BƐZƆNENLE John papa kɛ Gyihova Dasevolɛ wɔ 1950 awieleɛ wɔ sua ekyii bie mɔɔ wɔ Gujarat, India la azo. Ɛnee John nee ɔ mediema mrenyia nnu nee mralɛ yɛɛ bɛ mame amuala le Wulomu Katelekma mɔɔ bɛ nye die asɔnehɔlɛ nwo kpalɛ, ɔti bɛdwazole bɛtiale bɛ papa diedi ne.

Kenle ko, John papa zele ye kɛ ɔva ɛnvulopu ɔhɔmaa ɔ gɔnwo bie mɔɔ wɔ asafo ne anu la. Noko, zɔhane nwonlomɔ ne, John pɛle ɔ sa wɔ mekɛ mɔɔ ɛnee ɔlɛbuke angola bie azo la. Noko, kɛmɔ ɔkulo kɛ ɔtie ye papa edwɛkɛ la ati, ɔvale fuazinli ɔkyekyele ɔ sa ne mɔɔ ɛlɛtu mogya la na ɔhɔle.

Mɔɔ John hɔdwule ahenle mɔɔ ɔfa ɛnvulopu ne yeamaa ye sua nu la, ɔ ye mɔɔ ɛnee le Gyihova Dasevolɛ la liele ɛnvulopu ne. Ɔnwunle kɛ John asa ɛpɛ, na ɛnee ɔkpondɛ kɛ ɔboa ye. Ɔyele ye ayile ɛlɛka ne ɔrale, ɔkyikyile hanlɛ ne anyunlu na ɔvale ayile ɔdole zo ɔkyekyele. Akee ɔkpotole tii wuluwulu ɔmaanle John, na mɔɔ ɔlɛno la ɛnee bɛlɛbɔ Baebolo ne anu adawu.

Akee John bɔle ɔ bo kɛ ɔkakyi adwenle ɛtane mɔɔ ɔlɛ ye wɔ Alasevolɛ ne mɔ anwo la, ɔti ɔbizale ye ninyɛne nwiɔ mɔɔ nee ye papa diedi ɛdeɛ ne ɛnnyia la anwo kpuya​—saa Gyisɛse le Nyamenle yɛɛ saa ɔwɔ kɛ Kilisienema yɛ asɔne kile Mɛle a. Adiema raalɛ ne te Gujarati aneɛ ne, ɔti ɔgyinlanle Baebolo ne nee “This Good News of the Kingdom” buluku ne azo ɔbuale John kpuya ne mɔ.

Nzinlii, mɔɔ John gengale buluku ne la, ɔnwunle kɛ bɔ zo mɔɔ yenwu Baebolo nu nɔhalɛ ne a. Ɔhɔle ye ɛsɔfo ne ɛkɛ na ɔbizale ye kpuya ko ne ala. Ɛsɔfo ne vale ɛya vuandinle Baebolo ne bɔle ye na ɔdeanle nu kɛ: “Wɔyɛ Seetan! Kile me Baebolo ne anu ɛleka mɔɔ se Gyisɛse ɛnle Nyamenle la. Kile me ɛleka mɔɔ ɔka kɛ ɔnle kɛ yɛsonle Mɛle la. Kile me!” Edwɛkɛ ne zinle John anwo, na ɔzele ɛsɔfo ne kɛ, “Me gyakɛ ba ɛnrɛtia Kateleke asɔne ne anu bieko ɛlɛ.” Na yeangɔ bieko!

John bɔle ɔ bo kɛ ɔ nee Alasevolɛ ne mɔ sukoa debie, ɔgyinlanle nɔhalɛ ɛzonlenlɛ nzi, na ɔbɔle ɔ bo kɛ ɔsonle Gyihova. Mekɛ guale nu la, menli mɔɔ wɔ ye abusua ne anu la bie mɔ noko yɛle zɔ. Ɛvolɛ 60 ɛpɛ nu, noko kapenle ne mɔɔ wɔ John asa mrɛlɛsɛka ne anwo la maa ɔkakye kɛ Kilisienenli bie atiakunlukɛnlɛmayɛlɛ a hanle ye maanle ɔvale ɔ nwo ɔwulale nɔhalɛ ɛzonlenlɛ nu a.​—2 Kɔl. 6:4, 6.