WƆ ƐVOLƐ mɔɔ bo 3,000 mɔɔ ɛze la, tete selɛ Dwobu nwunle kɛ anwomanyunlu nloma ka Nyamenle asa nloa gyima anwo edwɛkɛ dɔɔnwo kile yɛ. Noko kɛzi bɛ subane de la maa bɛkola bɛfa bɛ bɛyɛ ndonwo nee ɛrɛlɛdendɛ. Wɔ Baebolo ne anu, anwomanyunlu nloma mɔɔ ɔka bɛ nwo edwɛkɛ dɔɔnwo la kilehile yɛ debie mɔɔ hyia mɔɔ fale ɛbɛlabɔlɛ nee agɔnwolɛvalɛ mɔɔ yɛ nee Nyamenle lɛ la anwo. Maa yɛnlea neazo ekyii bie.

Ɛnee Gyɛlusalɛmma ze nyamenleakatiba, mɔɔ dahuu bɛyɛ bɛ azua wɔ ezumule kɛsa bo la. Bie mɔ yɛle bɛ sua wɔ Sɔlɔmɔn ɛzonlenlɛ sua ne anu. Ɔbayɛ kɛ nyamenleakatiba mɔɔ yɛle bɛ azua wɔ ɛzonlenlɛ sua ne anwo ɛvolɛ biala la nwunle kɛ ɔle ɛleka mɔɔ banebɔlɛ wɔ, mɔɔ bɛbahola bɛanlea bɛ mra ngyikyi ne mɔ wɔ ɛkɛ a.

Ahenle mɔɔ hyehyɛle Edwɛndolɛ 84 mɔɔ le Kɔla amra ne mɔ ko mɔɔ zonlenle wɔ ɛzonlenlɛ sua ne anu dapɛne ko wɔ siane nsia biala anu la, nwunle bɛ azua ne mɔ wɔ ɛzonlenlɛ sua ne anu. Ɔhulole kɛ ɔbayɛ kɛ nyamenleakatiba mɔɔ ɛyɛ ye sua wɔ Gyihova sua nu la. Ɔzele kɛ: “O Tumivolɛ [Gyihova], Wɔ tɛnlabelɛ ne le kɛnlɛma! Me kunlu a anrɛɛ mewɔ ɛkɛ, me nwo dɔ [Gyihova] Ɛzonlenlɛ Sua ne anu. . . . Ngɛsanloma bɔbɔ lɛ ye sane, yɛɛ nyamenleakatiba lɛ ɔ ti anwo sane mɔɔ ɔfa ɔ mra ɔgua nu, wɔ wɔ azukponle ne anwo, O Tumivolɛ [Gyihova], me Belemgbunli nee me Nyamenle.” (Edwɛndolɛ 84:1-3) Asoo yɛ nee yɛ mra da ɛhulolɛ nee anyezɔlɛ ko ne ala ali kɛ yɛ nee Nyamenle menli ne bayia nu dahuu ɔ?​—Edwɛndolɛ 26:8, 12.

Ngapezonli Gyɛlɛmaya hɛlɛle kɛ, “Akoso bɔbɔ mɔɔ lua anwomanyunlu la ze ye mekɛ.” Ɔda ali kɛ ɛnee ɔze akoso mɔɔ tu fi Ɛwɔkɛ Azɛlɛ ne azo kɔ ɛleka fofolɛ la. Wɔ nyenyesuo mekɛ nu, bɛbule mgbonda kɛ akoso anwo fufule mɔɔ bo 300,000 la tu fi Africa dua ɛleka mɔɔ Dwɔdan Bɔnza ne wɔ la kɔ Europe Sɔlɔ. Bɛlɛ debie bie wɔ bɛ nu mɔɔ maa bɛnwu kɛ wawaa mekɛ ɛdwu mɔɔ ɔwɔ kɛ bɛsia bɛkɔ ɛleka mɔɔ bɛbobɔ bɛ mra ne mɔ la. Kɛ mɔɔ nloma gyɛne yɛ ye la, bɛze “mekɛ mɔɔ bɛsia bɛba a.”​—Gyɛlɛmaya 8:7.

Collins Atlas of Bird Migration ka kɛ, ‘Mɔɔ maa bɛ ɛdulɛ ne yɛ azibɛnwo la a le kɛ zɔhane a bɛbɔle bɛ a.’ Gyihova Nyamenle vale kɛzi nloma tu fi ɛleka ko kɔ ɛleka gyɛne la wɔ ye mekɛ nloa la bɔle bɛ, yɛɛ yemaa sonla tumi mɔɔ ɔkola ɔnwu mekɛ nee ɛlobɔ ne mɔ. (Luku 12:54-56) Sonla ɛnle kɛ akoso mɔɔ bɛva nganeɛ ɛhye bɛwula ye nu a, Nyamenle anwo ndelebɛbo a le debie titili mɔɔ maa sonla nwu kɛzi mekɛ mɔɔ yɛwɔ nu la anwo hyia a. Yizilayɛma mɔɔ dɛnlanle aze wɔ Gyɛlɛmaya mekɛ zo la bule bɛ  nye guale ɛhye azo. Nyamenle hilele deɛmɔti yera ye zɔ la anu kɛ: “Bɛkpo medame [Gyihova] me nloa edwɛkɛ; na duzu nrɛlɛbɛ bɔbɔ a bɛze a?”​—Gyɛlɛmaya 8:9.

Ɛnɛ, yɛlɛ ninyɛne dɔɔnwo mɔɔ di daselɛ kɛ yɛwɔ mekɛ mɔɔ Baebolo ne fɛlɛ ye “awieleɛ mekɛ ne” la anu. (2 Temɔte 3:1-5) Asoo ɛbazukoa akoso na wɔayɛ ‘mekɛ ne’ nzonlɛ ɔ?

Bɛha kɔleɛ nwo edwɛkɛ dɔɔnwo wɔ Baebolo ne anu, na ɛnee bɛta bɛnwu nloma ɛhye mɔ wɔ Ɛwɔkɛ Azɛlɛ ne azo. Kɔleɛ mɔɔ yɛ ye sua wɔ boka ti zo la, ‘kpondɛ mɔɔ ɔkɛli; ɔ nye [kɔ moa kpalɛ] die ye moa moa nehane.’ (Dwobu 39:27-29) Kɛmɔ kɔleɛ anye kɔ moa kpalɛ la ati, ɔkola ɔnwu asoasoa mɔɔ lua mayɛlɛ foa ko (km 1) la.

Kɛ mɔɔ kɔleɛ kola nwu ‘moa kpalɛ’ la, Gyihova noko kola nwu mɔɔ bazi kenle bie la. Gyihova Nyamenle hanle kɛ: “Medame a mɔlebɛbo ne menganle awieleɛ edwɛkɛ ne na mɔmoane menganle mɔɔ basisi la anwo bie” a. (Ayezaya 46:10) Saa yɛdi Gyihova folɛdulɛ zo a, yɛbanyia ye nrɛlɛbɛ kpole ne nee ye nwunu ne azo nvasoɛ.​—Ayezaya 48:17, 18.

Eza Baebolo ne fa bɛdabɛ mɔɔ bɛ rɛle wɔ Nyamenle anu la toto kɔleɛ nwo: “Bɛdabɛ mɔɔ bɛ rɛle wɔ [Gyihova] anu la, bɛbanyia anwosesebɛ fofolɛ; bɛbanyia ndɛbalɛ mɔ le kɛ kɔleɛ ɛdeɛ ne” la. (Ayezaya 40:31) Anwoma wuluwulu a fa kɔleɛ kɔ anwuma a. Saa kɔleɛ ne nwu ɛleka mɔɔ anwoma wuluwulu wɔ la a, ɔtɛlɛ ɔ ndɛba anu na ɔbɔ anwoma ne anwo mgbɔlɔka ɔmaa ɔfa ye ɔkɔ anwuma kpalɛ. Tɛ kɔleɛ mumua ne anwosesebɛ a fa ye kɔ anwuma moa kpalɛ a. Zɔhane ala a bɛdabɛ mɔɔ bɛ rɛle wɔ Gyihova anu la kola fa bɛ nye to ɔ nwo zo kɛ awie mɔɔ ɛbɔ bɛ ɛwɔkɛ kɛ ɔbamaa bɛ “tumi bedevinli” ne la.​—2 Kɔlentema 4:7, 8.

Ɔhale mekɛ ekyi na Gyisɛse awu la, ɔgyinlanle koonwu na ɔnleanle Dwuuma suakpole ne. Ɔgule ɛnwomenle ɔzele kɛ, “Gyɛlusalɛm, O Gyɛlusalɛm! Mɔɔ ɛku Nyamenle kpɔmanvolɛma, ɛsi menli mɔɔ Nyamenle ɛzoa bɛ wɔ ɛ nwo la awolɛ a! Fane dɔɔnwo yɛɛ mehulo kɛ anrɛɛ menwɔva me sa menwɔbɛla wɔ menli ne amuala kɛ akɔlɛ ɛdane butu ɔ mra anwo zo la, noko wɔammaa me adenle.”​—Mateyu 23:37.

Subane titili ko mɔɔ nloma lɛ la a le ɛhulolɛ mɔɔ bɛlɛ kɛ bɛbabɔ bɛ mra ngyikyi ne mɔ anwo bane la. Nloma mɔɔ da azɛlɛ nwo mɔɔ le kɛ sua nu akɔlɛ la, ɔwɔ kɛ sinza. Saa ɔnwu kɛ kyɛnyema luolua anwomanyunlu a, ɔtea nuhua ɔbɔ bɛ kɔkɔ, akee ngɔkɔlɛ mralɛ ne mɔ nriandi bafea ɔ ndɛba abo. Ɛkɛ ne a ngɔkɔlɛ mralɛ noko nyia banebɔlɛ fi ewia ne wuluwulu ne nee ezule mɔɔ tɔ kpole la anwo a. Zɔhane ala a ɛnee Gyisɛse kulo kɛ ɔbɔ Gyɛlusalɛmma anwo bane wɔ sunsum nu a. Ɛnɛ, Gyisɛse ɛlɛfɛlɛ yɛ kɛ yɛrɛla ye ɛkɛ amaa yɛ nwo adɔ yɛ na yɛanyia banebɔlɛ yɛavi yɛ ngyegyelɛ nee yɛ adwenleadwenle nwo.​—Mateyu 11:28, 29.

Nɔhalɛ nu, yɛlɛ ninyɛne dɔɔnwo mɔɔ yɛbahola yɛazukoa yɛavi nloma ɛkɛ a. Mekɛ mɔɔ ɛlɛnea kɛzi bɛ subane de la, bɔ mɔdenle kɛ ɛbahakye kɛzi Ngɛlɛlera ne fa ɛrɛlɛdendɛ ka bɛ nwo edwɛkɛ la. Maa nyamenleakatiba ɛboa wɔ na nyia Gyihova ɛzonlenlɛ sua ne anwo anyezɔlɛ. Kpondɛ anyelazo mɔɔ baboa wɔ yeamaa wɔadu kɛ kɔleɛ la fi Nyamenle ɛkɛ. Bɛla Gyisɛse ɛkɛ amaa wɔanyia sunsum nu nɔhalɛ mɔɔ babɔ ɛ nwo bane kɛ mɔɔ akɔlɛ ɛdane yɛ ɔ mra la. Maa akoso ɛhakye wɔ amaa wɔazinza na wɔanwu ninyɛne mɔɔ ɛlɛsisi wɔ yɛ mekɛ ye anu la.