Yɛtete Ninyɛne Zo A Ɔmaa Yɛ Nye Die
DANIEL NEE MIRIAM gyale September 2000, na bɛhɔdɛnlanle Barcelona mɔɔ wɔ Spain la. Daniel ka kɛ, “Ɛnee yɛ nwo tɔ yɛ wɔ ɛbɛlabɔlɛ nu. Yɛ gyima maa yɛkola yɛdi aleɛ wɔ aleɛlilɛleka mɔɔ ɛlie duma, yɛkɔ maanle gyɛne zo, na yɛwula adɛladeɛ kpalɛ. Ɛnee eza yɛkɔ daselɛlilɛ dahuu.” Noko debie bie zile.
Wɔ 2006 nyianu bie abo, bɛbizale kpuya ɛhye wɔ ɛdendɛlɛ ko anu, ɔse: “Asoo yɛlɛyɛ mɔɔ yɛbahola biala la yɛaboa ‘bɛdabɛ mɔɔ bɛlɛpele kɛ bɛnrɛhɔ ahunleɛ la’ yɛamaa bɛalua adenle ne mɔɔ kɔ dahuu ngoane nu la anu ɔ?” Ɛhye hanle Daniel ahonle kpalɛ. (Mrɛ. 24:11) Ɔzile zo kɛ, ɔwɔ kɛ yɛbɔ ngoane edwɛkɛ mɔɔ wɔ Baebolo ne anu la nolo. (Gyi. 20:26, 27) Daniel ka kɛ, “Ɛnee ɔle kɛ asɛɛ Gyihova ɛlɛtendɛ ahile me la.” Ɛdendɛlɛ ne eza hanle kɛ saa yɛyɛ dɔɔnwo wɔ ɛzonlenlɛ gyima ne anu a, ɔmaa yɛ nye die kpole. Ɛnee Daniel ze kɛ ɛhye le nɔhalɛ. Ɛnee Miriam ɛbɔ adekpakyelɛ gyima ne abo na ɔlɛnyia anwubielɛ mɔɔ yɛ anyelielɛ.
Daniel ka kɛ, “Menwunle kɛ ɔwɔ kɛ meyɛ nzenzaleɛ kpole.” Na ɔyɛle zɔ. Ɔdele mekɛ mɔɔ ɔfa ɔyɛ gyima la azo, ɔbɔle adekpakyelɛ bo, na ɔ nee Miriam zuzule anyelielɛ mɔɔ saa bɛkɔboa ɛleka mɔɔ moalɛ nwo hyia la a bɛbanyia ye la anwo.
BƐYIALE NGYEGYELƐ—AKEE BƐ NYE LIELE
Wɔ May 2007, Daniel nee Miriam gyakyile bɛ gyima ne na bɛhɔle Panama, maanle bie mɔɔ bɛhɔkpɔla ɛkɛ ɛlɛ la. Azɛlɛsinli mɔɔ bɛyɛle nu gyima la bie a le Bocas del Toro mbɔra ngyikyi mɔɔ wɔ Caribbean Nyevile ne anu la, menli mɔɔ ka Guaymi aneɛ la a de ɛkɛ a. Ɛnee Daniel nee Miriam ze kɛ ezukoa mɔɔ bɛlɛ la baza bɛ wɔ siane mɔtwɛ anu wɔ Panama.
Bɛvale ɛlɛne nee basekɛ a bɛdule adenle wɔ mbɔra ne mɔ azo a, bɛkakye kenle mɔɔ limoa mɔɔ bɛvale basekɛ bɛdule adenle kɛyɛ mayɛle 20 (32 km) wɔ awoka ndendenle bie mɔ azo wɔ ewia ketekete ne anu la. Ɔhale ekyi na Daniel anye zo abulu ye. Noko, mekɛ mɔɔ bɛlɛpɛ nu wɔ azua mɔɔ wɔ adenle ne azo la, Guaymi mbusua ne mɔ liele bɛ kɛnlɛma, titili wɔ mekɛ mɔɔ agyalɛma ne zukoale edwɛkɛ agbɔkɛ bie mɔ wɔ bɛ aneɛ nu la. Yeangyɛ, ɛnee bɛyɛ Baebolo ɛzukoalɛ 23.
Noko mekɛ mɔɔ agyalɛma ne ezukoa wiele la, bɛ anyelielɛ hakyile arɛlebɔlɛ. Daniel ka kɛ: “Yɛzunle na yɛnyianle adwenle kɛ yɛsia yɛahɔ Spain. Yɛlile nyane kɛ yɛlɛgyakyi yɛ Baebolo sukoavoma ne ɛkɛ yɛahɔ la. Noko siane ko pɛle nu la, bɛdele amaneɛ fɛlɛko.” Miriam ka kɛ: “Bɛvɛlɛle yɛ kɛ yɛhɔzonle kɛ adekpakyelɛ titilima. Ɛnee ɔyɛ anyelielɛ kɛ yɛbadoa yɛ gyima ne azo la!”
MƆƆ MAANLE BƐ NYE LIELE KPALƐ LA
Nzenzaleɛ mɔɔ rale ahyehyɛdeɛ ne anu wɔ 2015 la ati, bɛzele Daniel nee Miriam kɛ bɛdoa bɛ gyima ne azo kɛ dahuu adekpakyelɛma. Duzu a bɛyɛle a? Bɛnyianle ɛwɔkɛ ne mɔɔ wɔ Edwɛndolɛ 37:5 la anu anwodozo, ɔse: “Fa ɛ nwo maa [Gyihova]; fa ɛ rɛle wula ye nu, ɔbali yeamaa wɔ.” Bɛnyianle gyima mɔɔ bɛbayɛ bɛanlea bɛ nwo kɛ adekpakyelɛma la, na kɛkala bɛwɔ asafo bie mɔɔ wɔ Veraguas, Panama la anu.
Daniel ka kɛ: “Kolaa na yɛavi Spain la, ɛnee yɛngola yɛnwu ye saa yɛbahola yɛatete ninyɛne zo wɔ yɛ ɛbɛlabɔlɛ nu a. Ɛnɛ, yɛhola yɛyɛ ye zɔ na yɛngyia ɛhwee nwo.” Duzu a maa bɛ nye die kpalɛ a? Bɛka kɛ, “Menli mɔɔ bɛbɛlɛ bɛ nwo aze mɔɔ yɛboa bɛ yɛmaa bɛsukoa Gyihova anwo debie la yɛ anyelielɛ tɛla debie biala!”
