛsesebɛ; awie vi zolɛ ɛnvinde yɛɛ awie ɛnwolo nu.+
2 Akee Gyihova zele Dwɔhyua kɛ: “Nea, meva Gyɛleko nee ye belemgbunli ne yɛɛ ye konle nu katakyiema mewula ɛ sa nu.+
3 Ɔwɔ kɛ kovolɛma ne kɔsɔɔti bɔ suakpole ne anwo mgbɔlɔka yia, bɛbɔ nwolɛ mgbɔlɔka kokye. Ɔwɔ kɛ bɛyɛ ye zɔhane kenle nsia.
4 Maa ɛsɔfoma nsuu ɛva aweɛne* nsuu ɛli Ɛlɛka ne anyunlu. Noko kenle nsuu ne azo, ɔwɔ kɛ bɛbɔ suakpole ne anwo mgbɔlɔka bɛyia fane nsuu na ɛsɔfo ne mɔ bɔ aweɛne ne.+
5 Saa bɛbɔ aweɛne ne a—saa bɛte aweɛne ne ane* ala a—ɔwɔ kɛ menli ne amuala tea nuhua kpole kɛ bɛlɛkɔ konle la. Na suakpole ne bane ne bade agua aze gɔɔ,+ na ɔwɔ kɛ menli ne kɔ zolɛ, ko biala ɛhɔ ɔ nyunlu fɔɔnwo.”
6 Ɔti Nɛn ara Dwɔhyua vɛlɛle ɛsɔfo ne mɔ na ɔzele bɛ kɛ: “Bɛva ngyekyeleɛ ɛlɛka ne, na ɛsɔfoma nsuu ɛva aweɛne nsuu ɛli Gyihova Ɛlɛka ne anyunlu.”+
7 Akee ɔzele menli ne kɛ: “Bɛhɔbɔ suakpole ne anwo mgbɔlɔka bɛyia, na ɛlɔne ne mɔɔ dedɛ konle ninyɛne la+ ɛze ɛhɔli Gyihova Ɛlɛka ne anyunlu.”
8 Na kɛ mɔɔ Dwɔhyua hanle hilele menli ne ala la, ɛsɔfoma nsuu mɔɔ dedɛ aweɛne nsuu wɔ Gyihova anyunlu la zenle lile bɛ nyunlu na bɛbɔle aweɛne ne, na ɛnee Gyihova ngyekyeleɛ ɛlɛka ne li bɛ nzi.
9 Na ɛlɔne ne mɔɔ dedɛ konle ninyɛne ne la zenle lile ɛsɔfoma ne mɔɔ ɛlɛbɔ aweɛne ne la anyunlu, na ɛlɔne ne mɔɔ li bɛ nzi la doale Ɛlɛka ne wɔ mekɛ mɔɔ bɛlɛkɔ zo bɛabɔ aweɛne ne la.
10 Ɛnee Dwɔhyua ɛha ɛhile menli ne kɛ: “Bɛmmatea nu yɛɛ bɛmmamaa bɛte bɛ ne. Bɛmmamaa bɛte bɛ nloa anu edwɛkɛ biala kɔkpula kenle mɔɔ mekɛha kɛ, ‘Bɛdea nu!’ la na akee bɛadea nu.”
11 Ɔmaanle bɛvale Gyihova Ɛlɛka ne bɛbɔle suakpole ne anwo mgbɔlɔka bɛyiale, bɛyɛle ye kokye na akee bɛziale bɛhɔle azokoɛleɛ ne bɛhɔlale ɛkɛ.
12 Aleɛ hyenle la Dwɔhyua dwazole ndɛ, na ɛsɔfo ne mɔ hɔvale Gyihova Ɛlɛka ne,+
13 na ɛsɔfoma nsuu mɔɔ dedɛ aweɛne nsuu la hɔlile Gyihova Ɛlɛka ne anyunlu na bɛhɔle zo bɛbɔle aweɛne ne mɔ. Ɛnee ɛlɔne ne mɔɔ dedɛ konle ninyɛne ne la li bɛ nyunlu yɛɛ ɛlɔne mɔɔ li bɛ nzi la doa Gyihova Ɛlɛka ne wɔ mekɛ mɔɔ bɛlɛkɔ zo bɛabɔ aweɛne ne mɔ la.
14 Kenle nwiɔ ne azo, bɛbɔle suakpole ne anwo mgbɔlɔka kokye na bɛziale bɛhɔle azokoɛleɛ ɛkɛ. Bɛyɛle ye zɔhane too kenle nsia.+
15 Kenle nsuu ne azo bɛdwazole ndɛ, aleɛbahye ne ala, na bɛbɔle suakpole ne anwo mgbɔlɔka kɛ mɔɔ bɛyɛ ye ala la fane nsuu. Kenle zɔhane ala a bɛbɔle suakpole ne anwo mgbɔlɔka fane nsuu a.+
16 Kenle nsuu ne azo, ɛsɔfo ne mɔ bɔle aweɛne ne mɔ, na Dwɔhyua zele menli ne kɛ: “Bɛdea nu,+ ɔluakɛ Gyihova ɛva suakpole ne ɛmaa bɛ!
17 Ɔwɔ kɛ bɛsɛkye suakpole ne nee debie biala mɔɔ wɔ zolɛ la,+ ɔ muala le Gyihova ɛdeɛ. Tuutuunli Releehabe+ nee menli kɔsɔɔti mɔɔ boka ɔ nwo wɔ sua nu ɛkɛ ne la ala a badɛnla ngoane nu a, ɔluakɛ ɔvale menli mɔɔ yɛzoanle bɛ la ɔveale.+
18 Noko bɛhwe bɛ nwo bɛvi debie mɔɔ ɔwɔ kɛ bɛsɛkye ye la+ anwo, amaa bɛ nye ambolo debie mɔɔ ɔwɔ kɛ bɛsɛkye ye la na bɛanva,+ anrɛɛ bɛkɛmaa munzule* kɛra Yizilayɛma azokoɛleɛ ne na bɛkɛzɛkye ye.+
19 Noko dwɛtɛ fufule ne nee nvutuke yɛɛ kɔbele nee bulalɛ ninyɛne ne kɔsɔɔti le nwuanzanwuanza maa Gyihova.+ Ɔwɔ kɛ bɛfa bɛkɔgua Gyihova sua nu gya ne anu.”+
20 Mɔɔ bɛbɔle aweɛne ne mɔ la, akee menli ne deanle nu.+ Mɔɔ menli ne dele aweɛne ne ane na bɛdeanle nu kpole kɛ menli mɔɔ ɛlɛkɔ konle ala la, bane ne dele guale aze gɔɔ.+ Akee menli ne hɔle suakpole ne azo, ko biala hɔle ɔ nyunlu fɔɔnwo na bɛhonle bɛvale suakpole ne.
21 Bɛvale konle dadeɛ bɛzɛkyele debie biala mɔɔ wɔ suakpole ne azo la, mrenyia nee mraalɛ, ngakula nee mgbanyinli, nlankɛ, mboane yɛɛ asoaso.+
22 Dwɔhyua zele mrenyia nwiɔ ne mɔɔ hɔnleɛnleanle azɛlɛ ne azo la kɛ: “Bɛhɔ tuutuunli ne sua nu bɛhɔva raalɛ ne nee ɔ nwo amra kɔsɔɔti bɛrɛla kɛ mɔɔ bɛbɔle ye ɛwɔkɛ la.”+
23 Ɔti mgbavolɛ ne mɔ hɔvale Releehabe nee ye papa, ye mame, ɔ mediema mrenyia yɛɛ ɔ nwo amra kɔsɔɔti rale;+ bɛvale ye abusua ne amuala bɛvindele na bɛ nee bɛ hɔle Yizilayɛma azokoɛleɛ ne anzi anzodwolɛ nu.
24 Akee bɛvale senle bɛyelale debie biala mɔɔ wɔ suakpole ne azo la. Noko dwɛtɛ fufule, nvutuke yɛɛ kɔbele nee bulalɛ ninyɛne ne mɔ ɛdeɛ, bɛvale bɛguale Gyihova sua nu gya ne anu.+
25 Tuutuunli Releehabe nee ye papa sua nu amra yɛɛ ɔ nwo amra ala a Dwɔhyua gyakyile bɛ a;+ na ɔde Yizilayɛ too badwu ɛnɛ,+ ɔluakɛ ɔvale menli mɔɔ Dwɔhyua zoanle bɛ kɛ bɛhɔli busia bɛnleɛnlea Gyɛleko la ɔveale.+
26 Mekɛ zɔhane Dwɔhyua hanle ndane* ɛhye kɛ: “Munzule ɛha awie mɔɔ babɔ mɔdenle kɛ ɔkyekye suakpole Gyɛleko bieko wɔ Gyihova anyunlu la. Ɔwula ye adiabo a, ye belamunli ralɛ bawu, yɛɛ ɔtuodua ye nlenkɛ a, ɔ ra kakula bawu.”+
27 Yemɔti Gyihova nee Dwɔhyua luale,+ na ye duma dɛlɛle hɔle azɛlɛ ye azo amuala.+
Ɔbodwɛkɛ
^ Hibulu aneɛ nu, “mboane nyinli mɛne.”
^ Anzɛɛ “saa bɛbɔ bɛtwe nu.”
^ Anzɛɛ “ngyegyelɛ; esiane.”
^ Anzɛɛ ɔkola ɔkile, “Dwɔhyua maanle menli ne hanle ndane.”
