Bɛwole me wɔ Ciudad Mante, maanzinli kɛnlɛma bie mɔɔ wɔ Tamaulipas, Mexico la azo. Menli mɔɔ wɔ suakpole ne azo la le atiakunlukɛnlɛma yɛɛ bɛyɛ nyele. Noko ɔyɛ alɔbɔlɛ kɛ, ɔluakɛ nwulema ekpunli wɔ ɛkɛ la ati, ɔmaa ɛkɛ ne yɛ ɛzulolɛ.

Yɛle ngakula mrenya nna, na medame a metɔ zo nwiɔ a. Me awovolɛ maanle bɛzɔnenle me wɔ Kateleke Asɔne ne anu, nzinlii membokale edwɛndovo eku ne anwo. Ɛnee mekulo kɛ meyɛ mɔɔ sɔ Nyamenle anye la ɔluakɛ mesulo kɛ bɛbabua me ndɛne na bɛayela me wɔ hell senle nu dahuu.

Mɔɔ menyianle ɛvolɛ nnu la, me papa gyakyile yɛ ɛkɛ hɔle. Ɛhye maanle menlile nyane kpole na me nwo bubule me. Ɛnee mende deɛmɔti yekpo yɛ la abo, ɔluakɛ yɛkulo ye kpalɛ. Me mame vale mekɛ dɔɔnwo yɛle gyima wɔ ɛleka bie amaa yɛanlea yɛdayɛ ngakula nna ne.

Mɔɔ dole yɛ la maanle mengyakyile sukulu na me nee me gɔnwo mɔ mɔɔ tɛla me la dule. Bɛhilele me ndanehanlɛ, nyiletanenlonlɛ, awule nee konle. Kɛmɔ ɛnee mekulo kɛ medi awie mɔ anwo zo tumi la ati, menzukoale kɛzi bɛko wɔ ndenle ngakyile zo na bɛto etu la. Membayɛle kpavolɛ mɔɔ ɛnee mekulo basabasayɛlɛ. Ɛnee yɛta yɛko yɛtoto yɛ nwo etu, na fane dɔɔnwo ne ala me nwo yɛ mogya ngome na bɛgyakyi me wɔ gua ne azo bɛmaa ɔka me nee ewule. Nea kɛzi memaanle me mame lile nyane wɔ mekɛ mɔɔ ɔranwunle me wɔ adenle ɛhye azo na ɛnee ɔwɔ kɛ ɔfa me ɔkɔ asopiti ndɛndɛ la!

Menlile 16 la, me gɔnwo Jorge mɔɔ me nee ye dule wɔ me ngakula nu la rakpɔlale yɛ. Ɔzele yɛ kɛ ɔle Gyihova Dasevolɛ na ɔkulo kɛ ɔka edwɛkɛ bie mɔɔ anwo hyia la ɔkile yɛ. Ɔbɔle ɔ bo kɛ ɔdua Baebolo ne azo yeahilehile ye diedi ne anu yeahile yɛ. Ɛnee metɛkengale ye ɛlɛ, na me nye liele kɛ mebazukoa Nyamenle duma ne nee ye bodane ne mɔ anwo debie. Jorge hanle kɛ ɔ nee yɛ bazukoa Baebolo ne na yɛliele yɛdole nu.

Hell senle ne anwo nɔhalɛ edwɛkɛ mɔɔ menzukoale la maanle me nwo dɔle me​—Baebolo ne ɛngilehile zɔ. (Edwɛndolɛ 146:4; Nolobɔvo ne 9:5) Mɔɔ  menzukoale ɛhye la, meanzulo Nyamenle bieko. Emomu, menwunle ye kɛ ɔle Selɛ kulovolɛ na ɔkulo kɛ ɔwie ɔ mra boɛ.

Mɔɔ me Baebolo ɛzukoalɛ ne ɛlɛkɔ ɔ nyunlu la, menwunle kɛ ɔhyia kɛ mekakyi me subane. Ɛnee ɔwɔ kɛ mesukoa mɛlɛbɛnwoaze na megyakyi basabasayɛlɛ. Folɛdulɛ mɔɔ wɔ 1 Kɔlentema 15:33 la boale me. Ɔse: “Agɔnwolɛ ɛtane sɛkye ɛbɛla kpalɛ.” Menwunle kɛ saa mebahola meahakyi me subane a, ɔnle kɛ me nee menli mɔɔ ɛnlɛ subane kpalɛ la tu. Ɔti mengyakyile agɔnwolɛ dɛba ne mɔ na menvale agɔnwolɛ wɔ nɔhalɛ Kilisiene asafo ne anu​—menli mɔɔ ɛnlua konle anzɛɛ basabasayɛlɛ zo ɛnziezie bɛ avinli edwɛkɛ na emomu bɛfa Baebolo ngyinlazo bɛdi gyima la.

Ngɛlɛlera bieko mɔɔ boale me la wɔ Wulomuma 12:17-19. Ɔse: “Saa awie yɛ bɛ ɛtane a, bɛmmadi ye nzenralɛ. . . . Bɛbɔ mɔdenle kɛ bɛ nee menli kɔsɔɔti kɛdɛnla anzonudwolɛ nu. Ayi mɔ, bɛmmafa ɛtane bɛtua ɛtane kakɛ ɛlɛ, . . . Ɔluakɛ Nyamenle Edwɛkɛ ne se, ‘“Nzenralɛ le me ɛdeɛ, mebadua ɛtane kakɛ”, Awulae a se a.’” Menliele mendole nu kɛ Gyihova baye nzisi avi ɛkɛ wɔ adenle kpalɛ zo nee ye mekɛ kpalɛ nu. Ngyikyingyikyi, mengyakyile me basabasayɛlɛ subane ne.

Me rɛle ɛnrɛvi kenle ko nɔsolɛ bie mɔɔ ɛnee melɛkɔ sua nu la ɛlɛ. Mgbavolɛ bie mɔɔ bɛwɔ ekpunli bie mɔɔ ɛnee yɛ nee bɛ ɛnga la tetale me, na mɔɔ li bɛ ti la zile me nzi kuma nu na ɔdeanle nu kɛ, “Die ɛ nwo!” Mekɛ zɔhane, menzɛlɛle Gyihova sikalɛ kɛ ɔboa me ɔmaa mengyinla ɔ nloa. Ɛnee mekulo kɛ medi nzenralɛ, noko menzɔle me nwo na mengɔle. Aleɛ hyenle la, menyiale bɛ kpanyinli ne bieko. Menvale ɛya kpole mɔɔ anrɛɛ medi nzenralɛ a, noko menzɛlɛle Gyihova kɛ ɔboa me ɔmaa menzɔ me nwo. Ɔzinle me nwo kɛ kpavolɛ ne bikyele me na ɔzele me kɛ: “Fa mɔɔ zile ɛkenle nɔsolɛ ne la kyɛ me. Nɔhalɛ ne a le kɛ, mekulo kɛ meyɛ kɛ ɛdawɔ la. Mekulo kɛ mesukoa Baebolo ne.” Nea kɛzi me nye liele kɛ mengolale menzɔle me nwo a! Ɔlua ɛhye azo, ɔdaye noko ɔzukoale Baebolo ne.

Ɔyɛ alɔbɔlɛ kɛ, me mbusuafoɔ mɔɔ ɛha la angɔ zo anzukoa Baebolo ne wɔ mekɛ zɔhane. Noko akee, menzile kpɔkɛ kɛ mekɔ zo meazukoa Baebolo ne na menrɛmaa awie biala anzɛɛ debie biala ɛnrɛzi me adenle. Menwunle kɛ saa me nee Nyamenle menli tu dahuu a mebanyia anwosesebɛ na meanyia abusua mɔɔ mehyia nwo la. Menyianle anyuhɔlɛ, na wɔ 1991, bɛzɔnenle me kɛ Gyihova Dasevolɛ.

Ɛnee melɛ ahonle ɛtane, mele nzisi na meyɛ basabasa. Noko Nyamenle Edwɛkɛ ne ɛhakyi me ɛbɛlabɔlɛ ne bɔkɔɔ. Kɛkala meka anzodwolɛ edwɛkɛ mɔɔ wɔ Baebolo ne anu la mekile awie biala mɔɔ badie la. Menyianle adenle menyɛle mekɛ kɔsɔɔti ɛzonlenlɛ gyima ne wɔ ɛvolɛ 23 mɔɔ ɛze la.

Ɛnee ɔyɛ a, mekɔyɛ gyima wɔ Gyihova Alasevolɛ ɔfese ne mɔɔ wɔ Mexico la. Ɛkɛ ne a menyiale Claudia, Kilisienenli raalɛ mɔɔ bɔ mɔdenle, na yɛgyale wɔ 1999. Meyɛ Gyihova mo kɛ yeyila me na yemaa me raalɛ mɔɔ di nɔhalɛ a!

Yɛ mu nwiɔ yɛzonlenle wɔ Mexico Mumule Aneɛ asafo nu, na yɛboale mumulema yɛmaanle bɛzukoale Gyihova anwo debie. Nzinlii, bɛvɛlɛle yɛ kɛ yɛhɔ Belize maanle nu na yɛhilehile menli Baebolo ne. Yɛtete ninyɛne zo wɔ yɛ asetɛnla nu wɔ ɛke ɛdeɛ, noko yɛlɛ mɔɔ yɛhyia nwo mɔɔ bamaa yɛ nye alie a. Yɛnrɛhola yɛnrɛva debie biala yɛnrɛhakyi ye.

Nzinlii, me mame bɔle Baebolo ɛzukoalɛ ne abo bieko na bɛzɔnenle ye. Eza, me diema nrenyia kpanyinli, ɔ ye nee ɔ mra ɛrayɛ Gyihova Alasevolɛ. Me gɔnwo mɔ bie mɔ mɔɔ menganle Belemgbunlililɛ edwɛkɛ ne bie mengilele bɛ la noko ɛlɛsonle Gyihova ɛnɛ.

Ɔyɛ alɔbɔlɛ kɛ, me mbusuafoɔ bie mɔ ɛwu ɔluakɛ bɛangakyi bɛ basabasayɛlɛ subane ne. Saa mendoale ɛbɛla ko ne ala azo a, anrɛɛ bie a mende aze ɛnɛ kɛ bɛdabɛ la. Meyɛ Gyihova mo kɛ ɔhwenle me ɔbikyele ɔ nwo nee ye azonvolɛ ne mɔ, mɔɔ vale abotane nee atiakunlukɛnlɛma hilehilele me maanle menvale Baebolo ngyinlazo membɔle me ɛbɛla la.