Nolobɔvo 4:1-16
4 Eza menzuzule nzisi kɔsɔɔti mɔɔ kɔ zo wɔ ewiade la anwo. Menwunle menli mɔɔ bɛlɛsisi bɛ la monle, na awie ɛnle ɛkɛ mɔɔ kyekye bɛ rɛle a.+ Menli mɔɔ ɛlɛsisi bɛ la lɛ tumi, na awie ɛnle ɛkɛ mɔɔ kyekye bɛ rɛle a.
2 Na menganvole mowuamra mɔɔ ɛwu dɛba la mendɛlale anyewɔzoamra mɔɔ tɛte aze la.+
3 Na mɔɔ le kpalɛ tɛla bɛ mu nwiɔ la a le ahenle mɔɔ bɛtɛnyianle bɛtɛwole ye,+ mɔɔ ɔtɛnwunle ninyɛndane mɔɔ bɛyɛ ye wɔ ewiade la.+
4 Menwu kɛ gyima ɛsesebɛyɛlɛ* nee bɛ sa anloa gyima gyi sonla agɔnwo mɔɔ ɔ nee ye su la azo;+ ɛhye noko le mgbane, ɔle kɛ ɛdoa anwoma la.
5 Koasea to ɔ sa bɛka nu wɔ mekɛ mɔɔ ɔ nwo nane ɛlɛsɛkye la.*+
6 Bɛ menle ɛlielɛ ekyi* le kpalɛ tɛla gyima ɛsesebɛyɛlɛ* nee anwoma mɔɔ bɛpele bɛtoa ye la.+
7 Menzuzule debie bieko mɔɔ le mgbane wɔ ewiade ye la anwo:
8 Sonla ne bie wɔ ɛkɛ mɔɔ ɔ ngomekye, awie gyɛne ɛmboka ɔ nwo; ɔnlɛ ɔ ra nrenyia anzɛɛ ɔ diema nrenyia, noko ɔngyakyi gyima ɛsesebɛyɛlɛ ɛlɛ. Anwonyia ɛnzɔ ɔ nye ɛlɛ.+ Noko asoo ɔbiza ɔ nwo kɛ, ‘Nwane a melɛyɛ gyima ɛsesebɛ na meava ninyɛne mgbalɛ meabɔ me nwo* abokɛ meamaa ye a’?+ Ɛhye noko le mgbane nee ɛvɛlɛ gyima.+
9 Menli nwiɔ le kpalɛ tɛla sonla ko+ ɔluakɛ bɛnyia ahatualɛ kpalɛ* wɔ bɛ gyima ɛsesebɛ nwo.
10 Ɔluakɛ saa bɛ nuhua ko tɔ aze a, ko ne bahola aboa ye yeamaa yeadwazo. Noko duzu a bado sonla ko mɔɔ tɔ aze mɔɔ ɔnlɛ awie mɔɔ ɔboa ye yeamaa yeadwazo la ɛ?
11 Bieko, saa menli nwiɔ da a, bɛ nwo yɛ bɛ wuluwulu, na kɛ ɔkɛyɛ na sonla ko anwo ayɛ ye wuluwulu ɛ?
12 Eza awie bahola ali sonla ko anwo zo konim, noko menli nwiɔ bahola abɔ nu aho atia ye. Na nyɛma mɔɔ bɔ nwolɛ nsa la anu ɛnde ndɛndɛ.*
13 Kakula ehyianli mɔɔ ze nrɛlɛbɛ la le kpalɛ tɛla belemgbunli kpanyinli koasea+ mɔɔ ɛnlɛ adwenle ɛndie kɔkɔbɔlɛ bieko la.+
14 Kakula ne vi efiade a ɔrayɛle belemgbunli a,+ ɔnva nwo kɛ bɛwole ye kɛ ehyianli wɔ zɔhane belemgbunlililɛ ne anu la.+
15 Menzuzule anyewɔzoamra kɔsɔɔti mɔɔ wɔ ewiade ye anu nee kɛzi ɔbawie kakula ne mɔɔ ɔbali belemgbunli ne agyakɛ anu la anwo.
16 Menli mɔɔ gyi ɔ nzi la anwo zonle ɛdeɛ, noko menli mɔɔ bara nzinlii la anye ɛnrɛlie ɔ nwo.+ Ɛhye noko le mgbane, ɔle kɛ ɛdoa anwoma la.
Ɔbodwɛkɛ
^ Hibulu aneɛ nu, “mɔdenlebɔlɛ.”
^ Hibulu aneɛ nu, “na ɔdi ɔdaye mumua ne ɔ nwo nane.”
^ Hibulu aneɛ nu, “bɛ sa ko.”
^ Hibulu aneɛ nu, “bɛ sa nwiɔ.”
^ Anzɛɛ “me ɛkɛla.”
^ Anzɛɛ “nvasoɛ kpole.”
^ Anzɛɛ “nuhua ɛdelɛ ɛnla aze.”
