Ɛzoanvolɛma Gyima 2:1-47
2 Na mɔɔ Pɛntekɔso Ɛvoyia+ kenle ne dwule la, bɛ muala bɛyiale ɛleka ko.
2 Arɛlevilɛ nu ala dede bie vi anwuma kɛ anwoma kpole bie la rayile sua ne mɔɔ bɛwɔ nu la anu.+
3 Na bɛnwunle debie mɔɔ le kɛ senle mɔɔ zɔho ɛtafinlimalɛ la, na ɔzandele na ngoko razinzele bɛ nuhua ko biala anwo zo,
4 na sunsum nwuanzanwuanza+ ne yile bɛ muala tetɛkɛɛ na bɛbɔle ɔ bo kɛ bɛka aneɛ ngakyile, kɛ mɔɔ sunsum ne maanle bɛ adenle kɛ bɛha la.+
5 Mekɛ zɔhane ɛnee Dwuuma mɔɔ anye bolo nyamenlezonlenlɛ la ɛvi aleɛabo maanle biala anu ɛra Gyɛlusalɛm.+
6 Yemɔti mekɛ mɔɔ bɛdele dede ne la, menli dɔɔnwo rayiale ɛkɛ na ɔzinle bɛ nwo, ɔluakɛ bɛ nuhua ko biala dele kɛ bɛlɛka ye sua zo aneɛ.
7 Nɔhalɛ nu, ɔyɛle bɛ nwanwane kpole na bɛhanle kɛ: “Bɛnlea, se menli ɛhye mɔ mɔɔ bɛlɛtendɛ la amuala le Galelima,+ ɔnle zɔ ɔ?
8 Ɛnee kɛ ɔyɛle mɔɔ yɛ nuhua ko biala te kɛ bɛlɛka ye sua zo aneɛ ɛ?
9 Pateama, Medeama+ nee Yilamma,+ menli mɔɔ vi Mɛsɔpɔteemea, Dwudiya nee Kapadosea, Pɔntɛse yɛɛ Ehyea maanzinli nu,+
10 Felegyea nee Pamefelea, Yigyibiti yɛɛ Lebea maanzinli ne mɔ mɔɔ bikye Saelini, nyɛvolɛ mɔɔ vi Wulomu, Dwuuma nee bɛdabɛ mɔɔ bɛrayɛ Dwuuma la,+
11 Kilitima nee Areleebeama—yɛte kɛ bɛlɛfa yɛ sua zo aneɛ bɛaha ninyɛne mgbole mɔɔ Nyamenle ɛyɛ la anwo edwɛkɛ.”
12 Ɛhɛe, ɔzinle bɛ muala bɛ nwo na bɛbizale bɛ nwo ngoko kɛ: “Ɛhye abo kile duzu?”
13 Noko bie mɔ golole bɛ nwo na bɛhanle kɛ: “Bɛnlo nwanye menlemenle* bɛbo.”
14 Na Pita nee Bulu Nee Ko ne+ dwazole gyinlanle na ɔmaanle ɔ ne zo ɔzele bɛ kɛ: “Dwudiyama nee bɛdabɛ mɔɔ bɛde Gyɛlusalɛm la amuala, bɛnwu ɛhye na bɛdie me edwɛkɛ ne kpalɛ.
15 Nɔhalɛ nu, menli ɛhye mɔ ɛtɛbole nza kɛ mɔɔ bɛsuzu la, ɔluakɛ bɛbɔ kɛyɛ nwonlomɔ dɔne ngɔnla* ala.
16 Emomu, ɛhye a bɛluale ngapezonli Dwowɛle anwo zo bɛhanle a:
17 Nyamenle hanle kɛ, ‘“Mekɛ mɔɔ li awieleɛ la anu, mebawola me sunsum ne bie meagua nwonane biala anwo zo na bɛ mra mrenyia nee bɛ mra mraalɛ baha ngapezo yɛɛ bɛ mgbavolɛ banwu ɛnyelɛzodeɛnwunlɛ na bɛ mgbanyima aha ɛlalɛ,+
18 na mebawola me sunsum ne bie meagua me ngɛkɛlɛ mrenyia nee ngɛkɛlɛ mraalɛ bɔbɔ anwo zo wɔ mekɛ zɔhane anu, na bɛaha ngapezo.+
19 Na mebayɛ nwanwane ninyɛne wɔ anwuma lɔ na meayɛ sɛkɛlɛneɛ wɔ azɛlɛ ye azo—mogya nee senle yɛɛ esike mungumungu.
20 Sɛnzɛne ne bahakyi awozinli na siane ne ahakyi mogya kolaa na Gyihova* kenle kpole ne mɔɔ tɛla biala la ara.
21 Na awie biala mɔɔ kɛbɔ Gyihova* duma la, bɛbalie ye ngoane.”’+
22 “Yizilayɛma bɛdie edwɛkɛ ɛhye: Nyamenle luale Gyisɛse mɔɔ vi Nazalɛte la anwo zo lile gyima mgbole na ɔyɛle nwanwane ninyɛne nee sɛkɛlɛneɛ ngakyile ɔmaanle bɛnwunle ye wɔ mekɛ mɔɔ ɛnee ɔwɔ bɛ avinli la,+ kɛ mɔɔ bɛdabɛ mumua ne bɛze la.
23 Ɛnee Nyamenle ze kɛ bɛbahye ye noko ɔkponlenle zolɛ+ na bɛluale mɛladonlɛma anwo zo bɛhendanle ye baka zo bɛhunle ye.+
24 Noko Nyamenle dwazole ye+ na ɔliele ye ɔvile ewule nu,* ɔluakɛ ewule ɛnlɛ tumi mɔɔ ɔkola ɔkyekye ye a.+
25 Na Devidi hanle ɔ nwo edwɛkɛ kɛ: ‘Mefa Gyihova* mesie me nyunlu* dahuu, kɛmɔ ɔwɔ me sa fema zo la ati, ɛhwee ɛngola me bo tu.
26 Ɛhye ati, me ahonle lile fɛlɛko yɛɛ me tafinlima anye liele kpole. Na mebadɛnla aze wɔ anyelazo nu;
27 ɔluakɛ ɛnrɛgyakyi me* wɔ Nla* ne anu anzɛɛ ɛnrɛmaa wɔ nɔhavo ne nwonane ɛnrɛkpɔlɔ.*+
28 Wɔmaa menwu ngoane ndenle ne mɔ; ɛbamaa meali fɛlɛko kpole wɔ ɛ nyunlu.’+
29 “Mediema, mekola meka abusua kpanyinli Devidi anwo edwɛkɛ mekile bɛ mɔɔ menzulo a, kɛ ɔwule na bɛziele ye+ na ye nla ne tɛbɔ yɛ nwo ɛke badwu ɛnɛ.
30 Ɔluakɛ ɛnee ɔle ngapezonli na ɛnee ɔze kɛ Nyamenle ɛbɔ ye ɛwɔkɛ na yeha ndane kɛ ɔbamaa ɔ bo zo amra ne mɔ ko* adɛnla ye belemgbunli ebia ne azo,+
31 ɔnwunle Kelaese ewudwazo ne na ɔhanle nwolɛ edwɛkɛ kɛ bɛangyakyi ye wɔ Nla* ne anu anzɛɛ ye nwonane amkpɔlɔ.*+
32 Nyamenle dwazole Gyisɛse ɛhye, na yɛ muala yɛdi ɛhye anwo daselɛ.+
33 Yemɔti kɛmɔ Nyamenle ɛkpogya ye zo wɔ ɔ sa fema zo+ na yenyia sunsum nwuanzanwuanza ne mɔɔ Selɛ ne+ vale bɔle ye ɛwɔkɛ la ati a yewola mɔɔ bɛnwu ye na bɛde la yegua yɛ nwo zo a.
34 Ɔluakɛ Devidi mumua ne angɔ anwuma, noko ɔhanle kɛ, ‘Gyihova* zele me Awulae kɛ: “Tɛnla me sa fema zo
35 kɔkpula kɛ mekɛva wɔ kpɔvolɛma mekɛyɛ ɛ gyakɛ abo ebia.”’+
36 Yemɔti maa Yizilayɛma kɔsɔɔti ɛnwu ye kɛ Gyisɛse ɛhye mɔɔ bɛhunle ye wɔ baka zo+ la a Nyamenle ɛyɛ ye Awulae+ nee Kelaese a.”
37 Mɔɔ bɛdele ɛhye la, bɛlile nyane wɔ bɛ ahonle nu na bɛzele Pita nee ɛzoanvolɛma ne mɔɔ ɛha la kɛ: “Mediema, duzu a ɔwɔ kɛ yɛyɛ a?”
38 Pita zele bɛ kɛ: “Bɛnlu bɛ nwo,+ na bɛ nuhua ko biala ɛmaa bɛzɔne ye+ wɔ Gyisɛse Kelaese duma nu amaa bɛava bɛ ɛtane bɛahyɛ bɛ,+ na bɛbanyia sunsum nwuanzanwuanza ne mɔɔ Nyamenle fa maa mgbane la.
39 Ɔluakɛ ɛwɔkɛ ne+ wɔ ɛkɛ maa bɛ nee bɛ mra yɛɛ menli mɔɔ wɔ moamoa la kɔsɔɔti, bɛdabɛ mɔɔ Gyihova* yɛ Nyamenle ne kɛvɛlɛ bɛ la amuala.”+
40 Na ɔhanle edwɛkɛ gyɛne dɔɔnwo ɔvale ɔlile bɛ daselɛ bɔkɔɔ na ɔdule bɛ folɛ kɛ: “Bɛhwe bɛ nwo bɛvi awolɛndoazo amumuyɛ+ ɛhye anwo na bɛanzɛkye bɛ.”
41 Yemɔti bɛzɔnenle bɛdabɛ mɔɔ bɛvale anyelielɛ bɛliele ye edwɛkɛ ne bɛlile la,+ na kenle zɔhane bɛnyianle menli* kɛyɛ 3,000 bɛbokale bɛ nwo.+
42 Na bɛhɔle zo bɛdule bɛ nwo bɛmaanle ɛzoanvolɛma ne ngilehilelɛ ne, bɛbɔle nu,* bɛlile debie,+ na bɛyɛle asɔne.+
43 Nɔhalɛ nu, ɛzulolɛ hanle awie* biala na ɛzoanvolɛma ne yɛle nwanwane ninyɛne nee sɛkɛlɛneɛ dɔɔnwo.+
44 Bɛdabɛ mɔɔ bɛrayɛle diedima la kɔsɔɔti yiale nu na bɛhyɛle debie biala mɔɔ bɛlɛ la bɛmaanle bɛ nwo,
45 na bɛdɔnenle bɛ ninyɛne+ nee bɛ agyapadeɛ na bɛhyɛle ezukoa mɔɔ bɛnyianle bɛvile nuhua la, kɛ mɔɔ bɛ nuhua ko biala ngyianlɛ ne de la.+
46 Na bɛ muala bɛyiale ɛzonlenlɛsua ne anu alehyenlɛ biala, na bɛlile debie wɔ azua ngakyile nu, na bɛvale anyelielɛ nee ahonle kpalɛ bɛhyɛle aleɛ mɔɔ bɛlɛ la,
47 bɛyele Nyamenle ayɛlɛ na bɛnyianle menli kɔsɔɔti anyunlu ɛlolɛ. Mekɛ ko ne ala Gyihova* hɔle zo vale menli mɔɔ ɔbalie bɛ ngoane la rabokale bɛ nwo alehyenlɛ biala.+
Ɔbodwɛkɛ
^ Anzɛɛ “nwanye fofolɛ.”
^ Giliki aneɛ nu, kɛyɛ dɔnehwele nsa ne azo.
^ Giliki aneɛ nu, “ɔvile ewule nyane nu”; anzɛɛ ɔkola ɔkile, “ɔvile ewule nyɛma nu.”
^ Anzɛɛ “me nye dua.”
^ Anzɛɛ “me ɛkɛla.”
^ Anzɛɛ “Hades,” ɛhye kile, alesama nla. Nea Edwɛkɛbohilelɛ.
^ Anzɛɛ “ɛnrɛnwu ɛkpɔlɔlɛ.”
^ Giliki aneɛ nu, “ɔ kunlu ralɛ.”
^ Anzɛɛ “Hades,” ɛhye kile, alesama nla. Nea Edwɛkɛbohilelɛ.
^ Anzɛɛ “annwu ɛkpɔlɔlɛ.”
^ Anzɛɛ “ɛkɛla.”
^ Anzɛɛ “bɛhyɛle mɔɔ bɛlɛ la.”
^ Anzɛɛ “ɛkɛla.”
