SAA ɛdwenle nwolɛ kɛ kenle bie ɛbayɛ kpanyinli a, kɛzi ɛte nganeɛ ɛ? Ɛhye gyegye menli dɔɔnwo na ɔmaa ɛzulolɛ ka bɛ, ɔboalekɛ mgbanyinliyɛlɛ nee ngyegyelɛ lua. Bɛ nwonane nwoso, ɔmaa bɛ anwosesebɛ zo te, bɛ rɛle fi debie, eza ɔ nee anwondolɛ lua.

Noko akee, asolo kɛzi awie biala mgbanyinliyɛlɛ nu de a. Bie mɔ lɛ kpɔkɛdelɛ kpalɛ wɔ nwonane nee adwenle nu. Anyuhɔlɛ mɔɔ bɛnyia ye wɔ ayileyɛlɛ nu la ɛmaa bie mɔ ɛnyia bɛ ewule ne sɔbelɛ. Ɛhye ati, bie mɔ tɛnla aze kyɛ yɛɛ bɛ nwo yɛ se wɔ maanle bie mɔ anu.

Noko, saa bɛyia ngyegyelɛ anzɛɛ bɛnyia bie bɔbɔ a, menli dɔɔnwo bahulo kɛ bɛkɛnyia anyelielɛ wɔ bɛ mgbanyinliyɛlɛ nu. Kɛ ɔkɛyɛ na bɛayɛ ɛhye ɛ? Ɛhye bagyinla yɛ subane nee ɛhulolɛ mɔɔ yɛlɛ kɛ yɛbalie yɛ asetɛnla fofolɛ ɛhye yɛado nu la azo. Bɛmaa yɛzuzu ndenle bie mɔ nee Baebolo ngyinlazo mɔɔ ɔbaboa yɛ la anwo sikalɛ.

YƐ BƐLƐVO: “Mɔɔ le bɛlɛvo la nwu nrɛlɛbɛ.” (Mrɛlɛbulɛ 11:2) Wɔ edwɛkɛ ɛhye anu, “mɔɔ le bɛlɛvo la” bahola ayɛ bɛdabɛ mɔɔ bɛnwu kɛ bɛngola bɛnyɛ debie biala mɔɔ ɛnee bɛyɛ ye dɛba ne, na bɛmbɔ mɔdenle kɛ bɛbaha kɛ ɔnle zɔ anzɛɛ bɛmbu bɛ nye bɛngua zo. Charles mɔɔ ɛli 93 na ɔvi Brazil la edwɛkɛ ne le nɔhalɛ bɔkɔɔ, ɔse: “Saa ɛtɛnla aze ɛkyɛ a, ɛbayɛ kpanyinli. Ye biala anu ɛnrɛzia ɛnrɛyɛ kakula bieko.”

Noko akee, mɛlɛbɛnwoaze ɛngile kɛ yɛbanyia adwenle mɔɔ ɛndenrɛ kɛ, “Meyɛ kpanyinli, debie biala ɛnle ɛkɛ mɔɔ mebahola meayɛ a.” Subane ɛhye kola maa awie di nyane. Mrɛlɛbulɛ 24:10 ka kɛ, “Saa edwɛkɛ to wɔ na ɛ rɛle bɔ a, ɛnee noko wɔ anwosesebɛ le ekyi.” Emomu, awie mɔɔ le bɛlɛvo la da nrɛlɛbɛ ali na ɔbɔ mɔdenle ɔyɛ mɔɔ ɔbahola ye yɛ la kɔsɔɔti.

Corrado mɔɔ ɛli 77 na ɔwɔ Italy la se: “Saa ɛlɛfo boka a ɔwɔ kɛ ɛyɛ ye bɛtɛɛ amaa wɔandɔ aze.” Saa awie yɛ kpanyinli a, ɔwɔ kɛ ɔyɛ nzenzaleɛ. Corrado nee ɔ ye ɛyɛ sua nu gyima nwo ngyehyɛleɛ kpalɛ mɔɔ bɛdi zo a, amaa too mɔɔ aleɛ kadwo la bɛande nganeɛ kɛ bɛvɛ somaa. Marian mɔɔ ɛli 81 na ɔwɔ Brazil la noko lɛ kpanyinliyɛlɛ nwo adwenle kpalɛ. Ɔse, “Mezukoa kɛ mebayɛ  me debie ndɛndɛ. Megyinla ekyi wɔ mekɛ mɔɔ ɔhyia la anu. Metɛnla aze anzɛɛ meda mekenga debie anzɛɛ metie edwɛne. Medie meto nu kɛ menrɛhola menrɛyɛ mɔɔ ɛnee meyɛ ye dɛba ne la.”

YƐ NINYƐNE PƐPƐƐPƐ: ‘Mraalɛ ne mɔ noko ɛziezie bɛ nwo kɛnlɛma wɔ adenle mɔɔ kile kɛ bɛze deɛ la azo na nyiane wɔ bɛ nye zo la azo.’ (1 Temɔte 2:9) Edwɛkɛkpɔkɛ “ɛziezie bɛ nwo kɛnlɛma” kile debie mɔɔ bɛyɛ ye pɛpɛɛpɛ na ɔle kpalɛ la. Barbara mɔɔ ɛli 74 na ɔwɔ Canada la se: “Mebɔ mɔdenle kɛ mebali me nwo eni. Mengulo kɛ mebayɛ me ‘nwo basabasa’ kɛmɔ meyɛ kpanyinli la ati; Na memkpondɛ kɛ mebayɛ me nwo kɛ debie ɛnvale me nwo.” Fern mɔɔ ɛli 91 na ɔwɔ Brazil la se: “Ɔyɛ a, metɔ adɛladeɛ fofolɛ amaa me nye alie.” Na mrenyia mɔɔ bɛyɛ mgbanyinli la noko ɛ? Antônio mɔɔ ɛli 73 na ɔwɔ Brazil la se: “Mebɔ mɔdenle kɛ mebawula tɛladeɛ mɔɔ anye te na ɔle fofolɛ la amaa me nwo ayɛ fɛ.” Mɔɔ fane bɔkɔbɔkɔyɛlɛ nwo la, ɔtoa zo kɛ: “Mebia na mekpa me kɛsa dahuu.”

Noko, ɔhyia kɛ yɛkoati kɛ yɛbadwenle kɛzi yɛsiezie yɛ nwo la anwo somaa mɔɔ akee yɛnze “nyiane” a. Bok-im mɔɔ ɛli 69 na ɔwɔ South Korea la lɛ tɛladeɛwulalɛ nwo adwenle kpalɛ. Ɔse: “Meze kɛ ɔnle kpalɛ kɛ mebawula adɛladeɛ bie mɔ mɔɔ ɛnee me mbɛlɛra nu mewula la.”

NYIA ADWENLE KPALƐ: “Mɔɔ ɛlɛnwu amaneɛ la mekɛ kɔsɔɔti le munzule, na mɔɔ ɛlɛdi fɛlɛko la mekɛ kɔsɔɔti le anyelielɛ.” (Mrɛlɛbulɛ 15:15) Saa ɛlɛbikye mgbanyifoa na ɛkakye wɔ mgbavolɛ nu nee ninyɛne mɔɔ ɛnee ɛkola ɛyɛ la a, bie a ɔbamaa wɔali nyane. Ndelebɛbo wɔ ɛhye anu. Noko, bɔ mɔdenle kɛ ɛnrɛmaa nganeɛdelɛ ɛtane ɛhye ɛnrɛvo ɛ nwo zo. Saa ɛdwenle mɔɔ ɛpɛ nu la anwo a, ɔbamaa wɔali nyane na ɛ sa nu ado na ɔnrɛmaa ɛnrɛyɛ mɔɔ ɛkola ye yɛ la. Joseph mɔɔ ɛli 79 na ɔwɔ Canada la lɛ adwenle kpalɛ: “Mebɔ mɔdenle meyɛ mɔɔ mekola ye yɛ la na mendwenle mɔɔ mekɛ bie ɛnee meyɛ na kɛkala mengola ye yɛ la anwo.”

Debiezukoalɛ nee ɛgengalɛ boa maa yɛnyia adwenle kpalɛ, na ɔmaa yɛnwu ninyɛne fofolɛ. Ɛhye ati, saa ɛbahola a, bɔ mɔdenle kenga na sukoa ninyɛne fofolɛ mɔɔ ɛra la. Ernesto mɔɔ ɛli 74 na ɔwɔ Philippines la kɔ mbulukuzielɛleka na ɔkenga mbuluku mɔɔ nuhua edwɛkɛ ne yɛ anyelielɛ la. “Me nye tɛdie kɛ mebadu adenle meahɔ ɛleka ngakyile mealie me nye.” Lennart mɔɔ ɛli 75 na ɔwɔ Sweden la bɔ mɔdenle kɛ ɔbazukoa aneɛ fofolɛ.

 YƐ NYELE: “Bɛmaa bɛ sa ɛdwu awie mɔ anwo zo, na Nyamenle asa adwu bɛdabɛ noko bɛ nwo zo.” (Luku 6:38) Maa ɔyɛ wɔ subane kɛ ɛbanyia mekɛ wɔamaa menli na kyɛ awie mɔ debie. Ɛhye bamaa wɔade nganeɛ kɛ wɔboa awie mɔ na ɛ nye alie. Hosa mɔɔ ɛli 85 na ɔwɔ Brazil la bɔ mɔdenle kɛ ɔbaboa awie mɔ ɔnva nwo kɛ ɔnlɛ anwosesebɛ la. Ɔse: “Mefɛlɛ me gɔnwo mɔ mɔɔ ɛnde kpɔkɛ anzɛɛ asa nu ɛdo la na mekɛlɛ bɛ kɛlata. Ɔyɛ a menwa bɛ ahyɛlɛdeɛ ekyi. Eza meto aleɛ anzɛɛ meyɛ debie ekyi memaa bɛdabɛ mɔɔ bɛnde kpɔkɛ la.”

Saa yɛyɛ nyele a ɔka menli ɔmaa bɛyɛ bie. Jan mɔɔ ɛli 66 na ɔwɔ Sweden la se, “Saa ɛda ɛlɔlɛ ali ɛkile awie mɔ a, bɛdabɛ noko bɛkulo wɔ edwɛkɛ.” Ɛhɛe, awie mɔɔ ɔ sa do la maa awie mɔ anye die na bɛkile nwolɛ anyezɔlɛ.

FA AGƆNWOLƐ: ‘Sonla mɔɔ ɛnzo menli avinli la bua ɔ nwo benle; ɔtwe ɔ nwo ɔfi nrɛlɛbɛ kɔsɔɔti anwo.’ (Mrɛlɛbulɛ 18:1) Ɔdwu mekɛ ne bie a ɛbahulo kɛ ɔbaha ɛ ngome ɛdeɛ, noko koati kɛ ɛbahwe ɛ nwo wɔavi menli nwo bɔkɔɔ. Innocent mɔɔ ɛli 72 na ɔwɔ Nigeria la, anye die kɛ ɔ nee ɔ gɔnwo mɔ badu. “Me nye die kɛ me nee ngakula nee mgbanyinli kɔsɔɔti badu.” Börje mɔɔ ɛli 85 na ɔwɔ Sweden la se: “Mebɔ mɔdenle kɛ me nee mgbavolɛ nee mbɛlɛra babɔ. Bɛ anwosesebɛ ne maa mete nganeɛ kɛ meyɛ kpavolɛ bieko.” Ɔyɛ a fɛlɛ agɔnwolɛma maa bɛrɛla ɛ nwo. Han-sik mɔɔ ɛli 72 na ɔwɔ South Korea la se: “Me nee me ye to ɛsalɛ fɛlɛ agɔnwolɛma kɔsɔɔti—mgbanyinli nee ngakula—na yɛbɔ nu yɛdi aleɛ.”

Agɔnwolɛma di adwelie. Noko kɛmɔ menli nwiɔ a di adwelie la ati, ɔwɔ kɛ ɛtie mɔɔ ɛ gɔnwo ne baha la. Maa ɛ nye ɛlie menli nwo. Helena mɔɔ ɛli 71 na ɔwɔ Mozambique la se: “Mefa agɔnwolɛ na medi awie mɔ eni. Metie mɔɔ bɛka la amaa meanwu mɔɔ bɛdwenle nwo nee mɔɔ bɛkulo la.” José mɔɔ ɛli 73 na ɔwɔ Brazil la se: “Menli nye die kɛ awie mɔ badie bɛ edwɛkɛ—bɛdabɛ mɔɔ bɛse anwunvɔne na bɛ nye die awie mɔ anwo, bɛkanvo wɔ wɔ mekɛ kpalɛ nu na bɛsele la.”

Saa ɛlɛda wɔ nzuzulɛ ali a, nea kɛ ɛbamaa wɔ ‘edwɛkɛ ayɛ anyelielɛ.’ (Kɔlɔsaema 4:6) Suzu awie mɔ anwo na maa bɛ anwosesebɛ.

YƐ MO: ‘Da anyezɔlɛ ali.’ (Kɔlɔsaema 3:15) Saa awie boa wɔ a, maa ɛ nye ɛzɔ ye. Saa ɛyɛ ahenle mo a ɔboa ɔmaa bɛ agɔnwolɛvalɛ ne yɛ kpalɛ. Marie-Paule mɔɔ ɛli 74 na ɔwɔ Canada la se: “Kenlensa ye ala, me nee me hu vile sua ekyi nu rale sua kpole bie anu. Ɛnee yɛlɛ agɔnwolɛma dɔɔnwo mɔɔ boa yɛ a. Yɛangola yɛanyɛ bɛ mo somaa. Ɔvi mekɛ zɔhane, yɛvale moyɛlɛ kɛlata yɛmaanle bɛ na yɛvɛlɛle bie mɔ yɛ nee bɛ lile aleɛ.” Jae-won mɔɔ ɛli 76 na ɔwɔ South Korea la anye die kale mɔɔ bafa ye kɔ Belemgbunlililɛ Asalo la anwo. Ɔse: “Me nye sɔ moalɛ ɛhye mɔ kɔsɔɔti na ɔyɛ a mefa ezukoa ekyi memaa bɛfa bɛtɔ gaase. Ɔyɛ a mefa ahyɛlɛdeɛ ekyi nee moyɛlɛ kɛlata mekɔmaa bɛ.”

Mɔɔ hyia kpalɛ la, maa ɛ nye ɛlie kɛ ɛde ngoane nu la. Belemgbunli Sɔlɔmɔn nrɛlɛbɛvolɛ ne hakyele yɛ kɛ, ‘Twea anyewɔzo le kpalɛ tɛla awenade funli.’ (Nolobɔvo ne 9:4) Ɛhɛe, saa ɛnyia subane kpalɛ na ɛnyia ɛhulolɛ kɛ ɛbayɛ nzenzaleɛ a, ɔbamaa ɛ nye alie wɔ mgbanyinliyɛlɛ nu.