Janet se, “Me papa wule la yeangyɛ yɛɛ me hu zele me kɛ yenyia raalɛ fofolɛ a. Ɛhye anzi, yeambɔ me kɔkɔ anzɛɛ ɔ nee me anli nrɛlaleɛ, ɔyele ye ninyɛne ne mɔ na ɔgyakyile me nee yɛ mra nwiɔ ne.” Janet nyianle gyima, noko ɛnee ye ahatualɛ ne ɛnza bɛ nea. Tɛ ezukoa nwo ngyegyelɛ ala a ɔyiale a. Ɔse, “ɛzonlelilɛ fofolɛ mɔɔ ɛrala me nwo zo la yɛle me adwenleadwenle. Menlile nyane kɛ mengola mennea me mra ne mɔ kpalɛ kɛmɔ awovolɛ gyɛne yɛ la. Kɛkala bɔbɔ, kɛzi awie mɔ bu me nee me mra ne mɔ la gyegye me. Asoo bɛdwenle nwo kɛ menyɛle mɔɔ ɔwɔ kɛ meyɛ la amaa me agyalɛ ne agyinla ɔ?”

Asɔneyɛlɛ boale Janet maanle ɔzɔle ɔ nwo na ɔ nee Nyamenle nyianle agɔnwolɛvalɛ. “Saa ɔdwu nɔsolɛ nu a, ɔyɛ se kpalɛ, ɔluakɛ me adwenleadwenle yɛ kpole wɔ mekɛ mɔɔ maanle nu ɛyɛ dii la. Asɔneyɛlɛ nee Baebolo ɛgengalɛ boa maa meda. Tɛkese mɔɔ yɛ me fɛ kpalɛ la a le Felepaema 4:6, 7: ‘Bɛmmadwenle debie biala anwo. Wɔ debie biala anu bɛyɛ moyɛlɛ nzɛlɛlɛ na bɛva mɔɔ bɛhyia nwolɛ la bɛdo Nyamenle anyunlu. Na Nyamenle anzodwolɛ ne mɔɔ bo sonla ndelebɛbo muala azo la bazie bɛ ahonle nee bɛ adwenle gyɛlɛɛnye.’ Meyɛ asɔne nɔsolɛ biala na menwu kɛ Gyihova anzodwolɛ ne kyekye me rɛle.”

Gyisɛse edwɛkɛ mɔɔ maa anwosesebɛ mɔɔ ɔhanle wɔ ye Boka Zo Edwɛkɛhanlɛ ne anu la fane adwenleadwenle kɔsɔɔti anwo: “Bɛ Ze mɔɔ wɔ anwuma la ze mɔɔ bɛhyia nwolɛ la amuala kolaa na bɛabiza ye.” (Mateyu 6:8) Na ɔhyia kɛ yɛbiza ye. Asɔneyɛlɛ le adenle titili mɔɔ yɛdua zo ‘yɛbikye Nyamenle’ a. Saa yɛyɛ zɔ a, “Ɔdaye noko ɔkɛbikye yɛ.”—Gyemise 4:8.

Ɛhɛe, asɔneyɛlɛ ɛmmaa yɛ nwo ɛndɔ yɛ ala. Gyihova mɔɔ le ‘nzɛlɛlɛ Tievolɛ’ la eza boa bɛdabɛ  mɔɔ bɛfa diedi bɛkpondɛ ye la. (Edwɛndolɛ 65:2) Ɛhye ati a Gyisɛse hilele ye ɛdoavolɛma kɛ “bɛyɛ nzɛlɛlɛ dahuu na ɔnle kɛ bɛkpo aze” la. (Luku 18:1) Ɔwɔ kɛ yɛkɔ zo yɛkpondɛ Nyamenle ɛkɛ ne adehilelɛ nee moalɛ, na yɛlɛ anwodozo kɛ ɔbaboa yɛ. Ɔnle kɛ yɛ adwenle yɛ yɛ kesee kɛ ɔbahola yeaboa yɛ. Saa yɛyɛ “nzɛlɛlɛ dahuu” a, ɔbahile kɛ yɛlɛ nɔhalɛ diedi.—1 Tɛsalonaekama 5:17.

Diedi a le duzu? Diedi kile kɛ ‘yɛkɛnwu’ kɛ Nyamenle wɔ ɛkɛ. (Dwɔn 17:3) Yɛdua Baebolo ne ɛzukoalɛ zo yɛnyia Nyamenle adwenle ne bie. Yɛsukoa kɛ ɔnwu yɛ nuhua ko biala na ɔkulo kɛ ɔboa yɛ. Noko, tɛ Nyamenle anwo debie mɔɔ yɛbanwu ye la a kile kɛ yɛlɛ diedi a. Eza ɔkile kɛ yɛ nee ye banyia agɔnwolɛvalɛ mɔɔ ɛbulɛ wɔ nu. Kɛmɔ ɔde wɔ dasanli agɔnwolɛvalɛ nwo la, ɔmba kenle ko demua. Mekɛ mɔɔ yɛlɛsukoa ɔ nwo debie dɔɔnwo la ɔmaa yɛ “diedi nyi,” ɔmaa ‘yɛyɛ mɔɔ ɔkpondɛ la’ na ɔboa yɛ. (2 Kɔlentema 10:15; Dwɔn 8:29) Diedi ɛhye a boale Janet maanle ɔgyinlanle ye adwenleadwenle ne anloa a.

Janet se, “Debie mɔɔ ɛboa me ɛmaa menyia diedi la a le kɛ menwu Gyihova wɔ me ndenle kɔsɔɔti anu. Fane dɔɔnwo ne ala bɛsisi yɛ mɔɔ ɔyɛ se kɛ yɛbahola yɛagyinla ɔ nloa. Ɔlua nzɛlɛlɛ mɔɔ meyɛ ye dahuu la ati, Gyihova ye yɛ fi sɔnea nu mɔɔ anrɛɛ menrɛhola nwolɛ ɛhwee yɛ a. Saa meyɛ ye mo a, ɔmaa mekakye ninyɛne mgbalɛ dɔɔnwo mɔɔ yeyɛ yemaa me la. Ɔboa yɛ dahuu wɔ ye mekɛ nloa. Yemaa menyia agɔnwolɛma kpalɛ mɔɔ bɛle Kilisiene mrenyia nee mraalɛ. Bɛwɔ ɛkɛ wɔ mekɛ biala mɔɔ mehyia bɛ nwo la na bɛyɛ neazo kpalɛ bɛmaa me mra ne mɔ.” *

“Menwu deɛmɔti Gyihova hanle wɔ Malakae 2:16 kɛ: ‘Mekyi ewolebɔlɛ’ la. Bokavolɛ mɔɔ anwo ɛnlɛ edwɛkɛ la di nyane kpalɛ. Me hu gyakyile me la yehyɛ ekyi, noko ɔyɛ a me nwo yɛ me koonwu. Saa ɔba ye zɔ a, meyɛ debie meboa awie mɔ na ɛhye noko boa me kpalɛ.” Ɔluakɛ Janet vale Baebolo ngyinlazo mɔɔ ɔse ɔnle kɛ yɛtwe yɛ nwo yɛfi menli nwo yɛle gyima la ati, ye adwenleadwenle ne azo dele. *—Mrɛlɛbulɛ 18:1.

Janet ka kɛ, “Mɔɔ kyekye me rɛle kpole la a le kɛ meranwu kɛ Nyamenle le ‘nrisa bɛ ze nee ahunlanvolɛ pepɛdievolɛ.’ Ɔnrɛgyakyi yɛ kɛmɔ me hu yɛle la.” (Edwɛndolɛ 68:5) Janet ze kɛ Nyamenle ɛnva “ɛtane” ɛnzɔ yɛ ɛnnea. Emomu, ɔluakɛ ɔ ti “akunlu le kɛnlɛma” la ati ɔmaa yɛ nrɛlɛbɛ nee “tumi bedevinli” mɔɔ boa yɛ maa yɛgyinla yɛ adwenleadwenle nloa.—Gyemise 1:5, 13; 2 Kɔlentema 4:7.

Saa yɛ ngoane la esiane nu na yɛdwenledwenle noko ɛ?