Ɛkulo kɛ ɛnwu wɔ kenlebie ɔ? Menli dɔɔnwo anye edwɛkɛ ɛhye anwo. Menli dɔɔnwo ka mɔɔ bazi la, na mɔɔ bɛka la yɛ ngakyile. Suzu edwɛkɛ ɛhye mɔ anwo nea:

• ABƆDEƐ NWO NRƐLƐBƐVOLƐMA fa milahyinli kpalɛ di gyima na bɛsɛkye ezukoa dɔɔnwo bɛfa bɛka edwɛkɛ ngakyile mɔɔ bazi, mɔɔ bie a le kɛzi awieleɛ ne evinli baha azɛlɛ ne na bɛkile kɛ bie a ɛhyema ezule badɔ ɛleka mɔɔ ɛwɔ la.

• NEƐNLEANUMA MƆƆ ƐBE ka mɔɔ bazi gyima nee maanyɛlɛ nu la to ɛkɛ. Bɛbu Warren Buffett, mɔɔ le sukoavolɛma mɔɔ wɔ ewiade ye anu ko la kɛ, ɔle ye gyima ne mɔɔ ɛli munli la anwo ngapezonli. Nate Silver, mɔɔ le awie bieko mɔɔ yɛ neɛnleanu la, ɛlua mgbondabulɛ zo ɛhola ɛha debie biala anwo edwɛkɛ ɔvi U.S. maanyɛlɛ zo kɔdwu menli mɔɔ Hollywood kyɛ bɛ ninyɛne la anwo zo.

• TETEDWƐKƐ le kɛ ngapezo wɔ menli nye zo. Bie mɔ bu ninyɛne mgbane mɔɔ Michel de Notredame (Nostradamus) hɛlɛle ye wɔ ɛvoya 16 ne anu la kɛ bɛlɛba nu ɛnɛ. Bie mɔ hilele Maya kalenda ne mɔɔ wiele wɔ December 21, 2012 la abo kɛ, ɔle debie mɔɔ bava esiane anzɛɛ nzenzaleɛ kpole ara la.

• ASƆNE MGBANYIMA ka alɔbɔlɛ edwɛkɛ mɔɔ bazi ewiade amuala wɔ mekɛ bie anu la fa bɔ menli kɔkɔ na bɛmaa menli di bɛ nzi. Ngapezonli, Harold Camping, mɔɔ ka ndɛnebualɛ nwo edwɛkɛ la nee ye ɛdoavolɛma bɔle ye nolo kɛ ewiade bazɛkye wɔ 2011. Ewiade ne a tɛbɔ ɛkɛ ne la.

• SUNSUM NU EDWƐKƐHANLƐMA kile kɛ bɛlɛ tumi mɔɔ maa bɛka kenlebie edwɛkɛ la. Edgar Cayce nee Jeane Dixon, holale hanle edwɛkɛ bie mɔɔ bazi ɛvoya 20 ne anu la manle ɔyɛle nɔhalɛ. Bɛ nuhua ko biala noko hanle edwɛkɛ dɔɔnwo mɔɔ yeamba nu a. Kɛ neazo la, Dixon hanle kɛ Ewiade Konle III la bazi wɔ 1958, yɛɛ Cayce hanle kɛ nyevile ne bayi ava New York wɔ 1970 ne anu.

Asoo adenle kpalɛ bie wɔ ɛkɛ mɔɔ yɛbahola yɛalua zo yɛanwu kenlebie ɔ? Ɔfɛta kɛ yɛbiza kpuyia ɛhye. Saa ɛbahola wɔanwu mɔɔ bazi kenlebie la a, anrɛɛ ɔbahakyi wɔ ɛbɛlabɔlɛ.