Me ngakula nu amuala ɛnee me nye die abɔdeɛ nwo. Ɛnee me abusua ne ta kɔnea kpɔkɛ nee tandane ngɛnlɛma mɔɔ wɔ yɛ sua zo Jyväskylä, mɔɔ wɔ Central Finland la. Medame noko me nye die nane nwo. Mekɛ mɔɔ mele kakula la, ɛnee mekulo kɛ medwu kusu nee twea biala mɔɔ mekɛnwu ye la! Mekɛ mɔɔ melɛnyi la, ɛnee kɛzi menli yɛ nane amumuyɛ la gyegye me. Mekɛ hɔle bie la, menvale me nwo menwulale eku mɔɔ nea nane boɛyɛlɛ zo la anu, na me nee menli dɔɔnwo mɔɔ lɛ me adwenle ne bie la yiale wɔ ɛkɛ.

Yɛbɔle nane adenlenyianlɛ nwo nolo ɛsesebɛ. Yɛmanle menli dele nwolɛ edwɛkɛ na yɛmanle bɛyɛle nwolɛ yɛkile bɛtiale ɛleka ngakyile mɔɔ bɛtɔne nane nwo enrinli na bɛfa nyile bie mɔ bɛwɔ nane bɛnea la. Yɛdele eku fofolɛ bie bɔbɔ mɔɔ bɔ nane nwo bane la. Kɛmɔ ɛnee yɛ nye ɛbolo kɛ yɛyɛ nzenzaleɛ ndɛndɛ yɛamaa yɛ gyima ne ahɔ zo la ati, ɛnee yɛta yɛ nee tumivolɛma ne nyia edwɛkɛ. Bɛhyele me na bɛ nee me hɔle kɔɔto fane dɔɔnwo.

Saa ɛye nane mɔɔ ɛnee bɛ nwo edwɛkɛ hyia me la ɛsie ahane a, ɛnee ninyɛne gyɛne mɔɔ kɔ zo wɔ ewiade anu la gyegye me. Awieleɛ bɔkɔɔ ne, menvale me nwo menwulale eku ngakyile mɔɔ le kɛ Amnesty International nee Greenpeace anu. Menvale me anwosesebɛ muala memboale bɛ gyima ne. Ɛnee metendɛ memaa ehyiavolɛma, menli mɔɔ ɛhɔne ɛlɛku bɛ nee menli gyɛne mɔɔ hyia moalɛ la.

Noko akee, ngyikyingyikyi menwunle kɛ menrɛhola menrɛhakyi ewiade ne. Eku ɛhye mɔ bɔle mɔdenle manle bɛlile ngyegyelɛ ekyi anwo gyima ɛdeɛ, noko ɛnee ɔzɔho kɛ ɔ nyunlu ala a ngyegyelɛ mgbole ne mɔ kɔ a. Ɛnee ɔle kɛ asɛɛ ɛtane ɛme ewiade ne amuala la, na ɛnee debie biala ɛnvane awie biala anwo. Ɛnee menlɛ nwolɛ tumi.

Alɔbɔlɛ mɔɔ ɛnee medi kɛ mengola menyɛ nwolɛ ɛhwee la manle membɔle ɔ bo kɛ medwenle Nyamenle nee Baebolo ne anwo. Ɛnee me  nee Gyihova Alasevolɛ ɛzukoa Baebolo ne dɛba. Ɛnee medie meto nu kɛ Alasevolɛ ne mɔ ati ɛnyɛ se yɛɛ bɛ nye liele me nwo ɛdeɛ, noko ɛnee metɛyɛle me adwenle kɛ mekakyi me ɛbɛlabɔlɛ. Mekɛ ɛhye anu, ɛnee ninyɛne ɛyɛ ngakyile.

Menvale me Baebolo ne na membɔle ɔ bo kɛ mekenga. Ɔkyekyele me rɛle kpalɛ. Menwunle Baebolo edwɛkɛ dɔɔnwo mɔɔ kile kɛ ɔnle kɛ yɛyɛ nane amumuyɛ la. Kɛ neazo la, Mrɛlɛbulɛ 12:10 ka kɛ, “sonla kpalɛ biala dwenle ye nyɛmoa nwo.” (Good News Translation) Menwunle ye noko kɛ ewiade ye anu ngyegyelɛ ne ɛnvi Nyamenle. Emomu, yɛ ngyegyelɛ ne ɛyɛ kpole ɔluakɛ menli dɔɔnwo ɛmmaa ɔngile bɛ adenle. Me nye liele Gyihova ɛlɔlɛ nee ye abotane ne mɔɔ menzukoale nwolɛ debie la anwo kpalɛ.—Edwɛndolɛ 103:8-14.

Mekɛ ɛhye anu, menwunle debie mɔɔ bamaa meanyia Duzu A Baebolo ne Kilehile Amgba A? buluku ne bie la, na menvale menwanle. Yeangyɛ Alasevolɛ mɔɔ bɛle agyalɛma la rale me anlenkɛ ne anwo na bɛhanle kɛ bɛ nee me bazukoa Baebolo ne, menliele mendole nu. Eza membɔle ɔ bo mengɔle Keleseɛne nyianu wɔ Belemgbunlililɛ Asalo. Ɔlua ɛhye azo, Baebolo ne anu nɔhalɛ ne bɔle ɔ bo kɛ ɔsɔ ndinli wɔ me ahonle nu.

Baebolo ne boale me manle menyɛle nzenzaleɛ dɔɔnwo. Mengyakyile sigalɛte nee nza dɔɔnwo ɛnlonlɛ. Ɛnee akee mesiezie me nwo kɛnlɛma na metendɛ kpalɛ. Mengakyile subane mɔɔ melɛ ye wɔ ewiade tumivolɛma anwo la. (Wulomuma 13:1) Eza mengyakyile me ɛbɛlatane ne, debie mɔɔ ɛnee me ti ɛmi nu la.

Nzenzaleɛ mɔɔ ɛnee yɛ se maa me la a le kɛzi mebanyia eku ngakyile ne mɔ anwo adwenle kpalɛ la. Yeamba ɛkɛ ne ala. Mɔɔ lumua la, mendele nganeɛ kɛ saa megyakyi a, ɔbahile kɛ melɛye eku ɛhye mɔ meamaa. Noko akee, menwunle ye kɛ Nyamenle Belemgbunlililɛ ne ala a le anyelazo kpalɛ maa ewiade ɛhye a. Menzile kpɔkɛ kɛ mebava me anwosesebɛ muala meaboa zɔhane Belemgbunlililɛ ne na meaboa awie mɔ meamaa bɛazukoa nwolɛ debie.—Mateyu 6:33.

Kɛmɔ ɛnee mekpondɛ ninyɛne boɛ la ati, ɛnee mekyɛ menli nu meyɛ bɛ ekpunli nwiɔ—kɛ bɛle kpalɛ anzɛɛ bɛnle kpalɛ—na ɛnee meziezie me nwo kɛ mebadwazo meatia bɛdabɛ mɔɔ mebu bɛ kɛ bɛnle kpalɛ la. Noko ɔlua Baebolo ne moalɛ zo, ɔmmaa memkpɔ awie mɔ. Emomu, mebɔ mɔdenle kɛ mebanyia Keleseɛne ɛlɔlɛ meamaa menli kɔsɔɔti. (Mateyu 5:44) Adenle mɔɔ medua zo meyɛ ɛhye la a le kɛ, meka Nyamenle Belemgbunlililɛ ne anwo edwɛkpa ne mekile menli. Me nye die kɛzi ahunlunyele gyima ɛhye maa anzondwolɛ nee anyelielɛ kɔ zo na ɔmaa menli nyia anyelazo kpalɛ la anwo.

Ninyɛne mɔɔ megyakyi nu memaa Gyihova la maa me nzo nu dwo me. Medie medi kɛ kɛmɔ ɔle Bɔvolɛ la ati, ɔnrɛmaa alesama ɛnrɛyɛ nane amumuyɛ dahuu yɛɛ ɔnrɛmaa bɛnrɛzɛkye yɛ azɛlɛ kɛnlɛma ɛhye. Emomu, ɔlua ye Belemgbunlililɛ ne azo, ɔnrɛhyɛ ɔbayɛ debie biala mɔɔ bɛzɛkye ye la boɛ. (Ayezaya 11:1-9) Me nye die kpole kɛ menwu nɔhalɛ ɛhye mɔ na eza melɛboa awie mɔ meamaa bɛanyia nuhua diedi la. Mende nganeɛ kɛ ɔwɔ kɛ mekakyi ewiade ne bieko.