ME PAPA nee me mame yiale wɔ Baebolo Sukoavoma Maanle Maanle Avinli Maangyeba Nyianu bo wɔ 1919 Cedar Point, Ohio, U.S.A. Ɛvolɛ zɔhane ɛlɛkɔ ye awieleɛ la a bɛgyale a. Bɛwole me 1922 ne anu, na ɛvolɛ nwiɔ anzi yɛɛ bɛwole me diema Paul a. Bɛwole me ye Grace 1930. Ye awovolɛ Roy nee Ruth Howell ɛnee le Baebolo Sukoavoma, yɛɛ ɛnee ye nana nee ye nenya mɔ noko le Baebolo Sukoavoma na ɛnee bɛ gɔnwo a le Adiema Charles Taze Russell.

Menwunle Grace wɔ 1947, na yɛgyale July 16, 1949. Yɛzuzule yɛ kenlebie ɛbɛlabɔlɛ nwo kpalɛ kolaa na yɛagya. Yɛzile kpɔkɛ kɛ yɛbayɛ mekɛ kɔsɔɔti ɛzonlenlɛ gyima ne mɔɔ yɛnrɛwo a. Yɛbɔle adekpakyelɛ gyima ne abo wɔ October 1, 1950. Wɔ 1952 ne anu, bɛdole ɛsalɛ bɛvɛlɛle yɛ kɛ yɛhɔyɛ maanzinli zo neavolɛ gyima.

Yɛdele nganeɛ kɛ yɛhyia moalɛ dɔɔnwo na yɛahola yɛayɛ gyima fofolɛ ɛhye. Mekɛ mɔɔ ɛnee melɛsukoa ninyɛne meavi mediema mɔɔ lɛ anwubielɛ ɛkɛ la, eza memkpondɛle awie memanle ɔboale Grace. Mendwenle membikyele Marvin Holien, busuanli nee agɔnwolɛ bie mɔɔ ɛnee lɛ anwubielɛ wɔ neavolɛ adenduvo gyima ne anu la na membizale ye kɛ: “Grace le bɛlɛra mɔɔ ɛnlɛ anwubielɛ. Ɛbahola wɔahanvo awie bie mɔɔ ɔ nee ye balua ekyii na yeanyia ndetelɛ la wɔahile ɔ?” Ɔbuale kɛ “Ɛhɛe. Edna Winkle le adekpakyelɛnli mɔɔ ɛbe na ɔbahola yeaboa ye.” Nzinlii, Grace hanle Edna anwo edwɛkɛ kɛ: “Ɔmanle ninyɛne nu yɛle bɛtɛɛ manle me wɔ anlenkɛ nloa, ɛnee ɔze kɛzi bɛbua tendɛtiama la, na ɔhilele me kɛ anrɛɛ menyɛ koonwu mendie suamenle ne amaa meanyia edwɛkɛ mɔɔ fɛta la meaha. Ɛnee sonla mɔɔ mehyia ye la ala ɛne!”

Me nee Grace zonlenle wɔ maanzinli nwiɔ anu wɔ Iowa maangyeba ne anu, yɛɛ Minnesota yɛɛ South Dakota maangyeba ne mɔ ɛleka bie mɔ. Akee bɛyele yɛ bɛhɔle New York Maanzinli 1 ne anu, ɛleka mɔɔ Brooklyn nee Queens wɔ la. Yɛ rɛle ɛnrɛvi kɛzi yɛdele nganeɛ kɛ yɛnlɛ anwubielɛ  la ɛlɛ. Ɛnee Brooklyn Heights Asafo ne mɔɔ bɛyia Bɛtɛle Belemgbunlililɛ Asalo ne na Bɛtɛle abusua ne anu amra mɔɔ bɛlɛ anwubielɛ dɔɔnwo wɔ nu la wɔ zɔhane maanzinli ne anu. Mekɛ mɔɔ memanle me ɛzonlenlɛ ɛdendɛlɛ mɔɔ ɔlumua wɔ zɔhane asafo ne anu la, Adiema Nathan Knorr bikyele me na ɔzele me kɛ: “Malcolm, wɔmaa yɛ folɛdulɛ mɔɔ ɔfɛta mɔɔ ɔwɔ kɛ yɛfa yɛdi gyima a. Mmamaa ɛ rɛle fi kɛ saa wɔanvi atiakunlukɛnlɛma nu wɔandu yɛ folɛ a, ɛ nwo ɛnrɛra nvasoɛ biala ɛnrɛmaa ahyehyɛdeɛ ne. Sɔ gyima kpalɛ ne mɔɔ ɛlɛyɛ la anu.” Menganle ɛhye mengilele Grace wɔ mekɛ mɔɔ yɛkpɔnele ayia ne la. Akee yɛvole ɛbolɔnsam ne yɛhɔle yɛ ekpumgbunli ne anu wɔ Bɛtɛle ɛkɛ. Adwenleadwenle manle yɛzunle.

Siane ekyi pɛle nu la, yɛ sa hanle kɛlata kɛ yɛhɔ Geleade Sukulu ne mɔɔ ɔtɔ zo 24 mɔɔ bɛbawie bɛ debiezukoalɛ ne wɔ February 1955 la bie. Kolaa na yɛahɔ sukulu ne la, bɛmanle yɛdele kɛ yɛ ndetelɛ ne ɛngile kɛ bɛmaa yɛahɔyɛ edwɛkpatɛlɛvoma. Emomu, bɛbatete yɛ bɛamaa yɛayɛ kilehilevolɛma kpalɛ wɔ adenduvo gyima ne anu. Sukulu ne bamaa yɛ nye alie noko eza yɛbazukoa mɛlɛbɛnwoaze.

Mɔɔ yɛwiele sukulu ne la, bɛmanle yɛhɔyɛle maangyeba zo neavolɛ gyima. Ɛnee Indiana, Michigan, nee Ohio maanzinli ne mɔ boka yɛ maangyeba ne anwo. Wɔ December 1955, ɔzinle yɛ nwo kɛ yɛ sa hanle kɛlata bie yɛvile Adiema Knorr ɛkɛ la. Ɔhanle kɛ: “Bɛha mɔɔ wɔ bɛ ahonle nu la bɛhile me, na bɛ nee me ɛli ye nɔhalɛ nu. Saa bɛkulo kɛ bɛba Bɛtɛle na bɛtɛnla ɛke a . . . anzɛɛ saa bɛkulo kɛ bɛkɔyɛ gyima wɔ maanɔne wɔ mekɛ mɔɔ bɛzonle Bɛtɛle ekyii la a, bɛha bɛhile me. Saa bɛkulo maangyeba nee maanzinli zo neavolɛ gyima ne noko a, mekulo kɛ menwu ye.” Yɛbuale kɛ ɛleka biala mɔɔ bɛkɛze yɛ kɛ yɛhɔ la, yɛ nye balie nwo. Yeangyɛ biala, bɛvɛlɛle yɛ wɔ Bɛtɛle!

Ɛdendɛlɛ nee ngilehilelɛ gyimalilɛ mɔɔ mengɔnyɛle ye wɔ United States ɛleka dɔɔnwo la boka anyelielɛ mɔɔ menyianle ye wɔ Bɛtɛle la anwo. Mentetele mgbavolɛ dɔɔnwo mɔɔ nzinlii bɛnyianle ɛzonlelilɛ dɔɔnwo wɔ Gyihova ahyehyɛdeɛ ne anu. Awieleɛ bɔkɔɔ ne, ɛnee mele Adiema Knorr kɛlɛhɛlɛvolɛ wɔ ɔfese ne mɔɔ ɛnee bɛyɛ ewiade amuala edwɛkɛhanlɛ gyima ne anwo ngyehyɛleɛ wɔ ɛkɛ la.

Me nye liele gyima mɔɔ menyɛle ye wɔ “Service Department” mekɛ tendenle la anwo kpalɛ. Ɛkɛ ne a me nee T. J. (Bud) Sullivan yɛle gyima a. Ɛnee  yeyɛ neavolɛ wɔ zɔhane ɔfese ne mekɛ tendenle. Noko menzukoale ninyɛne dɔɔnwo menvile awie mɔ gyɛne noko ɛkɛ. Fred Rusk mɔɔ bɛzele ye kɛ ɔtete me la ɛnee le bɛ nuhua ko. Mekakye kɛ membizale ye kɛ, “Fred, duzu ati a ɛyɛ nzenzaleɛ dɔɔnwo wɔ me ngɛlata ne bie mɔ anu ɛ?” Ɔzelele na ɔhanle kɛ, “Malcolm, saa ɛka edwɛkɛ wɔ ɛ nloa a, bɛkola bɛfa edwɛkɛ gyɛne bɛkilehile nu bɛkɔ moa, noko saa ɛwɔ ɛke na ɛkɛlɛ debie a, ɔwɔ kɛ nuhua da ɛkɛ na ɔdi munli.” Akee ɔvile atiakunlukɛnlɛma nu ɔhanle kɛ, “Nyia akɛnrasesebɛ—ɛlɛbɔ mɔdenle, ɔnrɛhyɛ ninyɛne bayɛ boɛ.”

Grace vale mekɛ tendenle yɛle gyima ngakyile dɔɔnwo wɔ Bɛtɛle, bie a le sua nu ɛziezielɛ. Ɛnee ɔ nye die gyima ne anwo. Badwu ɛnɛ, saa ɔdwu mekɛ ne bie na yɛyia mediema mrenya mɔɔ mekɛ zɔhane ɛnee bɛle mgbavolɛ wɔ Bɛtɛle la a, bɛfa ɛzelekɛ bɛka bɛkile Grace kɛ, “Ɛdawɔ a ɛhilele me ɛkpa ɛtotolɛ a, na mekola meka kɛ me mame anye die mɔɔ ɛyɛle la anwo.” Grace anye liele gyima mɔɔ ɔyɛle ye wɔ Magazine, Ngitanwolilɛ nee “Tape Duplicating” ɔfese ɛkɛ ne la noko anwo. Gyima ngakyile zɔhane mɔɔ ɔyɛle la manle ɔnwunle kɛ debie biala mɔɔ yɛyɛ anzɛɛ ɛleka biala mɔɔ yɛsonle wɔ Gyihova ahyehyɛdeɛ ne anu la le nyilalɛ. Ɛnɛ nee ɛnɛ ala, zɔhane a ɔte nganeɛ a.

Wɔ 1970 ne anu, yɛnwunle kɛ ɔwɔ kɛ yɛmaa yɛ nye kɔ yɛ awovolɛ mɔɔ ɛlɛnyi la anwo. Awieleɛ bɔkɔɔ ne, ɛnee ɔwɔ kɛ yɛsi kpɔkɛ bie mɔɔ nuhua yɛ se la. Ɛnee yɛngulo kɛ yɛfi Bɛtɛle nee yɛ gɔnwo mɔ Gyihova azonvolɛ mɔɔ yɛkulo bɛ kpalɛ la anwo. Noko akee, ɛnee mete nganeɛ kɛ ɔle me ɛzonlelilɛ kɛ mebanlea yɛ awovolɛ. Ɛhye ati, yeangyɛ yɛvile Bɛtɛle, noko ɛnee yɛlɛ anyelazo kɛ saa yɛ tɛnlabelɛ ne yɛ kpalɛ a, yɛbazia yɛahɔ.

Me nee insurance kɔmpɛlɛ bie yɛle gyima amaa yɛanyia ezukoa yɛanlea yɛ nwo. Mebahakye edwɛkɛ mɔɔ gyima ne anu kpanyinli ko hanle hilele me wɔ mekɛ mɔɔ ɛnee mewɔ ndetelɛ bo la dahuu: “Gyima ɛhye mɔ kyesɛ ɛkɔ menli mɔɔ ɛ nee bɛ di gua la ɛkɛ nɔsolɛ nu. Mekɛ ɛhye anu a ɛbado menli ne a. Mɔɔ hyia kpalɛ la a le kɛ ɛbahɔ bɛ ɛkɛ nɔsolɛ biala.” Membuale kɛ, “Medie medi kɛ ɛlɛ ɛhye anwo anwubielɛ, na medie meto nu. Noko eza melɛ sunsum nu ɛzonlelilɛ bie mɔɔ metɛbule me nye metɛguale zo ɛlɛ, na mengulo kɛ mekɛbɔ ɔ bo kɛkala. Mebahɔ bɛ ɛkɛ nɔsolɛ nu, noko Dwɛkɛ nee Kule nɔsolɛ nu ɛdeɛ, ɔwɔ kɛ mekɔ ayia bie mɔ mɔɔ anwo hyia kpalɛ la.” Nɔhalɛ, Gyihova yilale me kɛ meanva nwonane afoa nu gyimayɛlɛ meanzie ayia ɛhɔlɛ agyakɛ anu la.

Me mame wule me sa nu wɔ ɛleka mɔɔ bɛnea wuleravolɛma la wɔ July 1987. Nɛɛse kpanyinli ne hanle hilele Grace kɛ: “Yma. Allen, kɔ sua nu na kɔlie ɛ menle. Awie biala ze kɛ ɛnee ɛba ɛke  dahuu ɛbanea ɛ hu mame. Fa anzondwolɛ kɔ na maa ɛ kunlu ɛdwo ɛ nwo.”

Wɔ December 1987, yɛbizale nwolɛ adenle kɛ yɛkulo kɛ yɛkɔsonle Bɛtɛle, ɛleka mɔɔ yɛkulo ye kpalɛ la bieko. Yeangyɛ yɛɛ bɛnwunle kɛ Grace ɛnyia anahɛlɛ a. Mekɛ mɔɔ bɛyɛle ye apelehyɛne bɛwiele la ɔdele kpɔkɛ na bɛhanle kɛ ye anahɛlɛ ne ɛhɔ bɔkɔɔ. Zɔhane mekɛ ne, yɛ sa hanle kɛlata yɛvile Bɛtɛle na bɛhanle kɛ yɛdoa zo yɛzonle asafo mɔɔ yɛwɔ nu la anu. Ɛnee yɛzi pi kɛ yɛbayele yɛ nwo wɔ Belemgbunlililɛ gyima ne anu.

Nzinlii, menyianle gyima wɔ Texas. Yɛnwunle kɛ ɛkɛ ne ɛlobɔ ne baboa yɛ, na yeboa yɛ noko. Yɛdɛnla Texas ɛke ɛvolɛ 25, mediema mɔɔ ɛbɔ yɛ ɛyia la dwenle yɛ nwo na bɛbikye yɛ kpalɛ.

Anahɛlɛ mɔɔ finde bɛ komiza nee anyalɛ nu la ɛgyegye Grace fane dɔɔnwo, na kenlensa ye, ɔnyianle anahɛlɛ mɔɔ finde nyɛfonlɛ nu la. Noko ɔtɛtendɛle ɔ nzo abo, anzɛɛ ɔtɛdwazole ɔtɛtiale tileyɛlɛ ngyinlazo ne ɛlɛ. Ɔyɛ a bɛbiza ye kɛ, “Duzu a ɛmaa bɛ agyalɛ ne ɛyɛ kpalɛ na bɛ nye die dahuu a?” Ɔka ninyɛne nna anwo edwɛkɛ: “Yɛle agɔnwolɛ kpalɛ. Dahuu yɛdi adwelie. Yɛyɛ ninyɛne yɛbɔ nu kenle ko biala. Yɛɛ ɔtɛbale ye ɛlɛ kɛ yɛva yɛ nwo ɛya yɛzie yɛ nu yɛhɔla nɔsolɛ nu.” Nɔhalɛ, ɔdwu mekɛ ne bie a yɛfo yɛ nwo, noko yɛfa yɛkyɛ na yɛmaa yɛ rɛle fi—ɛhye noko boa kpalɛ.

Yɛzukoa ninyɛne kpalɛ dɔɔnwo yɛvi sɔnea mɔɔ yɛhɔle nu la amuala anu:

1.  Fa ɛ rɛle wula Gyihova anu dahuu na die mɔɔ ɔkɛmaa nwolɛ adenle la to nu. Mmafa wɔ adwenle ɛsɔ ɛ ngome wɔ nrɛlɛbɛ ɛlɛ.—Mrɛ. 3:5, 6; Gyɛ. 17:7.

2.  Ɔnva nwo mɔɔ ɔbazi biala la, kpondɛ adehilelɛ wɔ Gyihova Edwɛkɛ ne anu. Tieyɛ mɔɔ yɛbayɛ yeamaa Gyihova nee ye mɛla ne la anwo hyia. Avinli ɛgyinlanlɛ biala ɛnle ɛkɛ—kɛ ɛbayɛ tieyɛ anzɛɛ ɛnrɛyɛ zɔ.—Wulo. 6:16; Hib. 4:12.

3.  Debie ko mɔɔ anwo hyia kpalɛ wɔ ɛbɛlabɔlɛ nu la a le kɛ ɛbanyia duma kpalɛ wɔ Gyihova anyunlu. Fa ye ɛhulolɛdeɛ dumua, mmadi anwonyia ɛkpondɛlɛ nzi.—Mrɛ. 28:20; Nolo. 7:1; Mat. 6:33, 34.

4.  Yɛ nzɛlɛlɛ kɛ ɛbayɛ dɔɔnwo wɔ Gyihova ɛzonlenlɛ nu kɛmɔ ɛbahola la. Fa wɔ adwenle sie mɔɔ ɛkola ye yɛ la azo, tɛ mɔɔ ɛngola ye la.—Mat. 22:37; 2 Tem. 4:2.

5.  Nwu ye kɛ ahyehyɛdeɛ bieko ɛnle ɛkɛ mɔɔ Gyihova nyilalɛ nee ye ɛlolɛ wɔ zo a.—Dwɔn 6:68.

Me nee Grace yɛ nuhua ko biala ɛva ɛvolɛ mɔɔ bo 75 ɛzonle Gyihova, yɛɛ yɛva ɛvolɛ 65 yɛzonle kɛ agyalɛma. Nɔhalɛ nu, yɛnyianle anyelielɛ wɔ mekɛ tendenle zɔhane mɔɔ yɛvale yɛzonlenle Gyihova la anu. Yɛ nzɛlɛlɛ a le kɛ yɛ mediema kɔsɔɔti banwu kɛ saa ɛfa ɛ rɛle ɛwula Gyihova anu a ɔle nyilalɛ.