Saa ɛkulo kɛ ɛnwu awie kpalɛ a, ɔle kpalɛ kɛ ɛbanwu mɔɔ yeyɛ yɛɛ ngyegyelɛ mɔɔ yeli zolɛ konim la. Zɔhane ala a saa ɛkulo kɛ ɛnwu Nyamenle kpalɛ a, ɔwɔ kɛ ɛnwu mɔɔ yeyɛ la a. Mekɛ mɔɔ ɛlɛyɛ zɔ la, ɛbanwu kɛ Nyamenle ɛyɛ ninyɛne dɔɔnwo mɔɔ ɔlɛboa yɛ ɛnɛ na yemɔ maa yɛnyia anwodozo kɛ yɛbahola yɛanyia kenle bie mɔɔ yɛ anyelielɛ la.

Gyihova Nyamenle a le Bɔvolɛ Kpole ne a, na “bɛnwu ye subane ne mɔ mɔɔ ɛnyelɛ ɛnnwu bɛ la ɔvi mekɛ mɔɔ ɔbɔle ewiade la, ɔluakɛ bɛdua ninyɛne mɔɔ ɔbɔle la azo bɛnwu ye.” (Wulomuma 1:20) “[Gyihova] vale ye tumi a bɔle azɛlɛ ye a, ɔvale ye nrɛlɛbɛ a ɔbɔle ewiade a, ɔvale ye ndelebɛbo a ɔbɔle anwomanyunlu a.” (Gyɛlɛmaya 10:12) Nyamenle nwanwane abɔdeɛ maa yɛnwu kɛzi ɔkulo yɛ la.

Suzu kɛzi Gyihova bɔle yɛ wɔ adenle titili zo la anwo, ɔbɔle alesama kɛ “ye ɛsaso.” (Mɔlebɛbo 1:27) Ɛhye kile kɛ yebɔ yɛ mɔɔ yɛkola yɛda ye subane ne mɔ mɔɔ bɛnlɛ bɛ ɛsaso la bie ali a. Ɔbɔle yɛ mɔɔ maa yɛkola yɛdwenle sunsum nu ninyɛne nwo, anzɛɛ tumi mɔɔ maa yɛte ye adwenle nee ye ngyinlazo bo a. Saa yɛbɔ mɔdenle yɛfa ninyɛne ɛhye mɔ yɛyɛ gyima a, yɛ nye balie kpole na yɛ ɛbɛlabɔlɛ agyinla kpɔkɛ zo. Mɔɔ tɛla ɛhye la, yemaa yɛnyia nwolɛ adenle kɛ yɛ nee ye bɛanyia agɔnwolɛvalɛ.

Ninyɛne mɔɔ Nyamenle ɛbɔ wɔ azɛlɛ ye azo la maa yɛnwu kɛzi ɔte nganeɛ ɔmaa yɛ la. Wɔ Ɛzoanvolɛ Pɔɔlo edwɛkɛ nu, ɔhanle kɛ, ‘Nyamenle luale ninyɛne mgbalɛ mɔɔ ɔyɛle la azo ɔmaanle yɛnyianle daselɛ, ɔmaanle ezule vi anwuma dɔle na yɛnyianle ɛlobɔ kpalɛ, ɔmaanle yɛnyianle aleɛ dɔɔnwo na yɛlile fɛlɛko wɔ yɛ ahonle nu.’ (Gyima ne 14:17) Tɛ ninyɛne mɔɔ yɛhyia nwo amaa yɛadɛnla ngoane nu la ala a Gyihova vale maanle yɛ a. Yemaa yɛ ninyɛne ngakyile dɔɔnwo amaa yɛ nye alie wɔ ɛbɛlabɔlɛ nu. Ɛhye mɔ amuala le ninyɛne mɔɔ ɔkulo kɛ ɔyɛ ɔmaa yɛ la anu ekyi bie ala.

 Gyihova bɔle azɛlɛ ne amaa alesama adɛnla zolɛ dahuu. Baebolo ne ka kɛ: “Yeva azɛlɛ ye yemaa menli” na “yeambɔ ye sesakaa biala yeanzie ɛkɛ; ɔbɔle ewiade, amaa sonla adɛnla nu.” (Edwɛndolɛ 115:16; Ayezaya 45:18) Nwane mɔ a badɛnla zo a, na bɛbadɛnla zo mekɛ tendenle nyɛ? “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”​—Edwɛndolɛ 37:29.

Ye zɔhane ati, Gyihova bɔle nrenyia nee raalɛ mɔɔ limoa, Adam nee Yive na ɔvale bɛ ɔhɔdɛnlanle paladaese azɛlɛ ne azo kɛ ‘bɛyɛ nu egyinli na bɛziezie ɛkɛ.’ (Mɔlebɛbo 2:8, 15) Nyamenle maanle bɛ gyima nwiɔ bie mɔɔ yɛ anyelielɛ la: “Bɛlɔ, bɛyɛ mɔnwo mɔnwo, bɛyi azɛlɛ ye na bɛzie azɛlɛ ye.” (Mɔlebɛbo 1:28) Ɛhye kile kɛ ɛnee Adam nee Yive lɛ anyelazo kɛ bɛbava anyelielɛ badɛnla azɛlɛ ye azo dahuu. Ɔyɛ alɔbɔlɛ kɛ, bɛyɛle Nyamenle anwo anzosesebɛ na ɔlua zo bɛminlinle anyelazo mɔɔ bɛlɛ kɛ bɛbaboka “tenlenema” mɔɔ “bava azɛlɛ ne ayɛ bɛ ɛdeɛ” la anwo. Noko kɛ mɔɔ yɛbanwu ye la, bɛ kpɔkɛzilɛ ne angakyi bodane mɔɔ Gyihova lɛ maa alesama anzɛɛ azɛlɛ ne la. Yɛlimoa yɛzuzu debie fofolɛ mɔɔ Nyamenle ɛyɛ la anwo.

Bɛfɛlɛ Baebolo ne kɛ Nyamenle Edwɛkɛ. Duzu ati a Gyihova vale Baebolo ne maanle yɛ a? Bodane titili ne a le kɛ, amaa yɛazukoa ɔ nwo debie. (Mrɛlɛbulɛ 2:1-5) Nɔhalɛ nu, Baebolo ne ɛmbua kpuya biala mɔɔ fale Nyamenle anwo la​—buluku biala ɛnrɛhola ɛnrɛyɛ zɔ. (Nolobɔvo ne 3:11) Noko, debie biala mɔɔ wɔ Baebolo ne anu la boa yɛ maa yɛnwu Nyamenle. Yɛdua kɛzi ɔ nee menli di la azo yɛnwu ye sonla holɛ. Yɛnwu menli holɛ mɔɔ ɔkulo nee mɔɔ ɔngulo la. (Edwɛndolɛ 15:1-5) Yɛnwu adwenle mɔɔ Nyamenle lɛ ye wɔ ɛzonlenlɛ, ɛbɛlabɔlɛ kpalɛ yɛɛ nwonane afoa nu ninyɛne nwo la wɔ nu. Baebolo ne maa yɛkola yɛnwu Gyihova subane ne kpalɛ ɔlua ɔ Ra, Gyisɛse Kelaese edwɛkɛhanlɛ nee ye nyɛleɛ zo.​—Dwɔn 14:9.

Debie bieko mɔɔ ɔti Gyihova ɛva Baebolo ne ɛmaa yɛ la a le kɛ, ɔmaa yɛanwu kɛzi yɛbahola yɛanyia ɛbɛlabɔlɛ mɔɔ yɛ anyelielɛ na ɔgyi bodane zo la. Gyihova ɛlua Baebolo ne azo ɛmaa yɛnwu kɛzi yɛbanyia abusua anyelielɛ, yɛ kunlu adwo yɛ nwo na yɛangyinla adwenleadwenle nloa la. Kɛ mɔɔ ɛbanwu ye wɔ magazine ɛhye anu la, Baebolo ne bua ɛbɛlabɔlɛ nu kpuya bie mɔ mɔɔ anwo hyia kpalɛ la. Kɛ neazo la: Duzu ati a amaneɛnwunlɛ ɛbu a? Duzu a bazi kenle bie a? Eza ɔkile mɔɔ Nyamenle ɛyɛ amaa ye mɔlebɛbo bodane ne ara nu la.

Yɛlɛ ndenle gyɛne mɔɔ maa yɛnwu kɛ Baebolo ne le ngakyile bɔkɔɔ na Nyamenle ala a le ye kɛlɛvolɛ ne a. Menli 40 a vale ɛvolɛ mɔɔ bo 1,600 la hɛlɛle a, noko ɔ muala lɛ edwɛkɛtile ko ɔluakɛ Nyamenle a le ye Kɛlɛvolɛ ne a. (2 Timote 3:16) Baebolo ne ɛnle kɛ tete mbuluku gyɛne la, bɛbɔ nwolɛ bane wɔ ɛvolɛ dɔɔnwo anu kɛ mɔɔ tete Baebolo bɛsanloangɛlɛlera dɔɔnwo maa yɛnwu ye la. Bieko, Baebolo ne ɛhola ɛgyinla mɔdenle mɔɔ menli ɛbɔ kɛ bɛsɛkye ye amaa bɛangile ɔ bo, bɛangyɛ na bɛangenga la anloa. Ɛnɛ Baebolo ne a le buluku mɔɔ bɛhyɛ ye dɔɔnwo na bɛhile ɔ bo bɛhɔ aneɛ dɔɔnwo anu a. Baebolo ne mɔɔ tɛbɔ ɛkɛ ne la le daselɛ mɔɔ kile kɛ “Nyamenle edwɛkɛ ne bagyinla ɛkɛ dahuu.”​—Ayezaya 40:8.

Debie bieko mɔɔ Nyamenle ɛyɛ la a le ngyehyɛleɛ titili mɔɔ ɔbamaa yeali ye bodane mɔɔ ɔlɛ ɔmaa yɛ la anwo gyima la. Kɛ mɔɔ yɛlimoa yɛha la, Nyamenle kulo kɛ alesama tɛnla azɛlɛ ye azo dahuu. Noko akee, mɔɔ Adam yɛle Nyamenle anwo anzosesebɛ na ɔyɛle ɛtane la, ɔminlinle dahuu ngoane nwo adenle mɔɔ ɛnee ɔ nee ɔ bo zo amra banyia la. “Ɔlua sonla ko anwo zo ɛtane rale ewiade na ewule luale ɛtane nwo zo rale la, yɛɛ ewule dɛlɛle hanle menli kɔsɔɔti a, ɔluakɛ bɛ muala bɛyɛ ɛtane.” (Wulomuma 5:12) Mɔɔ Adam andie Nyamenle la, ɛnee ɔle kɛ asɛɛ bodane mɔɔ ɔlɛ ɔmaa azɛlɛ ne la ɛnrɛra nu. Boni a Gyihova yɛle a?

Kɛzi Gyihova yɛle ye ninyɛne la nee ye subane ne mɔ yia. Kɛmɔ ɔdi pɛlepɛle la ati, ɔvale ɛtane mɔɔ Adam nee Yive yɛle la anwo ɛzonlelilɛ ɔdole bɛ nwo zo, noko ɔvile ɛlɔlɛ nu ɔyɛle ngyehyɛleɛ kpalɛ ɔmaanle bɛ bo zo amra. Gyihova luale ye nrɛlɛbɛ ne  azo ɔlile tɛnlabelɛ ne anwo gyima, na ɛkɛ ne ala ɔvale nwolɛ sɔbelɛ ne ɔdole gua. (Mɔlebɛbo 3:15) Nyamenle Ara ne, Gyisɛse Kelaese a baye yɛ avi ɛtane nee ewule nu a. Boni a ɛhye kile a?

Amaa bɛalie alesama bɛavi ngyegyelɛ mɔɔ Adam atuadelɛ ne ɛva ɛra abo la, Gyihova zoanle Gyisɛse rale azɛlɛ ye azo kɛ ɔhilehile menli ngoane adenle ne na ‘ɔva ye ngoane ɔyɛ ɛkpɔnedeɛ ɔlie menli dɔɔnwo.’ a (Mateyu 20:28; Dwɔn 14:6) Gyisɛse bahola ava ye ngoane ayɛ ɛkpɔnedeɛ ɔluakɛ ɛnee ɔdi munli kɛ Adam. Noko Gyisɛse anyɛ kɛ Adam, ɔyɛle tieyɛ ɔhɔle ewule nu. Kɛmɔ ɛnee ɔnfɛta kɛ Gyisɛse wu la ati, Gyihova dwazole ye hɔle anwuma. Kɛkala, akee Gyisɛse holale yɛle mɔɔ Adam angola ye yɛ la​—ɔmaanle alesama mɔɔ yɛ tieyɛ la nyianle anyelazo kɛ bɛbanyia dahuu ngoane. “Na kɛ mɔɔ sonla ko anzosesebɛ maanle menli dɔɔnwo yɛle ɛtanevolɛma la, zɔhane ala noko a sonla ko tieyɛ bamaa menli dɔɔnwo ayɛ tenlenema a.” (Wulomuma 5:19) Ɔlua Gyisɛse ɛkpɔnelɛ afɔlebɔlɛ ne ati, Nyamenle bamaa ɛwɔkɛ mɔɔ yebɔ kɛ alesama bɛadɛnla azɛlɛ ye azo dahuu la ara nu.

Saa yɛnea kɛzi Gyihova lile ngyegyelɛ mɔɔ Adam anzosesebɛ ne vale rale la anwo gyima la a, ɔmaa yɛnwu ye kpalɛ. Yɛnwu ye kɛ debie biala ɛnle ɛkɛ ne mɔɔ bahola azi Gyihova adenle wɔ ninyɛne mɔɔ yebɔ ɔ bo ɔlɛyɛ la anwo a; ye edwɛkɛ ne bara nu. (Ayezaya 55:11) Eza yɛ nye sɔ ɛlɔlɛ kpole mɔɔ Gyihova ɛla ye ali ɛhile yɛ la. “Ɛhye azo a bɛluale bɛlale Nyamenle ɛlɔlɛ ne ali wɔ yɛ nwo a, Nyamenle zoanle ɔ Ra kokye ne wɔ ewiade amaa ɔlua ɔ nwo zo yɛanyia ngoane. Ɛhye anu a ɛlɔlɛ ne wɔ a, tɛ yɛdayɛ a yɛhulole Nyamenle a, emomu yemɔ a ɔhulole yɛ na ɔzoanle ɔ Ra ne kɛ ɔrabɔ yɛ ɛtane nwo mgbɔdalɛ afɔle a.”​—1 Dwɔn 4:9, 10.

Kɛ mɔɔ Nyamenle ‘anva ɔ Ra ne bɔbɔ ambɔ abokɛ na ɔvale ye ɔmaanle yɛ muala la,’ zɔhane ala a yɛlɛ anwodozo kɛ Nyamenle bava “ninyɛne muala” mɔɔ yeva yebɔ yɛ ɛwɔkɛ la yeamaa yɛ a. (Wulomuma 8:32) Duzu a Nyamenle ɛbɔ nwolɛ ɛwɔkɛ mɔɔ ɔbayɛ yeamaa yɛ a? Toa zo kenga.