1. Duzu a ɔwɔ kɛ yɛyɛ na yɛ diedi ne anu ahɔ zo ayɛ se ɛ?

MENLI dɔɔnwo ka kɛ ninyɛne mɔɔ bɛkola bɛfa bɛ nye bɛnwu ye la ala a bɛdie bɛdi a. Kɛ ɔkɛyɛ na yɛaboa menli zɛhae mɔ yɛamaa balie Gyihova bali ɛ? Baebolo ne ka kɛ “awie biala ɛtɛnwunle Nyamenle ɛlɛ.” (Dwɔn 1:18) Ɛhye ati, kɛ ɔkɛyɛ na yɛamaa diedi mɔɔ yɛlɛ ye wɔ Gyihova, “Nyamenle ne mɔɔ ɛnyelɛ ɛnnwu ye” anu la ayɛ kpole ɛ? (Kɔl. 1:15) Mɔɔ ɔlumua la, ɔwɔ kɛ yɛnwu ngilehilelɛ mɔɔ ɔmmaa bɛnnwu Gyihova anwo nɔhalɛ ne la. Na akee yɛagyinla Baebolo ne azo yɛabɔ nzuzulɛ biala mɔɔ ‘bɛkɛmaa ye zo bɛkɛtia Nyamenle anwo adwenlenubukelɛ la yɛagua.’—2 Kɔl. 10:4, 5.

2, 3. Ngilehilelɛ nwiɔ boni mɔ a ɛmmaa menli ɛnnwu Nyamenle anwo nɔhalɛ ne a?

² Adalɛ ngilehilelɛ ko mɔɔ ɔmmaa menli dɔɔnwo ɛnnwu Nyamenle anwo nɔhalɛ ne la a le ngakyihakyililɛ. Ngilehilelɛ ɛhye nee mɔɔ Baebolo ne ka la ɛnnyia na eza ɔmmaa anyelazo. Ngakyihakyililɛ ngilehilelɛ ne a le kɛ tɛ awie biala a bɔle ngoane a; saa ɔle nɔhalɛ a, ɛnee yɛnrɛhola yɛnrɛhilehile deɛmɔti yɛwɔ azɛlɛ ye azo la anu.

³ Menli mɔɔ bɛkɔ asɔne la bie mɔ noko kilehile kɛ bɛbɔle anwuma nee aze nee ngoane mɔɔ wɔ zo la ɔtɛkyɛle biala. Bie a menli mɔɔ kilehile ɛhye la bu Baebolo ne kpalɛ noko bɛdie bɛdi kɛ Nyamenle vale kenle nsia mɔɔ kenle ko biala le dɔnehwele 24 la a bɔle debie biala a. Bɛkpo abɔdeɛ nwo nrɛlɛbɛvolɛma daselɛ mɔɔ ɔkile kɛ bɛ edwɛkɛ ne ɛnle nɔhalɛ la. Ɔlua ngilehilelɛ ɛhye ati, ɔyɛ se ɔmaa bie mɔ kɛ bɛbalie Baebolo ne bɛali. Bɛsuzu kɛ ndelebɛbo ɛnle nu na ɔnle nɔhalɛ. Menli mɔɔ die ngilehilelɛ ɛhye mɔ di la kakye yɛ bɛdabɛ mɔɔ ɛnee bɛlɛ Nyamenle anwo mɔdenlebɔlɛ wɔ ɛvoya ne mɔɔ lumua anu ‘noko bɛ mɔdenlebɔlɛ ne ɛngyi nɔhalɛ ndelebɛbo zo la.’ (Wulo. 10:2) Kɛ ɔkɛyɛ na yɛagyinla Nyamenle Edwɛkɛ ne azo yɛabɔ “kpolerazulɛ mgbane mgbane” mɔɔ bie a le ngakyihakyililɛ  nee adalɛ ngilehilelɛ gyɛne yɛagua ɛ? Saa yɛbahola yɛayɛ ɛhye a kyesɛ yɛbɔ mɔdenle yɛnyia mɔɔ Baebolo ne kilehile la anu ndelebɛbo mɔɔ ɔdi munli.

4. Duzu azo a ɔwɔ kɛ yɛ diedi ne gyinla a?

⁴ Baebolo ne ka kɛ yɛnyia Nyamenle anwo nrɛlɛbɛ anzɛɛ ndelebɛbo. (Mrɛ. 10:14) Gyihova kpondɛ kɛ yɛ diedi gyinla daselɛ nee ndelebɛbo kpalɛ zo. Ɔmkpondɛ kɛ ɔgyinla sonla nrɛlɛbɛ nee ɛzonlenlɛ nu amaamuo zo. (Bɛgenga Hibuluma 11:1.) Saa yɛbanyia diedi kpole wɔ Gyihova anu a, ɔwɔ kɛ yɛdumua yɛnwu kɛ ɔwɔ ɛkɛ. (Bɛgenga Hibuluma 11:6.) Tɛ kɛ yɛkulo kɛ yɛdie yɛdi kɛ Nyamenle wɔ ɛkɛ la ati a yɛyɛ zɔ a, emomu, yɛyɛ neɛnleanu yɛɛ yɛfa yɛ “adwenle” yɛdi gyima.—Wulo. 12:1, 2.

5. Ninyɛne mɔɔ maa yɛnwu kɛ Nyamenle wɔ ɛkɛ la anu ko a le duzu?

⁵ Ɔnva nwo bɔbɔ kɛ yɛnnwu Nyamenle la, ɛzoanvolɛ Pɔɔlo hilele yɛ debie ko mɔɔ yɛbahola yɛalua zo yɛanwu kɛ ɔwɔ ɛkɛ a. Pɔɔlo hɛlɛle ye wɔ Gyihova anwo kɛ: “Sumunli kɛ Nyamenle bɔle ewiade la yɛɛ ɔbɔle ɔ bo kɛ ɔye ye su kpalɛ ne mɔɔ yɛ nye ɛnnwu ye la wienyi yeahile sonla a. Ninyɛne ɛhye mɔ a le ye damɛnlangoate tumi ne nee ye nyamenleyɛlɛ ne. Menli nwu ɛhye wɔ ninyɛne mɔɔ Nyamenle ɛbɔ la anu.” (Wulo. 1:20) Kɛ ɔkɛyɛ na wɔaboa awie mɔɔ ɔnlie ɔnli kɛ Nyamenle wɔ ɛkɛ la wɔamaa yealie Pɔɔlo edwɛkɛ ɛhye yeali ɛ? Ɛbahola ɛ nee ye azuzu abɔdeɛ nu ninyɛne mɔɔ bɛmaa yɛnwu Bɔvolɛ ne tumi ne nee ye nrɛlɛbɛ ne la bie mɔ anwo.

6, 7. Kɛzi ninyɛne nwiɔ ne mɔɔ bɔ yɛ nwo bane la maa yɛnwu Gyihova tumi ne ɛ?

⁶ Yɛnwu Gyihova tumi ne wɔ ninyɛne nwiɔ mɔɔ bɔ yɛ nwo bane—anwomanyunlu nee magenɛte bie mɔɔ wɔ azɛlɛ ye anu la anu. Kɛ neazo la, yɛnyia anwoma kpalɛ nee banebɔlɛ yɛfi anwomanyunlu. Kɛzi? Saa awolɛ mgbole nee ninyɛne gyɛne vi ɛleka bie batɔ azɛlɛ ye azo a, anrɛɛ bɛbazɛkye ninyɛne dɔɔnwo. Yemɔti, fane dɔɔnwo ne ala bɛyela wɔ anwomanyunlu na yɛnwu bɛ nɔsolɛ nu kɛ nwɔlɔra mɔɔ ɛdu.

⁷ Magenɛte ne mɔɔ wɔ azɛlɛ ne anu la noko bɔ yɛ nwo bane. Debie bie mɔɔ ɔle kɛ bulalɛ mɔɔ ɛholo la pɛne ɔ nwo kɛ bɔlo wɔ azɛlɛ ne abo. Deɛ ɛhye mɔɔ pɛne ɔ nwo la maa yɛnyia magenɛte tumi wɔ azɛlɛ ye ɛleka biala na bie dwu anwomanyunlu bɔbɔ. Ɛhye bɔ yɛ nwo bane fi sɛnzɛne ne nee ye wuluwulu ne anwo. Sɛnzɛne ne wuluwulu ne maa anwoma evinli mɔɔ ɔkola ɔboda la ba azɛlɛ ye azo. Noko kɛmɔ azɛlɛ ne lɛ banebɔlɛ la ati, anwoma evinli ɛhye ɛngola ɛnzɛkye ninyɛne mɔɔ ngoane wɔ nu wɔ azɛlɛ ye azo la. Magenɛte ne mɔɔ wɔ azɛlɛ ne anu la die anwoma evinli ɛhye anzɛɛ ɔsiane ye ɔkɔ anwomanyunlu. Yɛkola yɛnwu magenɛte ne mɔɔ wɔ azɛlɛ ne anu mɔɔ ɛnyelɛ ɛnnwu ye la anwo sɛkɛlɛneɛ wɔ kɔla ngakyile mɔɔ aleɛ dwo a bɛnwu ye wɔ anwomanyunlu wɔ Sɔlɔ nee Nyiakɛ kpalɛ la anu. Gyihova lɛ “tumi kpole” amgba.—Bɛgenga Ayezaya 40:26.

8, 9. Kɛzi Gyihova nrɛlɛbɛ da ali wɔ ahyimangolilɛ mɔɔ maa ngoane kɔ zo la anu ɛ?

⁸ Yɛnwu Gyihova nrɛlɛbɛ wɔ ninyɛne mɔɔ di ahyimango bɔ ngoane nwo bane wɔ azɛlɛ ye azo la anu. Fa ye kɛ ɛde suakpole bie mɔɔ bɛlie nwolɛ bane mɔɔ menli dɔɔnwo wɔ zo noko adenle ɛnle ɛkɛ mɔɔ nzule kpalɛ dua nu ba sua ne azo anzɛɛ nzule evinli dua nu fi sua ne azo la azo. Ɔnrɛhyɛ sua ɛhye azo bayɛ evinli ngome na bɛnrɛhola zolɛ tɛnla. Wɔ  adenle bie azo, yɛ azɛlɛ ne le kɛ suakpole zɔhane la. Nzukpa ekyi bie ala a wɔ zo a, yɛɛ yɛnrɛhola yɛnrɛye evinli mɔɔ wɔ zo la kɔsɔɔti. Noko akee, azɛlɛ ne kola maa abɔdeɛ mɔɔ ngoane wɔ nu la kɔsɔɔti asa ka mɔɔ bɛhyia nwo na bɛahola bɛadɛnla aze la. Kɛzi? Azɛlɛ ne dua nwanwane adenle zo ɔyɛ ninyɛne mɔɔ maa ngoane kɔ zo la fofolɛ.

⁹ Maa yɛva anwoma kpalɛ ne mɔɔ yɛdie la yɛyɛ neazo. Abɔdeɛ mgbe mgbe dɔɔnwo die anwoma kpalɛ ne kɔ bɛ nu na bɛye anwoma ɛtane ne bɛfi bɛ nu. Noko anwoma kpalɛ ne ɛnwie ɛlɛ yɛɛ anwoma “ɛtane” ne noko ɛtɛyile anwomanyunlu. Duzu ati ɔ? Mbaka hyia anwoma ɛtane ɛhye, ewia, azɛlɛ ne anu ninyɛne bie mɔ anzɛɛ nzule na bɛamaa yɛ aleɛ nu nyile nee anwoma kpalɛ. Saa yɛdie anwoma kpalɛ ne yɛkɔ yɛ nu na yɛye anwoma ɛtane ne yɛmaa mbaka a, ɛnee ahyimangolilɛ mɔɔ maa ngoane kɔ zo la ɛli munli bɔkɔɔ. Gyihova dua mbaka mɔɔ yebɔ la azo ɔmaa “sonla biala ngoane nee ɛnwomenle.” (Gyi. 17:25) Nea nrɛlɛbɛ kokyenyi!

10, 11. Kɛzi ɛbolakɔlɛ nee anane maa yɛnwu Gyihova nrɛlɛbɛ ɛ?

¹⁰ Eza yɛnwu Gyihova nrɛlɛbɛ ne wɔ abɔdeɛ ngakyile mɔɔ wɔ yɛ azɛlɛ kɛnlɛma ɛhye azo la anu. Neɛnleanu maa ɔda ali kɛ nyɛmoa kɛyɛ mgbe 2 kɔdwu mgbe 100 a wɔ azɛlɛ ye azo a. (Bɛgenga Edwɛndolɛ 104:24.) Maa yɛnlea ye nrɛlɛbɛ ne wɔ abɔdeɛ ɛhye mɔ bie anu.

¹¹ Kɛ neazo la, ɛbolakɔlɛ lɛ amelɛ mɔɔ ye kpole bayɛ kɛ agbuyia ti nretee ne la. Noko, ɔlua sɛnzɛne ne moalɛ zo ɛbolakɔlɛ kola pɛ adenle kɛyɛ mayɛlɛ 1,800 (kɛyɛ km 3,000) ɔvi Canada ɔkɔ Mexico ɛhoayelɛ bie anu. Na saa sɛnzɛne ne anye kakyi a, duzu a ɔyɛ a? Gyihova bɔle ɛbolakɔlɛ amelɛ nretee ne mɔɔ saa sɛnzɛne ne anye kakyi bɔbɔ a ɔkola ɔtoa ye adendulɛ ne azo a. Maa yɛnlea anane noko. Ɔlɛ ɛnyelɛ mgbole nwiɔ na debie mɔɔ ɔle kɛ ɛhwɛleɛ la kɛyɛ 30,000 wɔ ko biala anu. Anane amelɛ nretee ne maa ɔkola ɔte sɛkɛlɛneɛ biala abo anzɛɛ ɔkola ɔnwu debie biala mɔɔ kɛze ɔ nwo ɛkɛ la.

12, 13. Duzu a yɛ nwanwane wɔ ngoane ngɛkɛba ne mɔ mɔɔ Gyihova ɛyɛ ye wɔ wɔ sonlabaka ne anu la anwo a?

¹² Debie mɔɔ yɛ nwanwane kpalɛ la a le kɛzi Gyihova yɛle ngoane ngɛkɛba mɔɔ wɔ tease abɔdeɛ kɔsɔɔti anu la. Kɛ neazo la, ngoane ngɛkɛba kɛyɛ mgbe mgbe mgbe 100 a wɔ wɔ sonlabaka ne anu a. Debie bie mɔɔ ɔle kɛ nyɛma ekyi bie mɔɔ bɛfɛlɛ ye DNA (deoxyribonucleic acid) la wɔ ko biala anu. Kɛzi wɔ sonlabaka ne bayɛ la anwo edwɛkɛ kɔsɔɔti wɔ nu.

¹³ Edwɛkɛ dodo nyɛ a wɔ DNA nu a? Fa edwɛkɛ dodo mɔɔ wɔ DNA mɔɔ ye ɛlomboɛ le gram ko anu la to edwɛkɛ dodo mɔɔ wɔ apawa anzɛɛ CD ko azo la anwo nea debie. CD ko bahola ava edwɛkɛ mɔɔ  wɔ edwɛbohilelɛ buluku ko anu la kɔsɔɔti. Ɛhye yɛ azibɛnwo ɔluakɛ CD le wolɔba apawa nretee bie. Noko akee, DNA gram ko kola fa edwɛkɛ mɔɔ wɔ CD mgbe mgbe mgbe ko azo la sie! Wɔ adenle fofolɛ zo, DNA welera adɛlɛ nretee ko kola fa menli mɔɔ bo mgbe mgbe mgbe nwiɔ ne foa la anwo edwɛkɛ sie!

14. Kɛzi ninyɛne mɔɔ abɔdeɛ nwo nrɛlɛbɛvolɛma ɛnwu ye la maa ɛte nganeɛ wɔ Gyihova anwo ɛ?

¹⁴ Belemgbunli Devidi hanle kɛ bɛhɛlɛ edwɛkɛ mɔɔ ɔhyia na bɛahola bɛayɛ sonlabaka ne la wɔ sɛkɛlɛneɛ adenle zo buluku bie anu. Ɔhanle ye wɔ Gyihova Nyamenle anwo kɛ: “Mekɛ mɔɔ metɛsɔhonle ɛhwee la ɛnee ɛ nye gyi me nwo; ɛnee bɛhɛlɛ me nwo edwɛkɛ biala wɔ wɔ buluku ne anu; mekɛ mɔɔ ɛnee bɛtɛbɔle me ɛleka biala bɔbɔ la, ɛnee bɛhɛlɛ kenle dodo mɔɔ bɛva bɛmaa me la.” (Edw. 139:16) Ɔda ali kɛ, mekɛ mɔɔ Devidi dwenledwenlenle kɛzi bɛyɛle ye sonlabaka ne anwo la ɔyele Gyihova ayɛlɛ. Abɔdeɛ nwo nrɛlɛbɛvolɛma ɛnwu ninyɛne dɔɔnwo wɔ sonlabaka ne anwo mɔɔ ɔyɛ azibɛnwo a. Ninyɛne ɛhye mɔ mɔɔ bɛnwu ye la maa yɛ nee edwɛndolɛnli ne mɔɔ hɛlɛle ɛhye wɔ Gyihova anwo la yɛ adwenle: “Meye wɔ ayɛlɛ, ɔluakɛ ɛ nwo yɛ ɛzulolɛ nee nwanwane. Wɔ gyima yɛ nwanwane! Ɛze me kpalɛ bɔkɔɔ.” (Edw. 139:14) Nɔhalɛ, abɔdeɛ maa yɛnwu kɛ Nyamenle wɔ ɛkɛ amgba!

15, 16. Kɛzi yɛ mbuluku ne mɔ ɛboa ɛmaa menli ɛnwu Gyihova abɔdeɛ ne anwo ninyɛne dɔɔnwo ɛ?

¹⁵ Wɔ ɛvolɛ dɔɔnwo anu, Awake! magazine ne ɛmaa menli dɔɔnwo ɛnwu mɔɔ abɔdeɛ da ye ali wɔ yɛ tease Nyamenle ne anwo la. Kɛ neazo la, ɛnee September 2006 ɛdeɛ ne ati ne se “Is There a Creator?” (Bɔvolɛ Bie Wɔ Ɛkɛ Ɔ?) Ɛnee ye bodane a le kɛ bɛfa bɛabuke bɛdabɛ mɔɔ ngakyihakyililɛ nee adalɛ ngilehilelɛ gyɛne ɛzi bɛ adwenle ne anye la anye. Adiema raalɛ ko hɛlɛle United States ɔfese ne wɔ magazine titile zɔhane anwo kɛ: “Magazine titile ɛhye anwo nolobɔlɛ ne hɔle zolɛ kɛnlɛma kpalɛ. Raalɛ ko liele ngoko 20. Ɛnee ɔkile abɔdeɛ mɔɔ ngoane wɔ nu la anwo debie na ɛnee ɔkpondɛ kɛ ye sukoavoma ne anu biala nyia ko.” Adiema nrenya ko hanle kɛ: “Membɔle daselɛlilɛ bo wɔ ɛvolɛ 1940 ne anu na ɔka ekyii menyia ɛvolɛ 75, noko me nye ɛtɛdiele daselɛlilɛ nu kɛ siane ɛhye mɔɔ yɛlɛfa Awake! titile ɛhye yɛamaa la.”

¹⁶ Edwɛkɛ “Was It Designed?” (Asoo Awie A Yɛle A?) ɛra Awake! mɔɔ bɛyɛ ye kenlensa ye la dɔɔnwo anu. Edwɛkɛ nzinrenzinra ɛhye mɔ si kɛzi abɔdeɛ yɛ azibɛnwo la dawua yɛɛ ɔmaa yɛnwu kɛzi menli ɛbɔ mɔdenle kɛ bɛsukoa Dwinvolɛ Kpole ne la. Mekɛ mɔɔ bɛyele Was Life Created? bulohyua ne wɔ 2010 la, yɛnyianle debie bieko mɔɔ yɛbalua zo yɛawula Nyamenle anyunlunyia la. Bɛyɛ nvoninli nee ngilehilelɛ nlɛka ne mɔ mɔɔ wɔ buluku ne anu la kɛ ɔmaa yɛanwu Gyihova tumi ne mɔɔ ɔfa ɔbɔ ninyɛne la kpalɛ. Kpuyia ne mɔɔ wɔ foa biala awieleɛ la maa kengavolɛ ne dwenle edwɛkɛ mɔɔ ɔkɛgenga la anwo. Asoo ɛfa bulohyua ɛhye ɛdi gyima wɔ daselɛlilɛ nu?

17, 18. (a) Awovolɛ, kɛ ɔkɛyɛ na bɛahola bɛamaa bɛ mra anyia anwodozo kpalɛ ahilehile bɛ diedi ne anu ɛ? (b) Kɛzi bɛva abɔdeɛ nwo bulohyua ne mɔ bɛli gyima wɔ bɛ abusua ɛzonlenlɛ nu ɛ?

¹⁷ Awovolɛ, bɛzuzu nwo kɛ bɛbava bulohyua ɛhye mɔɔ bɛva kɔla dɔɔnwo bɛyɛ la bɛ nee bɛ mra ayɛ abusua ɛzonlenlɛ ɔ? (Nea nvoninli ne.) Saa bɛyɛ zɔ a, ɔbamaa ngakula ne mɔ anwu yɛ tease Nyamenle ne kpalɛ. Bie a bɛlɛ ngakula mɔɔ kɔ sukunwiɔ la. Bɛmɛ a bɛfa ngakyihakyililɛ  ngilehilelɛ ne bɛgyegye bɛ titile a. Abɔdeɛ nwo nrɛlɛbɛvolɛma, sukulu kilehilevolɛma, abɔdeɛ nwo edwɛkɛ, yɛɛ anyelielɛ ninyɛne mɔɔ TV zo gyimalilɛ nee sini boka nwo la, si ye dawua kɛ ngakyihakyililɛ le nɔhalɛ edwɛkɛ. Ɛbahola wɔalua The Origin of Life—Five Questions Worth Asking bulohyua ne mɔɔ bɛyele ye 2010 ne anu la azo wɔaboa ɛ mra mɔɔ bɛlɛyɛ mgbanyinli la wɔamaa bɛakpo adalɛ ngilehilelɛ ɛhye. Buluku ɛhye le kɛ Was Life Created? bulohyua ne la, ɔdaye noko ɔboa ngakula ɔmaa bɛtete bɛ “adwenle.” (Mrɛ. 2:10, 11) Ɔkilehile bɛ ɔmaa bɛnwu adenle mɔɔ bɛdua zo a bɛbanwu kɛ mɔɔ bɛkile bɛ wɔ sukulu la le nɔhalɛ anzɛɛ ɔnle nɔhalɛ la.

¹⁸ Ɔdwu mekɛ ne bie a adwelie kɛlɛvoma bɔ amaneɛ kɛ abɔdeɛ nwo nrɛlɛbɛvolɛma ɛnwu “nane mbowule” mɔɔ ɔkile kɛ ngakyihakyililɛ ngilehilelɛ ne le nɔhalɛ. Anzɛɛ bɛbɔ amaneɛ kɛ abɔdeɛ nwo nrɛlɛbɛvoma ɛhola ɛbɔ ngoane. Yemɔti, The Origin of Life bulohyua ne baboa sukuluma yeamaa bazi kpɔkɛ saa amaneɛbɔlɛ ɛhye mɔ le nɔhalɛ anzɛɛ ɔnle nɔhalɛ a. Awovolɛ, bɛva bulohyua ɛhye mɔ bɛboa bɛ mra bɛmaa bɛnyia anwodozo kpalɛ bɛhilehile diedi mɔɔ bɛlɛ ye wɔ bɛ Bɔvolɛ ne nu la anu.—Bɛgenga 1 Pita 3:15.

19. Nwolɛ adenle boni a yɛ kɔsɔɔti yɛlɛ a?

¹⁹ Saa yɛkenga abɔdeɛ nwo edwɛkɛ wɔ mbuluku mɔɔ Gyihova ahyehyɛdeɛ ne yɛ maa yɛ la anu a, ɔmaa yɛnwu Gyihova subane ngɛnlɛma ne mɔ anwo ninyɛne dɔɔnwo. Ɛhye mɔ maa yɛfi yɛ ahonle nu yɛye Nyamenle ayɛlɛ. (Edw. 19:1, 2) Nea kɛzi ɔle nwolɛ adenle kpole kɛ yɛbava enililɛ nee anyunlunyia mɔɔ fɛta la yɛamaa Gyihova, yɛ Bɔvolɛ ne a!—1 Tem. 1:17.