ƐZUKOALƐDEƐ 1
Edwɛkpa Ne A Le Duzu?
1. Edwɛkɛ boni a vi Nyamenle ɛkɛ a?
Nyamenle kulo kɛ menli nye die wɔ azɛlɛ ye azo. Ɔbɔle azɛlɛ ye nee debie biala mɔɔ wɔ zo la ɔluakɛ ɔkulo alesama. Ɔnrɛhyɛ ɔbamaa menli mɔɔ wɔ ewiade ɛleka biala la anye alie kpalɛ. Ɔbaye ninyɛne mɔɔ maa alesama nwu amaneɛ la yeavi ɛkɛ.—Kenga Gyɛlɛmaya 29:11.
Arane biala ɛtɛkolale ɛtɛyele basabasayɛlɛ, anwodolɛ anzɛɛ ewule ɛtɛfile ɛkɛ. Noko edwɛkpa bie wɔ ɛkɛ. Ɔnrɛhyɛ, Nyamenle bava ye arane ɛdeɛ ne azie alesama arane ne mɔ agyakɛ anu. Ye maanlema banyia anzodwolɛ nee kpɔkɛdelɛ kpalɛ.—Kenga Ayezaya 25:8; 33:24; Daneɛle 2:44.
2. Duzu ati a edwɛkpa ne anwo hyia ɛnɛ a?
Saa Nyamenle sɛkye ɛtanevolɛma a yɛɛ amaneɛnwunlɛ bo bapɛ a. (Zɛfanaya 2:3) Mekɛ boni a ɛhye bazi a? Nyamenle Edwɛkɛ ne hanle ninyɛne mɔɔ gyegye alesama ɛnɛ la dole ɛkɛ. Ninyɛne mɔɔ ɛlɛsisi kenlensa ye la kile kɛ Nyamenle mekɛ ne ɛbikye.—Kenga 2 Timote 3:1-5.
3. Duzu a ɔwɔ kɛ yɛyɛ a?
Ɔwɔ kɛ yɛsukoa Nyamenle anwo debie wɔ ye Edwɛkɛ, Baebolo ne anu. Ɔle kɛ kɛlata mɔɔ vi selɛ mɔɔ lɛ ɛlɔlɛ la ɛkɛ la. Ɔmaa yɛnwu mɔɔ yɛyɛ a yɛ nye balie wɔ ɛbɛlabɔlɛ nu ɛnɛ nee kɛzi yɛbanyia dahuu ngoane wɔ azɛlɛ ye azo kenle bie la. Nɔhalɛ nu, menli bie mɔ anye ɛnrɛlie nwo kɛ ɛbamaa awie aboa wɔ yeamaa wɔade Baebolo ne abo. Noko mmamaa ɛbɛlabɔlɛ mɔɔ yɛ anyelielɛ mɔɔ ɛbanyia ye kenle bie la kpa ɛ ti.—Kenga Mrɛlɛbulɛ 29:25; Yekile 14:6, 7.
Bie A Eza Ɛ Nye Balie
YƐ NWO EDWƐKƐ
Duzu Ati A Ɔwɔ Kɛ Ɛsukoa Baebolo Ne A?
Baebolo ne ɛlɛboa menli mɔɔ wɔ ewiade la anu mgbe dɔɔnwo yeamaa bɛanyia kpuya mɔɔ gyegye bɛ la anwo mualɛ. Ɛkpondɛ kɛ ɛdawɔ noko ɛnyia wɔ kpuya nwo mualɛ ɔ?
