Menyinle wɔ suakpole Turku mɔɔ habɔ wɔ ɛkɛ la ɛleka bie mɔɔ ehyiavolɛma wɔ la. Ɛnee me papa le kovolɛ kpanyinli, na ɛnee me nee me diema ekyi ne noko kulo konle. Mekɛ mɔɔ mekɔ sukulu la, ɛnee bɛta bɛfa konle bɛtoa me; ɛnee ɔngyɛ na meado kɛlɛ. Melɛnyi la, me nee menli ekpunli bie mɔɔ bɛyɛ mgbane mgbane la dule, na ɛnee ɔmaa meta meko mgbane mgbane. Eza me nye liele edwɛne mɔɔ yɛ dede la anwo, na ɔmanle mendele nganeɛ kɛ ɔnrɛhyɛ mebalie duma wɔ edwɛnebɔlɛ nu.

Mendɔle ahenle ngakyile, mendele edwɛnebɔlɛ eku, na yeangyɛ ɛnee medame a medi bɛ nyunlu wɔ edwɛnebɔlɛ ne anu a. Saa melɛto edwɛne a, bɛnzɔ me. Kɛzi yɛyɛ yɛ ninyɛne na yɛteɛdea nu la, manle menli dɔɔnwo dele yɛ nganeɛ. Yɛbɔle ɔ bo yɛdole edwɛne yɛhilele menli dɔɔnwo, yɛɛ yɛbɔle edwɛne dɔɔnwo na menli hanvole mɔɔ li awieleɛ la kpalɛ. Ɛvolɛ 1980 awieleɛ ɛkɛ ne, yɛhɔle United States kɛ yɛmaa bɛanwu yɛ edwɛnebɔlɛ eku ne. Yɛbɔle edwɛne ekyi wɔ New York nee Los Angeles, na yɛ nee menli mɔɔ ɛbe edwɛnedolɛ gyima ne anu la bie mɔ lile adwelie kolaa na yɛazia yɛahɔ Finland.

Ɛnee me nye die edwɛnebɔlɛ eku ne anwo ɛdeɛ, noko ɛnee mekulo kɛ menyia asetɛnla kpalɛ. Anyebolo nee anyesesebɛ mɔɔ wɔ edwɛnebɔlɛ nu la manle me abɛ nu bule. Ɛnee ninyɛne mgbane mgbane ne mɔɔ meyɛ la noko gyegye me. Mendele nganeɛ kɛ menle sonla kpalɛ, na ɛnee mesulo kɛ bɛbayela me wɔ hɛle senle nu. Membɔle mɔdenle kɛ mebanyia mualɛ bie mɔ wɔ ɛzonlenlɛ ngakyile mbuluku nu, na eza menzɛlɛle Nyamenle moalɛ kpalɛ, ɔnva nwo kɛ ɛnee mete nganeɛ kɛ menrɛhola menrɛzɔ ɔ nye la.

Amaa meahola meanlea me nwo la, menyɛle gyima wɔ posuɔfese mɔɔ wɔ ɛkɛ la anu. Kenle ko, menwunle kɛ gyimayɛvoma ne anu ko le Gyihova Dasevolɛ. Membizale ye kpuyia dɔɔnwo kpalɛ. Kɛzi ɔgyinlanle Ngɛlɛlera ne azo ɔ nee me zuzule mualɛ ne anwo la manle me nye liele, yemɔti menliele mendole nu kɛ me nee ye bazukoa Baebolo ne. Menzukoale debie wɔ dapɛne ekyi anu la, adenle kɛnlɛma bie rale kɛ yɛ edwɛnebɔlɛ eku  ne bahɔ United States na bɛabɔ edwɛne fofolɛ bie. Mendele nganeɛ kɛ ɔle nwolɛ adenle kpole.

Mengale mengilele Dasevolɛ ne mɔɔ ɔ nee me sukoa la kɛ, mekulo kɛ meto edwɛne ko na mewie a akee meava Baebolo ngyinlazo meabɔ me ɛbɛla kpalɛ. Yeangile ye adwenle; emomu, ɔhanle kɛ mengenga Gyisɛse edwɛkɛ ne mɔɔ wɔ Mateyu 6:24 la. Ngyehyɛnu ne ka kɛ: “Awie biala ɛnrɛhola ɛnrɛzonle menlenlɛ nwiɔ.” Mekɛ mɔɔ mendele Gyisɛse edwɛkɛ ne abo la ɔzinle me nwo. Noko, mekɛ ekyi anzi, menyɛle debie memanle ɔzinle me Baebolo kilehilevolɛ ne noko anwo! Mengale mengilele ye kɛ kɛmɔ mekulo kɛ medi Gyisɛse anzi la ati, megyakyi edwɛnebɔlɛ eku ne!

Baebolo ne le kɛ neanleɛ mɔɔ manle menwunle me sinlidɔlɛ la. (Gyemise 1:22-25) Menwunle kɛ ɛnee membɔ ɛbɛla kpalɛ: Ɛnee mememaa me nwo zo yɛɛ mekulo mgbolede. Ɛnee mebɔ aholoba, meko, meno sigalɛte na meno nza mebo. Mekɛ mɔɔ menwunle kɛ me ɛbɛlabɔlɛ nee Baebolo ngyinlazo ɛnyia la, ɔmanle me rɛle bɔle kpole. Noko akee, ɛnee mekulo kɛ meyɛ nzenzaleɛ mɔɔ hyia la.—Ɛfɛsɛsema 4:22-24.

Mɔlebɛbo ne, menlile nyane wɔ ɛtane mɔɔ menyɛle ye dɛba ne la anwo titile. Noko Dasevolɛ ne mɔɔ nee me sukoa debie la boale me dɔɔnwo. Ɔmanle menwunle mɔɔ Baebolo ne ka ye wɔ Ayezaya 1:18 la kɛ: “Bɛ ɛtane ne mɔ ɛla zo kɛ ɛbenle bɔbɔ ɛdeɛ, noko bɛbayɛ fufule kɛ ezukɔtweaba.” Ɛhye nee Baebolo ngyehyɛnu ngakyile manle menwunle kɛ yɛ anwuma Selɛ ne se anwunvɔne, na ɔkulo kɛ ɔboa bɛdabɛ mɔɔ bɛkɛnlu bɛ nwo wɔ bɛ ɛtane nwo la.

Mekɛ mɔɔ menwunle Gyihova kpalɛ la, ɔmanle menyianle ɛhulolɛ kɛ meyila me ngoane zo meamaa ye. (Edwɛndolɛ 40:8) Bɛzɔnenle me wɔ 1992 wɔ Gyihova Alasevolɛ maanle maanle avinli nyianu mɔɔ bɛyɛle ye wɔ St. Petersburg, Russia la abo.

Menyia agɔnwolɛma kpalɛ dɔɔnwo wɔ Gyihova azonvolɛ avinli. Kɛkala, yɛyia nu yɛto edwɛne kɛnlɛma na yɛfa ahyɛlɛdeɛ ɛhye mɔɔ Nyamenle ɛva ɛmaa yɛ la yɛdie yɛ nye. (Gyemise 1:17) Nyilalɛ titile ko a le me ye Kristina, mɔɔ mekulo ye la. Yɛbɔ nu yɛyɛ ninyɛne dɔɔnwo—yɛ nye die yɛɛ yɛgyinla ɛbɛlabɔlɛ nu ngyegyelɛ nloa, eza ɔmaa mete nganeɛ kpalɛ.

Saa menle Gyihova Dasevolɛ a, anrɛɛ bie a mende aze ɛnɛ. Dɛba ne, ɛnee meyia ngyegyelɛ dɔɔnwo. Kɛkala akee me ɛbɛlabɔlɛ ne gyi bodane kpalɛ zo, na mete nganeɛ kɛ debie biala ɛlɛkɔ zo kɛnlɛma.