Yɛ muala yɛdwenle kenlebie anwo. Yɛdwenle kɛzi yɛ ɛbɛlabɔlɛ nee yɛ alɔvolɛ ɛdeɛ bayɛ wɔ kenlebie la anwo. Yɛbiza kpuyia mɔɔ le kɛ ɛhye mɔ la kɛ: ‘Asoo me mra banyia ewiade kpalɛ nu adɛnla? Esiane bie bazɛkye azɛlɛ ye ɔ? Asoo debie wɔ ɛkɛ mɔɔ mebahola meahakyi ye kɛkala na meanyia kenlebie kpalɛ ɔ?’ Yɛle menli mɔɔ yɛkulo kɛ yɛnwu debie; yɛkpondɛ kɛ yɛnyia anwodozo, yɛsi pi, yɛnyia ngyehyɛleɛ nee banebɔlɛ. Saa ɛze mɔɔ bazi kenlebie la a, ɛbahola wɔaziezie ɛ nwo nee wɔ nganeɛdelɛ wɔamaa ye.

Yemɔti, duzu a bado wɔ kenlebie a? Ɛbahola wɔanwu ye ɔ? Nwomama mɔɔ bɔ mɔdenle ka mɔɔ bazi kenlebie la edwɛkɛ bie mɔ ɛra nu noko dɔɔnwo amba nu. Noko, bɛkile kɛ Nyamenle kola ka edwɛkɛ mɔɔ bazi kenlebie la nɔhalɛ bɔkɔɔ. Ye Edwɛkɛ ne ka kɛ: ‘Mevi mɔlebɛbo meka mɔɔ bazi la, yɛɛ mevi tete meka mɔɔ ɛtɛsile la.’ (Ayezaya 46:10) Kɛzi mɔɔ yeha la ɛyɛ nɔhalɛ ɛ?

Kɛmɔti a ɔwɔ kɛ ɛ nye die Nyamenle tete ngapezo mɔɔ rale nu la anwo ɛ? Saa awie ka kɛzi maanle nu bayɛ na ɔyɛ zɔ mekɛ tendenle a, ɛ nye balie ɔ nwo. Ɔda ali kɛ ɔka kɛzi maanle nu bayɛ wɔ ɛhyema la anwo edwɛkɛ a ɛbadie. Zɔhane ala a, ɛnwu kɛ Nyamenle ɛha edwɛkɛ mɔɔ basisi la ɛmaa yera nu bɔkɔɔ a, ɛ nye balie mɔɔ ɔka ɔfane wɔ kenlebie la anwo a.

SUAKPOLE BIE ƐZƐKYELƐ:

Kɛ neazo la, ɔbayɛ nwanwane kpole kɛ awie baha ado ɛkɛ ne kɛ suakpole bie mɔɔ lɛ tumi wɔ ɛvoya dɔɔnwo anu la ɛnrɛhyɛ na yeazɛkye. Nyamenle luale ye ngapezoma ne anu ko anwo zo hanle edwɛkɛ zɛhae​—Nenɛvɛ ɛzɛkyelɛ ne. (Zɛfanaya 2:13-15) Duzu a ewiade  tetedwɛkɛ kɛlɛvolɛma ɛha a? Wɔ ɛvoya ne mɔɔ tɔ zo nsuu K.Y.M., ɔbayɛ kɛ Nyamenle hanle edwɛkɛ ɛhye la ye ɛvolɛ 15 anzi, Babelɔnma nee Midiama tetale Nenɛvɛ na bɛzɛkyele ye. Bieko, Nyamenle hanle dole ɛkɛ ne kɛ Nenɛvɛ ‘badɔ mgbane, zolɛ awe kɛ ɛsɛlɛ zo.’ Asoo edwɛkɛ ɛhye mɔɔ bɛlumuale bɛhanle la yɛle nɔhalɛ? Ɛhɛe. Suakpole ne lɛ azua mɔɔ zuozua ye, mɔɔ bayɛ kɛ mayɛlɛ 200 wɔ ye muleɛ nna ne ɛdeɛ, noko konimlilɛma ne angyakyi sua ne na bɛadɛnla zolɛ, kɛmɔ ɛnyelɛ la kɛ bɛbayɛ la. Emomu, bɛzɛkyele ye. Asoo anrɛɛ awie mɔɔ ka maanyɛlɛ nu edwɛkɛ la bahola aha ɛhye ado ɛkɛ ne nɔhalɛ nu?

BƐBAYELA MENLI MBOWULE:

Nwane a bahola azi ɔ kɛnra aha edwɛkɛ mɔɔ bazi ɛvolɛ 300 la, na yeabɔ ahenle mɔɔ bayela menli mbowule wɔ afɔlemokyea zo la duma wienyi nee abusua mɔɔ ɔvi nu la, na eza yeahile sua mɔɔ afɔlemokyea ne wɔ zolɛ la ɛ? Saa edwɛkɛ zɛhae mɔɔ ɔnda ɔnzi la ba nu a, ɔbamaa kavolɛ ne alie duma bɔkɔɔ. Nyamenle ngapezonli ne zele kɛ: ‘Bɛbawo ralɛ nrenya mɔɔ bɛfɛlɛ ye Dwosaya la wɔ Devidi sua nu’ na ‘ɔbayela menli mbowule’ wɔ afɔlemokyea mɔɔ wɔ Bɛtɛle la azo. (1 Arelemgbunli 13:1, 2) Ɛvolɛ kɛyɛ nsa anzi, belemgbunli bie mɔɔ bɛfɛlɛ ye Dwosaya​—duma mɔɔ ɔnvinde Baebolo nu dɔɔnwo​—vi Devidi abusuandoazo ne anu rale. Kɛmɔ bɛhanle bɛdole ɛkɛ ne la, Dwosaya ‘manle bɛzale avunli mbowule na bɛyelale bɛ wɔ afɔlemokyea’ ne mɔɔ wɔ Bɛtɛle la azo. (2 Arelemgbunli 23:14-16) Saa tɛ tumi mɔɔ bo sonla ɛdeɛ zo la a, kɛzi awie bahola aha edwɛkɛ ɛhye ɛ?

MAANLE BIE AWIELEƐ:

Ɔbayɛ nwanwane kɛ awie bahola abɔ nrenya bie mɔɔ bazɛkye ewiade tumililɛ titile bie la duma, na bɔbɔ yeahile adenle ngakyile mɔɔ ɔbalua zolɛ la kolaa na bɛawo ye. Nyamenle hanle kɛ nrenya bie mɔɔ bɛfɛlɛ ye Saelɛse la bamaa bɛazɛkye maanle bie. Saelɛse ɛhye eza bamaa bɛagyakyi Dwuuma mɔɔ bɛhye bɛ la na yeaboa yeamaa bɛazi asɔnesua nwuanzanwuanza ne bieko. Bieko, Nyamenle hanle dole ɛkɛ ne kɛ Saelɛse bamaa azule asesa na ɔhilele kɛ  bɛnrɛdo nlenkɛ mgbole nu, amaa bɛahola bɛali konim. (Ayezaya 44:27–45:2) Asoo Nyamenle ngapezo ne anu edwɛkɛ ne amuala rale nu bɔkɔɔ? Tetedwɛkɛ kɛlɛvolɛma die to nu kɛ konim ɛhye mɔɔ Saelɛse lile la rale nu bɔkɔɔ. Saelɛse ɛlɔnema ne bɔle mɔdenle yɛle engyineama gyima na bɛhakyile Babelɔn azule ne ko anye, na bɛmanle azule ne sesanle. Bieko, ɛlɔnema ne luale nlenkɛ mgbole ne mɔɔ bɛando nu la anu. Ɛhye anzi, Saelɛse gyakyile Dwuuma na ɔhanle kɛ bɛbahola bɛazi asɔnesua ne mɔɔ wɔ Gyɛlusalɛm la bieko. Ɔnda ɔnzi, ɔluakɛ ɛnee Saelɛse ɛnzonle Dwuuma Nyamenle ne. (Ɛzela 1:1-3) Saa tɛ Nyamenle a dasanli boni a anrɛɛ ɔbahola yeaha zɔhane tetedwɛkɛ ne nɔhalɛ nu a?

Yɛha neazo nsa mɔɔ kile kɛzi Nyamenle holale hanle kenlebie edwɛkɛ manle ɔrale nuhua pɛpɛɛpɛ la anwo edwɛkɛ. Ɛhye mɔ ɛnle edwɛkɛ mɔɔ bɛsisile ɛleka ngakyile ala. Dwɔhyua mɔɔ ɛnee li Dwuuma anyunlu la hanle nɔhalɛ edwɛkɛ mɔɔ ɛnee ye tievolɛma dɔɔnwo ne ze ye kpalɛ la kɛ: ‘Bɛze ye wɔ bɛ ahonle nu na bɛdie bɛto nu kɛ Gyihova bɛ Nyamenle ne ɛva ninyɛne kpalɛ ne mɔɔ ɔvale ɔbɔle bɛ ɛwɔkɛ la ɛmaa bɛ. Ɛwɔkɛ biala mɔɔ ɔbɔle la yeli zolɛ; kokye anga nu.’ (Dwɔhyua 23:1, 2, 14) Dwɔhyua menli ne angola anzu Nyamenle ɛwɔkɛ nee ngapezo ne mɔ mɔɔ ɛra nu la anwo kpolera. Noko kɛzi Nyamenle yɛ ye ɛdeɛ ɛ? Ngakyile kpole wɔ kɛzi Nyamenle nee sonla yɛ debie la anu. Ɔhyia kɛ ɛnwu ɛhye, ɔluakɛ Nyamenle ɛha kenlebie edwɛkɛ bie mɔ mɔɔ yɛ nwanwane mɔɔ baha wɔ bɔkɔɔ la ɛdo ɛkɛ.

Sonla edwɛkɛ ta gyinla abɔdeɛ nwo neɛnleanu, debie nwo nɔhalɛ edwɛkɛ anzɛɛ adalɛ sunsum nu nwunu zo. Saa alesama ka edwɛkɛ bie a bɛtɛnla aze koonwu na bɛnea mɔɔ bazi la.​—Mrɛlɛbulɛ 27:1.

Noko akee Nyamenle ɛnle kɛ sonla la, ɔze debie biala. Ɔze kɛzi alesama de nee mɔɔ wɔ bɛ ahonle nu la bɔkɔɔ; ɛhye ati, saa ɔkulo kɛ ɔka mɔɔ bado bɛ la a, Nyamenle bahola anwu kɛzi sonla ko biala nee maanle muala bayɛ bɛ nyɛleɛ la. Noko Nyamenle kola yɛ mɔɔ tɛla zɔ la. Ɔkola bɔbɔ ɔkakyi ninyɛne bie ɔmaa edwɛkɛ ne ba nu. Ɔka kɛ: ‘Edwɛkɛ mɔɔ kɛvi me nloa anu kɛvinde la ɛnrɛzia ɛnrɛra me nwo ɛke mgbane, kyesɛ ɔyɛ mɔɔ mekulo la, na ɔbara nu bɔkɔɔ.’ (Ayezaya 55:11) Wɔ adenle bie azo, Nyamenle ngapezo bie mɔ le kɛ edwɛkɛ mɔɔ ɔlɛka yeahile yɛ la. Ɔnea kɛ ye edwɛkɛ ne bayɛ zɔ bɔkɔɔ.

Asoo ngapezo bie mɔɔ anwodozo wɔ nu mɔɔ baha ɛdawɔ nee wɔ alɔvolɛ kenlebie la wɔ ɛkɛ ɔ? Saa ɛte kɛ ahumuakyima bie bazi a, ɛbayɛ debie mɔɔ bamaa wɔanyia ngoane la. Zɔhane ala a ɛbahola wɔayɛ wɔ Baebolo ngapezo nwo a. Nyamenle ɛmaa yɛde kɛ ɔnrɛhyɛ nzenzaleɛ kpole bara ewiade amuala. (Nea ɛlɛka:“ Mɔɔ Nyamenle Ɛhile Kɛ Ɔbazi Kenlebie La.”) Kenlebie ɛhye le ngakyile wɔ mɔɔ menli dɔɔnwo mɔɔ ɛbe ka la anwo.

Ɛbahola wɔadwenle nwolɛ wɔ adenle ɛhye azo: Ewiade ɛhye anwo edwɛkɛ wɔ ɛkɛ. Bɛhɛlɛ bɛdo ɛkɛ, na ɛbahola wɔanwu mɔɔ bavi nu ara la. Nyamenle se: ‘Mevi mɔlebɛbo meka mɔɔ bazi la, meka kɛ me kpɔkɛbɔlɛ bagyinla, na biala mɔɔ sɔ me nye la mebayɛ.’ (Ayezaya 46:10) Ɛ nee wɔ abusua ne bahola anyia kenlebie mɔɔ yɛ anyelielɛ la. Biza Gyihova Alasevolɛ maa bɛha mɔɔ Baebolo ne kile kɛ ɔbazi kenlebie la anwo edwɛkɛ bɛhile wɔ. Alasevolɛ ne mɔ ɛnga sunsum nu edwɛkɛ; yɛɛ bɛnga kɛ bɛte sunsum nu edwɛkɛ anzɛɛ bɛnlɛ tumi bie mɔɔ maa bɛka ngapezo a. Bɛle Baebolo sukoavoma mɔɔ bɛbahola bɛahile wɔ ninyɛne kpalɛ mɔɔ Nyamenle ɛlɛsiezie amaa wɔ kenlebie la.