Asoo ɛlɛ ɛ gɔnwo kpalɛ bie mɔɔ ɛnze ye duma ɔ? Ɔnrɛzi ɛlɛ. Bulgaria raalɛ bie mɔɔ bɛfɛlɛ ye Irina la hanle ye kɛnlɛma kɛ, “saa ɛnze Nyamenle duma a, ɛnrɛhola ɛnrɛbikye ye.” Kɛmɔ bɛhanle ye wɔ edwɛkɛ ne mɔɔ lumua la anu la, ɔyɛ anyelielɛ kɛ Nyamenle kulo kɛ ɛbikye ye. Yemɔti yelua Baebolo ne azo yemaa wɔnwu ye. Ɔse: ‘Medame a mele Gyihova a, me duma ɛne.’—Ayezaya 42:8.

Asoo ɛze Gyihova duma na ɛbɔ anzɛɛ ɛnze a ɔhyia ye ɔ? Suzu ɛhye anwo: Nyamenle duma mɔɔ bɛva Hibulu kɔnsɔnante nna mɔɔ bɛfɛlɛ ye Tetragrammaton bɛhɛlɛ la, finde mɔlebɛbo Hibulu Ngɛlɛlera ne anu fane kɛyɛ 7,000. Ɔfinde fane dɔɔnwo wɔ Baebolo ne anu ɔtɛla duma biala. Ɛhye amgba le daselɛ mɔɔ kile kɛ Gyihova kulo kɛ yɛnwu ye duma na yɛbɔ a. *

Noko bie a, bie mɔ te nganeɛ kɛ kɛmɔ Nyamenle le nwuanzanwuanza nee tumivolɛ la ati, ɔngile ɛbulɛ kɛ bɛbabɔ ye duma. Nɔhalɛ nu, ɔnle kpalɛ kɛ ɛbɔ Nyamenle duma wɔ adenle ɛtane zo, kɛmɔ ɛnrɛbɔ ɛ gɔnwo kpalɛ bie duma wɔ adenle ɛtane zo la. Noko akee, ɔle Gyihova ɛhulolɛdeɛ kɛ menli mɔɔ kulo ye la di ye duma ne eni na bɛmaa bɛnwu ye. (Edwɛndolɛ 69:30, 31; 96:2, 8) Kakye kɛ Gyisɛse hanle hilele ye ɛdoavolɛma kɛ bɛyɛ asɔne kɛ: “Yɛ Ze mɔɔ wɔ anwuma: Wɔ duma nwo ɛde.” Ɔwɔ kɛ yɛmaa bɛnwu Nyamenle duma na bɛte nwolɛ. Yɛyɛ ye zɔ a, ɔmaa yɛbikye ye.—Mateyu 6:9.

Baebolo ne kile kɛ, Nyamenle tie ‘bɛdabɛ mɔɔ bɛdwenle anzɛɛ ye duma sonle bolɛ maa bɛ la.’ (Malakae 3:16) Gyihova ɛbɔ sonla zɛhae ɛwɔkɛ kɛ: “Mebalie ye; mebawowa ye, ɔboalekɛ ɔze me duma. Saa ɔfɛlɛ me a, mebalie ye zo; saa ɔkɔ ngyegyelɛ nu a, mebabikye ye.” (Edwɛndolɛ 91:14, 15) Ɔwɔ kɛ yɛnwu Gyihova duma na yɛbɔ amaa yɛahola yɛayɛ ɔ gɔnwo.