Wuluwulu kpole mɔɔ tɛla biala ɛlɛku menli wɔ ewiade amuala. Yɛ amaneɛbɔlɛ ɛhye mɔ mɔɔ doa zolɛ la nzonlɛ:

•   Ɛvolɛ ɛhye June siane ne a le mekɛ mɔɔ maanle nu yɛle wuluwulu dɛlale siane biala wɔ ɛvolɛ 174 anu mɔɔ bɛbɔle ɔ bo kɛ bɛka kɛzi maanle nu ɛyɛ wuluwulu la anwo edwɛkɛ la.”​—National Oceanic and Atmospheric Administration, U.S. Department of Commerce, July 13, 2023.

•   “Wuluwulu kpole ɛra Italy, Spain, France, Germany yɛɛ Poland, na bɛ nye la kɛ wuluwulu ne badwu 48°C [118°F] wɔ Sicily nee Sardinia mbɔra ne mɔ azo. Ɛhye a bayɛ mekɛ mɔɔ maanle nu ɛyɛ wuluwulu kpalɛ wɔ Europe a.”​—European Space Agency, July 13, 2023.

•   “Kɛmɔ maanle nu ɛlɛyɛ wuluwulu la ati, yɛ nye la kɛ ezule badɔ kpole wɔ ɛleka dɔɔnwo na yeamaa azule ayi ava ɛleka dɔɔnwo.”​—Stefan Uhlenbrook, kpanyinli mɔɔ ze nzule nee ezule mɔɔ tɔ la anwo debie mɔɔ wɔ World Meteorological Organization la, July 17, 2023.

 Asoo maanle nu mɔɔ ɛlɛyɛ wuluwulu kpole zɛhae la anwo amaneɛbɔlɛ gyegye wɔ ɔ? Nea mɔɔ Baebolo ne ka ye wɔ edwɛkɛ ɛhye mɔɔ nwolɛ hyia anwo la.

 Ɛhɛe. Maanle nu mɔɔ ɛlɛyɛ wuluwulu kpole wɔ ewiade amuala nee azuyilɛ boka ninyɛne mɔɔ Baebolo ne hanle kɛ ɔbasisi yɛ mekɛ ye azo la anwo. Kɛ neazo la, Gyisɛse hanle dole ɛkɛ ne kɛ yɛbanwu “ninyɛne ɛzulolɛ.” (Luku 21:11) Maanle nu mɔɔ ɛlɛyɛ wuluwulu kpole wɔ ewiade amuala la ɛmaa ɛzulolɛ ɛha menli dɔɔnwo kɛ alesama bazɛkye azɛlɛ ye.

 Kyɛkyɛ. Nyamenle bɔle azɛlɛ ye kɛ yɛdɛnla zolɛ dahuu; ɔnrɛmaa alesama ɛnrɛzɛkye ye. (Edwɛne 115:16; Nolobɔvo 1:4) Nɔhalɛ nu, yebɔ ɛwɔkɛ kɛ ‘ɔbazɛkye bɛdabɛ mɔɔ bɛlɛsɛkye azɛlɛ ne la.’​—Yekile 11:18.

 Baebolo ne maa yɛnwu kɛ Nyamenle kola yɛɛ ɔbabɔ azɛlɛ ne anwo bane amaa debie biala anzɛkye ye.

•   “[Nyamenle maa] ahumu ne gua dii; nyevile azɛlɛkye ne mɔ yɛ ngungoonwu.” (Edwɛne 107:29) Nyamenle lɛ ninyɛne mɔɔ yebɔ wɔ azɛlɛ ye azo la azo tumi. Ɔbahola yeaziezie ninyɛne mɔɔ maa maanle nu tɛnlabelɛ sɛkye na ɔmaa alesama nwu amaneɛ la.

•   “Ɛnea azɛlɛ ne, ɛmaa ɔso ma dɔɔnwo na ɔkye aleɛ.” (Edwɛne 65:9) Nyamenle bayila azɛlɛ ye yeamaa yeayɛ paladaese.

 Amaa wɔazukoa ɛwɔkɛ mɔɔ wɔ Baebolo ne anu kɛ bɛbayɛ ninyɛne mɔɔ wɔ azɛlɛ ye azo boɛ bieko anwo ninyɛne dɔɔnwo la, nea edwɛkɛ “Who Will Save the Earth?”