Ahyɛlɛdeɛ boni a bamaa wɔanwu kɛ bɛ nye sɔ mɔɔ wɔyɛ la ɛ? Ɔda ali kɛ yɛ nuhua dɔɔnwo anye balie kɛ yɛbanyia ahyɛlɛdeɛ yɛavi awie mɔɔ ɛlɔlɛ a hanle ye manle ɔyɛle zɔ na tɛ kɛ ɔle ye gyima la ati ɔ. Saa yɛlɛfa debie yɛahyɛ a, adwenle mɔɔ wɔ ɔ nzi la kile dɔɔnwo. Nwolɛ hyia yɛ. Na nwolɛ noko hyia Nyamenle kpalɛ. Suzu edwɛkɛ mɔɔ sunsum ne hanle ɛzoanvolɛ Pɔɔlo manle ɔhɛlɛle la anwo wɔ 2 Kɔlentema 9:7.

Duzu ati a Pɔɔlo hɛlɛle zɔhane edwɛkɛ ne a? Ɛnee ɔkulo kɛ ɔmaa Keleseɛnema mɔɔ wɔ Kɔlente la anwosesebɛ kɛ bɛboa gyima mɔɔ bɛlɛyɛ bɛamaa bɛ gɔnwo mɔ diedima mɔɔ bɛhyia wɔ Dwudiya la. Asoo ɔbɔle mɔdenle kɛ ɔbapiepia Kɔlentema kɛ bɛhyɛ debie? Yeanyɛ zɔ, emomu, ɔhɛlɛle kɛ: “Awie biala ɛva mɔɔ yezuzu nwo wɔ ye ahonle nu la ɛmaa. Ɔmmatwenlehwenle ɔ bo aze anzɛɛ ɔyɛ ye kɛ asɛɛ yemia la ati ɔ, ɔluakɛ Nyamenle kulo sonla mɔɔ te ɔ nyunlu kyɛ debie la.” Bɛmaa yɛzuzu ye folɛdulɛ ne anwo kpalɛ.

“Awie biala ɛva mɔɔ yezuzu nwo wɔ ye ahonle nu la.” Pɔɔlo hanle kɛ Keleseɛnenli kpalɛ kyɛ debie ɔluakɛ yezuzu nwo “wɔ ye ahonle nu” kɛ ɔyɛ zɔ la ati ɔ. Mekɛ ko ne ala, Keleseɛnenli eza dwenle ɔ gɔnwo mɔ azonvolɛ ngyianlɛ nwo kpalɛ. Nwomanli ko ka kɛ, mɔlebɛbo aneɛ mɔɔ bɛhile ɔ bo “yezuzu nwo” la kile “kpɔkɛ mɔɔ bɛlumua bɛbɔ la.” Yemɔti Keleseɛnenli suzu ɔ gɔnwo mɔ diedima ngyianlɛ nwo na ɔbiza ɔ nwo deɛ mɔɔ ɔbahola yeayɛ yeava yeali nwolɛ gyima la.—1 Dwɔn 3:17.

“Ɔmmatwenlehwenle ɔ bo aze anzɛɛ ɔyɛ ye kɛ asɛɛ yemia la ati ɔ.” Pɔɔlo yɛle ninyɛne nwiɔ nzonlɛ wɔ debie ɛhyɛlɛ nwo mɔɔ ɔwɔ kɛ Keleseɛnema koati a—kɛ awie twehwe ɔ bo aze na yeayɛ ye kɛ yemia la. Giliki edwɛkɛkpɔkɛ mɔɔ bɛhile ɔ bo twehwe ɛ bo aze kile “nyanelilɛ (anzɛɛ, alɔbɔlɛlilɛ).” Buluku ko kilehile nu kɛ, awie mɔɔ twehwe ɔ bo aze kyɛ debie la “fi ahonle mɔɔ ɛlɛdi nyane kɛ ezukoa ɛvi ɔ sa nu la anu a kyɛ debie a.” Awie mɔɔ kyɛ debie kɛ asɛɛ yemia la ati la, te nganeɛ kɛ bɛlɛpiepia ye kɛ ɔhyɛ debie. Yɛ nuhua boni a kulo kɛ awie mɔɔ twehwe ɔ bo aze anzɛɛ te nganeɛ kɛ bɛlɛpiepia ye la kyɛ ye debie a?

“Nyamenle kulo sonla mɔɔ te ɔ nyunlu kyɛ debie la.” Saa Keleseɛnenli bɔ kpɔkɛ kɛ ɔkyɛ debie a, ɔwɔ kɛ ɔte ɔ nyunlu anzɛɛ ɔfa anyelielɛ ɔyɛ zɔ, kɛmɔ Pɔɔlo ɛha la. Nɔhalɛ nu, awie fa adwenle kpalɛ kyɛ debie a ɔ nye die. (Gyima ne 20:35) Awie mɔɔ te ɔ nyunlu kyɛ debie la ɛnvea ye anyelielɛ zo. Nɔhalɛ nu, edwɛkɛkpɔkɛ “te ɔ nyunlu” ka kɛzi ahenle mɔɔ ɛlɛkyɛ deɛ ne te nganeɛ na ɔda ye ali la anwo edwɛkɛ. Awie te ɔ nyunlu kyɛ yɛ debie a, ɔka yɛ ahonle. Ɔmaa Nyamenle noko anye die. Ngilebɛbo fofolɛ ka kɛ: “Nyamenle kulo menli mɔɔ kulo kɛ bɛkyɛ debie la.”—Contemporary English Version.

Ɛzoanvolɛ Pɔɔlo edwɛkɛ ne mɔɔ vi sunsum nu la le ngyinlazo maa Keleseɛnema wɔ debie ɛhyɛlɛ nwo. Saa yɛlɛfa yɛ mekɛ, yɛ anwosesebɛ anzɛɛ yɛ ninyɛne yɛahyɛ a, bɛmaa yɛvi yɛ ɛhulolɛ nu yɛyɛ zɔ kɛ yɛfa yɛaboa awie mɔ, titile menli mɔɔ bɛhyia la. Saa yɛkyɛ debie wɔ adenle zɛhae azo a, ɔmmaa yɛ nye ɛnlie ala, na eza ɔmaa Nyamenle anye die yɛ nwo, ɔluakɛ ‘ɔkulo sonla mɔɔ te ɔ nyunlu kyɛ debie la.’