Mɔɔ Belemgbunli Nɛbukadenɛza hanle ananze ne anwo ɛlalɛ ne wiele la anzi, ɔyɛle nvutuke ananze kpole bie. Ɔziele ye wɔ Dula azɛlɛ fɛɛnye ne azo, na ɔvɛlɛle menli titili mɔɔ wɔ maanle ne anu la dɔɔnwo yɛɛ Hyeedelake, Mihyake, nee Abɛdenɛgo kɛ bɛrayia ɛkɛ. Belemgbunli ne hanle ye ndinlizo kɛ: ‘Saa bɛte kɛ bɛlɛbɔ aweɛne ndendenle ne mɔ, getaa, nee fulutu ne mɔ a, awie biala ɛdu ɛdɔ ɛzonle nvutuke ananze ne! Awie biala mɔɔ yeambɔ ɔ ti aze la, bɛbado ye fonlomo mɔɔ ɛlɛsɔ la anu bɛayela ye.’ Asoo Hibulu mgbavolɛ nsa ne bɛabɔ bɛ ti aze amaa ananze ne, anzɛɛ bɛbazonle Gyihova angomekye?

Akee belemgbunli ne hanle kɛ bɛbɔ edwɛne ne. Awie biala bɔle ɔ ti aze zonlenle ananze ne, Hyeedelake, Mihyake nee Abɛdenɛgo ala a bɛanyɛ a. Awie mɔ nwunle bɛ yemɔti bɛhɔbɔle belemgbunli ne amaneɛ kɛ: ‘Zɔhane Hibulu mgbavolɛ nsa ne anzonle wɔ ananze ne.’ Nɛbukadenɛza maanle bɛhɔvɛlɛle bɛ bɛrale na ɔhanle kɛ: ‘Memaa bɛ adenle bieko kɛ bɛbɔ bɛ ti aze bɛzonle ananze ne. Saa bɛanyɛ a, mebavuandi bɛ meagua fonlomo ne anu. Nyamenle biala ɛnrɛhola ɛnrɛlie bɛ ɛnrɛvi me sa nu.’ Bɛbuale kɛ: ‘Mmamaa yɛ nwolɛ adenle bieko. Yɛ Nyamenle ne kola die yɛ. Saa yeanlie yɛ bɔbɔ a, yɛnrɛzonle ananze ne.’

Nɛbukadenɛza vale ɛya kpole. Ɔhanle ɔhilele ye menli ne kɛ: ‘Bɛzɔ fonlomo ne bɛmaa ɔlɔ kpole ɔdɛla dɛba ɛdeɛ ne fane nsuu!’ Akee ɔzele ye sogyama ne kɛ: ‘Bɛkyekye menli ɛhye mɔ na bɛvuandi bɛ bɛgua  fonlomo ne anu!’ Kɛmɔ ɛnee fonlomo ne ɛlɔ kpole kpalɛ la ati, mɔɔ sogyama ne bikyele nwo la, bɛwule ɛkɛ ne ala. Ɛnee Hibulu mgbavolɛ nsa ne gua senle ne anu. Noko mɔɔ Nɛbukadenɛza ɛlɛnea nu la, ɔnwunle kɛ menli nna a akee luolua senle ne anu a, tɛ menli nsa ɔ. Ɛzulolɛ hanle ye na ɔbizale ye mgbanyima ne mɔ kɛ: ‘Tɛ menli nsa a yɛvuandinle bɛ yɛguale senle ne anu ɔ? Menwu menli nna, na mɔɔ tɔ zolɛ nna la zɔho anwumabɔvolɛ!’

Nɛbukadenɛza bikyele fonlomo ne na ɔdeanle nu kɛ: ‘Anwuma Anwuma Nyamenle ne sonvolɛma, bɛvinde bɛrɛla!’ Mɔɔ Hyeedelake, Mihyake, yɛɛ Abɛdenɛgo vi senle ne anu vindele rale mɔɔ ɛhwee anyɛ bɛ la, ɔyɛle awie biala azibɛnwo. Bɛ nwo nane, bɛ ti enrinli nee bɛ adɛladeɛ ne anyela, yɛɛ bɛ nwo ambɔnle esike bɔbɔ.

Nɛbukadenɛza hanle kɛ: ‘Hyeedelake, Mihyake, yɛɛ Abɛdenɛgo Nyamenle ne lɛ tumi kpole. Ɔzoanle ye anwumabɔvolɛ ɔmaanle ɔraliele bɛ. Nyamenle biala nee bɛ ɛdeɛ ne ɛnzɛ.’

Asoo wɔbɔ kpɔkɛ kɛ ɛbali nɔhalɛ wɔamaa Gyihova ɔnva nwo edwɛkɛ biala mɔɔ bazi la kɛ mɔɔ Hibulu mgbavolɛ nsa ne yɛle la ɔ?