Ɛzoanvolɛma Gyima 14:1-28
14 Akee bɛhɔle Dwuuma nyianusua ne anu wɔ Ayekoneɛm na bɛdendɛle kɛnlɛma bɛmaanle Dwuuma nee Gilikima dɔɔnwo rayɛle diedima.
2 Noko Dwuuma mɔɔ bɛanlie bɛanli la lile wulale maanle maanle ne anu amra bɛmaanle bɛnyianle mediema ne mɔ anwo adwenle ɛtane.+
3 Ɔti bɛvale mekɛ dɔɔnwo bɛluale Gyihova* tumi ne azo bɛdendɛle akɛnrazilɛ zo, na ɔluale bɛ nwo zo ɔyɛle nwanwane ninyɛne nee sɛkɛlɛneɛ ɔvale ɔlile ye ɛlolɛ kpole ne anwo edwɛkɛ ne mɔɔ bɛhanle la anwo daselɛ.+
4 Noko menli mɔɔ wɔ suakpole ne azo la anu hyɛle nwiɔ; bie mɔ hɔle Dwuuma ne afoa yɛɛ bie mɔ noko hɔle ɛzoanvolɛma ne afoa.
5 Mɔɔ maanle maanle ne anu amra nee Dwuuma nee bɛ tumivolɛma nyianle adwenle kɛ bɛbɔ bɛ aholoba na bɛazi bɛ awolɛ la,+
6 bɛdele na bɛnriandile bɛhɔle Lekewonea azuamgbole Lesetela nee Dɛbi yɛɛ namunamu mɔɔ bikye bɛ la azo.+
7 Bɛhɔhanle edwɛkpa ne wɔ ɛkɛ.
8 Ɛnee nrenyia bie wɔ Lesetela mɔɔ le abubura na ɔde azɛlɛ nwo ɛkɛ. Bɛwole ye abubura na ɔtɛtiale ɛlɛ.
9 Nrenyia ɛhye diele Pɔɔlo wɔ mekɛ mɔɔ ɔlɛtendɛ la. Pɔɔlo nleanle ye koonwu na ɔnwunle kɛ ɔlɛ diedi mɔɔ ɔbamaa yeade kpɔkɛ la,+
10 ɔmaanle ɔ ne zo ɔhanle kɛ: “Dwazo gyinla ɛ gyakɛ azo.” Yemɔti nrenyia ne wulule gyinlanle na ɔbɔle ɔ bo kɛ ɔtia.+
11 Mɔɔ menli ne nwunle mɔɔ Pɔɔlo ɛyɛ la, bɛdeanle nu wɔ Lekewonea aneɛ nu kɛ: “Nyamenle ne mɔ ɛhakyi bɛ nwo menli ɛra yɛ avinli!”+
12 Na bɛvɛlɛle Baanabase Ziyɛse yɛɛ bɛvɛlɛle Pɔɔlo Hɛmɛse, ɔluakɛ yemɔ a ɔtendɛ dɔɔnwo a.
13 Na Ziyɛse ɛsɔfo ne mɔɔ ye ɛzonlenlɛsua ne wɔ suakpole ne kandiba la vale nlankɛ nee felawɔse abotile rale anlenkɛ ne anloa kɛ ɔkpondɛ kɛ ɔ nee menli ne bɔ afɔle.
14 Noko mɔɔ ɛzoanvolɛma ne, Baanabase nee Pɔɔlo dele la, bɛsuosuanle bɛ adɛladeɛ ne mɔ anu, bɛnriandile bɛhɔle menli ne anu na bɛdeanle nu kɛ:
15 “Ayi mɔ, kɛmɔti a bɛlɛyɛ ninyɛne ɛhye mɔ ɛ? Yɛdayɛ noko yɛle menli mɔɔ yɛtɔ sinli kɛ bɛdabɛ ala la.+ Na yɛlɛbɔ edwɛkpa ne nolo yɛahile bɛ amaa bɛagyakyi ninyɛne ɛhye mɔ mɔɔ nvasoɛ ɛnle zo la na bɛara tease Nyamenle ne mɔɔ bɔle anwuma+ nee aze* nee nyevile nee mɔɔ wɔ nuhua amuala la ɛkɛ.
16 Dɛba ne ɔmaanle maanle maanle ne mɔ adenle ɔmaanle bɛyɛle mɔɔ bɛdabɛ bɛkulo la,+
17 ɔnva nwo kɛ ɔluale ninyɛne mgbalɛ mɔɔ ɔyɛle la azo ɔmaanle bɛnyianle daselɛ,+ ɔmaanle ezule vi anwuma dɔle na bɛnyianle ɛlobɔ kpalɛ,+ ɔmaanle bɛnyianle aleɛ dɔɔnwo na bɛlile fɛlɛko wɔ bɛ ahonle nu la.”+
18 Bɛhanle ɛhye ɛdeɛ, noko ɔhale kyɛkyɛ na menli ne abɔ afɔle ne amaa bɛ.
19 Noko Dwuuma mɔɔ vi Anteɔko nee Ayekoneɛm rale la lile menli ne adwenle,+ na bɛzile Pɔɔlo awolɛ na bɛhwenle ye bɛhɔle suakpole ne kandiba, ɛnee bɛdwenle kɛ yewu.+
20 Noko mekɛ mɔɔ ɛdoavolɛma ne rabɔle yiale ye la, ɔdwazole na ɔhɔle suakpole ne azo. Aleɛ hyenle la ɔ nee Baanabase hɔle Dɛbi.+
21 Mɔɔ bɛbɔle edwɛkpa ne nolo wɔ suakpole ne azo na bɛnyianle ɛdoavolɛma ekyi la, bɛziale bɛhɔle Lesetela, Ayekoneɛm yɛɛ Anteɔko.
22 Ɛkɛ ne, bɛmaanle ɛdoavolɛma ne anwosesebɛ,+ na bɛdule bɛ folɛ kɛ bɛgyinla kpundii wɔ diedi ne anu na bɛhanle kɛ: “Ɔwɔ kɛ yɛnwu amaneɛ dɔɔnwo na yɛahɔ Nyamenle Belemgbunlililɛ ne anu.”+
23 Eza bɛkpale mgbanyima bɛmaanle bɛ wɔ asafo biala anu,+ bɛyɛle asɔne na bɛhyele ɛhɔne,+ na bɛvale bɛ bɛwulale Gyihova* mɔɔ bɛliele ye bɛlile la asa anu.
24 Akee bɛhɔvale Pesedea na bɛrale Pamefelea,+
25 na mɔɔ bɛhanle edwɛkɛ ne wɔ Pɛga bɛwiele la, bɛhɔle Ateelea.
26 Bɛvi ɛkɛ ne la bɛvale ɛlɛne bɛhɔle Anteɔko, ɛleka mɔɔ bɛvale bɛ bɛwulale Nyamenle ɛlolɛ kpole ne abo bɛmaanle gyima ne mɔɔ kɛkala bɛyɛ bɛwie la.+
27 Mɔɔ bɛdwule ɛkɛ ne na bɛyiale asafo ne amuala la, bɛhanle ninyɛne dɔɔnwo mɔɔ Nyamenle ɛlua bɛ nwo zo ɛyɛ, nee kɛzi yebuke diedi adenle ne yemaa maanle maanle ne la bɛhilele bɛ.+
28 Yemɔti bɛdɛnlanle ɛdoavolɛma ne anwo ɛkɛ ne bɛhyɛle.
