Asoo Gyihova anye sɔ mɔɔ ye azonvolɛ bɔ mɔdenle yɛ kɛ bɛfa bɛazɔ ɔ nye la? Bie mɔ baha kɛ kyɛkyɛ, na bɛahile kɛ Nyamenle anye ɛnlie yɛ nwo. Noko edwɛkɛ zɛhae si Nyamenle anwo adalɛ mɔɔ ɛnle kpalɛ la adua. Ye Edwɛkɛ, Baebolo ne, maa ninyɛne nu da ɛkɛ ne wienyi. Ɔsi zolɛ kɛ Gyihova anye sɔ mɔdenle mɔɔ ye nɔhalɛ azonvolɛ bɔ la. Suzu edwɛkɛ mɔɔ ɛzoanvolɛ Pɔɔlo hɛlɛle la anwo wɔ Hibuluma 11:6.

Duzu a bamaa yɛazɔ Gyihova anye a? Pɔɔlo hɛlɛle kɛ “ɔyɛ se kɛ awie mɔɔ ɛnlɛ diedi la kɛzɔ Nyamenle anye.” Yɛ ye nzonlɛ kɛ Pɔɔlo anga kɛ ɔnla aze kɛ awie mɔɔ ɛnlɛ diedi la kɛzɔ Nyamenle anye. Emomu, ɛzoanvolɛ ne hanle kɛ ɔyɛ se kɛ yɛkɛyɛ zɔ. Ɔkile kɛ, diedi hyia kpalɛ na yɛazɔ Nyamenle anye.

Diedi boni a sɔ Gyihova anye a? Ɔwɔ kɛ diedi mɔɔ yɛlɛ wɔ Nyamenle anu la gyinla ninyɛne nwiɔ azo. Mɔɔ lumua la, ‘ɔwɔ kɛ yɛdie yɛdi kɛ ɔwɔ ɛkɛ.’ Ngilebɛbo bie mɔ ka kɛ “bɛdie bɛdi kɛ ɔwɔ ɛkɛ amgba” yɛɛ “bɛdie bɛdi kɛ ɔde aze.” Saa yɛnlie yɛnli kɛ Nyamenle wɔ ɛkɛ a, kɛzi yɛbahola yɛazɔ ɔ nye ɛ? Noko, nɔhalɛ diedi kile dɔɔnwo, ɔluakɛ sunsum ɛtane ne mɔ die di kɛ Gyihova wɔ ɛkɛ. (Gyemise 2:19) Ɔwɔ kɛ diedi mɔɔ yɛlɛ kɛ Nyamenle wɔ ɛkɛ la maa yɛyɛ debie, kile kɛ, ɔwɔ kɛ yɛbɔ ɛbɛla mɔɔ sɔ ɔ nye la yɛfa yɛkile kɛ yɛlɛ diedi.—Gyemise 2:20, 26.

Mɔɔ tɔ zo nwiɔ, ‘ɔwɔ kɛ yɛdie yɛdi kɛ’ Nyamenle ‘yila’ menli. Awie mɔɔ lɛ nɔhalɛ diedi la ze ye wienyi kɛ mɔdenle mɔɔ ɔlɛbɔ kɛ ɔsɔ Nyamenle anye la ɛnrɛyɛ mgbane. (1 Kɔlentema 15:58) Saa yɛnlie yɛnli kɛ Gyihova lɛ ɛhulolɛ kɛ ɔbayila yɛ a, kɛzi yɛbahola yɛazɔ ɔ nye ɛ? (Gyemise 1:17; 1 Pita 5:7) Awie mɔɔ ka kɛ Nyamenle ɛndwenle yɛ nwo, ɔnze ayɛlɛ yɛɛ ɔti yɛ se la ɛnze Nyamenle ne mɔɔ wɔ Baebolo ne anu la.

Nwane mɔ a Gyihova yila bɛ a? Pɔɔlo se, “bɛdabɛ mɔɔ bɛkpondɛ ɔ bo zo la.” Buluku bie mɔɔ menli mɔɔ kile Baebolo bo nea nu la ka kɛ, Giliki edwɛkɛkpɔkɛ mɔɔ bɛhile ɔ bo “bɛkpondɛ” la ɛngile kɛ awie “finde ahɔkpondɛ” emomu, ɔkile kɛ awie ba Nyamenle ɛkɛ “wɔ ɛzonlenlɛ nu.” Buluku bieko kilehile nu kɛ Giliki yɛkpɔkɛ ɛhye kile mɔdenlebɔlɛ mɔɔ anu yɛ se la. Ɔle zɔ kɛ, Gyihova yila bɛdabɛ mɔɔ bɛ diedi ka bɛ maa bɛfi ahonle muala anu bɛkulo ye na bɛbɔ mɔdenle bɛsonle ye la.—Mateyu 22:37.

Kɛzi Gyihova yila ye nɔhalɛ azonvolɛ ɛ? Yeva kenlebie nyilalɛ mɔɔ sonle bolɛ la yebɔ bɛ ɛwɔkɛ, mɔɔ kile ye ahunlunyele nee ye ɛlɔlɛ ne la, ɔse bɛbanyia dahuu ngoane wɔ azɛlɛ ye azo Paladaese ne anu. (Yekile 21:3, 4) Kɛkala bɔbɔ, bɛdabɛ mɔɔ bɛkpondɛ Gyihova la nyia nyilalɛ dɔɔnwo. Ɔlua ye sunsum nwuanzanwuanza ne moalɛ yɛɛ nrɛlɛbɛ mɔɔ wɔ ye Edwɛkɛ ne anu la azo, bɛbɔ ɛbɛla mɔɔ nyilalɛ nee ahunlundwolɛ wɔ nu la.—Edwɛndolɛ 144:15; Mateyu 5:3.

Nɔhalɛ nu, Gyihova le Nyamenle mɔɔ ze ayɛlɛ mɔɔ anye sɔ nɔhalɛ ɛzonlenlɛ mɔɔ ye azonvolɛ fi bɛ ɛhulolɛ nu fa maa ye la. Asoo ɛhye mɔɔ wɔnwu ye la bamaa wɔabikye ye kpalɛ? Saa ye zɔhane a, ɛnee duzu ati a ɛnzukoa kɛzi ɛbahola wɔanyia zɔhane diedi ne mɔɔ Gyihova bamaa wɔanyia nwolɛ nyilalɛ la na ɛnla ye ali ɛ?