Ɛzoanvolɛma Gyima 8:1-40
8 Sɔɔlo noko liele ye ɛhunlɛ ne dole nu.+
Ɔvi kenle zɔhane bɛbɔle ɔ bo bɛyɛle asafo ne mɔɔ wɔ Gyɛlusalɛm la kpɔdekpɔde kpalɛ; bɛ muala bɛbɔle asande bɛhɔle Dwudiya nee Samɛlea maanzinli ne mɔ anu, na ɔhale ɛzoanvolɛma ne ala.+
2 Na menli bie mɔɔ bɛsulo Nyamenle la vale Sitivin hɔziele ye, na bɛzunle ye kpole kpalɛ.
3 Na Sɔɔlo bɔle ɔ bo kɛ ɔsɛkye asafo ne. Ɔwolowolole azua nu ɔhɔhwenle mrenyia nee mraalɛ ɔvindele na ɔmaanle bɛhɔguale bɛ efiade.+
4 Noko menli mɔɔ bɔle asande la bɔle edwɛkpa ne nolo wɔ ɛleka biala mɔɔ bɛhɔle la.+
5 Felepe hɔle Samɛlea suakpole ne*+ azo na ɔbɔle ɔ bo ɔhanle Kelaese ne anwo edwɛkɛ ɔhilele bɛ.
6 Mɔɔ menli ne diele Felepe na bɛnwunle nwanwane ninyɛne ne mɔ mɔɔ ɔlɛyɛ la, bɛ muala bɛvale koyɛlɛ bɛdiele mɔɔ ɔlɛka la kpalɛ.
7 Ɛnee sunsum ɛtane wɔ menli dɔɔnwo anwo, na ɛnee bɛfa ɛnelɛ kpole bɛteɛdea nu na bɛfi bɛ nwo bɛtu.+ Eza menli mɔɔ ɛbubu nee wuliravolɛma dɔɔnwo dele kpɔkɛ.
8 Ɔti suakpole ne azo amra anye liele kpole.
9 Ɛnee nrenyia bie wɔ suakpole ne azo mɔɔ bɛfɛlɛ ye Saemɔn, ɛnee ɔye ngonyia ɔmaa ɔyɛ Samɛlea maanlema ne ɛzulolɛ, na ɔka kɛ ɔle sonlakpole.
10 Bɛ muala, ɔvi mɔɔ le ekyi kɔdwu mɔɔ le kpole la anwo zo tie ye na bɛka kɛ: “Nrenyia ɛhye a le Nyamenle Tumi ne, mɔɔ bɛfɛlɛ ye Bedevinli la.”
11 Kɛmɔ ɔyɛle ye ngonyia ninyɛne ne ɔmaanle ɔyɛle bɛ ɛzulolɛ mekɛ tendenle la ati, ɛnee bɛtie ye.
12 Noko mɔɔ Felepe hanle Nyamenle Belemgbunlililɛ ne+ nee Gyisɛse Kelaese duma ne anwo edwɛkpa ne hilele bɛ, na bɛliele ye bɛlile la, mrenyia nee mraalɛ kɔsɔɔti maanle bɛzɔnenle bɛ.+
13 Saemɔn noko rayɛle diedinli, na mɔɔ bɛzɔnenle ye la ɔ nee Felepe+ luale; na sɛkɛlɛneɛ nee nwanwane ninyɛne mɔɔ ɔnwunle kɛ Felepe ɛlɛyɛ la zinle ɔ nwo.
14 Mekɛ mɔɔ ɛzoanvolɛma ne mɔɔ wɔ Gyɛlusalɛm dele kɛ menli mɔɔ wɔ Samɛlea la ɛlie Nyamenle edwɛkɛ ne ɛdo nu la,+ bɛzoanle Pita nee Dwɔn wɔ bɛ nwo lɔ;
15 na bɛhɔyɛle asɔne bɛmaanle bɛ amaa bɛanyia sunsum nwuanzanwuanza ne.+
16 Ɔluakɛ ɛnee bɛzɔne bɛ wɔ Awulae Gyisɛse duma nu+ ɛdeɛ, noko ɛnee ɔtɛbale bɛ nuhua biala anwo zo.
17 Akee bɛvale bɛ sa bɛguale bɛ nwo zo,+ na bɛbɔle ɔ bo bɛnyianle sunsum nwuanzanwuanza ne.
18 Noko mɔɔ Saemɔn nwunle kɛ ɛzoanvolɛma ne fa bɛ sa gua menli nwo zo a bɛnyia sunsum ne la, ɔyɛle kɛ ɔmaa bɛ ezukoa,
19 ɔhanle kɛ: “Bɛmaa me tumi ɛhye noko bie amaa awie biala mɔɔ mekɛva me sa mekɛgua ɔ nwo zo la anyia sunsum nwuanzanwuanza ne bie.”
20 Noko Pita zele ye kɛ: “Ɛ nee wɔ ezukoa ne amuala ɛminli, ɔluakɛ ɛdwenle kɛ ɛbahola wɔava ezukoa wɔadɔ Nyamenle ahyɛlɛdeɛ ne mɔɔ ɔfa ɔmaa mgbane la.+
21 Ɛnlɛ kyɛfoa biala wɔ gyima ɛhye anu, ɔluakɛ wɔ ahonle nu ɛnde wɔ Nyamenle anyunlu.
22 Ɔti nu ɛ nwo na gyakyi wɔ subane ɛtane ne, bodo Gyihova* na kakyi wɔ adwenle amaa yeava wɔ ɛtane yeahyɛ wɔ;
23 ɔluakɛ menwu kɛ anyebolo* ɛyi wɔ tɛkɛɛ na dahuu ɛkpondɛ kɛ ɛyɛ ɛtane.”
24 Saemɔn buale bɛ kɛ: “Bɛbodo Gyihova* bɛmaa me amaa ninyɛne mɔɔ bɛha la anu biala anzi me nwo zo.”
25 Ɔti mɔɔ bɛlile daselɛ bɔkɔɔ na bɛhanle Gyihova* edwɛkɛ ne la, bɛziale bɛ nzi kɛ bɛkɔ Gyɛlusalɛm, na bɛhɔhanle edwɛkpa ne wɔ Samɛlea namunamu dɔɔnwo azo.+
26 Noko Gyihova* anwumabɔvolɛ+ zele Felepe kɛ: “Dwazo kɔ nyiakɛ, adenle ne mɔɔ vi Gyɛlusalɛm kɔ Gaza la azo.” (Adenle ɛhye la ɛsɛlɛ zo.)
27 Na ɔzile nu ɔhɔle, na nea! Yiteyopeanli kpanyinli bie ɛne, nrenyia ɛhye lɛ tumi na ɔnea Kandase, Yiteyopea ɔbahyema* ne ezukoa kɔsɔɔti azo. Ɛnee yehɔ Gyɛlusalɛm yehɔzonle+
28 na ɔde ye ehwili nu ɔlɛsia, ɛnee ɔlɛkenga ngapezonli Ayezaya buluku ne kpole.
29 Ɔti sunsum ne zele Felepe kɛ: “Kɔ na twe bikye ehwili ɛhye.”
30 Felepe nriandile hɔle nwolɛ na ɔdele kɛ ɔlɛkenga ngapezonli Ayezaya buluku ne kpole, na ɔbizale ye kɛ: “Asoo ɛte mɔɔ ɛlɛkenga la abo?”
31 Ɔzele kɛ: “Saa awie angile me a, kɛ ɔkɛyɛ na meade ɔ bo ɛ?” Yemɔti ɔmaanle Felepe vole radɛnlanle ɔ nwo ɛkɛ.
32 Na Ngɛlɛlera ne mɔɔ ɛnee ɔlɛkenga la ɛne: “Ɔle kɛ boane mɔɔ bɛ nee ye ɛlɛkɔ kɛ bɛkahu ye la, yɛɛ ɔle kɛ boaneralɛ mɔɔ ɛyɛ koonwu wɔ awie mɔɔ ɛlɛpepɛ ɔ nwo enrinli anyunlu la, yemɔti yeambuke ɔ nloa.+
33 Mekɛ mɔɔ bɛlɛgua ɔ nyunlu aze la, bɛyele pɛlepɛlelilɛ bɛvile ɔ nwo zo bɛhɔle.+ Nwane a baha ye awolɛndoazo ne anwo edwɛkɛ a? Ɔluakɛ bɛye ye ngoane bɛvi azɛlɛ ye azo.”+
34 Akee kpanyinli ne bizale Felepe kɛ: “Mesɛlɛ wɔ, nwane anwo edwɛkɛ a ngapezonli ne ɛlɛka a? Ɔdaye ɔ nwo edwɛkɛ anzɛɛ awie gyɛne ɔ?”
35 Felepe bɔle ɔ bo kɛ ɔtendɛ, na ɔbɔle ɔ bo wɔ ngɛlɛlera ɛhye azo ɔhanle Gyisɛse anwo edwɛkpa ne ɔhilele ye.
36 Na mɔɔ bɛlua adenle zo bɛlɛkɔ la, bɛhɔdwule ɛleka mɔɔ nzule wɔ la, na kpanyinli ne hanle kɛ: “Nea! Nzule ɛne; duzu a si me ɛzɔnenlɛ nwo adenle a?”
37 * ——
38 Yemɔti ɔmaanle ehwili ne gyinlanle na Felepe nee kpanyinli ne dwule hɔle nzule ne anu, na ɔzɔnenle ye.
39 Mɔɔ bɛvile nzule ne anu bɛvole file zo la, Gyihova* sunsum ne vale Felepe vile ɛkɛ ne ndɛndɛ, na kpanyinli ne annwu ye bieko, noko ɔvale anyelielɛ ɔhɔle.
40 Felepe noko hɔvindele Ahyedɔdo, na ɔhɔvale azɛlɛsinli ne amuala anu na ɔhɔle zo ɔbɔle edwɛkpa ne nolo wɔ azuamgbole ne mɔ kɔsɔɔti azo too ɔhɔdwule Sizalia.+
Ɔbodwɛkɛ
^ Anzɛɛ ɔkola ɔkile, “suakpole bie.”
^ Anzɛɛ “pɔezen mɔɔ yɛ ɛnwonle.” Giliki aneɛ nu, “bɔnyema ɛnwonle.”
^ Anzɛɛ “belemgbunli raalɛ.”
