Ɛzoanvolɛma Gyima 18:1-28
18 Ɛhye anzi ɔvile Atɛnse na ɔhɔle Kɔlente.
2 Na ɔnwunle Dwuunli bie mɔɔ bɛfɛlɛ ye Akoyela+ mɔɔ vi Pɔntɛse na ɔvi Yetali ɔrale la ɛtɛkyɛle la nee ɔ ye Pelesela, ɔluakɛ ɛnee Kolɔdeɛse ɛha kɛ Dwuuma kɔsɔɔti ɛvi Wulomu. Yemɔti ɔhɔle bɛ nwo ɛkɛ,
3 na kɛmɔ ɔ nee bɛ yɛ gyima ko la ati, ɔdɛnlanle bɛ sua nu na ɔ nee bɛ yɛle gyima,+ ɔluakɛ ɛnee bɛyɛ ɛdanlɛsua.
4 Ɛnee ɔkɔtendɛ* wɔ nyianusua ne anu+ ɛnwomenlelielɛ kenle biala+ ɔmaa Dwuuma nee Gilikima die di.
5 Na mɔɔ Saelase+ nee Timote+ vi Masidonea rale la, Pɔɔlo vale ye mekɛ muala hanle edwɛkɛ ne, na ɔlile Dwuuma daselɛ ɔvale ɔhilele kɛ Gyisɛse a le Kelaese ne a.+
6 Noko mɔɔ bɛdwazole bɛtiale ye na bɛdendɛle bɛtiale ye la, ɔkpokpole ye tɛladeɛ ne anu+ na ɔzele bɛ kɛ: “Bɛ mogya ɛgua bɛdabɛ mumua ne bɛ ti zo.+ Menli awie biala mogya nwo fɔlɛ.+ Ɔvi ɛnɛ mɔɔ kɔ la mebahɔ maanle maanle ne anu amra ɛkɛ.”+
7 Ɔti ɔvile ɛkɛ ne* ɔhɔle nrenyia bie mɔɔ bɛfɛlɛ ye Taeteɛse Gyɛsetɛse, mɔɔ sonle Nyamenle na ye sua bikye nyianusua ne la sua nu.
8 Na Kelesepɛse,+ nyianusua ne azo neavolɛ ne nee ye sua nu amra amuala liele Awulae lile. Na Kɔlentema dɔɔnwo mɔɔ dele edwɛkpa ne la liele lile na bɛzɔnenle bɛ.
9 Akee nɔe ne, Awulae zele Pɔɔlo wɔ ɛnyelɛzodeɛnwunlɛ nu kɛ: “Mmasulo, kɔ zo ka edwɛkɛ ne, mmagyakyi,
10 na me nee wɔ lua+ yemɔti awie biala ɛnrɛbo wɔ ɛnrɛboda wɔ; ɔluakɛ melɛ menli dɔɔnwo wɔ suakpole ɛhye azo.”
11 Ɔti ɔdɛnlanle ɛkɛ ne ɛvolɛ ko siane nsia, ɔhilehilele bɛ Nyamenle edwɛkɛ ne.
12 Mekɛ mɔɔ ɛnee Galeyo le amɛnlado* wɔ Akaya la, Dwuuma ne yɛle ko na bɛdwazole bɛtiale Pɔɔlo na bɛvale ye bɛhɔle ndɛnebualɛ ebia ne anyunlu,
13 bɛhɔhanle kɛ: “Nrenyia ɛhye ɛlɛkilehile menli kɛ bɛzonle Nyamenle wɔ adenle mɔɔ tia mɛla ne la azo.”
14 Noko mɔɔ Pɔɔlo yɛle kɛ ɔtendɛ la, Galeyo zele Dwuuma ne kɛ: “O Dwuuma, nɔhalɛ nu, saa ɛtane anzɛɛ amumuyɛ kpole bie yɛɛ yeyɛ a, anrɛɛ mebazi abotane meadie bɛ.
15 Na saa ɔle edwɛkɛ nee aluma nee bɛ mɛla ne anwo kpolerazulɛ ɛdeɛ a,+ ɛnee bɛdabɛ bɛnlea bɛha. Mengulo kɛ medi edwɛkɛ zɛhae mɔ.”
16 Na ɔvoanle bɛ ɔvile ndɛnebualɛ ebia ne anyunlu.
17 Ɔti bɛ muala bɛhyele Sɔsetinɛse+ mɔɔ le nyianusua ne azo neavolɛ ne la na bɛbole ye wɔ ndɛnebualɛ ebia ne anyunlu. Noko Galeyo anyɛ ɛhye anwo ɛhwee.
18 Noko mɔɔ Pɔɔlo lile mekɛ ekyi wɔ ɛkɛ la, ɔ nee mediema ne mɔ lile nrɛlaleɛ na ɔ nee Pelesela nee Akoyela vale nyevile zo hɔle Selea. Ɔpepɛle ye enrinli ne ɔmaanle ɔhanle aze wɔ Sɛnkilia,+ ɔluakɛ ɛnee yebɔ ɛwɔkɛ.
19 Mɔɔ bɛdwule Ɛfɛsɛse la, ɔgyakyile bɛ wɔ ɛkɛ; noko ɔhɔle nyianusua ne anu na ɔ nee Dwuuma ne hɔzuzule edwɛkɛ nwo.+
20 Bɛbodole ye kɛ ɔdɛnla ɛkɛ ne ɔhyɛ ekyi ɛdeɛ, noko yeamkponle,
21 emomu ɔ nee bɛ lile nrɛlaleɛ na ɔzele bɛ kɛ: “Saa ɔyɛ Gyihova* ɛhulolɛ a, mebazia meara bɛ nwo ɛke bieko.” Na ɔvi Ɛfɛsɛse ɔvale nyevile zo
22 ɔhɔle Sizalia. Na ɔhɔkpɔlale* asafo ne na ɔdoale zo ɔhɔle Anteɔko.+
23 Mɔɔ ɔlile mekɛ ekyi wɔ ɛkɛ la, ɔvile ɛkɛ ne ɔhɔkpɔsale azua mɔɔ wɔ Galeehyea nee Felegyea+ la dɔɔnwo azo, na ɔmaanle ɛdoavolɛma ne amuala anwosesebɛ.+
24 Dwuunli bie mɔɔ bɛfɛlɛ ye Apɔlɔso+ mɔɔ vi Alɛzandelea la rale Ɛfɛsɛse; ɔle awie mɔɔ ɔ nloa ɛde na ɔze Ngɛlɛlera ne kpalɛ a.
25 Bɛhilehile nrenyia ɛhye Gyihova* adenle ne, na sunsum ne maa ɔbɔ mɔdenle kpalɛ, ɛnee ɔlɛka na ɔlɛkilehile Gyisɛse anwo ninyɛne pɛpɛɛpɛ, noko ɛnee Dwɔn ɛzɔnenlɛ* ne ala a ɔze a.
26 Ɔbɔle ɔ bo ɔvale akɛnrazilɛ ɔdendɛle wɔ nyianusua ne anu, na mɔɔ Pelesela nee Akoyela+ dele mɔɔ ɔlɛka la, bɛvale ye bɛbokale bɛ nwo na bɛhilele ye Nyamenle adenle ne wienyi.
27 Na kɛmɔ ɛnee ɔkpondɛ kɛ ɔkɔ Akaya la ati, mediema ne mɔ hɛlɛle ɛdoavolɛma ne na bɛzɛlɛle bɛ kɛ bɛlie ye kɛnlɛma. Ɔti mɔɔ ɔdwule ɛkɛ ne la, ɔboale bɛdabɛ mɔɔ ɔlua Nyamenle ɛlolɛ kpole ne azo bɛrayɛ diedima la kpole;
28 ɔluakɛ ɔbɔle mɔdenle ɔhilele ye wɔ bagua nu kɛ Dwuuma ne mɔ ngilehilelɛ ne ɛnle kpalɛ, na ɔluale Ngɛlɛlera ne azo ɔhilele bɛ kɛ Gyisɛse a le Kelaese ne a.+
Ɔbodwɛkɛ
^ Anzɛɛ “ɔ nee bɛ kɔsuzu edwɛkɛ nwo.”
^ Ɛhye kile, nyianusua ne anu.
^ Wulomu amɛnlado mɔɔ nea maanzinli zo. Nea Edwɛkɛbohilelɛ.
^ Ɔbayɛ kɛ ɔhɔle Gyɛlusalɛm.
^ Anzɛɛ “ɛnlomanlɛ.”
