Asoo ɔyɛ se ɔmaa wɔ kɛ ɛbanwu mɔɔ le nɔhalɛ anzɛɛ adalɛ la ɔ? Ɛnɛ menli gyinla kɛzi bɛte nganeɛ nee bɛ nzuzulɛ zo a bɛdie edwɛkɛ bie bɛdi a na tɛ kɛ ɔle nɔhalɛ anzɛɛ adalɛ la ati ɔ. Ɛnɛ menli dɔɔnwo mɔɔ wɔ ewiade la ɛnlie ɛnli kɛ nɔhalɛ bie wɔ ɛkɛ.

 Nzuzulɛ ɛhye ɛnle fofolɛ. Kɛyɛ ɛvolɛ 2,000 mɔɔ ɛze ɛhɔ la, Wulomu Amɛnlado Pɔnteɛse Paelɛte bizale Gyisɛse kɛ: “Duzu a le nɔhalɛ?” (Dwɔn 18:38) Paelɛte angendɛ ammaa Gyisɛse ambua ye, noko ɛnee ɔle kpuya mɔɔ anwo hyia kpalɛ. Kpuya ɛhye anwo mualɛ mɔɔ Baebolo ne fa maa la yɛ ahunlundwolɛ, na ɔbaboa wɔ yeamaa wɔanwu mɔɔ le nɔhalɛ nee adalɛ la wɔ ewiade ɛhye mɔɔ menli ɛnnwu ngakyile mɔɔ wɔ nɔhalɛ nee adalɛ avinli la anu.

Asoo nɔhalɛ wɔ ɛkɛ?

 Ɛhɛe. Edwɛkɛkpɔkɛ “nɔhalɛ” mɔɔ wɔ Baebolo ne anu la kile debie mɔɔ le zɔ nee debie mɔɔ tenrɛ la. Ɔmaa yɛnwu kɛ Gyihova a Nyamenle ɛkɛ ne a nɔhalɛ ne vi a, ɔti ɔfɛlɛ ye “Nyamenle mɔɔ ka nɔhalɛ” la. (Edwɛne 31:5) Nɔhalɛ edwɛkɛ mɔɔ vi Nyamenle ɛkɛ ne la a wɔ Baebolo ne anu a, na ɔfa nɔhalɛ zɔhane ɔtoto wienyi nwo ɔluakɛ ɔbahola yeahile yɛ adenle wɔ ewiade ɛhye mɔɔ bɛnnwu ngakyile mɔɔ wɔ nɔhalɛ nee adalɛ avinli la anu.​—Edwɛne 43:3; Dwɔn 17:17.

Kɛ ɔkɛyɛ na wɔanwu nɔhalɛ ne ɛ?

 Nyamenle ɛngulo kɛ yɛdie nɔhalɛ ne mɔɔ wɔ Baebolo ne anu la yɛto nu ala. Emomu, ɔse yɛdwenle nwo na yɛyɛ neɛnleanu na yɛmmagyinla kɛzi yɛte nganeɛ la azo. (Wulomuma 12:1) Ɔkulo kɛ yɛnwu ye na yɛfa yɛ “adwenle muala” yɛkulo ye na ɔmaa yɛ anwosesebɛ kɛ yɛnlea saa mɔɔ yɛlɛsukoa ye wɔ Baebolo ne anu la le nɔhalɛ a.​—Mateyu 22:37, 38; Gyima ne 17:11.

Adalɛbɔlɛ vi ni?

 Baebolo ne ka kɛ Nyamenle kpɔvolɛ Seetan Abɔnsam mɔɔ Baebolo ne fɛlɛ ye “adalɛ kɔsɔɔti bɛ ze” la a limoale bɔle adalɛ a. (Dwɔn 8:44) Ɔhanle Nyamenle anwo adalɛ edwɛkɛ ɔhilele alesama mɔɔ limoa la. (Gyɛnɛsese 3:1-6, 13, 17-19; 5:5) Ɔvi zɔhane mekɛ ne, Seetan ɛhɔ zo ɛmaa adalɛ edwɛkɛ ɛdɛlɛ na yeheda Nyamenle anwo nɔhalɛ ne azo.​—Yekile 12:9.

Duzu ati a adalɛbɔlɛ ɛbu zo ɛnɛ a?

 Seetan ɛhola ɛnyia menli dɔɔnwo anwo zo tumi wɔ yɛ mekɛ ye mɔɔ Baebolo ne ka kɛ ɔle “mekɛ mɔɔ li awieleɛ” la anu. Menli ta bɔ adalɛ fa bɛlɛbɛla menli na bɛsisi bɛ. (2 Timote 3:1, 13) Ɛzonlenlɛ dɔɔnwo mɔɔ wɔ ɛkɛ ne ɛnɛ la ɛnga nɔhalɛ. Baebolo ne hanle yɛ mekɛ ye anwo edwɛkɛ kɛ menli “[baboɔboa] kilehilevolɛma anloa bɛamaa bɛ nwo bɛamaa bɛahoto bɛ nzo nu” na ‘bɛagyakyi nɔhalɛ ne ɛdielɛ na bɛahɔdie adalɛ edwɛkɛ.’​—2 Timote 4:3, 4.

Duzu ati a nɔhalɛ nwo hyia a?

 Yɛdi nɔhalɛ a ɔmaa menli die yɛ di. Saa menli die yɛ di a ɔmaa yɛ nee bɛ nyia agɔnwolɛvalɛ kpalɛ. Baebolo ne ka kɛ Nyamenle kulo kɛ yɛsonle ye nɔhalɛ nu. Ɔka kɛ: “Ɔwɔ kɛ bɛdabɛ mɔɔ bɛlɛsonle [Nyamenle] la sonle ye wɔ sunsum nee nɔhalɛ nu.” (Dwɔn 4:24) Amaa wɔanwu kɛzi Baebolo ne anu nɔhalɛ ne bahola aboa wɔ yeamaa wɔanwu ɛzonlenlɛ nu adalɛ edwɛkɛ na wɔahwe ɛ nwo wɔavi nwo la, kenga edwɛkɛ mɔɔ wɔ Ɛzinzalɛ Arane mɔɔ ti ne se “Adalɛ Mɔɔ Maa Bɛdwenle Kɛ Nyamenle Ɛnlɛ Ɛlɔlɛ La” anu la.

Duzu ati a Nyamenle kulo kɛ menwu nɔhalɛ ne a?

 Nyamenle kulo kɛ ɛnyia ngoane noko kyesɛ ɛsukoa ɔ nwo nɔhalɛ ne na wɔanyia ngoane. (1 Timote 2:4) Saa ɛsukoa mɔɔ Nyamenle ɛha kɛ ɔle kpalɛ nee ɛtane la na ɛfa ɛbɔ wɔ ɛbɛla a, ɛ nee ye banyia agɔnwolɛvalɛ kyengye. (Edwɛne 15:1, 2) Nyamenle zoanle Gyisɛse wɔ azɛlɛ ye azo amaa yeaboa menli yeamaa bɛazukoa nɔhalɛ ne. Nyamenle kulo kɛ yɛtie Gyisɛse ngilehilelɛ ne.​—Mateyu 17:5; Dwɔn 18:37.

Asoo Nyamenle bamaa bɛagyakyi adalɛbɔlɛ ɔ?

 Ɛhɛe. Nyamenle kyi menli mɔɔ bɛlɛbɛla awie mɔ la. Yebɔ ɛwɔkɛ kɛ ɔbaye menli mɔɔ kpa kɛ bɛbahɔ zo bɛabɔ adalɛ la yeavi ɛkɛ. (Edwɛne 5:6) Mekɛ zɔhane, eza Nyamenle bali ye ɛwɔkɛ ɛhye azo: “Ɛnloanlɛ mɔɔ ka nɔhalɛ la badɛnla ɛkɛ dahuu.”​—Mrɛlɛbulɛ 12:19.