Me ngakula nu, ɛnee me abusua ne de ɛleka bie mɔɔ bikye Leipzig, mɔɔ wɔ East Germany, mɔɔ nee menli mɔɔ ka Czech nee Poland aneɛ ɛweɛne zo anwa la. Menlile ɛvolɛ nsa la, me papa gyima ne manle yɛhɔle maanle gyɛne zo—yɛlumuale yɛhɔle Brazil yɛɛ akee Ecuador.

Menlile ɛvolɛ 14 la, bɛvale me bɛhɔle sukulu mɔɔ bɛda ɛkɛ la wɔ Germany. Kɛmɔ ɛnee me awovolɛ wɔ America Nyiakɛ la ati, ɛnee ɔwɔ kɛ menea me nwo. Membɔle ɔ bo kɛ medi me ti anwo. Ɛnee mendwenle kɛzi me nyɛleɛ gyegye awie mɔ la anwo.

Menlile ɛvolɛ 17 la, me awovolɛ ziale rale Germany. Alumua ne, ɛnee me nee bɛ a de a. Noko me fanwodi subane ne manle ɔyɛle se kɛ me nee abusua ne badɛnla. Menlile ɛvolɛ 18 la, menvile sua nu.

Me nye bolole kɛ mekpondɛ bodane wɔ ɛbɛlabɔlɛ nu. Mekɛ mɔɔ meneanle ɛbɛla mɔɔ bie mɔ bɔ yɛɛ ahyehyɛdeɛ bie mɔ nyɛleɛ la, menwunle kɛ ɔle kpalɛ kɛ mebɔ mɔdenle menwu ninyɛne ngɛnlɛma mɔɔ wɔ azɛlɛ ɛhye azo la na alesama azɛkye ye.

Menvile Germany, na menvale moto mengɔle Africa. Noko, yeangyɛ, ɛnee ɔwɔ kɛ mesia mekɔ Europe na mekɔyɛ me moto ne boɛ. Mekɛ ekyi bie anzi, ɛnee mewɔ Portugal ɛnweazo. Menzile kpɔkɛ kɛ mebagyakyi me moto ne ɛkɛ na meava meli meadu adenle.

Mendoale menli ekpunli bie mɔɔ ɛnee bɛlɛsiezie bɛ nwo kɛ bɛkapɛ Atlantic Nyevile ne la. Menwunle Laurie, mɔɔ bayɛ me ye kenlebie la wɔ nu. Yɛlumuale yɛhɔle Caribbean mbɔra ne azo. Akee, yɛlile mekɛ ekyi wɔ Puerto Rico, na yɛziale yɛhɔle Europe. Ɛnee yɛ nye la kɛ yɛbanyia meli mɔɔ yɛbahola yɛadɛnla nu la. Noko yɛvale siane nsa ala yɛkpondɛle la, gyima ne hale ɛkɛ ne arɛlevilɛ nu. Germany sogyama hyele me wulale gyima ne anu.

Menlile siane 15 wɔ Germany nyevile zo sogya gyima ne anu. Zɔhane mekɛ ne anu, me nee Laurie gyale na  yɛzieziele yɛ nwo kɛ yɛtoa yɛ adendulɛ ne azo. Ɔhale ekyii na meahɔ sogya gyima ne anu la, yɛdɔle meli ne abo ne. Mekɛ mɔɔ mewɔ sogya gyima ne anu la, yɛyɛle ye ngyikyingyikyi yɛvale meli ne abo ne yɛyɛle meli ekyi mɔɔ yɛfa yɛkpɔsa la. Yɛyɛle ngyehyɛleɛ kɛ yɛbadɛnla nu na yɛakpɔsa ewiade kɛnlɛma ɛhye anu. Mekɛ ɛhye—mɔɔ ɛnee mewie sogya gyima ne na yɛtɛwiele meli ne la—anu a yɛ nee Gyihova Alasevolɛ lile ngitanwo na yɛbɔle ɔ bo kɛ yɛsukoa Baebolo ne a.

Alumua ne, ɛnee mennwu deɛmɔti ɔhyia kɛ mekakyi me ɛbɛlabɔlɛ la. Ɛnee megya raalɛ ne mɔɔ me nee ye de la, na megyakyi sigalɛtenlonlɛ. (Ɛfɛsɛsema 5:5) Ɛnee meze kɛ adwenle mɔɔ yɛnyia kɛ yɛkpɔsa ewiade na yɛanlea abɔdeɛ mɔɔ yɛ nwanwane mɔɔ Nyamenle ɛbɔ la le adwenle kpalɛ.

Noko ɛnee amgba ɔhyia kɛ mekakyi me ɛbɛlabɔlɛ titile. Kɛmɔ ɛnee medie me nwo medi kpalɛ la ati, ɛnee me mɔdenlebɔlɛ nee mɔɔ meyɛ la ala a medwenle nwo a. Ɛnee me nwo ala a medwenle a.

Kenle ko bie, mengengale Gyisɛse Boka Zo Edwɛkɛhanlɛ ne. (Mateyu tile 5-7) Mɔlebɛbo ne, meande anyelielɛ ne mɔɔ Gyisɛse hanle nwolɛ edwɛkɛ la abo. Kɛ neazo la, ɔhanle kɛ anyelielɛ a le bɛdabɛ mɔɔ ɛhɔne nee nzuhɔne ɛlɛku bɛ la. (Mateyu 5:6, NW) Meande kɛzi awie kyia a ɔ nye bahola alie la abo. Melɛkɔ zo meazukoa la, menwunle kɛ yɛ muala yɛlɛ sunsum nu ngyianlɛ noko ɔwɔ kɛ yɛdie zɔhane ngyianlɛ ne yɛto nu na yɛahola yɛali nwolɛ gyima. Kɛmɔ Gyisɛse hanle la: ‘Anyelielɛ a le bɛdabɛ mɔɔ bɛze bɛ sunsum nu ngyianlɛ la.’—Mateyu 5:3.

Yɛbɔle yɛ Baebolo ɛzukoalɛ ne abo wɔ Germany yɛwiele la, me nee Laurie hɔle France, nzinlii yɛhɔle Italy. Ɛleka biala mɔɔ yɛkɛhɔ la, yɛnwu Gyihova Alasevolɛ. Ɛnee me nye die kɛzi bɛkulo bɛ nwo edwɛkɛ yɛɛ koyɛlɛ mɔɔ bɛlɛ la anwo. Menwunle kɛ amgba Alasevolɛ ne mɔ le mediema wɔ ewiade amuala. (Dwɔn 13:34, 35) Mekɛ hɔle bie la, bɛzɔnenle medame nee Laurie kɛ Gyihova Alasevolɛ.

Bɛzɔnenle me la anzi, mengɔle zo menyɛle nzenzaleɛ. Me nee Laurie zile kpɔkɛ kɛ yɛbalua Africa nyevile zo yɛapɛ Atlantic Nyevile ne yɛahɔ United States. Mekɛ mɔɔ yɛlua nyevile ne azo, yɛ mu nwiɔ ala, na yɛ nye dua nzule mayɛlɛ mgbe dɔɔnwo ne la yɛɛ menwunle kɛzi menzɔho ɛhwee wɔ yɛ Bɔvolɛ kpole ne anye zo a. Kɛmɔ ɛnee melɛ mekɛ dɔɔnwo (yɛnyɛ gyima dɔɔnwo biala wɔ nyevile ne azo) la ati, menvale menziele me nye zo kɛ mekenga Baebolo ne. Me nye liele Gyisɛse azɛlɛ ye azo ɛbɛlabɔlɛ ne anwo kpalɛ. Ɛnee ɔle sonla mɔɔ di munli mɔɔ ɔbahola yeayɛ debie biala, noko yeanva yeanlie duma. Yeandwenle ɔ nwo, ɔdwenlenle ye anwuma Selɛ ne anwo.

Mekɛ mɔɔ menzuzule Gyisɛse neazo ne anwo la, menwunle kɛ ɔhyia kɛ mefa Nyamenle Belemgbunlililɛ ne medumua me ɛbɛlabɔlɛ nu, na ɔnle kɛ mefa meboka ninyɛne mɔɔ mekulo kɛ meyɛ la anwo. (Mateyu 6:33) Mekɛ mɔɔ me nee Laurie dwule United States la, yɛbɔle kpɔkɛ kɛ yɛbadɛnla ɛkɛ na yɛava yɛ adwenle yɛazie yɛ ɛzonlenlɛ ne azo.

Dɛba ne mɔɔ ɛnee me nwo ala a medwenle la, ɛnee mesulo ɔ nzi. Noko, kɛkala, menwu nrɛlɛbɛ kpole mɔɔ kile me adenle a. (Ayezaya 48:17, 18) Eza menyia bodane wɔ ɛbɛlabɔlɛ nu mɔɔ ɛnee menlɛ a—kɛ mebazonle Nyamenle na meaboa awie mɔ meamaa bɛazukoa ɔ nwo debie la.

Baebolo ngyinlazo mɔɔ yɛva yɛbɔ yɛ ɛbɛla la ɛmaa yɛ agyalɛ ne anu ɛmia kpalɛ. Yɛlɛ yɛ ra raalɛ kɛnlɛma ko noko mɔɔ kɛkala ze Gyihova na ɔkulo ye a.

Ɛbɛlabɔlɛ ɛnla aze ɛmmaa yɛ dahuu. Noko ɔlua Gyihova moalɛ zo, yɛbɔ kpɔkɛ kɛ yɛ sa nu ɛnrɛdo ɛlɛ yɛɛ yɛnrɛgyakyi kɛ yɛbava yɛ nwo yɛado ɔ nwo zo.—Mrɛlɛbulɛ 3:5, 6.