Bɛwole me wɔ Acul, sua bie mɔɔ te ɔ nwo mɔɔ wɔ Guatemala adɔleɛ awoka ne mɔ azo la. Me abusua ne vi Ixilma anu, menli ekpunli bie mɔɔ bɛ bo vi Maya la. Saa ɛye Spain aneɛ ne ɛsie ahane a, eza meka me sua zo aneɛ. Bɛwole me la ɛnee Guatemalama gua zo ɛlɛko, na bɛvale ɛvolɛ 36 a bɛhonle a. Ixilma dɔɔnwo wule wɔ mekɛ zɔhane.

Mɔɔ menyianle ɛvolɛ nna la, ɛnee me diema nrenyia mɔɔ ɛli ɛvolɛ nsuu la lɛ bɔmbo ɔ sa nu ɔlɛdi nwɔhoa na ɔdele arɛlevilɛ nu. Me nye zinle ɔlua esiane ɛhye ati; ɔyɛ alɔbɔlɛ kɛ me diema ne wule la. Yemɔti, bɛvale me bɛhɔle sukulu mɔɔ bɛyɛ bɛmaa anyezinlira ngakula la wɔ Guatemala Sua ne azo, ɛleka mɔɔ menzukoale kɛzi anyezinlirama kenga debie la. Edwɛkɛ bie mɔɔ meande ɔ bo la a le kɛ sukulu mgbanyima ne mɔ duale me kɛ me nee ngakula ne mɔ mmatendɛ na me gɔnwo mɔ sukoavoma hwenle bɛ nwo vile me nwo. Ɛnee me nwo yɛ me koonwu dahuu na me kunlu a anrɛɛ bɛmaa yɛ siane nwiɔ ne mɔɔ yɛnyia ye ɛvolɛ biala la amaa meahɔ me mame, mɔɔ ɔ ti akunlu le kɛnlɛma na ɔse anwunvɔne la anwo lɔ. Ɔyɛ alɔbɔlɛ kɛ, me mame wule wɔ mekɛ mɔɔ melɛ ɛvolɛ bulu la. Me rɛle bɔle wɔ mekɛ mɔɔ awie mɔɔ ɔkulo me wɔ ewiade ye anu wule la.

Menyianle ɛvolɛ 11 la, menziale mengɔle me sua zo na me nee me diema nrenyia (me papa ara) ne nee ye abusua ne dɛnlanle. Bɛmaanle menyianle mɔɔ mehyia nwo la, noko bɛangola bɛamboa me wɔ nganeɛdelɛ nu. Ɔyɛ a, mesu mefɛlɛ Nyamenle kɛ: “Nzɔne ati a me mame wule a? Duzu ati a meyɛ anyezinliravolɛ a?” Menli ka kile me kɛ esiane ɛhye mɔ le Nyamenle ɛhulolɛdeɛ. Menganle kɛ Nyamenle ɛndwenle me nwo yɛɛ ɔyɛ nyeyenu. Deɛmɔti meangu me nwo la a le kɛ ɛnee menlɛ debie mɔɔ mebava meayɛ zɔ la.

Kɛ anyezinliravolɛ la, ɛnee me nwo yɛ anwunvɔne kpole. Kɛmɔ mele kakula la ati, ɛnee bɛto me bɔna fane dɔɔnwo. Meanga meangile awie biala—ɛnee medwenle kɛ ɔnvale awie biala anwo. Menli nee me ɛndendɛ, yɛɛ me nee awie biala ɛnli adwelie. Ɛnee me nwo yɛ me koonwu na medi nyane, yɛɛ menlie awie biala menli.

Melɛnyi la, Gyihova Alasevolɛ nwiɔ (agyalɛma) rale me nwo ɛkɛ wɔ mekɛ mɔɔ sukuluma ɛlɛdie bɛ ɛnwomenle la. Kilehilevolɛ ne mɔ ko mɔɔ wɔ sukulu ɛkɛ ne mɔɔ te me tɛnlabelɛ ne abo la a zele bɛ kɛ bɛrɛla me nwo ɛkɛ a.  Bɛhanle Baebolo nu ɛwɔkɛ mɔɔ fale mowuamra mɔɔ bɛbadwazo bɛ nee anyezinlirama mɔɔ bɛ nye bɛabuke la anwo edwɛkɛ bɛhilele me. (Ayezaya 35:5; Dwɔn 5:28, 29) Me nye liele mɔɔ bɛhilehilele me la anwo, noko ɛnee ɔyɛ se kɛ me nee bɛ bɛali adwelie kɛmɔ ɛnee mengulo ɛdendɛlɛ la ati. Noko, ɔnva nwo kɛ me nwo yɛ me koonwu la, bɛnyianle me nwo abotane na bɛrale me nwo ɛkɛ dahuu amaa bɛahilehile me Baebolo ne. Agyalɛma ɛhye mɔ tia mayɛlɛ mɔɔ bo nsia (km 10) na bɛfo awoka bɛba me sua zo.

Me diema nrenyia ne ka kɛ bɛziezie bɛ nwo kɛnlɛma noko bɛnlɛ nwonane afoa nu ninyɛne dɔɔnwo. Noko, bɛ nye die me nwo, eza bɛkyɛ me debie ekyi. Menwunle kɛ nɔhalɛ Kilisienema ala a bala anwofamaa ɛhye ali a.

Menluale anyezinlirama mbuluku ne mɔ azo menzukoale Baebolo ne. Ɛnee mete mɔɔ melɛsukoa la abo ɛdeɛ, noko ninyɛne bie mɔ wɔ ɛkɛ mɔɔ ɔyɛ se kɛ mebalie meado nu a. Kɛ neazo la, ɔyɛ se kɛ mebalie meado nu kɛ Nyamenle nee awie mɔ dwenle me nwo amgba. Mendele deɛmɔti Gyihova ɛmaa ninyɛndane ɛlɛkɔ zo la abo, noko ɛnee ɔyɛ se kɛ mebanwu ye kɛ ɔle Selɛ mɔɔ lɛ ɛlɔlɛ a. *

Ngyikyingyikyi, mɔɔ menzukoale ye wɔ Ngɛlɛlera ne anu la maanle mengakyile me adwenle. Kɛ neazo la, menzukoale kɛ Nyamenle di menli mɔɔ ɛlɛnwu amaneɛ la anwo nyane. Mɔɔ fale ye azonvolɛ mɔɔ ɛnee bɛlɛkile bɛ nyane la anwo la, Nyamenle hanle kɛ: “Menwu me menli [ne]  . . . amaneɛnwunlɛ ne, ɔlua abodelɛ mɔɔ bɛ gyima zo neavolɛma ne ɛlɛfa ahile bɛ la.” (Adendulɛ 3:7) Mɔɔ menwunle Gyihova subane ngɛnlɛma ne mɔ la, ɔmaanle menyilale me nwo zo memaanle ye. Bɛzɔnenle me wɔ 1998 kɛ Gyihova Dasevolɛ.

Bɛzɔnenle me la kɛyɛ ɛvolɛ ko anzi, mengɔle anyezinlirama sukulu mɔɔ bikye Escuintla sua ne la. Kpanyinli bie mɔɔ wɔ asafo ne anu la nwunle ngyegyelɛ mɔɔ meyia na meahɔ debiezukoalɛ wɔ mekɛ mɔɔ mewɔ me sua zo la. Ɛze ɔ, asafo mɔɔ bikye la wɔ boka ne mɔɔ Alasevolɛ agyalɛma ne rale zo nee me zukoale la, na ɛnee ɔyɛ se kɛ mebapɛ adenle ɛhye. Amaa bɛaboa me la, kpanyinli ne kpondɛle Alasevolɛ abusua bie mɔɔ bɛwɔ Escuintla mɔɔ bɛkulo kɛ bɛmaa metɛnla bɛ sua nu na bɛboa me bɛmaa mekɔ asafo debiezukoalɛ la. Badwu ɛnɛ, bɛtɛnea me kɛ asɛɛ meboka bɛ abusua ne anwo la.

Mekola meka neazo dɔɔnwo mɔɔ kile ɛlɔlɛ mɔɔ mediema mɔɔ wɔ asafo ne anu ɛla ye ali ɛhile me la anwo edwɛkɛ. Ɔ muala anu, anwubielɛ ɛhye mɔ maa medie medi kɛ, kɛ Gyihova Dasevolɛ la, meboka nɔhalɛ Kilisienema anwo.—Dwɔn 13:34, 35.

Mende nganeɛ kɛ me nwo ɛnlɛ nvasoɛ mɔɔ menlɛ anyelazo biala a. Kɛkala me ɛbɛlabɔlɛ ne gyi bodane zo. Kɛmɔ mele Gyihova Dasevolɛ mɔɔ mefa me mekɛ kɔsɔɔti meyɛ Baebolo ngilehilelɛ gyima ne la ati, mefa me adwenle mesie menli mɔɔ mekilehile bɛ Baebolo nu nɔhalɛ mɔɔ sonle bolɛ la azo metɛla me ewule ne. Eza menyia adenle melɛsonle kɛ asafo nu kpanyinli na memaa ɛdendɛlɛ mɔɔ gyi Baebolo ne azo la wɔ asafo ne anu. Memaa ɛdendɛlɛ mɔɔ gyi Baebolo ne azo la wɔ maanzinli nyianu mɔɔ menli dɔɔnwo kɔ la abo.

Wɔ 2010, menwiele Azonvolɛ Ndetelɛ Sukulu (kɛkala bɛfɛlɛ ye Belemgbunlililɛ Edwɛkpakavolɛma Sukulu) ne mɔɔ bɛyɛle wɔ El Salvador la. Sukulu ɛhye zieziele me maanle menyɛle me gyimalilɛ wɔ asafo ne anu kpalɛ. Ndetelɛ ɛhye mɔɔ menyia la maa mete nganeɛ kɛ bɛbu me bie kpalɛ na Gyihova Nyamenle mɔɔ kola maa awie biala fɛta wɔ ye gyima nu la kulo me.

Gyisɛse se: “[Anyelielɛ] dɔɔnwo wɔ ɛmanlɛ nu tɛla ɛlielɛ.” (Gyima ne 20:35) Mekola meka ye ɛnɛ kɛ me nye die, ɔnva nwo kɛ alimoa ne meanzuzu ye zɔ la, kɛkala mekola meboa awie mɔ.