Kenlenzu A Amagɛdɔn Konle Ne Bara a?

“Ɛhye anzi memanle me nye zo, na menwunle menli pemgbenleamgbe bie mɔɔ awie ɛngola bɛ tia la! Bɛvi mbusua, maanle, aneɛ nee menli ngakyile kɔsɔɔti anu. . . . Menli ɛhye mɔ a le bɛdabɛ mɔɔ bɛho bɛdɔ zolɛ wɔ amaneɛnwunlɛ kpole ne anu la.”—YEKILE 7:9, 14.

AKEE Amagɛdɔn konle ne ɛdwu zo. Adenle boni azo?

Menli wɔ ewiade ye anu mɔɔ bɛbɔ nu bɛsonle Gyihova na bɛfa Baebolo ngyinlazo bɛbɔ bɛ ɛbɛla a. Kɛmɔ Nyamenle gyi bɛ nzi la ati, menli mgbe dɔɔnwo mɔɔ vi maanle, aneɛ, nee mbusua kɔsɔɔti anu la ɛlɛka abɔ nu wɔ koyɛlɛ nu. Koyɛlɛ ɛhye wɔ Gyihova Alasevolɛ avinli.—Dwɔn 13:35.

Ɔnrɛhyɛ Seetan baboɔboa ye ɛlɔnema ne anloa na bɛava ngyegyelɛ kpole bɛara menli mɔɔ bɛlɛ anzondwolɛ noko ɔzɔho kɛ bɛnlɛ banebɔlɛ biala la anwo zo. (Yizikeɛle 38:8-12; Yekile 16:13, 14, 16) Kɛ ɔkɛyɛ na wɔanwu kɛ edwɛkɛ zɔhane le nɔhalɛ ɛ? Baebolo ne kile ninyɛne fɔɔnwo bie mɔ mɔɔ baboa yɛ yeamaa yɛanwu mekɛ mɔɔ Amagɛdɔn konle ne bara la. Ninyɛne mɔɔ ɔhanle nwolɛ edwɛkɛ la anu dɔɔnwo ɛra nu.

Ninyɛne Mɔɔ Ɛlɛsisi

Gyisɛse ɛdoavolɛ ne mɔ bizale ye “debie mɔɔ bazi ahile kɛ . . . ewiade ɛhye ɛlɛba awieleɛ la.” (Mateyu 24:3) Gyisɛse buale bɛ kɛ: “Maanle nee maanle baho atia bɛ nwo, arelemgbunli badwazo arelemgbunli nwo zo, sane bara, yɛɛ azɛlɛ bakpusu ɛleka muala.” Akee ɔhanle kɛ: “Ɛhye mɔ amuala le kɛ awolɛ nyane ɛdelɛ bo ɛbɔlɛ” la. (Mateyu 24:7, 8) Ɛzoanvolɛ Pɔɔlo hanle mekɛ ɛhye ala anwo edwɛkɛ kɛ “awieleɛ mekɛ,” akee ɔdoale zo kɛ “anwongyelelɛ dɔɔnwo bara.” (2 Temɔte 3:1) Asoo wɔnwu kɛ ninyɛne ɛhye mɔ ɛlɛsisi?

Duzu ati a mekɛ ɛhye anu bayɛ se ɛ? Ɛzoanvolɛ Dwɔn kile deɛmɔti ɔle zɔ la anu. Ɔhanle kɛ yeha “mekɛ . . . ekyi bie ala” na bɛazɛkye Seetan nee ye sunsum ɛtane  ne mɔ. Ɔhanle kɛ wɔ mekɛ ɛhye anu, “ɛya kpole” wɔ Seetan nu. (Yekile 12:7-12) Asoo wɔnwu kɛ ɛyavalɛ nee basabasayɛlɛ ɛwolo menli wɔ ewiade amuala ɛnɛ ɔ?

Gyisɛse noko hanle kɛ wɔ mekɛ ɛhye mɔɔ anu yɛ se kpole la anu, bɛbayɛ gyima titile bie. Ɔhanle kɛ: “Bɛbabɔ Edwɛkpa ɛhye mɔɔ fane [Nyamenle] Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.” (Mateyu 24:14) Ɛnɛ, Gyihova Alasevolɛ ɛlɛfa aneɛ mɔɔ bo 500 la abɔ Nyamenle Belemgbunlililɛ ne nolo wɔ azɛlɛ mɔɔ bo 235 la azo. Bɛfa Ɛzinzalɛ Arane ne nee Awake! ne mɔɔ gyi Baebolo ne azo la dɔɔnwo bɛmaa wɔ ewiade amuala bɛtɛla buluku gyɛne biala. Alasevolɛ ne mɔ eza ɛhile Baebolo ne abo ɛhɔ aneɛ kɛyɛ 100 anu. Menli mɔɔ tu bɛ nwo maa la a yɛ bɛ gyima ne anu dɔɔnwo a, na bɛfa ndoboa mɔɔ bɛnyia la a bɛtua nwolɛ kakɛ a. Asoo nolobɔlɛ titile ɛhye ɛmaa Gyisɛse ngapezo ne ɛra nu ɔ?

Baebolo ne eza ka ninyɛne mɔɔ bava konle ara Gyihova Nyamenle mumua ne nee menli mɔɔ dwazo tia ye avinli la anwo edwɛkɛ. Suzu ngapezo ɛhye mɔ anu nsa mɔɔ ɛra nu la anwo.

Ninyɛne Mɔɔ Ɔnrɛhyɛ Ɔbasisi La

Ngapezo 1. Baebolo ne ka kɛ menli baha ye bagua nu kɛ akee “Debie biala ɛla boɛ.” Bɛ adwenle bɛayɛ bɛ kɛ bɛhola bɛli ngyegyelɛ titile bie mɔ anwo gyima. Noko akee, ninyɛne mɔɔ basisi edwɛkɛ ɛhye anzi la ɛnrɛmaa anzondwolɛ ɛnrɛra.—1 Tɛsalonaekama 5:1-3.

Ngapezo 2. Bieko, ewiade tumima, bɛaho atia ɛzonlenlɛ mɔɔ bɛwɔ ewiade la. Wɔ Baebolo ne anu, bɛva nane anwo ɛzulolɛ bie a bɛyɛ tumima ɛhye mɔ anwo sɛkɛlɛneɛ a; yɛɛ bɛva raalɛ mɔɔ de nane anwo ɛzulolɛ zo la bɛyɛ adalɛ ɛzonlenlɛ nwo sɛkɛlɛneɛ. (Yekile 17:3, 15-18) Sɛkɛlɛneɛ adenle zo nane ɛhye bɛayɛ mɔɔ Nyamenle kulo la na yeazɛkye adalɛ ɛzonlenlɛma mɔɔ bɛka kɛ bɛgyi Nyamenle agyakɛ anu la.

Ɛzoanvolɛ Dwɔn luale sɛkɛlɛneɛ zo hilehilele mɔɔ ɔbazi la anu kɛ: “Mɛne bulu ne mɔɔ ɛnwunle bɛ la, nee nane ne bakpɔ tuutuunli ne; bɛbalie debie biala mɔɔ ɔlɛ la bɛamaa yealɛ ɔ nwo zɔ; bɛbali ye nwonane ne na bɛado ye senle nu bɛayela ye bɔkɔɔ. Ɔluakɛ Nyamenle ɛva ye gyimayɛlɛ nwo adwenle ɛwula bɛ ahonle nu.”—Yekile 17:16, 17.

Ngapezo 3. Bɛsɛkye adalɛ ɛzonlenlɛ bɛwie a, Seetan bamaa maanle maanle ne mɔ ateta menli mɔɔ sonle Gyihova Nyamenle la.—Yekile 7:14; Mateyu 24:21.

Kɛzi Ɔbaha Wɔ Ɛ?

Saa ɛtɛnyianle nwolɛ adenle ɛtɛsukoale Baebolo ne kpalɛ a, bie a ɔbayɛ se yeamaa wɔ kɛ ɛkɛlie ɛkɛli kɛ ninyɛne mɔɔ bɛha nwolɛ edwɛkɛ wɔ anwuma ɛke la bazi. Noko, ndelebɛbo kpalɛ bie ati ɔwɔ kɛ ɛdie ɛdi kɛ edwɛkɛ biala mɔɔ bɛha la bara nuhua na ɔnrɛhyɛ ninyɛne ɛhye mɔ basisi. Baebolo ngapezo mɔɔ ɛra nu la anwo kɛlɛtokɛ maa yɛnyia anwodozo kɛ ɛhye mɔ amuala bara. *

Duzu ati a ɛmkpondɛ mekɛ ɛnzukoa deɛmɔti Gyihova Alasevolɛ die di kɛ “Nyamenle Bedevinli ne Kenle kpole ne” anu konle ne mekɛ ɛdwu nee deɛmɔti ɔnle kɛ ɛsulo la ɛ? Maa bɛ nee wɔ ɛzuzu mɔɔ Baebolo ne ka kɛ ɔwɔ kɛ ɛyɛ na wɔaboka Gyihova Nyamenle menli mɔɔ ɔbabɔ bɛ nwo bane anwo la anwo. (Yekile 16:14) Mɔɔ ɛbazukoa la bamaa wɔanyia adwenle ngakyile wɔ mɔɔ ɔbara kenlebie la anwo.

[Ɔ bo ɛkɛ ne edwɛkɛ]

[Edwɛkɛ mɔɔ bɛkpa wɔ mukelɛ 8]

Asoo Gyihova Alasevolɛ gyima ne kile kɛ Baebolo ngapezo ɛra nu?