Anthony: Ahye o. Me nye ɛlie kɛ menwu wɔ bieko la.

Ndede: Medame noko zɔhane ala.

Anthony: Melɛfa Ɛzinzalɛ Arane nee Awake! fofolɛ mɔɔ ɛra la mearɛlɛ wɔ. Meze kɛ ɛ nye balie edwɛkɛ mɔɔ wɔ magazine ɛhye mɔ anu la anwo kpalɛ.

Ndede: Meda wɔ ase. Me nye ɛlie kɛ wɔra ɛke ɛnɛ a, ɔluakɛ mekulo kɛ mebiza wɔ edwɛkɛ bie.

Anthony: Amgba, duzu edwɛkɛ ɔ?

Ndede: Ɛkenle, ɛnee me nee me gɔnwo bie mɔɔ me nee ye yɛ gyima la ɛlɛtendɛ. Menganle buluku ne mɔɔ ɛvale ɛmanle me la anu edwɛkɛ nee kɛzi ɔyɛ anyelielɛ la mengilele ye. Noko ɔhanle kɛ ɔngyia kɛ mekenga ɔluakɛ Gyihova Alasevolɛ ɛnlie Gyisɛse ɛnli. Ɔle nɔhalɛ ɔ? Menganle mengilele ye kɛ ɛba bieko a mebabiza wɔ.

Anthony: Ɔyɛ, me nye ɛlie kɛ wɔbiza me la. Ɔle kpalɛ kɛ wɔbiza awie mɔɔ ɔkɔ bie la. Ɛkulo kɛ ɛnwu awie diedi a ɔle kpalɛ kɛ ɛbabiza ɔdaye mumua ne.

Ndede: Kɛ ɛnee medwenle la ɛne.

Anthony: Nɔhalɛ nu, Gyihova Alasevolɛ die Gyisɛse di bɔkɔɔ. Yɛte nganeɛ kɛ Gyisɛse anu diedi hyia maa ngoanelielɛ.

Ndede: Meze kɛ bɛyɛ ye zɔ, noko mekɛ mɔɔ me gɔnwo ne hanle kɛ bɛnlie Gyisɛse bɛnli la, ɛnee mekulo kɛ menwu nɔhalɛ mɔɔ wɔ nu la. Ɔyɛ me kɛ me nee wɔ ɛtɛsuzule nwolɛ ɛlɛ.

Anthony: Mebahola meahile wɔ Baebolo nu ngyehyɛnu bie mɔ mɔɔ maa yɛnwu kɛzi ɔhyia kɛ yɛnyia Gyisɛse anu diedi la ɔ? Ngyehyɛnu ɛhye mɔ a Gyihova Alasevolɛ ta fa di gyima wɔ daselɛlilɛ nu a.

Ndede: Yoo mede.

Anthony: Ɔle kpalɛ kɛ yɛfa Gyisɛse mumua ne anloa edwɛkɛ mɔɔ wɔ Dwɔn 14:6 la yɛbɔ ɔ bo. Zɔhane edwɛkɛ ne boka adwelie mɔɔ Gyisɛse nee ye ɛzoanvolɛ ne mɔ anu ko lile la anwo. Yɛkenga kɛ: “Gyisɛse buale ye kɛ: ‘Mame a mele adenle ne, nɔhalɛ ne, nee ngoane ne a; awie biala ɛnrɛhola Selɛ ne ɛkɛ ne kɔ kyesɛ ɔdua me nwo zo.’” Kɛmɔ ngyehyɛnu ɛhye kile la, adenle kokye boni a yɛdua zo yɛbikye Selɛ ne a?

Ndede: Ɔlua Gyisɛse anwo zo.

Anthony: Wɔyɛ deɛ. Gyihova Alasevolɛ die ɛhye di bɔkɔɔ. Maa membiza wɔ edwɛkɛ ɛhye: Kɛmɔ wɔnwu ye wɔ mɔɔ Nyamenle kpondɛ kɛ yɛyɛ anwo la, saa awie yɛ asɔne a, nwane duma nu a ɔwɔ kɛ ɔyɛ asɔne ne a?

Ndede: Wɔ Gyisɛse duma nu.

Anthony: Ɔle zɔ. Yemɔti a meyɛ asɔne biala a meyɛ ye wɔ Gyisɛse duma nu la. Zɔhane ala a Gyihova Alasevolɛ kɔsɔɔti yɛ asɔne a.

Ndede: Ɔle kpalɛ kɛ menwu ye la.

Anthony: Ngɛlɛlera bieko mɔɔ yɛbazuzu nwolɛ la a le Dwɔn 3:16. Ngyehyɛnu ɛhye anwo hyia kpalɛ la ati bɛfɛlɛ ye Edwɛkpa ne mɔɔ bɛyɛ ye ekyi la. Adwenle ne a le kɛ saa ɛfa debie biala mɔɔ bɛhɛlɛ  ye wɔ Gyisɛse azɛlɛ ye azo ɛbɛlabɔlɛ nee ye ɛzonlenlɛ gyima ne anwo wɔabɔ nu na wɔayɛ ye ngyehyɛnu ko a, yemɔ a le ɛhye. Kenga ngɛlɛlera ɛhye maa yɛnlea.

Ndede: Yoo. Ɔse: “Ɔluakɛ Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.”

Anthony: Meda wɔ ase. Ɛze ngyehyɛnu ɛhye ɔ?

Ndede: Ɛhɛe, mede ye fane dɔɔnwo, yɛɛ meta menwu kɛ bɛkɛlɛ bɛbɔ ɛleka bie mɔ.

Anthony: Ɔle ngyehyɛnu mɔɔ bɛze ye kpalɛ a. Maa yɛnlea ye kpalɛ, na tie mɔɔ Gyisɛse hanle la. Ɔhanle kɛ Nyamenle ɛhulolɛ ne ɛmaa yeyɛ boɛ kɛ alesama banyia dahuu ngoane​—noko kyesɛ yɛyɛ duzu?

Ndede: Yɛnyia diedi.

Anthony: Ɔle zɔ. Titile, diedi wɔ Ralɛ kokye ne, Gyisɛse Kelaese anu. Edwɛkɛ ɛhye​—mɔɔ se Gyisɛse anu diedi buke dahuu ngoane nwo adenle la wɔ magazine ɛhye mɔɔ meva memaa wɔ la mukelɛ 2. Ɔka bodane mɔɔ Ɛzinzalɛ Arane ne gyi zo la anwo edwɛkɛ kɛ, magazine ɛhye maa “yɛnyia Gyisɛse Kelaese, mɔɔ wule amaa yɛanyia dahuu ngoane, na kɛkala ɔlɛdi tumi kɛ Nyamenle Belemgbunlililɛ ne azo Belemgbunli la anu diedi.”

Ndede: Ɔyɛ, menwu ye. Bɛ magazine ne bɔbɔ di daselɛ kɛ Gyihova Alasevolɛ die Gyisɛse di.

Anthony: Ɔdaye ne ala ɛne.

Ndede: Ɛnee duzu ati a menli ka kɛ bɛnlie Gyisɛse bɛnli a?

Anthony: Bie a ndelebɛbo bie mɔ ati a menli ka ye zɔ a. Ɔdwu mekɛ ne bie a, menli ka ɛhye ala ɔluakɛ bɛde kɛ menli gyɛne ɛlɛka la ati. Anzɛɛ bie a bɛ ɛsɔfo a ɛha edwɛkɛ ɛhye ɛhile bɛ a.

Ndede: Ɔyɛ me kɛ​—bie mɔ ka kɛ bɛnlie Gyisɛse bɛnli ɔluakɛ bɛfɛlɛ bɛ nwo Gyihova Alasevolɛ na tɛ Gyisɛse Alasevolɛ la ati ɔ.

Anthony: Ɔbahola yeayɛ zɔ.

Ndede: Duzu ati a bɛka Gyihova anwo edwɛkɛ dɔɔnwo a?

Anthony: Debie ko a le kɛ, yɛdie yɛdi kɛ ɔhyia kɛ yɛfa Nyamenle duma, Gyihova ne yɛfɛlɛ ye​—kɛmɔ ɔ Ra, Gyisɛse yɛle la. Suzu mɔɔ Gyisɛse hanle ye wɔ asɔneyɛlɛ nu hilele ɔ Ze la anwo nea. Bɛhɛlɛ ye wɔ Dwɔn 17:26. Mesɛlɛ wɔ kenga ngyehyɛnu ɛhye maa me.

Ndede: Yoo. “Mela wɔ [duma] ali mehile bɛ na mebahɔ zo meayɛ ye zɔhane, amaa ɛhulolɛ ne mɔɔ ɛlɛ ye me nwo la adɛnla bɛ nu, na medame noko meadɛnla bɛ nu.”

Anthony: Mo. Yɛ ye nzonlɛ kɛ Gyisɛse hanle kɛ yela Nyamenle duma ne ali. Ɛnea a duzu ati a ɔyɛle zɔ a?

Ndede: Hmm. Menze.

Anthony: Ɔyɛ, bie a yɛbahola yɛanlea ngɛlɛlera fofolɛ mɔɔ bamaa yɛade edwɛkɛ ne abo la. Mɔɔ melɛdwenle nwolɛ la a le Gyima ne 2:21. Ɔkenga kɛ: “Awie biala mɔɔ kɛbɔ [Gyihova] duma la bɛkɛlie ye ngoane.” Meze kɛ ɛte ɔ bo kɛ awie bɔ Gyihova duma a ɔbanyia ngoane a, ɛnee ɔda ali kɛ Gyisɛse ze ye zɔ.

Ndede: Ɛhɛe.

Anthony: Yemɔti ye ɛdoavolɛma ngoanelielɛ a le debie ko mɔɔ ɔti ɛnee ɔhyia Gyisɛse kɛ ye bɛbanwu Nyamenle duma na bɛabɔ la. Na yemɔ a le debie titile ko mɔɔ ɔti yɛka Gyihova anwo edwɛkɛ dɔɔnwo la. Yɛte nganeɛ kɛ ɔhyia kɛ yɛmaa bɛnwu Nyamenle duma, na yɛboa awie mɔ yɛmaa bɛbɔ zɔhane duma ne.

Ndede: Noko saa menli ɛnze Nyamenle duma anzɛɛ bɛmbɔ bɔbɔ a, bɛze awie mɔɔ bɛlɛka ɔ nwo edwɛkɛ wɔ mekɛ mɔɔ bɛkɛha Nyamenle anwo edwɛkɛ la.

Anthony: Ɔbahola yeayɛ zɔ. Noko, ɔlua ye duma mɔɔ yemaa yɛnwu ye la azo, Nyamenle ɛlɛmaa yeayɛ sikalɛ kɛ yɛbabikye ye kpalɛ.

Ndede: Boni a ɛkile a?

 Anthony: Dwenle nwolɛ wɔ adenle ɛhye azo nea: Ɛnee ɔngyia kɛ yɛnwu Mosisi duma. Anrɛɛ yɛbanwu ye sikalɛ kɛ nrenya ne mɔɔ manle Nyevile Kɔkɔlɛ ne anu hyɛle nwiɔ anzɛɛ nrenya ne mɔɔ liele Mɛla Bulu ne la. Kɛ ɔde wɔ Nowa anwo la ɛne​—duzu ati a ɔwɔ kɛ yɛnwu ye duma a? Anrɛɛ bɛbahola bɛavɛlɛ ye kɛ nrenya ne mɔɔ bobɔle ɛlɛne na ɔliele ye abusua ne nee nane ne mɔ ngoane la. Anrɛɛ yɛbahola yɛanwu Gyisɛse Kelaese bɔbɔ kɛ awie mɔɔ vi anwuma rale na ɔwule wɔ yɛ ɛtane ti la. Ɔnle zɔ ɔ?

Ndede: Ɔyɛ me zɔ.

Anthony: Noko Nyamenle manle yɛnwunle menli ɛhye mɔ aluma. Yɛnwu bɛ aluma a ɔmaa yɛte bɛ edwɛkɛ ne abo kpalɛ. Yɛtɛnwunle Mosisi, Nowa, anzɛɛ Gyisɛse ɛlɛ ɛdeɛ, noko yɛnwu bɛ aluma a ɔmaa yɛte mrenya ɛhye mɔ edwɛkɛ bo kpalɛ.

Ndede: Meandwenle nwolɛ zɛhae ɛlɛ, noko ndelebɛbo wɔ nu!

Anthony: Na yemɔ le debie bieko mɔɔ ɔti Gyihova Alasevolɛ bɔ Nyamenle duma kpalɛ a. Yɛkulo kɛ yɛboa menli yɛmaa bɛnyia Gyihova Nyamenle anu diedi kɛ Awie mɔɔ bɛkola bɛbikye ye la. Eza yɛsi gyima mɔɔ Gyisɛse di wɔ yɛ ngoanelielɛ nu la azo kpalɛ. Bie a yɛbahola yɛagenga ngɛlɛlera bieko mɔɔ bamaa edwɛkɛ ɛhye anu ala ɛkɛ la.

Ndede: Mede.

Anthony: Yɛlumua yɛgenga Dwɔn 14:6. Kakye kɛ Gyisɛse hanle kɛ yemɔ a le “adenle ne, nɔhalɛ ne, nee ngoane ne” la. Maa yɛhɔ ɔ nzi ekyii na tie ye edwɛkɛ ne mɔɔ wɔ Dwɔn 14:1 la. Mesɛlɛ wɔ ɛbahola wɔagenga Gyisɛse edwɛkɛ mɔɔ ɔhanle wɔ ngyehyɛnu zɔhane awieleɛ la ɔ?

Ndede: Ɛhɛe. Ɔse: “Bɛlie Nyamenle bɛli na bɛlie medame noko bɛli.”

Anthony: Mo. Ɛnee, ɛbaha kɛ nɔhalɛ diedi le mɔɔ yeanyɛ ɛhye a ɛnee ɔbayɛ debie gyɛne ɔ? Asoo ɔle Gyisɛse anu diedi nee Gyihova anu diedi nwo edwɛkɛ ɔ?

Ndede: Kyɛkyɛ. Gyisɛse hanle kɛ yɛhyia ɔ mu nwiɔ anwo.

Anthony: Ɔle zɔ. Meze kɛ ɛdie ɛto nu kɛ yɛka kɛ yɛlɛ Nyamenle nee Gyisɛse anu diedi a ɛnee ɔtɛwiele. Nɔhalɛ nu, ɔwɔ kɛ yɛ ɛbɛlabɔlɛ kile kɛ yɛdie bɛ yɛdi.

Ndede: Ɔle nɔhalɛ bɔkɔɔ.

Anthony: Noko kɛzi awie kile kɛ amgba ɔlɛ diedi wɔ Nyamenle nee Gyisɛse anu ɛ? Bie a yɛbahola yɛazuzu kpuyia ɛhye anwo wɔ mekɛ fofolɛ nu. *

Ndede: Me nye balie nwolɛ.